NAHÚM 1
1
1Elcos llactamanta, Nahumman Nínive llactata tucuchinamanta muscuipi shina huillashcata quillcashcami.
Mandac Dios Nínive llactata llaquichinamanta
2¡Mandac Diosca,
paipaclla cachun munacmi!
Ima shina paita llaquichishca
shinallatac llaquichicmi.
Paita mana ricunayachiccunata
llaquichicmi,
paita piñaccunata piñacmi.
3Mandac Diosca
imatapish ruhuacmi.
Mana allita ruhuaccunataca
llaquichingatacmi.
Shina cashpapish
mana utca piñaricchu.
Mandac Diosca tamya
acapana huairapimi purin.
Puyuca pai purishca polvomi.
4Pai rimashpaca,
mama cuchatapish,
achca yacucunatapish chaquichinmi.
Basán llactapish, Carmelo urcupish,
Líbano llacta sisacunapish,
anguyashpa chaquinmi.
5Paipac ñaupapica,
urcucunapish chucchunmi,
lomacunapish yacuyanmi.
Allpapish, cai pachapish,
tucui chaipi causaccunapish cuyurinmi.
6Pai piñaricpica,
¿pitac paipac ñaupapi shayaringayari?
Nina japiric shina pai piñaricpica,
¿pitac paipac ñaupapi
cai pudingayari?
Nina talliricuc shinami
paica yallita piñarin.
Jatun rumicunapish chaupirinmi.
7¡Mandac Diosca allimi!
Llaqui punzhacunapica
sinchi torre shinami jarcan.
Paita shuyaccunataca cuidanmi.
8Ashtahuanpish paita
mana ricusha niccunataca
jatun yacu tucuchic shinami tucuchin.
Paita piñaccunataca
pura tutami catishpa tucuchinga.
9¿Imamantatac Mandac Diosta
piñachisha nicunguichic?
Paita piñaccunataca
jaicapi mana jataripacta
ruhuashpami tucuita tucuchinga.
10Quichqui casha
yuracuna shina cashpapish,
machashca shina cashpapish
chaquishca ucsha shinami
tucuringuichic.
11Canmantami Mandac Diosta
piñachishpa, mana alli yuyaita
cuc runaca llucshirca.
12Chaimantami Mandac Diosca:
“Paicunaca sinchi cashpapish,
achca cashpapish,
tucui huañuchishcami canga.
Cantaca yallitami llaquichircani,
ña mana ashtahuan llaquichishachu.
13Cunanca, cambac jahuapi
churashca yugota paquishami,
coyundacunatapish pitishami” ninmi.
14Nínive llactalla,
Mandac Dios mandashpaca:
“Cambac shutita jaicapi
ama yuyarishca cachun.
Cambac diospac huasipi
tiyac dioscunatapish
imaman riccha
dioscunatapish ñutuchishami.
Can imapac mana valic cashcamantami
chaillapitac enterrana
jutcuta ruhuasha” ninmi.
15¡Riquichic, sumac causaimanta
alli huillaita huillacmi,
jahua urcucunata shamucun!
¡Judá llactalla, canca
fiestacunata ruhuailla.
Can imatapish Diosman
cusha nishcataca cuilla.
Millaita ruhuaccunaca
mana ashtahuan llaquichingachu,
chaica ñami tucui chingarirca!
Currently Selected:
NAHÚM 1: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.