Esikeel 13
13
Esua Enọ mme Nsu-Nsu Prọfed
1Ikọ Abọọñ amaadinsịm miin ate: 2“Ayịn awo, tañ prọfesi baña mme prọfed Isrel e-esʌkkọ etañ prọfesi idahami. Dọkkọ mbon e-etañña prọfesi a-atooho udọñ esịd ammọ: ‘Ikop ikọ Abọọñ! 3Se Abọọñ Andikara atañ ado ami: Adọdiọọk anọ mme ndisịme#13:3 Akeme ido ibak prọfed e-ekeeneke sịbidịd idem ammọ inyʌññọ ikịt ñkpọ ndomokeed! 4Isrel, mme prọfed mfo eba nte mme ewaikọd ke atu mme mbiaña ñkpọ. 5Ndufo idọọhọ ika mme adudu ndibene ikidiọñ anye inọ ufọk Isrel mbaak ammọ esọọñọ eda ke ekọñ ke usen Abọọñ. 6Mme ñkukịd ammọ edo abiaña, idiọñ ammọ enyʌñ edo nsu. Akpesʌkado Abọọñ ikiidọññọ ammọ, ammọ ete, “Abọọñ atañ,” ndin enie idodanyen ke akpena anye anam ikọ se ammọ etañ awuọ asu. 7Nte ndufo ikịtte nsu-nsu ñkukịd inyʌññọ ibre abiaña-abiaña idiọñ ke ndufo emaebo, “Abọọñ atañ,” akpesʌkado ami mmentañña?
8“ ‘Ke ntoro se Abọọñ Andikara atañ ado ami: Ke ntak mme ikọ abiaña ye nsu-nsu ñkukịd ndufo, ami mmenam ikọ ye ndufo, Abọọñ Andikara atañ. 9Ubọk mmi ayaadoro mme prọfed e-ekịtte nsu-nsu ñkukịd enyʌñ ebre abiaña-abiaña idiọñ. Ammọ idiisịneke ke esob ikọd mmi, awo idiinyʌññọ iwet anyịñ ammọ isịn ke ñwed ufọk Isrel, ammọ idiinyʌññọ idʌk isọñ Isrel. Ndin ndufo eyaediọọñọ ke ami ndo Abọọñ Andikara.
10“ ‘Sia ammọ etịnne ikọd mmi usʌñ, ebo, “Emem,” ke ini emem imiibaaha, ñko sia adooho, emaebọp ndibene i-imiisọññọ idem, ammọ eben afia ndom edeppe efʌk anye, 11ke ntoro dọkkọ mbon ebenne afia ndom edeppe efʌk anye bo ke anye ayaaduọ. Ekamba ukod edịm ayaadep, ami ñyaanyʌñ ndọñ edịm itiad eduọññọ, ndin afịm ayobio ayaafịme. 12Ndibene ado amaaduọ, nte mme awo idiibịppe ndufo ibo, “Mmọ afia ndom ekebenne edeppe efʌk anye?”
13“ ‘Ke ntoro se Abọọñ Andikara atañ ado ami: Ke ifiobesịd mmi ami ñyaasio afịm ayobio, ndin ke iyadesịd mmi ami ñyaanam edịm itiad ye ikpọ ukod edịm edep akpọsọñ-akpọsọñ ebiat ñkpọ. 14Ami ñyaawuut ndibene a-ndufo ebenne afia ndom efʌk do ñnyʌñ mmia anye nnịm ke isọñ nọ itiad idakisọñ amọ ana ukpọk. Anye#13:14 Akeme ido abio ado amaaduọ, ndufo eyaetak ke esịd; ndin ndufo eyaediọọñọ ke ami ndo Abọọñ. 15Ntom ke ami ndiinwañña ifiobesịd mmi mfʌk ndibene ado ye mbon se ikiben afia ndom ideppe ifʌk anye. Ami ñyaibo ndufo nte, “Ndibene ado ibaaha aba, ukem ye mbon e-ekekamake afia ndom edeppe anye, 16mme prọfed Isrel ado eketañña ikọ prọfesi ebaña Yeruselem enyʌñ ekịt mme ñkukịd emem enọ anye ke ini emem imiikibaaha, Abọọñ Andikara atañ.” ’
17“Idahami, ayịn awo, wuuk anyen mfo se nditọ ibaan mbon ndufo e-etañña prọfesi eto udọñ esịd ammọ. Tañ prọfesi baña ammọ 18nyʌñ bo ate, ‘Se Abọọñ Andikara atañ ado ami: Adọdiọọk anọ ibaan e-ekịmme ibọk mmayịk ekọñọ ke afịd itọñubọk ammọ enyʌñ enam ñkpọ ufʌkiwuod ke utọ ke utọ unyọọñ enọ iwuod ammọ nọ ato do ammọ esịn mme awo ukad. Nte ndufo eyaesịn uwem mbon mmi ke ukad ado enịm a-ndufo ke nte afọn? 19Ndufo emensappa miin ke atu ikọd mmi ato ke etək uyọhọ ubọk baali ifañ ye mbeñe uyo. Ke adisʌhọ nsu nnọọ ikọd mmi, e-ekpañña utọñ enọ nsu, ndufo emewot mbon imiikpikinaaha ekpa, enyʌñ esaana mbon imiikpikinaaha edu uwem eyaak.
20“ ‘Ke ntoro se Abọọñ Andikara atañ ado ami: Ami mmesua mme ibọk mmayịk a-ndufo ekamake esịn mme awo ukad nte inuen ndin ami ñyaakịppe ammọ nsio ke ubọk ndufo; ami ñyaanam mbon se ndufo esịn ke ukad ebọkkọ nte inuen. 21Ami ñyaawai mme ñkpọ ufʌkiwuod ndufo ñnyʌñ ñnyaaña ikọd mmi nsio ke ubọk ndufo, ndin ammọ idiiduọhọ idʌk adudu ndufo aba. Ndin ndufo eyaediọọñọ ke ami ndo Abọọñ. 22Sia ndufo ekedatta nsu ndufo enam ndinen awo enie iduọesịd, ke ini ami mmeñkebenne ukuud nsọk ammọ, ñko sia ndufo emaesọọñọ mbon ibak idem anam ammọ ikpọññọ ibak usʌñ ammọ inyʌñ inyaaña uwem ammọ, 23ke ntoro ndufo idiikịtte nsu-nsu ñkukịd idiinyʌññọ ibre idiọñ aba. Ami ñyaanyaaña ikọd mmi nsio ke ubọk ndufo. Ndin ndufo eyaediọọñọ ke ami ndo Abọọñ.’ ”
Currently Selected:
Esikeel 13: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
