Esikeel 17
17
Ntrukpuum Iba ye Fain Keed
1Ikọ Abọọñ amaadinsịm miin ate: 2“Ayịn awo, nọ ndadñwọd ikọ a-awọttọ idiọọk ye eti edu nyʌñ ben anye tañ wọt nditọ Isrel nte ñke. 3Bo ammọ ate, ‘Se Abọọñ Andikara atañ ado ami: Ekamba ntrukpuum a-anieghe akpọsọñ mba, ñnyan ñwa a-adọọñọke nsio-nsio ñkem amaadi Lebanọn. Amaadidoro ke atịñe sida keed, 4anye amaabuuñ ataa atịñe sida ado asio anyʌñ aben aketọ ke abio mme anyamudua.
5“ ‘Anye amaaben mfịd keed ke isọñ ado aketọ ke eti isọñ. Anye aketọ anye nte eto wilo ke mben uwak mmọọñ, 6ndin anye amaatịppe anyʌñ akappa fain a-asakkake ñkọk anyʌñ aməho idaha. Mme ñkọk amọ emaekappa ese anye, ado mme adʌñ amọ emaesʌhọ ke idak amọ. Ndin anye amaakappa ado fain anyʌñ asaiya ñkọk, anyʌñ asịññe mme mfañ.
7“ ‘Ado ekamba ntrukpuum mfen amaaba se ikikop akpọsọñ adudu ke mme mba amọ, ñwa amọ anyʌñ awak. Fain ami ndin amaawọññọ adʌñ amọ awọt anye, ke itie e-eketọọhọ anye, anyʌñ anyanna mme ñkọk amọ anọ anye, ayem mmọọñ. 8Eketọ anye ke eti isọñ ke mben isọñ se inekke inie mmọọñ nọ ato do anye asaiya ñkọk, anwịm mfịd anyʌñ akappa ado ataa uyaiya fain.’
9“Bo ammọ ate, ‘Se Abọọñ Andikara atañ ado ami: Nte anye ayaaseghe? Nte awo idiiwịppeke anye isio inyʌñ ikịp mfịd amọ nọ anye ayeppe? Afịd ufa nseghe amọ ayaayeppe. Idooho ubọk se inie adudu me uwak awo ediida iwịppe anye isio ito adʌñ amọ. 10Emaetọ anye, ado nte anye ayaaseghe? Nte anye idiiyeppeke afịd-afịd ke ini afịm ayobio edem usakkautịn atuuhọ anye, ayeppe ke itie isọñ eketọọhọ anye?’ ”
11Ndin ikọ Abọọñ amaadinsịm miin ate: 12“Dọkkọ mbon nsọñiwuod ami ate, ‘Nte ndufo idiọọñọke se mme ñkpọ ami ewuọñọ?’ Bo ammọ ate: ‘Adidem Babilọn amaakaa Yeruselem akeben adidem amọ ye mme ñkpisọñ amọ, akoono ammọ anyọñ akaa Babilọn. 13Ndin anye amaasio awo ufọk adidem keed anyʌñ anam edioomo ye anye, anyʌñ anam anye adat unwọñọ. Anye amaanyʌñ akoono mme awuọiso awo ke abio asio, 14nọ ato do esuuhọ ubọọñ abio ado, mbaak anye akuukan abenne idem aba, adu uwem ato ke anye adinịm edioomo amọ kpọd. 15Ado adidem amaasọñ iwuod ye anye anyʌñ adọñ mme isʌñutom eka Iyib ekebọ mme enañmbakara ye uwak mbon ekọñ esọk anye. Nte anye ayaakịt unen? Nte awo a-anamma utọ ñkpọ ado ayaabọkkọ? Nte anye ayaabiat edioomo ado ama ndin abọkkọ?
16“ ‘Abọọñ Andikara abo ate, Adaña nte ami nduuho uwem, anye adiikpa ke Babilọn, ke isọñ adidem ado a-aketemme anye ke ebekpo, a-anye akesịnne unwọñọ amọ ke ndek, anyʌñ abiat edioomo amọ. 17Fero ye ñkpọsọñ udịmekọñ amọ ye ikpọ uwak atu awo idiibaaha ufọn inọ anye ke ekọñ, ke emaebọp mme ufiọkñkpọ ye mme ufọk ekọñ nọ ato do esobo uwak uwem awo. 18Anye amaasịn unwọñọ ke ndek ke adibiat edioomo. Sia adooho anye amaanam enwọñọ ama akem anye asʌk akenam afịd ñkpọ ami, anye idiibọkkọke.
19“ ‘Ke ntoro se Abọọñ Andikara atañ ado ami: Adaña nte ami nduuho ke uwem, ami ñyaanọ anye utịb ke abaña anye adisịn enwọñọ mmi ke ndek ye ke adibiat edioomo mmi. 20Ami ñyaatat iyịre mmi nnịm nnọ anye, ndin afia mmi ayaamʌm anye. Ami ñyaaben anye ñkaa Babilọn ñnyʌñ ñkekpe ikpe amọ do sia anye ikinamma akpanikọ ye ami. 21Eyaesobo afịd nti mbon ekọñ amọ ke akañkañ, ndin eyaesuan mbon se isʌhọ edọñ ke mme itʌñ ye inuuk. Ndin ndufo eyaediọọñọ ke ami Abọọñ ntañ.
22“ ‘Se Abọọñ Andikara atañ ado ami: Ami ke idem mmi ñyaadat nseghe ke ataa atịñe sida ñnyʌñ ntọ; ami ñyaabuuñ nsek emịne ke ataa atịñe amọ ñnyʌñ ntọ ke anyọñ ñkoñ-ñkoñ abod. 23Ami ndiitọ anye ke atịñe ñkoñ-ñkoñ ikpọabod Isrel; anye ayaasaiya ñkọk anyʌñ anwịm mfịd anyʌñ akappa uyaiya sida. Mme nsio-nsio utọ inuen eyaebọp efọk edʌñọ do; ammọ eyaenie mfuud ke idak ñkọk amọ 24Afịd eto ke akai eyaediọọñọ ke ami Abọọñ nnam anyan eto aməho ñnyʌñ nnam ibio eto akọt anyọọñ. Ado ami nnam nọ awawa eto asaat ñnyʌñ nnam nsaad eto aseghe atara.
“ ‘Ami Abọọñ mmetañ, ndin ñyaanyʌñ nnam.’ ”
Currently Selected:
Esikeel 17: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
