Izikiẹl 19
19
Uvwerhe Kẹ Emọ rẹ Ivie rẹ Izrẹl
1Wẹ, mu ugo rẹ uvwerhe vwọ kẹ isun rẹ Izrẹl, 2re wọ ta:
Didie okpohrokpo oni wẹn epha vwẹ ohri rẹ ikpohrokpo na!
O de fiọnko vwẹ uherevie rẹ emọboba rọye,
rọ ghẹrẹ emọ rọye.
3Ọ da ghẹrẹ ọvo vwẹ usun rẹ emọ rọye na,
o de rhi hirhe phihọ upene rẹ okpohrokpo,
o de rhi yono obo re muẹ eranvwe,
o de hwe ihwo.
4Irere na de hworo owanre hẹrhẹ,
e de muo vwẹ uyere rayen,
ayen da vwẹ eghọre sa ayen de muo kpo Ijipt.
5Ọke rẹ ọ vwọ mrẹ ọyena ọ de gbe unu,
kidie ugẹn rọ vwẹ ẹro so muẹ oghwrẹ,
ọ da reyọ ọmọ rọye ọfa
ọ de vwo ru upene rẹ okpohrokpo.
6Kẹ ọ kọn vwẹ ọhri rẹ ikpohrokpo na,
o de rhi hirhe phihọ upene rẹ okpohrokpo,
o de yono obo re muẹ eranvwe,
o de hwe ihwo.
7Ọ da guọghọ ogba ọgangan rayen,
ọ da kua irere rayen fiotọ,
otọ na da kua re kugbe ihwo re herọ ejobi rẹ ayen vwo
nyo edo rọye.
8Etiyin ẹgborho na da hwa hẹrhẹ
ayen kpahe ufi vwẹ abọ na vẹ abọ yena,
ayen de phi obriki rayen rhurho,
e de muo vwẹ uyere rayen.
9Ọ vẹ oghọre vwẹ unu e de mu phihọ akpẹrẹ,
ayen de muo rhe ovie ri Babilọn,
ayen de muo phihọ uwodi,
rere e vwo je urhurhu rọye enyo
vwe enu rẹ igbenu rẹ Izrẹl na.
10Oni wẹn da họhọ urhe ri vain vwẹ ogba ri vain
re ghwie kọn kẹrẹ asan ame,
ọ tan eghọn buebu vẹ emamọ
fiki rẹ ame buebu rẹ ọ epha na.
11Ugboma rọye rọ ma gan ejobi de rhi
hirhe phihọ ọkpọ rẹ ovie,
ọ da tan gogorogo kpenu
vwẹ ohri rẹ eghọn ri chekọ na,
a da mrẹ vwe asan ro kpenu te
vẹ eghọn rọye re pha gbidi na.
12Ẹkẹvuọvo a da vwẹ ophu ghwie vain na kufia,
a da kparọ phihọ otọ,
ọ da yamu vwẹ odju rẹ obaro ọnre,
a da kpare ibi rọye kufia,
ugboma rọye rọ ma gan ejobi na da yamu;
erhanre da torhẹ.
13Asakiephana e de ghwie kọn phihọ evun rẹ aton,
vwẹ otọ ọyaya rẹ ame epha-a.
14Erhanre da la nẹ ugboma rọye rhe,
ọ da ra torhẹ eghọn rọye vẹ emamọ rọye,
omamọ rẹ ugboma rọ ganre gbi rhe-e,
o rhe vwo ọkpọ rẹ ovie-e.
Ọnana hẹ uvwerhe, ọ da rhe dia uvwerhe.
Currently Selected:
Izikiẹl 19: UBV77
Highlight
Share
Copy
Want to have your highlights saved across all your devices? Sign up or sign in
Bible in Urhobo © United Bible Societies, 1977.
