MATEO 7
QCA04
7
Shuccunata mana juchanchina cashcamanta
(Lc 6.37-38,41-42)
1Ama shuccunata juchanchinguichicchu, pacta cancunatapish Diosca juchanchinman. 2Cancuna ima shinami shuccunata juchanchinguichic, chashnallatacmi cancunatapish Diosca juchanchinga. Ima shinami shuccunata ruhuanguichic, chashnallatacmi cancunatapish ruhuanga. 3¿Ima nishpatac quiquin ñahuipi tiyacuc caspita mana ricushpa, shucpac ñahuipi tiyacuc uchilla ucshatarac ricungui? 4Cambac ñahuipi caspi tiyacucpica, ¿ima shinatac caishuctaca: “Shamui, cambac ñahuimanta ucshata llucchisha” ninguiyari? 5Mishqui shimi, jayac shungu, cambac ñahuimantarac caspita llucchi. Chashna llucchishpami, alli ricushpa, caishucpac ñahuimanta uchilla ucshataca llucchingui.
6Dios cushcataca ama allcucunaman cunguichicchu. Achca valishca perlastapish ama cuchicunaman cunguichicchu. Chashna cucpica, yangamanta sarungacunami. Chai allcucunaca cancunataca mana ricunayachishpa llaquichingami.
Japina yuyailla Diosta mañanamanta
(Lc 11.9-13; 6.31)
7Diosta mañaichic, paica cungami. Mashcaichic, taringuichicmi. Huasiyuc nichic, paica pascangami. 8Maijanpish mañacca japinmi. Maijanpish mashcacca tarinmi. Huasiyuc nictaca yaicuchinmi.
9¿Cancunapuramanta maijantac huahua tandata mañacpica, rumita cunguichic? 10¿Challuata mañacpica, culebrata cunguichicchu? 11Cancuna millaicuna cashpapish, cancunapac huahuacuna imata mañacpica, allicunatami cunguichic. Ashtahuanpish jahua pacha Dioscarin, maijanpish mañacpica, allicunatami cunga.
12Ima shinami shuccuna cancunaman allita ruhuachun ninguichic, chashnallatac cancunapish shuccunaman allita ruhuaichic. Chaitami Moisés mandashcacunapipish, Dios ima nishcata huillashcapipish nicun.
Quichqui punguta yaicuna cashcamanta
(Lc 13.24)
13Quichqui punguta yaicuichic. Chaica chingarinaman apac ñanpish, pungupish purinalla anchomi. Taucacunami chaitaca yaicun. 14Ashtahuanpish huiñai causaiman apac ñanpish, pungupish quichquimi, mana yaicuipacllachu. Ashallami chaitaca yaicun.
Yuraca pucushpami, ima yura cashcataca ricuchin
(Lc 6.43-44)
15Cancunapacman shamuc llulla huillaccunamanta cuidaringuichic. Paicunaca oveja carata churarishca, cutin ucu shungupica, atuc shina millaicunami. 16Paicuna ima shina cashcataca, paicunapac ruhuashcata ricushpami ricsinguichic. Casha yuraca mana uvasta pucunchu. Cardos yurapish, higota mana pucunchu. 17Alli yuraca alli granotami pucun. Mana alli yuraca, mana alli granotami pucun. 18Alli yuraca, mana alli granotaca mana pucunchu. Mana alli yurapish, alli granotaca mana pucunchu. 19Mana alli granota pucuc yurataca, tucui pitishpa ninapi shitanami. 20Paicuna ima ruhuashcata ricushpami llullashpa huillac cashcataca yachanguichic.
Dios mandacucman mana tucui yaicunamanta
(Lc 13.25-27)
21Mana tucui ‘Apunchic Jesús, Apunchic Jesús’ niccunachu jahua pacha Dios mandacucmanca yaicunga, ashtahuanpish jahua pacha cac ñuca Taita munashcata ruhuaccunallami yaicunga. 22Taripana punzhapica taucacunami: “Apunchic Jesús, Apunchic Jesús, cambac shutipimi huillacurcanchic, supaicunatapish llucchircanchic, milagrocunatapish ruhuarcanchic” ningacuna. 23Chashna cacpica ñucaca: “Cancunataca mana ricsinichu. Anchurichic, millaita ruhuaccuna” nishami.
Ishcai huasichicmanta Jesús chimbapurashpa parlashcamanta
(Lc 6.46-49)
24Maijanpish cai nishcata uyashpa cazucca, shuc alli yuyaiyuc, sinchi rumi allpapi huasichic runa shinami. 25Chashna sinchi rumi allpapi ruhuashca huasi cashpami, mashnata tamyacpipish, mashnata huairacpipish mana urmarca.
26Maijanpish cai nishcata uyashpa mana cazucca, shuc yuyai illac runa cabia allpapi huasichic shinami. 27Shina huasichishcataca, yalli tamyacpi, yacu shamucpi, huaira huactacpica, urmashpa llaquimi tucurca» nirca.
28Jesús chashna yachachicpica, tucui uyaccunami mancharishpa saquirirca. 29Jesusca mana mandashcacunata yachachic shinachu yachachirca, ashtahuanpish paillatac mandac cashpami, allita yachachirca.

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

Learn More About Dios Rimashcata Quillcashcami