DEUTERONOMIO 1
1
Horeb urcumanta rinamanta
1Cai quillcashcapica Moisesmi Puca Cucha, Jordán yacu chimba ladopi cac shitashca pamba Arabapi tucui israelcunaman huillarca. Chai pamba muyundipica Parán, Tofel, Labán, Hazerot, Di-zahab llactacunami carca. 2Horeb urcumanta Seir urcuta rishpa, Cades-barneaman chayangapacca chunga shuc punzhatami purina carca. 3Egiptomanta llucshishca chuscu chunga huata, chunga shuc quilla, punta punzhapimi Moisesca israelcuna imata ruhuana cashcata Mandac Dios mandashca shinallatac huillarca. 4Hesbón llactapi causac amorreocunata jatun mandac Sehonta shinallatac Edrei, Astarot llactapi causac Basán llactata jatun mandac Ogta atishca quipami caicunataca huillarca. 5Moisés Jordán yacu chimba ladopi cac Moab llactapi cai mandashcacunata yachachishpaca:
6«Ñucanchicta Mandac Dios Horeb urcupi rimashpaca: “Caipica unaitami tiyashcanguichic. 7Cancunaca amorreocunapac urcucunaman, chai cuchulla llactacunaman richic. Chai llacta ladollapi cac Arabá llactapi, urcupi, pugru pambapi, shitashca pamba Neguevpi, mama cucha patapi causac cananeocunapac llactapi, Líbano llactapi cac Eufrates yacu ladocaman rishpa causagrichic. 8Riquichic, ñucami cai llactacunata cancunapac maquipi churani. Mandac Dios ñucami chai llactacunataca cancunapac taita Abrahamman, Isaacman, Jacoboman, paicunapac huahua huahuacunaman cungapac ari nircani. Chai llactacunata japishpa tiyarigrichic” nirca.
Juezcunata Moisés acllashcamanta
(Ex 18.13-27)
9Chai huatapi ñuca cancunataca: “Ñucallaca cancunataca ña mana pushai pudinichu. 10Mandac Diosmi cancunataca yallita mirachishca. Cunanca jahua pacha lucerocuna shinami, achca tucushcanguichic. 11¡Cancunapac taitacunata Mandac Diosllatac cancunataca huaranga cutin yallita mirachishpa, pai nishca shina bendiciachun! 12Ñucallaca, ¿ima shinatac cancuna aparishca shina llaquicunata, cancuna piñanacushcataca allichi pudishayari? 13Chaimanta cancunata pushachun, cancunapac aillupuramanta alli yachac, alli yuyaiyuc, imatapish allita ruhuac runacunata acllaichic” nircani.
14Shina nicpica cancunaca: “Allimi, can nishca shina ruhuailla” nircanguichicmi.
15Chaimantami cancunapac aillupuramanta alli yachac, imatapish allita ruhuac runacunataca patsacta mandacta, pichca chungata mandacta, chungata mandacta churarcani. Shinami cancunapac ailluta pushachun churarcani. 16Chashna churashpami, chai punzhacunapi cancunapac juezcunataca: “Imata cashpapish cancunapac huauquipurata allita uyanguichic. Cancunapac llacta runacunatapish, shuctac llactamanta shamushpa, caipi causacuccunatapish cashcata ruhuashpa allichinguichic. 17Pimanpish mana tucushpa, yangalla runa cacpipish, alli nishca runa cacpipish, cashcata ruhuashpa allichinguichic. Mandac Diosmi cancunata mandacun. Chaimanta ama manchanguichicchu. Maijan llaquicunata mana allichi pudishpaca, ñucaman huillanguichic. Ñucami paicuna ima nishcata uyashpa allichisha” nircani.
18Chai huatacunapimi tucui imata ruhuana cashcataca mandarcani.
Moisés Canaán llactata ricumuchun cachashcamanta
(Num 13.1-33)
19Ñucanchicta Mandac Dios mandashca shinami, Horeb urcumanta llucshishpaca, cancuna ricushca jatun manchaipac pambata pasashpa, amorreocunapac urcu ñanta rishpa, Cades-barneaman chayarcanchic. 20Chaipimi ñucaca: “Ñucanchic Mandac Dios cushca, amorreocunapac urcumanmi chayamunchic. 21Riquichic, Mandac Diosmi cai allpata cushca. Cancunapac taitacunaman Mandac Dios nishca shina, huichai rishpa, allpacunata japishpa tiyarichic. ¡Ama manchaichicchu! ¡Ama shaicuichicchu!” nircani.
22Shina nicpimi, cancunaca ñucataca: “Maita rinatapish, mai llactaman chayanatapish ricumuchun maijan runacunata ñaupachishpa cachashunchic. Quipaca ima shina cashcata huillangapac shamuchun” nircanguichic.
23Cancuna nishcaca allimi carca. Chaimantami cada cancunapac aillumanta shuc runata cayashpa, chunga ishcai runata cacharcani. 24Paicunaca urcuman huichai rishpa, Escol pugru pambaman chayashpami, chai allpacunata allita ricushpa purirca. 25Cutishpaca, chai llactapi pucushca granocunatami ricuchingapac apamurca. Shinallatac paicunaca: “Ñucanchicta Mandac Dios ñucanchicman cushca llactaca sumac llactami” nishpami huillarca.
Israelcuna mana risha nishcamanta
26Ashtahuanpish cancunaca mana rishun nishpami, Mandac Dios mandashcata mana cazushpa, paita llaquichircanguichic. 27Chashnami cancunapac carpa huasi ucupica: “Mandac Diosca ñucanchictaca mana ricunayachishpami, Egipto llactamanta llucchimushpaca, amorreocunapac maquipi churashpa tucuchigrin. 28¿Maimantac rishun? Ñucanchic huauquicunaca: ‘Chai llactapica ñucanchicta atishpa ashtahuan achca, ashtahuan jatun gentecunami tiyan. Llactacunapish muyundita alto jarcashca, shinallatac Anac runapac huahua huahuacunatami chaipica ricumunchic nishpami manchachirca’ ninmi” nircanguichic.
29Chashna nicpimi ñucaca: “Ama paicunata manchaichicchu, ama chucchuichicchu, 30Mandac Diosmi cancunapac ñaupata ringa. Egiptomanta llucchingapac imata ruhuashcataca cancunapac ñahuihuanmi ricurcanguichic. Chashnallatacmi cunanpish cancunamanta macanacunga. 31Shitashca pambapi imata ruhuashcatapish ricurcanguichicmi. Ñucanchicta Mandac Diosca shuc taita churita maquimanta aisashpa shamuc shinami, cancunataca tucui ñanpi cuidashpa, caicaman apamurca” nircani. 32Chashna cacpipish, cancunata mana Mandac Diospi shunguta churarcanguichicchu. 33Paimi cancunataca tutaca ninahuan achicyachishpa, punzhaca puyuhuan llandushpa pusharca. Chashnami maita rina ñanta ricuchishpa, maipi samarina cashcaman pusharca.
Israelcunata Dios llaquichishcamanta
(Num 14.20-35)
34Mandac Dios cancuna rimashcata uyashpa, yallita piñarishpa, pai pactachingapac ari nishpaca: 35“Cancunapac taitacunaman cungapac ari nishca sumac llactataca quipa huiñai cai millai gentecunaca shucllapish mana ricungachu. 36Ashtahuanpish Jefonepac churi Calebllami chai llactata ricunga. Pai purishca llactataca paiman, shinallatac paipac huahua huahuacunamanmi cusha. Paimi Mandac Dios ñucataca allita catirca” nirca.
37Cancunamanta Mandac Diosca ñucahuan piñarishpaca: “Canpish chai llactamanca mana yaicunguichu. 38Canta ayudashpa puric Nunpac churi Josuemi chai llactamanca yaicunga. Paimi japina cashca llactataca israelcunaman cunga. Chaimanta pai richun alli yuyaita cungui. 39Cancunaca: ‘Ñucanchic huahuacunata macashpa quichungacunami’ nircanguichicmi. Ashtahuanpish allitapish, mana allitapish manarac yachac cambac churicunami chaimanca yaicunga. Paicunamanmi chai llactataca cusha. Chai llactapimi causanga. 40Ashtahuanpish cancunaca Puca Cuchaman rina ñanta japishpa, shitashca pambaman cuti richiclla” nircani.
Hormapi israelcunata atishcamanta
(Num 14.39-45)
41Shina nicpimi cancunaca: “Juchallishpami Mandac Diosta llaquichishcanchic. Cunanca Mandac Dios mandashca shina, huichai rishpa macanacugrishun” nircanguichic. Chashnami tucui macanacunata japishpa, urcuman huichai rircanguichic. 42Ashtahuanpish Mandac Diosca ñucataca: “Ñucaca mana cancunahuanchu cani. Macanacungapac ama richicchu. Pacta cancunata piñaccuna atishpa macanman nigri” nirca.
43Ñuca chashna nicpipish, cancunaca mana uyarcanguichicchu, ashtahuanpish uyanapac randica, Mandac Dios nishcata mana cazushpami, cari tucushpa urcumanca huichai rircanguichic. 44Ashtahuanpish chai urcupi causac amorreocuna tupangapac shamushpaca, avispacuna jataric shinami, Seir urcupi atishpa, Hormacaman macashpa catirca. 45Chaimanta cutishpami Mandac Diospac ñaupapi huacarcanguichic. Shina huacacpipish, Mandac Diosca mana uyarcachu, mana tigra ricurcachu. 46Chaimantami cancunaca Cadespica unaita causarcanguichic.
Currently Selected:
DEUTERONOMIO 1: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.