Esikeel 16
16
Yeruselem nte Asịn Efịbe Anwaan
1Ikọ Abọọñ amaadinsịm miin ate: 2“Ayịn awo, deet mme mbubiam ido se Yeruselem anañña wọt anye 3nyʌñ bo ate, ‘Se Abọọñ Andikara atañ abaña Yeruselem ado ami: Ntịppe mfo ye emana mfo eketo isọñ Kenan; ete mfo akedo awo Amọọ, eka mfo anyʌñ ado awo Hed. 4Usen a-afo akemanake awo ikukpịkkeke fiin udʌkakob, awo ikinyʌññọ uyet fiin ke mmọọñ yak afo asana, ikinyʌññọ usọọk fiin ke inʌñ me adubọp fiin ke afọñ. 5Awo ndomokeed ikuseeghe fiin ye mbọm, inyʌññọ ukop udʌk ikem se ekpenam mme ñkpọ ami unọọ fiin. Utu ke ndo, emautop fiin eduọọk ke akpa inwañ, sia usen a-afo akemanake emausọọn fiin.’ ”
6“Ndin ami mmaasaña mboiyo ñnyʌñ ñkịt naña afo amiañña ke iyiib mfo, ndin nte afo asịneke do ke iyiib mfo ami mmaubo fiin nte, ‘Du uwem!’ 7Ami mmaanam afo akọt nte ñkpọ se itịppe ke inwañ. Afo amaakọt anyʌñ akpon akappa abọikpa. Amaatịppe eba, ided mfo amaanyʌñ akọt, kpayeado afo akesaña ataa ifed.”
8Akema ami mmaadisaña mboiyo, ndin ke ini ami mmaakuse fiin ñnyʌñ ñkịt mbo ke afo amekpon akem se ema, ami mmaatat mben afọñidem mmi udot fiin ke idem ñnyʌñ ufʌk ifed. Ami mmaanam enwọñọ ye afo ñnyʌñ ndʌk edioomo ye afo, ndin afo amaakappa ado ake mmi, Abọọñ Andikara atañ.
9Ami mmauyet fiin ke mmọọñ ñnyʌñ usio iyiib ado ke idem mfep, ñnyʌñ ufiọññọ adan. 10Ami mmausịn fiin awedeñwed afọñ ke idem ñnyʌñ usịn ikpaukod e-ekamake ataa eti uduud ikpa enam. Ami mmausịn fiin uyaiya afọñ linen ñnyʌñ ndat mme nsọñudua afọñ ufʌk fiin. 11Ami mmaubana fiin idem ye ñkpọ mbanaidem: ami mmausịn fiin mme akpohoubọk ke ubọk ñnyʌñ ukọọñ ñkwaitọñ ke itọñ, 12ñko ami mmausịn ñkpannuun ke iwuo mfo, ñkpahautọñ ke utọñ ye uyaiya anyanya ke iwuod mfo. 13Ke ntoro emaubana fiin idem ke kold ye silfa; ekedat uyaiya linen ye nsọñudua afọñ ye awedeñwed afọñ ekịm mme nsiine mfo. Ndidia mfo akedo adanakwọọk, adan ọlif ye ataa eti ndomuyo. Uyai mfo amaademme eti-eti ndin afo amaanyʌñ adọọk akekappa abọọñanwaan. 14Etob mfo amaatara ke mme idịd ke ntak uyai mfo, sia inie a-ami ñkunọọhọ fiin amaanam uyai mfo afọn ama, Abọọñ Andikara atañ.
15Ado afo amaabuọt idem ke uyai mfo anyʌñ akama etob mfo asaña akpara. Afo amaafọn ido ye awo akeedodo akesañake aboiyo ndin uyai mfo amaakappa ado ake amọ. 16Afo amaaben ubaak nsiine mfo anam mme ñyaayamma ñkoñ-ñkoñ itie a-afo asitieghe anam akpara mfo. Afo amaabịne anye, ndin anye amaaben uyai mfo anie. 17Afo amaanyʌñ aben uyaiya ñkpọ mbanaidem a-ami ñkunọọhọ fiin, ñkpọ mbanaidem edatta kold ye silfa mmi enam, amaanyʌñ abot mme abasi ke mbid ideen anọ idem mfo anyʌñ anam akpara ye ammọ. 18Afo amaanyʌñ aben mme awedeñwed afọñ mfo asịn ammọ, anyʌñ aben adan mmi ye insensi mmi anịm ammọ ke iso. 19Ñko ndidia a-ami ñkunọọhọ fiin: ndomuyo, adan ọlif ye adanakwọọk a-ami ñkunọọhọ fiin mbo yak adia, afo amaaben anịm ammọ ke iso nte anemufịk insensi. Se ikitịppe ado ado, Abọọñ Andikara atañ.
20Afo amaanyʌñ akoono nditọ ideen ye ibaan a-afo akemanna annọọ miin awa anọ mme ubobodñkpọ nte ndidia. Nte akpara mfo ikikemme? 21Afo amaayọi nditọ mmi aben awa anọ mme ubobodñkpọ ado. 22Ke afịd mme mbubiam adinam mfo ye akpara mfo afo ukutoiyoke mme usen uyịn mfo, a-afo akesañake ifed ye ukpọk, anyʌñ amiañña ke iyiib mfo.
23Adọdiọọk! Adọdiọọk unọ fiin, ado Abọọñ Andikara atañ. Ke adidian ke afịd mme ibak mfo mfen, 24afo amaabọp abod anọ idem mfo anyʌñ anam uyaiya ñwommo ke afịd anwa abio. 25Kwa ikọkkọ efaak afo amaabọọp mme mfọọn ñwommo mfo anyʌñ abiat uyai mfo, anyʌñ atat ukod akpara mfo anọ afịd awo se isaña iboiyo. 26Afo amaanam akpara ye mbon Iyib, mme mbọhọidʌñ mfo e-enieghe ikpọ idemideen, a-anyʌñ anam iyadesịd mmi akpon ato ke edu usaña akpara mfo. 27Anam ami mmaanyanna ubọk mmi udot fiin ke idem ñnyʌñ nsuuho adaña udeeme idʌñ mfo; ami mmauyaak fiin nnọ idiọọkitọñ mme asua mfo, kpa nditọ ibaan mbon Filistia, e-ekekoppo ñkpaidem ebaña abʌd-abʌd ido mfo. 28Afo amaasaña akpara ye mbon Asiria ñko, sia ukukoppo uyʌkkọ; ndin ke umaukuma ado, afo ukusʌkkọ ukokop uyʌkkọ. 29Ndin afo amaasaña akpara akewuọ Babilọn, isọñ mme anyam udua, ado kpayeado ukukoppo uyʌkkọ.
30 Abọọñ Andikara abo, Ami mmeyọhọ ye iyadesịd ubaña fiin, ke ini afo umaunam afịd mme ñkpọ ami, nte akpara i-imiinieghe iso abuud! 31Ke ini afo akebọppọ mme abod mfo ke afịd iwuod efaak anyʌñ anam mme mfọọn ñwommo mfo ke afịd anwa abio, afo ukubaaha nte akpara, sia amaasịn adibọ akʌk utom akpara.
32Afo asịn efịbe anwaan! Afo amema isenawo akan ebe mfo! 33Afịd mme akpara esida ke adibọbọ enọ, ado afo anọọnọ afịd mbon ima mfo enọ, anọ ammọ ubọkedem ate ammọ eto afịd itie edi ubịne fiin nọ edibọ ndiọi unwam uto fiin. 34Ke ntoro, ke usaña akpara mfo afo unamma naña mbon mfen enam; awo ndomokeed idiighe ubịne fiin ke ntak adiyem mfọn mfo. Afo ado ataa isio-isio, sia afo amekpe akʌk, ado awo ukpeeghe fiin ñkpọ ndomokeed.
35Ke ntoro, afo akpara, kop ikọ Abọọñ! 36Se Abọọñ Andikara abo ado ami: Sia afo umaunwañña idiọọkitọñ mfo unyʌñ ufʌkkọ ifed mfo ato ke adinam use ye mme ama mfo, ñko ke ntak afịd mbubiam ibọk mfo, ye sia umaukunọ ammọ iyiib nditọ mfo, 37ke ntak ado ami ñyaakoono afịd mme ama mfo, a-afo akesikoppo inem uwem ye ammọ, mbon a-afo akemaaha ye mbon a-afo akesuaha. Ami ñyaakoono ammọ ke afịd ñkanñkʌk mbon itie keed ñnyʌñ ufʌkkọ fiin ifed ke iso ammọ, ndin ammọ eyaekịt naña afo ada ataa ifed. 38Ami ñyaabiide ukem ufen e-esinọọhọ ibaan e-esịnne efịbe ye mbon e-eduọkkọ iyiib unọ fiin; ke ifiobesịd ye ufịb mmi, ami ñyaanyʌñ mbiere ikpe usio usiene uduọk iyiib unọ fiin. 39Ami ñyauyaak fiin nsịn ke ubọk mme ama mfo ndin ammọ eyaewuut mme abod mfo enyʌñ ebiat mme mfọọn ñwommo mfo. Ammọ eyausịññe fiin afọñ ke idem enyʌñ ekoono mfọọn ñkpọ mbanaidem mfo ndin uyaak fiin esuuk ataa ifed. 40Ammọ eyaedat udịm awo ukeene fiin, ammọ eyautọọñ fiin ke itiad enyʌñ ukpok fiin mbai-mbai ke akañkañ ammọ. 41Ammọ eyaefọọmọ mme ufọk mfo enyʌñ unọ fiin ufen ke iso uwak ibaan. Ami ñyautre fiin usaña akpara, ndin afo uduukpeeghe mme ama mfo aba. 42Ndin ifiobesịd mmi ye afo ayaasuuhọ, iyadesịd ufịb mmi ayaanyʌñ awọññọ ukpọñ fiin; ami ñyaasuuhọ esịd ñnyʌññọ ñyat esịd aba.
43Sia afo umuukutoiyoke mme usen uyịn mfo ado anam afịd ñkpọ ami nọ esịd añyat miin, ke akpanikọ ami ñyaaben se afo anam udot fiin ke iwuod, Abọọñ Andikara atañ. Nte afo ukubenne ndedeghe ido mfo udian ye afịd mme mbubiam adinam mfo mfen?
44Afịd mbon se isitop ufiid eyaetop ufiid ami ubaña fiin: “Ayịn mbid eka.” 45Afo ado ataa mbid eka mfo, a-akesuaha ebe ye nditọ amọ; afo anyʌñ ado ataa mbid nditọeka mfo ibaan, e-ekesuaha mme ebe ye nditọ ammọ. Eka mfo akedo awo Hed, ete mfo anyʌñ ado awo Amọọ. 46Ekamba ayịneka mfo awonwaan aketo Sameria, a-akedʌññọ ke ukañ adoro mfo ye nditọ ibaan amọ; ndin etək ayịneka mfo awonwaan, a-akedʌññọ ke usuuk mfo ye nditọ ibaan amọ, aketo Sọdọm. 47Afo ukukeeneke usʌñ ammọ unyʌñ unam mbubiam ido ammọ kpọd, ado afo amaasappa idem mfo akan ammọ ke afịd usʌñ mfo. 48Adaña ini a-nduuho uwem, ayịneka mfo andikito Sọdọm ye nditọ amọ ibaan akenam inamma se afo ye nditọ mfo ibaan enam, Abọọñ Andikara atañ.
49Idiọọkñkpọ ayịneka mfo a-aketooho Sọdọm akedo ami: Anye ye nditọ amọ ibaan ekewọt idem, edia eyʌkkọ inyʌññọ idọñ anyen ibaña mbon mfen; ammọ ikinwamma mme uweene ye mbon unana. 50Ammọ emaetañ idem enyʌñ enam mme mbubiam ñkpọ ke iso mmi. Ke ntoro, ami mmaabịn ammọ nsio nte afo akịtte. 51Andikito Sameria ikinamma ukpọk mbakka iba ndiọiñkpọ se afo akenam. Afo amenam mbubiam ñkpọ nọ awak akan ake ammọ, ndin afịd se afo anam ami anam anye aba nte nditọeka mfo ibaan edo ndinen. 52Biom asuenne mfo, sia afo amenam nọ nditọeka mfo ibaan enen. Sia ndiọiñkpọ mfo emaediọi ekan ake ammọ, anye adiba nte ammọ efọn ukan fiin. Ke ntoro, kop abuud nyʌñ biom asuenne mfo, sia afo amenam nọ aba nte nditọeka mfo ibaan edo ndinen.
53Ado ami ñyaayaak mfọnọñkpọ Sọdọm ye nditọ amọ ibaan ye ake Sameria ye nditọ amọ ibaan, ye ake mfo, etịmme ubịne fiin, 54nọ ato do afo abiom asuenne mfo anyʌñ akop abuud ke afịd se afo anam adinọ ammọ idọñesịd. 55Ndin nditọeka mfo ibaan, Sọdọm ye nditọ amọ ibaan ye Sameria ye nditọ amọ ibaan, eyaemaana edido se ekedo; afo ye nditọ ibaan mfo eyaenyʌñ emaana edido se ekedo. 56Afo ukpukusiaha anyịñ Sọdọm ayịneka mfo ke usen ntañidem mfo, 57mbemiso ekeyaara ibak mfo. Kpayeado, afo adiido ñkpọ nsaha anọ nditọ ibaan Edọm idahami ye afịd mbọhọidʌñ amọ ye nditọ ibaan Filistia, afịd mbon se ukanna fiin ikʌk u-useeghe fiin nte ñkpọ ndọk. 58Afo ayaabọ utịb ndedeghe ido mfo ye mme mbubiam adinam mfo, Abọọñ atañ.
59Se Abọọñ Andikara atañ ado ami: “Ami ñyaanam naña adot ye afo, sia afo amaasịn unwọñọ mmi ke ndek ke adibiat edioomo mmi. 60Kpayeado ñyaatoiyo edioomo a-ami ñkenamma ye afo ke ini uyịn mfo, ndin ami ñyaawuuk nsi-nsi edioomo ye afo. 61Ndin afo ayaatoiyo usʌñ mfo anyʌñ akop abuud ke ini mmaayaak nditọeka mfo ibaan unọ, mbon se usọñ fiin ye mbon se isịp ukan fiin. Ami ñyaaben ammọ unọ fiin nte nditọ mfo ibaan, ado idiitooho ke edioomo mmi ye afo. 62Ke ntom ami ñyaanam edioomo mmi ye afo asọọñọ ada, ndin afo ayaadiọọñọ ke ami ndo Abọọñ. 63Ndin, ami mmaadakka unọ fiin ke afịd se afo anam, afo ayaatoiyo anyʌñ akop abuud, ndin tutu amama uduukʌppọke inua aba akeene ntak asuenne mfo, Abọọñ Andikara atañ.”
Currently Selected:
Esikeel 16: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
