Izikiẹl 20

Obo rẹ Ọghẹnẹ vẹ Izrẹl Yere Wan

1Vwẹ ukpe righwrẹ, vwẹ emeranvwe riyori, vwẹ ẹdẹ rihwe rẹ emeranvwe na, ekpako rẹ Izrẹl evo da rhe otọeduo vwẹ obọ rẹ Ọrovwohwo, ayen de tidia vwẹ obaro mẹ. 2Ota rẹ Ọrovwohwo de bru vwe rhe: 3Ọmọ rẹ ohwo, ta ota kẹ ekpako rẹ Izrẹl, re wọ ta kẹ ayen, Enẹ Ọrovwohwo Ọghẹnẹ tare, Fiki rẹ otọeduo we vwo bru vwe rhe? Kirobo rẹ me herọ na, eriyin Ọrovwohwo Ọghẹnẹ tare, ovwan se duotọ rẹ emuọvo vwẹ obọ mẹ-ẹ. 4Wọ sa vwẹ ayen gu ẹdjọ, ọmọ rẹ ohwo, wọ sa vwẹ ayen gu ẹdjọ? Gbe jẹ ayen riẹn ẹgua rẹ esẹ ride rayen, 5re wọ ta kẹ ayen, Enẹ Ọrovwohwo Ọghẹnẹ tare: Vwẹ ẹdẹ re me vwọ jẹ Izrẹl reyọ, mi de duvwu iyori kẹ evwruwevwi ri Jekọp, mi de dje oma mẹ kẹ ayen vwẹ otọ rẹ Ijipt, mi de duvwu iyori kẹ ayen, tanẹ, Mẹvwẹ Ọrovwohwo Ọghẹnẹ wẹn. 6Vwẹ ẹdẹ yena mi de duvwu iyori kẹ ayen nẹ, Me reyọ ayen nẹ otọ rẹ Ijipt rhe otọ re me guọnọ vwọ kẹ ayẹn, otọ rọ djẹ ọkẹre vẹ ame rẹ ivie kugbe ọnyọn, otọ ro me yovwi ejobi. 7Me da ta kẹ ayen, Ku eravwọ ri tuoma ejobi rẹ ẹro wẹn mrẹ ghọghọ na kufia, ovwan gbẹ vwẹ ema rẹ Ijipt gbe oma rẹ ovwan ẹgua-a, Mẹvwẹ ọye Ọrovwohwo Ọghẹnẹ wẹn. 8Ẹkẹvuọvo ayen de mu kpahe ovwẹ ayen gbe kerhọn mẹ-ẹ, ayen ohwo ọvuọvo gbe rhọvwe ku obo ri tuoma rẹ ẹro rayen mrẹ ghọghọ na kufia-a, eyẹ ayen ji siobọ nu ema re Ijipt na-a. Etiyin mi de roro nẹ mi ku ophu mẹ ku ayen rere mi hirhe ivuemiovwo mẹ ku ayen vwẹ uherevie rẹ otọ rẹ Ijipt na. 9Ẹkẹvuọvo mi ruro fiki rẹ odẹ mẹ, rere ayen vwo jẹ ẹphọphọ vwẹ obaro rẹ ẹgborho na rẹ ayen dia ohri rẹ ayen na. Me da vwẹ oma mẹ kẹ ayen riẹn vwẹ obaro rẹ ayen re me vwọ reyọ ayen nẹ otọ rẹ Ijipt rhe. 10Etiyin mi de sun ayen nẹ otọ rẹ Ijipt rhe me da reyọ ayen

kpo obo evun rẹ aghwa. 11Me da vwẹ iji mẹ kẹ, me da vwẹ irhi mẹ nẹ ayen, nẹ ohwo rọ sẹro rẹ ayen kọ rhọ. 12Ọ rọ marho, me da vwẹ ẹdidjala mẹ kẹ ayen, rere ọ dia oka vwẹ uvwiẹ mẹ vẹ ọ rẹ ayen rere ayen vwọ riẹn nẹ mẹvwẹ Ọrovwohwo ri ru ayen fon. 13Ẹkẹvuọvo uwevwi rẹ Izrẹl de mu kpahe ovwẹ vwẹ evun rẹ aghwa, ayen gbe yan phihọ evun rẹ iji mẹ-ẹ ẹkẹvuọvo ayen da sen irhi mẹ, rẹ ohwo rọ sẹro rayen ko rhọ, ẹdidjala mẹ ayen de gbe ẹgua tughu tughu. Etiyin mi de roro nẹ mi ku ophu mẹ ku ayen vwẹ evun rẹ aghwa na, rere mi ghwe furhie ayen re kakare. 14Ẹkẹvuọvo mi ruro vwi fiki rẹ odẹ mẹ, rere e vwo je gbe ẹgua vwẹ obaro rẹ ẹgborho na, re me dia irharo rẹ ayen de si ayen nu na 15Ọ rọ marho mi de duvwu iyori kẹ ayen vwẹ evun rẹ aghwa nẹ, me gbe reyọ ayen rhe otọ re me vwo kẹ ayen na-a, otọ rọ djẹ ọkẹre vẹ ame-ivie kugbe ọnyọn, otọ ro me yovwi ejobi, 16fikiridie ayen siẹn irhi mẹ ayen gbi rhe nene iji mẹ-ẹ, ayen de gbe ẹdidjala mẹ ẹgua, kidie udu ayen ghwru nene ẹdjọ rayen. 17Dede na mi de ku ẹro fia kẹ ayen, me gbe guọghọ aye-en eyẹ furhie ayen kakare vwẹ evun rẹ aghwa na-a.

18Me da ta kẹ emọ rayen vwẹ evun rẹ aghwa na, We nene esi rẹ iji rẹ esẹ rẹ ovwa-an eyẹ wa yọnrọn irhi raye-en, eyẹ wa vwẹ edjọ rayen gbe oma rẹ ovwan ẹgua-a. 19Mẹvwẹ Ọrovwohwo, mẹvwẹ Ọghẹnẹ wẹn, yan phihọ iji mẹ; vwẹ ẹro kpotọ sẹro rẹ irhi mẹ. 20Ru ẹdidjala mẹ na fuanfon rere ayen vwọ dia oka vwẹ uvwre me vẹ owẹ, rere wọ vwọ riẹn nẹ mẹvwẹ Ọrovwohwo mẹvwẹ Ọghẹnẹ wẹn. 21Ẹkẹvuọvo emọ na de mu kpahe ovwẹ, ayen gbe yan phihọ iji mẹ-ẹ, ayen gbe vwẹ ẹro kpotọ sẹro rẹ irhi mẹ-ẹ, rẹ ohwo rọ sẹro rọye kọ rhọ, ayen gbe ẹdidjala mẹ na ẹgua.

Me da jẹ iroro nẹ mi ku ophu mẹ ku ayen vwẹ evun rẹ aghwa. 22Ẹkẹvuọvo me da da obọ mẹ ji, mi de ru fiki rẹ odẹ mẹ, rere e vwo je ẹgua egbe vwẹ obaro rẹ ẹgborho na, re me dia irharo rẹ ayen da reyọ ayen rhe na. 23Ọ rọ marho mi de duvwi iyori kẹ ayen vwẹ evun rẹ aghwa na nẹ mẹ hra ayen phihọ ohri rẹ ẹgborho na. Me me rhaphiẹ ayen wan irho na ejobi. 24Fikiridie ayen vwẹ irhi mẹ ru iruo-o ẹkẹvuọvo ayen da siẹn iji mẹ ayen de gbe ẹdidjala mẹ ẹgua, ayen da tọn ẹru vi edjọ rẹ esẹ rayen. 25Ọ rọ marho mi de ji iji ri je yovwo vwọ kẹ ayen kugbe irhi re ayen de jẹ arhọ evwo; 26mi de gbe ayen ẹgua vwẹ oma rẹ okẹ rẹ ayen kẹ rẹ ayen da vwẹ emekpako rayen vwo ze izobo rẹ ẹtorhẹ, rere me vwọ djẹ uguegue mu ayen, mi ruro rere ayen vwọ riẹn nẹ mẹvwẹ ọye Ọrovwohwo na.

27Fiki rẹ ọtiọye na, ọmọ rẹ ohwo, ta ota kẹ uwevwi rẹ Izrẹl rere wọ ta kẹ ayen, Enẹ Ọrovwohwo Ọghẹnẹ tare: Vwẹ evun rẹ ọnana ọvuọvo na esẹ re ovwan vwo gbe odẹ mẹ ku, rẹ ayen vwo nene uvwe ru emu ogbegbo. 28Kidie ọke re me vwọ reyọ ayen rhe otọ ri mi ve kẹ ayen nẹ me vwọ kẹ ayen nu, etiyin kasan kasan rẹ ayen da mrẹ ugbenu ro kpenu eyẹ urhe rọ vẹ ẹbe gbidi, etiyin kọye ayen de ze izobo rayen, ayen me vwẹ izobo rọ kpare ophu mẹ vwọ rhe, etiyin ọnrhẹ ororo rayen mi bru kpenu, ke etiyin ayen da jẹ udi kuotọ. 29(Me da ta kẹ ayen, Tivọ asan ro kpenu rẹ ovwan ra na? Ọtiọye na e de se odẹ rọye Bamah rhi te nonẹ na) 30Ọtiọye na gba ta kẹ uwevwi rẹ Izrẹl, Enẹ Ọrovwohwo Ọghẹnẹ tare; We ji miovwi oma rẹ ovwan kirobo rẹ esẹ rẹ ovwan ruru ri ghwru nene obo ri tu ayen oma na? 31Ọke ru wo da kẹ okẹ wẹn ru da vwẹ ọmọ wẹn vwo ze izọbo rẹ ẹtorhẹ, yi wo vwẹ edjọ miovwo oma wẹn rhi te nonẹ na. Ku wọ je rhe duotọ rẹ emu vwẹ obọ mẹ, E uwevwi rẹ Izrẹl? Kirobo re me herọ na, eriyin Ọrovwohwo Ọghẹnẹ tare, wo se duotọ rẹ emu vwẹ obọ mẹ-ẹ.

32Obo ru wo roro vwẹ evun wẹn na cha sa phia-a iroro evun wẹ na, Jẹn avwanre dia kerẹ ẹgborho na, kerẹ orua rẹ irho na, re gọ urhe vẹ oragha.

33Re me vwọ herọ na, eriyin Ọrovwohwo Ọghẹnẹ tare, uyota te obọ rẹ ẹgba mẹ vẹ ogangan rẹ ugbobọ mẹ, kugbe ophu ọgangan mẹ, ọye me vwọ dia ovie vwẹ enu wẹ. 34Me reyọ owẹ nẹ ohrl rẹ ihwo na rhe, me ghwẹ wẹ koko nẹ irho ra hra wẹ ra rhe, vẹ obọ rẹ ẹgba mẹ kugbe ogangan rẹ igbabọ mẹ vẹ ophu ọgangan mẹ. 35Me cha reyọ owẹ rhe aton rẹ ihwo, ke etiyin me vẹ owe de hirhe aro ku ohwohwo de gu ẹdjọ. 36Kirobo re me vẹ esẹ rẹ ovwan gu ẹdjọ vwẹ evun rẹ aghwa vwẹ otọ rẹ Ijipt, ọtiọye me vẹ owẹ che gu ẹdjọ, eriyin Ọrovwohwo Ọghẹnẹ na tare. 37Mi che ru ovwan vwọ wan obotọ rẹ ọkpọ na, uchunu rẹ ovwan ejobi ki fio wan. 38Ki mi si ihwo ri muẹkpahe ihwo nẹ ohri rẹ ovwan, kugbe ihwo re chọ urhi mẹ; kẹ mẹ cha reyọ ayen nẹ otọ rẹ ayen da hẹ ọrhorha na, ẹkẹvuọvo ayen cha vwẹriẹ otọ rẹ Izrẹl na-a, Ọke yena kẹ ovwan riẹn nẹ mẹvwẹ ọye Ọrovwohwo na.

39Vwọ kẹ wẹ, E uwevwi rẹ Izrẹl, Enẹ Ọrovwohwo Ọghẹnẹ tare: Yanran re ohwo

ọvuọvo ra gọ ẹdjọ rọye, asakiephana vẹ ọke rọ cha, ọ da dianẹ ovwan rha kerhọn mẹ-ẹ, ẹkẹvuọvo odẹ ọfuanfon mẹ na ovwan gbe vwẹ ekẹ wẹn kugbe ẹdjọ wẹn vwọ miovwo-o.

40Kidie vwe enu rẹ ugbenu ọfuanfon mẹ na, obenu rẹ ugbenu phelephele rẹ Izrẹl na, eriyin Ọrovwohwo Ọghẹnẹ tare, Etiyin uwevwi rẹ Izrẹl ejobi, ayen ejobi da cha ga vwẹ vwẹ evun rẹ otọ na; Etiyin me da reyọ ayen, etiyin me da cha reyọ arhọghọ wẹn kugbe omamọ rẹ okẹ wẹn, kugbe izobo wẹn rẹ efuanfon ejobi. 41Ke me reyọ owẹ kere izobo ro gbo ọnrhe ororo, vwẹ ọke me da reyọ owẹ nẹ ohri rẹ ihwo na rhe, re me da ghwẹ wẹ koko nẹ irho ra hra wẹ ra rhe, ke me vwẹ ọfuanfon mẹ phia vwẹ ohri wẹ vwẹ irharo rẹ ẹgborho na. 42Ku wọ cha riẹn nẹ mẹvwẹ ọye Ọrovwohwo na, vwẹ ọke me da vwẹ owẹ rhe otọ rẹ Izrẹl, orho ri mi duvwu iyori nẹ me vwọ kẹ esẹ wẹn. 43Oboyi wọ da cha karohọ idjerhe wẹn kugbe uruemu ejobi ru wo vwo miovwo oma wẹn, oma wẹn ko tu we oma fiki rẹ umwemu ejobi ru wo ruru. 44Ku wọ riẹn nẹ mẹvwẹ Ọrovwohwo na, ri mi de nene uwe yeri fiki rẹ odẹ mẹ, ọ dianẹ fiki rẹ idjerhe omiomiovwi wẹ-ẹn, eyẹ kere uruemu ọbrabra wẹ-ẹn, E uwevwi rẹ Izrẹl, eriyin Ọrovwohwo Ọghẹnẹ tare.

Aroẹmrẹ Kpahe Obuko Ọnre

45Ota rẹ Ọrovwohwo dẹ bru vwe rhe. 46Ọmọ rẹ ohwo, tọn opharo wẹn vi obukọ ọnre, ta ota kpahe obuko ọnre na, re wọ mraro kpahe otọ rẹ egbo rọ hẹ obi Nẹgẹb; 47ta kẹ egbo rọ hẹ obi Nẹgẹb, Nyo ota rẹ Ọrovwohwo na Enẹ Ọrovwohwo Ọghẹnẹ tare, Nighe, mi che koko erhanre phihọ owẹ, kọ torhẹ kurhe kurhẹ ọkpokpọ rọ hẹ evun wẹn kugbe kurhe kurhe ọyaya, e rhe se fue ogidi erhanre na-a, opharo ejobi nẹ obọrhe ọnre rhe rhi te obọhwẹre ọnre erhanre kọ torhẹ. 48Uvwo ejobi ke mrẹ nẹ mẹvwẹ ri koko erhanre na phihọ; e gbi se fuo-o. 49Etiyin me da ta, E Ọrovwohwo Ọghẹnẹ! ayen ra ta kpahe ovwẹ, O dia ọye ohwo ro gbe ido vwo rẹ?

Currently Selected:

Izikiẹl 20: UBV77

Highlight

Copy