DANIEL 1
1
Daniel Babilonia llactapi cashcamanta
1Judá llactata jatun mandac Joacim quimsa huatata mandacucpimi, Babilonia llactata jatun mandac Nabucodonosorca Jerusalenman paipac soldadocunahuan shamushpa muyundita shayarirca. 2Mandac Diosmi Judá llactata mandac Joacimtapish, paipac huasipi tiyac imacunatapish Nabucodonosorpac maquipi churarca. Shina churacpimi, Babiloniaman apashpa, paipac dioscunapac imacuna huacaichinapi churarca.
3Jatun mandac Nabucodonosormi paipac huasipi serviccunata mandac Aspenazta israelcunapuramanta alli nishca jatun mandacpac churicunata pushamuchun cacharca. 4Shinallatac mana ima tucushca, sumac ñahui, imatapish allita yachac, alli yuyaiyuc mosocunatami mandana huasipi paita servishpa causaccunata quillcanatapish, caldeocunapac rimaitapish yachachichun cayac cacharca. 5Jatun mandacca punzhantami paipac micunata, pai ubiana vinota paicunaman carachun cacharca. Shinallatac quimsa huatata yachacushpa paita servichunmi mandarca. 6Chai mosocunapurapica Judá aillupuramanta Daniel, Ananías, Azariasmi carca. 7Chai mandana huasipi serviccunata mandacca Danieltaca Beltesasartami shutichirca. Ananiastaca Sadractami shutichirca. Cutin Misaeltaca Mesacta, Azariastaca Abed-negotami shutichirca.
8Danielca jatun mandacpac micunatapish, pai ubiana vinotapish micushpa, ubiashpa mapayanatami paipac shungupi mancharca. Chaimantami mandana huasipi serviccunata mandactaca: “Caita micushpaca mapayashunmi, cai micunata micuchun ama mandaichu” nirca. 9Dios yuyaita cucpimi, chai mandacca Danielta sumacta chasquirca. 10Chaimantami chai mandacca Danieltaca:
—Ñucaca jatun mandacta manchanimi. Paimi cai micunatapish, ubianatapish cuchun mandarca. Cancunapac huiñaipuramanta, cancuna irquiyashca ñahuicuna ricuricpica, jatun mandacca ñucata huañuchingami. Shina ruhuacpica, cancunamantami huañusha— nirca.
11Mandana huasipi serviccunata mandacca shuc mayordomotami Danielta, Ananiasta, Misaelta shinallatac Azariasta mandachun churarca. Danielca chai mayordomotaca:
12—Canta serviccunataca chunga punzhacaman yacullata, verdura micunallata carangui. 13Chai quipaca ñucanchic ñahuitapish, shinallatac jatun mandacpac micunata micuc mosocunapac ñahuitapish ricungui. Shina ricushpaca, canta servic ñucanchic ima shina cashcata ricushpa ruhuanguilla— nirca.
14Chashna nishcata uyashpami, chunga punzhata chashna carashpa ricurca. 15Ña chunga punzha tucucpica, paicunapac ñahuica jatun mandacpac micunata micuc mosocunapac ñahuita atishpa, ashtahuan sumac huira ñahuimi ricurirca.
16Chaita ricushpami, mayordomoca jatun mandac micunata mana cushpa, verdura micunallata cararca.
17Diosmi chai chuscu mosocunataca alli yachaita, tucuilaya quillcanata yachachirca. Danielca muscuipi shina ricurishcatapish, muscushcatapish alli yachacmi carca.
18Chai mosocunata jatun mandacpac ñaupaman pushamuchun nishca punzhami pactarca. Chaimantami mandana huasipi serviccunata mandacca Nabucodonosorpac ñaupaman chai mosocunata pushamurca. 19Jatun mandac chai tucui mosocunahuan parlashpaca, Daniel, Ananías, Misael, Azarías shina cacta mana tarircachu. Chashnami paicunaca jatun mandacpac ñaupapi servicurca. 20Tucui alli yachacushcata, alli yuyaiyuc cashcata jatun mandac yachashpaca, pai mandacuc llactapi tiyac tucui yachaccunatapish, lucerota ricushpa yachacuccunatapish chunga cutinhuan yalli yachac cashcatami ricurca. 21Danielca jatun mandac Ciro callari huatata mandangacamanmi servishpa causarca.
Currently Selected:
DANIEL 1: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.