HABACUC 1
1
1Dios ima nishcata huillac Habacucmi Dios huillashcata muscuipi shina ricurca.
2Mandac Dioslla,
¿ima horacamantac
ñuca mañashcata
mana uyagringui?
¿Ima horacamantac
ama llaquichichu
nishpa caparicushalla?
¿Imamantatac mana quishpichingui?
3¿Ima nishpatac
mana allicunata ricuchingui?
¿Ima nishpatac llaquicunata
ricuchun saquingui?
Ñuca ñaupapica piñanacui,
rimarinacui, macanacui,
huañuchishpa tucuchinacuimi ricurin.
4Mandashcacunataca
pipish mana cazunchu.
Allita ruhuanataca
saruc shinami yangata ruhuan.
Canta mana manchacca
cashcata ruhuactami
llaquichingapac caticun.
Chaimantami cashcata
ruhuana tiyanapac randica,
mana alli ruhuashca ricurin.
Habacuc mañashcata Mandac Dios uyashcamanta
5Mandac Diosca:
«Shuctac llactacunata
ricushpa manchaichic.
Ñucaca cancuna causacui
punzhacunapimi chai shina
mancharinacunata ruhuasha.
Chai ruhuashcata
maijan huillacpipish,
mana cringuichicchu.
6Ñucaca caldeocunamanmi
cancunata llaquichichun
yuyaita cugrini.
Paicunaca pitapish mana llaquic,
tucui llactacunata purishpa,
shuccunapac huasicunata
quichuc runacunami.
7Paicunaca yalli millai runacunami.
Ima mandashcatapish mana cazushpa,
quiquin munashcata ruhuashpami,
jatun tucuncuna.
8Paicunapac caballocunaca
leopardocunatapish yalli callpac,
amsata llucshic atuccunatapish
yalli millaicunami canga.
Caballopi ric soldadocunaca
tandanacushpami huaicashpa
carumanta shamunga.
Paicunaca angacuna
ima animalta japingapac
jahuata shamuc shinami shamunga.
9Tucui paicunami
llaquichingapac shamunga.
Ñaupata ricurashpa shamushpami
tucuita manchachinga.
Shinallatac tiyu allpata
tandachic shinami prezu japinga.
10Jatun mandaccunatapish,
shuctac mandaccunatapish,
burlashpa asishpami pingaichinga.
Muyundita pircashca llactata
ricushpaca asingacunami.
Macanacuna pushtucunata
ruhuashpami llactata quichunga.
11Chai quipaca acapana
huaira shina yaicushpami,
tucui tucuchinga.
Paicunapac diosca fuerzami can» nirca.
Habacuc Mandac Diosta mañashcamanta
12Mandac Dioslla,
jucha illac Dioslla, canca,
¿manachu imapish manarac
tiyacpi, ña tiyarcangui?
¡Shina cashcamantaca ñucanchicca
mana huañushunchu!
Mandac Dioslla, llaquichichunmi
Babilonia runacunataca
caipi churarcangui.
Jatun Rumi shina Dioslla,
canca llaquichinpacmi
paicunataca cacharcangui.
13Canca jucha illac cashpami,
millaitaca mana ricusha ningui.
Ima mana allitapish
mana ricusha ninguichu.
¿Ima nishpatac mana
cazuccunataca ricucunguilla?
¿Ima nishpatac canta
mana manchac runa
cashcata ruhuac runata
llaquichicucta ricucunguilla?
14Canca runacunataca
mama cuchapi tiyac
challuacuna shina
cachunmi saquingui.
Llucashpa puric animalcuna shinatami
mandac illacta saquingui.
15Babilonia runacunaca
anzuelohuanmi tucuita japinga.
Linchita shitashpa, tandachishpami,
yallita cushicushpa asinga.
16Chaimantami paicunapac linchiman
animaltapish, inciensotapish
rupachinga.
Chai linchihuanmi
ima charinacunata yallita mirachirca.
Shinallatac sumac micunatami micurca.
17¿Paicunaca chai shinachu
llactacunata mana llaquishpa
tucuchishpa caticungalla?
Currently Selected:
HABACUC 1: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.