Esikeel 18
18
Anam Idiọọkñkpọ Ayaakpa
1Ikọ Abọọñ amaadinsịm miin ate: 2“Awuọñọ die ndufo editop utọ ntəño-ntəño ñke ami mbaña isọñ Isrel:
“ ‘Mme ete ye eka edadia ñkpaiya kreb,
ndin eded nditọ edidoro adiyịk’?
3“Abọọñ Andikara abo ate, adaña nte ami mbaaha ke uwem, ndufo idiitoppo ntəño-ntəño ñke ami aba ke Isrel. 4Sia afịd awo edo ake mmi, ete ye eka ukem nte ayịn, ammọ awo iba ukem-ukem edo ake mmi. Awo a-anamma idiọọkñkpọ ado anye adiikpa.
5“Adieke adinen awo abaaha
a-anamma se ifọn inyʌñ inen.
6Anye idiaha ñkpọ ke mme ñwommo ikpọabod
inyʌññọ ibenne anyen ise mme ubobodñkpọ Isrel.
Anye isappake anwaan mbọhọidʌñ amọ
inyʌññọ inie ewuana ye awonwaan ke ini itieisọñ amọ.
7Anye ifiighe awo ndomokeed,
ado asaana se anye akebọọ awo ke ubiọñ ayaak.
Anye iwooho ñwo
ado aben ndidia amọ anọ mbon abiọọñ
anyʌñ anọ mbon esañake ifed afọñ.
8Anye iwuọdọ awo akʌk iyem udod
inyʌññọ ibọ ammọ udod.
Anye isịnne ubọk ke idiọọkñkpọ
anyʌñ akpe ikpe ke ufọọd awo iba ke unen.
9Anye asaña ke mme ewʌhọ mmi
anyʌñ anịm mme mbed mmi ke afịd esịd.
Awo ado ado adinen;
ke akpanikọ anye ayaadu uwem,
Abọọñ Andikara abo.
10“Akpedo anam anye anie afai-afai ayịn, a-aduọkkọ iyiib anyʌñ anam mme ñkpọ ami ndomokeed 11(akpesʌkado ete amọ imiinamma ndomokeed):
“Anye adia ñkpọ ke mme ñwommo ikpọabod.
Anye asappa anwaan mbọhọidʌñ amọ.
12Anye afiik uweene ye mbon unana.
Anye awo ñwo.
Anye isaanake se anye akebọọ ke ubiọñ iyaak.
Anye abenne anyen ase mme ubobodñkpọ.
Anye anam mme mbubiam ñkpọ.
13Anye awuọt awo akʌk ke udod anyʌñ abọ akpọsọñ udod.
Nte utọ awo ado ayaadu uwem? Anye idiiduuho! Sia anye anam afịd mbubiam ñkpọ ami, ana ewot anye; iyiib amọ adiidoro anye ke iwuod.
14“Akpedo anam ayịn ami anie ayịn a-akịtte afịd ndiọiñkpọ se ete amọ anam, ndin akpesʌkado anye akịtte ammọ, anye inamma mme utọ ñkpọ ado:
15“Anye idiaha ñkpọ ke mme ñwommo ikpọabod
inyʌññọ ibenne anyen ise mme ubobodñkpọ Isrel.
Anye isappake anwaan mbọhọidʌñ amọ.
16Anye ifiikke awo ndomokeed
inyʌññọ ibọ ubiọñ mbemiso anọ awo ewuọd.
Anye iwooho ñwo
ado anọ mbon abiọọñ ndidia amọ
anyʌñ anọ mbon se isaña ifed afọñ.
17Anye inamma uweene idiọọk
inyʌññọ ibọ ammọ udod me usiene.
Anye anịm mme mbed mmi anyʌñ asaña ke mme ewʌhọ mmi.
Anye idiikpaaha ke iwuod idiọọkñkpọ ete amọ; ke akpanikọ anye ayaadu uwem. 18Ado ete amọ ayaakpa ke ntak idiọọkñkpọ amọ, sia anye akefiighe mme awo abọ ñkpọ, awo ayịneka amọ anyʌñ anam se imiifọnnọ ke atu mbon amọ.
19“Ado afo abịp ate, ‘Nsoo inam nọ ayịn imiiwanake ke ufen ndudue ete amọ?’ Sia ayịn amaanam se inen inyʌñ ifọn anyʌñ adat ini anịm afịd ewʌhọ mmi, anye idiitreke adidu uwem. 20Awo a-anamma idiọọkñkpọ ado awo se idiikpa. Ayịn idiiwanake ke ufen ndudue ete, ete ñko idiiwanake ke ufen ndudue ayịn. Eyaebat adinenido mbon ndinen awo enọ ammọ, enyʌñ ebat ibak mbon ibak enọ mbon ibak.
21“Ado idiọọk awo akpekpọñ afịd ndiọiñkpọ a-anye akenamma anyʌñ anịm afịd ewʌhọ mmi anyʌñ anam se inen inyʌñ ifọn, ke akpanikọ awo ado ayaadu uwem; anye idiikpaaha. 22Awo idiitoiyoke ndudue ndomokeed a-ammọ ekenamma. Ammọ eyaedu uwem ato ke ntak ndinen ñkpọ a-ammọ ekenamma. 23Abọọñ Andikara abo ate, Ado nte ami ñkop inemesịd ke ñkpa idiọọk awo? Utu ke ado, nte ami nnemme esịd ke ammọ emaekpọñ usʌñ ammọ inyʌñ idu uwem?
24“Ado adinen awo akpekpọñ adinenido amọ anyʌñ anam idiọọkñkpọ ye ukem mbubiam ñkpọ ake anamidiọọk anamma, nte anye ayaadu uwem? Awo idiitoiyoke eti ñkpọ ndomokeed se awo ado akenam. Ke ntak unana akpanikọ ammọ ye ke ntak idiọọkñkpọ a-ammọ ekenamma, ammọ eyaekpa.
25“Kpayeado ndufo ebo, ‘Usʌñ Abọọñ inenne.’ Ikpañ utọñ, ndufo mbon Isrel: Nte usʌñ mmi inenne? Nte idooho usʌñ ndufo akapado se imiinenne? 26Adinen awo akpekpọñ adinenido amọ anyʌñ anam idiọọkñkpọ, ammọ eyaekpa ke abaña ado; ammọ eyaekpa ke ntak idiọọkñkpọ ammọ. 27Ado idiọọk awo akpekpọñ idiọọk usʌñ amọ anyʌñ anam se inen inyʌñ ifọn, ammọ eyaenyaaña uwem ammọ. 28Sia ammọ ekereke ebaña afịd ndudue ammọ enyʌñ esịññe idem ekpọñ, awo ado idiitreke adidu uwem; ammọ idiikpaaha. 29Kpayeado mbon Isrel ebo ete, ‘Usʌñ Abọọñ inenne.’ Mbon Isrel, nte usʌñ mmi inenne? Nte idooho usʌñ ndufo akapado se imiinenne?
30“Ke ntoro, Abọọñ Andikara abo ate, ndufo mbon Isrel, ami ñyaakpe ikpe ye ndufo keedekeed ñkeene naña mme usʌñ ndufo eba. Ikappa esịd! Ikpọñ afịd idiọọk ido ndufo; ndin idiọọkñkpọ idiidooho ñkpọ iduọ inọ ndufo. 31Isịññe idem ikpọñ afịd ndiọi se ndufo enam, inyʌñ inie ufa esịd ye ufa sịbidịd. Nsoo ido ntak ake ndufo eyemme edikpa, O mbon Isrel? 32Abọọñ Andikara abo ate, ami ñkoppo inemesịd mbaña ñkpa awo akeedodo. Ikappa esịd inyʌñ idu uwem!
Currently Selected:
Esikeel 18: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
