AMÓS 1
1
Cuchulla llactacunata llaquichinamanta
1Judá llactata jatun mandac Uzías mandacucpi, Israel llactataca Joaspac churi Jeroboam mandacucpi, allpa chucchungapac ishcai huata tiyacpiracmi Mandac Diosca israelcuna ima tucunata Tecoamanta ovejacunata michic Amosman huillachirca. 2Amosca:
«¡Sión urcumanta,
Jerusalenmantami
Mandac Diosca león
huacac shina caparishpa
uyaringa! Michinapish
mana tiyangachu.
Carmelo urcupish
chaquingami» nirca.
3Mandac Diosca:
«Damascopi causaccunataca
paicuna catipi quimsa cutin,
chuscu cutin juchallishcamanta
llaquichinataca manatac
saquishachu.
Paicunaca Galaad llactapi
causaccunataca trillana
fierrohuanmi llaquichirca.
4Hazaelpac huasipica
ninatami churasha.
Chai ninami jatun mandac
Ben-hadad mandashpa
tiyana huasitapish
tucui rupachinga.
5Damasco pungu aldabacunatapish
paquishami.
Avén pambapi causaccunatapish,
Bet-edén llactata
mandaccunatapish tucuchishami.
Siria llactapi causaccunataca
Kir llactamanmi
prezu apanga» ninmi.
6Mandac Diosca:
«Gazapi causaccunataca
paicuna catipi quimsa cutin,
chuscu cutin juchallishcamanta
llaquichinataca manatac
saquishachu.
Paicunaca Edom llactapi
causaccunaman cungapacmi
shuc llactapi tucui
causaccunata prezu aparca.
7Chaimantami Gaza muyundi
pircapica ninata churasha.
Chai ninami mandashpa
tiyana huasicunatapish
tucui rupachinga.
8Asdodpi causaccunatapish,
Ascalón llactata
mandaccunatapish tucuchishami.
Ecrón llactapi causaccunataca
piñarishpa llaquichicpica,
maijan saquirishca
filisteocunapish huañungami.
Chaitaca Mandac Dios
ñucami nini» ninmi.
9Mandac Diosca:
«Tiropi causaccunataca
paicuna catipi quimsa cutin,
chuscu cutin juchallishcamanta
llaquichinataca manatac
saquishachu.
Paicunaca huauquicunahuan
ari nishcata mana yuyarishpami,
shuc llactapi causaccunata
prezushpa, Edom llactapi
causaccunaman curca.
10Chaimantami Tiro llacta
muyundi pircapica ninapica
churasha.
Chai ninami mandashpa
tiyana huasicunatapish
tucui rupachinga» ninmi.
11Mandac Diosca:
«Edom llactapi causaccunataca,
paicuna catipi quimsa cutin,
chuscu cutin juchallishcamanta
llaquichinataca manatac
saquishachu.
Paicunaca quiquin
huauquicunatami mana llaquishpa,
espadahuan huañuchirca.
Paicunaca yallita piñarishpami,
paicuna munashcata ruhuashpa
llaquichishpa causarca.
12Chaimantami Temán llactapica
ninata churasha.
Chai ninami Bosra llactata
mandashpa tiyana huasicunatapish
tucui rupachinga» ninmi.
13Mandac Diosca:
«Amón llactapi causaccunataca,
paicuna catipi quimsa cutin,
chuscu cutin juchallishcamanta
llaquichinataca manatac
saquishachu.
Paicunaca allpata
mirachingapacmi Galaad llactapi
causac huicsayuc huarmicunataca
huicsata tucyachirca.
14Chaimantami Rabá llacta muyundi
pircapica ninata churasha.
Chai ninami jatun macanacui
punzhapi, acapana huaira
punzhapi mandashpa tiyana
huasicunatapish tucui rupachinga.
15Jatun mandactaca
pai churashca mandaccunandimi
prezu apanga.
Chaitaca Mandac Dios
ñucami nini» ninmi.
Currently Selected:
AMÓS 1: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.