Esikeel 14
14
Esua Enọ mme Akpono Ndem
1Usʌk mme ñkpisọñ ke Isrel emaedi embịne miin enyʌñ editie ke iso mmi. 2Ndin ikọ Abọọñ amaadinsịm miin ate: 3“Ayịn awo, ideen ami eben mme ubobodñkpọ ewuuk ke esịd ammọ enyʌñ eben mme ibak ndiọiñkpọ iduọ enịm ke iso ammọ. Nte ami ñkpaayak ammọ edimbịp miin mbuume? 4Ke ntoro tañ ikọ nọ ammọ nyʌñ bo ammọ ate, ‘Se Abọọñ Andikara atañ ado ami: Awo ufọk Isrel ndomokeed amaawuuk ndem ke esịd ammọ anyʌñ aben ibak idiọọkñkpọ iduọ anịm ke iso ammọ ndin edakka ebịne prọfed, ami Abọọñ ñyaabọọrọ ammọ ke idem mmi naña asaña akekem ye akpọsọñ ukpono ubobodñkpọ ammọ. 5Ami ndiinam ami nọ ato do mmaana mben esịd mbon Isrel ntịmme ñnyọñ, e-emaekeñkpọñ miin ebịne mme ndem ammọ.’
6“Ke ntoro bo mbon Isrel ate, ‘Se Abọọñ Andikara atañ ado ami: Ikappa esịd! Isịññe idem ikpọñ mme ubobodñkpọ ndufo inyʌñ ikañ afịd mbubiam ido ndufo!
7“ ‘Ke ini awo Isrel me asenawo ndomokeed a-adʌññọ ke Isrel amaadiañña idem amọ iñkpọñ miin inyʌñ ikiben ubobodñkpọ ammọ iwuuk ke esịd ammọ inyʌñ iben ibak idiọọkñkpọ iduọ inịm ke iso ammọ ndin edakka ebịne prọfed adidimbịp miin ñkpọ, ami Abọọñ ñyaabọọrọ ammọ ke idem mmi. 8Ami ñyaawuuk iso mmi nse ammọ ñnyʌñ mben ammọ nnam uwọdñkpọ ye se etañ ebaña. Ami ñyaasio ammọ mfep ke atu ikọd mmi. Ndin ndufo eyaediọọñọ ke ami ndo Abọọñ.
9“ ‘Ndin ekpekpek prọfed ado nọ atañ prọfesi, ami Abọọñ mmekpek prọfed ado, ndin ami ñyaanyan ubọk mmi ntuuk anye ñnyʌñ nsobo anye nsio ke atu ikọd mmi Isrel. 10Ammọ eyaebiom ndudue ammọ, prọfed ado ayaadue ukem nte awo a-akaaha akebịp anye ñkpọ. 11Ndin mbon Isrel idiitịnne usʌñ aba iñkpọñ miin, idiinyʌññọ isappa idem ammọ aba ye afịd ndiọiñkpọ ammọ. Ammọ eyaedo ikọd mmi, ami ñyaanyʌñ ndo Abasi ammọ, Abọọñ Andikara atañ.’ ”
Yeruselem Idiibọkkọke Ubiomikpe
12Ikọ Abọọñ amaadinsịm miin ate: 13“Ayịn awo, adieke idʌñ ndomokeed endueghe miin ke aditre adinam akpanikọ ye ami ndin ami ñnyan ubọk mmi ndot anye nọ ntre ndidia adidʌk ñnyʌñ ndọñ akañ aka do anyʌñ akewot mme awo ye mme unam ammọ, 14akpekọm ideen ita ami: Nua, Dandiel #14:14 Akeme ido Danel, awuọ etob awo ke mbʌk esed; se ñko ke Esi 14:20 ye Yoob, ekeba do, ammọ ekeme edinyaaña idem ammọ ikpọọñ ato ke adinenido ammọ, Abọọñ Andikara atañ.
15“Me adieke ndọññọ ndiọi unam edʌk idʌñ ado enyʌñ ewoot awo tutu awo ndomokeed isʌhọke aba ndin idʌñ ado akappa ndoon nọ awo ndomokeed imiikanna isaña iboiyo ke ntak ndiọi unam ado, 16maama uwem mmi, akpekọm ideen ita ami ekeba ke idʌñ ado, ammọ ikpikanna inyaaña nditọ ideen ye ibaan ammọ. Ammọ ikpọọñ ekpebọkkọ, ado isọñ ayaakappa ndoon, Abọọñ Andikara atañ.
17“Me ami ñkpedat akañkañ ñkeene idʌñ ado ñnyʌñ mbo nte, ‘Yak akañkañ asaña isañ ke afịd isọñ,’ ndin ami ñwot mme andidʌñ ye mme unam ammọ, 18maama uwem mmi, Abọọñ Andikara atañ, akpekọm ideen ita ami ekeba ke esịd abio ado, ammọ ikpikanna inyaaña nditọ ideen ye ibaan ammọ. Ammọ ikpọọñ ekpebọkkọ.
19“Me ami ñkpedọñ udọñọ nsobo utom ke isọñ ado ñnyʌñ ñnwañña ifiobesịd mmi mfʌk anye ato ke uduọk iyiib, ñwot mme andidʌñ ke esịd ye mme unam ammọ, 20maama uwem mmi, Abọọñ Andikara atañ, akpekọm Nua, Dandiel ye Yoob ekeba do, ammọ ikpikanna inyaaña nditọ ideen ye ibaan ammọ. Ammọ ekpenyaaña idem ammọ kpọd ato ke adinenido ammọ.
21“Sia se Abọọñ Andikara atañ ado ami: Adiidiọọk ikitre die ke ami mmaadọñ mme aniendịk ubiomikpe mmi inaañ: akañkañ ye akañ ye ndiọi unam ye udọñọ nsobo utom ke Yeruselem yak ekewot mme awo ye mme unam ammọ! 22Kpayeado ayaaba mbon se idiibọkkọ, nditọ ideen ye ibaan se ediikoono isio do. Ammọ eyaedi ubịne fiin, ndin afo umaukịt ido ammọ ye mme adinam ammọ, afo ayaakop idọñesịd ke abaña idiọọk unọmọ a-ami ndatta ñkeene Yeruselem, afịd idiọọk unọmọ se ami ndat ñkeene anye. 23Afo ayaakop idọñesịd ke umaukịt ido ammọ ye mme adinam ammọ, sia afo ayaadiọọñọ ke ami nnamma ñkpọ ndomokeed ke unana ntak, Abọọñ Andikara atañ.”
Currently Selected:
Esikeel 14: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
