Parallel
6
Allita ruhuanamanta
1Ama gentecuna ricucucllapi allita ruhuaichicchu. Chashna ruhuacpica, jahua pacha Diosca, ima allita mana cungachu. 2Chaimanta can huacchacunata ayudashpaca tucuiman parlashpa puringuichu. Chashnaca mishqui shimi, jayac shungucunallami tandanacuna huasicunapipish, mai ñancunapipish parlashpa purincuna. Chashna ruhuashpaca, cai pachapacllami alli nishca cancuna. Chaica chashnatacmi can. 3Huacchacunata can ayudashcata ama pipish yachachun. 4Can chashna pacalla ayudacpica, pacallata ricuc Diosca, can japina cashcataca cungami.
Diosta mañanamanta
(Lc 11.2-4)
5Cancuna Diosta mañashpaca, ama chai mishqui shimi jayac shungucuna shina mañaichicchu. Paicunaca gentecuna ricuchunmi, plaza esquinacunapi, tandanacuna huasicunapi shayarishpa mañancuna. Chashna ruhuashpaca, cai pachapacllami alli nishca cancuna. Chaica chashnatacmi can. 6Canta Diosta mañashpaca, ucuman yaicushpa, punguta huichcashpa canta Mandac Diosta pacalla mañai. Chashna mañacpica, pacallata ricuc Diosca, can japina cashcata cungami.
7Diosta mañashpaca, ama chai Diosta mana ricsiccuna shina cutin cutin chaillatatac rimashpa mañaichicchu. Paicunaca “Chashna mañacpica Diosca uyangami” yuyashpami, chashnaca mañancuna. 8Ama cancunaca paicuna shina mañaichicchu. Cancunapac Diosca imalla illashcataca cancuna manarac mañacpimi, ña yachan. 9Cancuna mañashpaca:
“Jahua pacha
ñucanchic Taitalla,
cambac shutitaca,
tucuilla alli nishca cachun.
10Can mandana punzha shamuchun.
Ima shinami jahua pachapi
can munashca ruhuaricun,
chai shinallatac cai pachapipish
ruhuarichun.
11Punzhanta micuna tandataca,
cunan punzhapish carai.
12Ima shinami ñucanchic
mana allita ruhuaccunata perdonanchic,
shinallatac ñucanchic
juchacunatapish perdonai.
13Ama ima millaipi
urmachun saquinguichu,
tucui mana allimanta huacaichingui.
[Canmi huiñai huiñaita
tucuita mandacpish,
tucuita ruhuacpish,
sumaimana cushicuipish cangui.
Chashna cachun]” nishpa mañanguichic.
14Shuccuna ima mana allita ruhuashcata perdonacpica, jahua pachapi tiyac cancunapac Diospish cancunata perdonangami. 15Ashtahuanpish cancuna ima mana allita ruhuashcata mana perdonacpica, Diosca cancunapac juchacunataca mana perdonangachu.
Ayunanamanta
16Cancuna ayunashpaca, ama chai mishqui shimi, jayac shungucuna shina ayunanguichicchu. Paicunaca gentecuna ricuchunllami llaquilla ñahui tucushpa ayunan. Paicuna chashna ruhuashpaca, cai pachapacllami alli nishca cancuna. Chaica chashnatacmi can. 17Ashtahuanpish cancuna ayunashpaca, ñahuita jahuarichic, umatapish llambucllata ñaccharichic. 18Chaica gentecuna ama ricuchunmi chashnaca ruhuana canguichic. Chashna ruhuacpimi, ima pacallatapish ricuc Diosca cancuna japina cashcata cunga.
Jahua pachapi chayuc canamanta
(Lc 12.33-34)
19Ama cai pachallapi chayuc canata munaichicchu. Chai charishcacunataca polillapish micunllami, ismunllami. Huasita jutcushpa shuhuanllami. 20Ashtahuanpish jahua pachapi chayuc canata munaichic. Chaipica polillapish mana micunchu, mana ismunchu, mana shuhuanchu. 21Maipimi cancunapac charishca tiyan, chaillatatacmi cancunapac shungupish yuyacun.
Cuerpopac luzca shinaca ñahui cashcamanta
(Lc 11.34-36)
22Cuerpopac luz shinaca ñahuimi. Chaimanta cambac ñahui alli cacpica, tucui cuerpomi achicpi canga. 23Cambac ñahui mana alli cacpica, tucui cuerpomi amsapi canga. Cambac cuerpopi achicyachic luz amsayacpicarin, ¡amsaca yallita amsami canga!
Chayucyana yuyaihuan Diosta mana servi pudi cashcamanta
(Lc 16.13)
24Maijanpish ishcai amotaca mana servi pudinchu. Chaica, shuc amotaca piñangami, caishuctaca cuyangami. Shuc amo mandashcataca cazungami, cutin caishuc amo mandashcataca mana cazungachu. Chashnami maijanpish charicyana yuyailla cashpaca, Diostaca mana servi pudinga.
Diosca ima illashcatapish cuc cashcamanta
(Lc 12.22-31)
25Chaimantami ñucaca: Ama: “¿Imatatac micushun, imatatac ubiashun, imatatac churarishun?” nishpa, chai yuyailla canguichicchu. Causaimari micunatapish ashtahuan yalli valin. Cuerpomari, churanata ashtahuan yalli valin. 26Volac animalcunata ricushpa yuyarichic. Chaicunaca mana tarpunchu, mana cosechanchu, grano huacaichinatapish mana huacaichinchu. Chashna cacpipish jahua pachapi tiyac cancunapac Diosca caranllami. Cancunacarin, ¡zhutacunatapish yallimari valinguichic! 27Maijan yallita unaita causanata munashpapish, shuc horallatapish yallihuan mana causai pudinchu.
28¿Ima nishpatac churana illac cashcamanta llaquiricunguichic? Pambapi sisacuna sumacta sisacucta ricushpallapish yuyarichic. Chaicunaca mana puchcanchu, imatapish mana ruhuanchu. 29Chaica, jatun mandac Salomón, pai tucuita charic cashpapish, sisa shina sumacta mana churarircachu. 30¡Mana tucui shunguhuan cric gentecunalla! Cunanca sumacta sisacuc, cayaca ninapi shitanalla quihuacunatapish huiñachic Diosca, ¿manachu cancunamanca ashtahuan yallita churachinga? 31Shinashpaca: Ama: “¿Imatatac micushun, imatatac ubiashun, imatatac churarishun?” nishpa, llaquiricuichicchu. 32Diosta mana ricsiccunami chashna causancuna. Jahua pacha Diosca cancunapac ima illashcataca ña yachanmi. 33Tucuimanta yallica, Dios mandacucta, shinallatac cashcata ruhuanata mashcaichic. Cancunapac ima illashcataca chasquinguichicllami. 34Ama: “Cayaca, ¿imashi tucushun?” nishpa, llaquiricuichicchu. Llaquicunaca punzhantami tiyan. Chaimanta cayapac ima tucuna cashcataca, cayallatami yuyarina canguichic.