MATEO 4
4
Diablo Jesusta pandachisha nishcamanta
(Mr 1.12-13; Lc 4.1-13)
1Chai quipaca, Diospac Espiritumi Jesustaca diablo shitashca pambaman pusharca. Chaipimi diabloca pandachisha nirca. 2Chaipi chuscu chunga punzhata, chuscu chunga tutata mana micushca cashpami, Jesusca yarcachirca. 3Chashna cacpimi, diablo Jesuspacman cuchuyashpaca:
—Can Diospac Churi cashpaca, cai rumicunata tanda tucuchun ni— nirca.
4Chashna nicpimi Jesusca:
—Dios quillcachishcapica: “Gentecunaca mana tandallahuanchu causanga, ashtahuanpish Dios rimashcahuanmi causanga” ninmi— nirca.
5Chaimantaca diabloca, Diospaclla Jerusalén puebloman Jesusta pushashpa, Diosta mañana huasi jahuapi 6churashpaca:
—Can Diospac Churi cashpaca, caimanta shitari. Dios quillcachishcapica:
“Ama huactarichunca, Diosmi
paipac angelcunata jarcachun cachanga.
Chaquillatapish ama chugririchunca,
angelcunami maquipi chasquinga” ninmi— nirca.
7Chashna nicpimi Jesusca:
—Dios quillcachishcapica: “Canta Mandac Diosta ama pandachisha nichun” ninmi— nirca.
8Diabloca Jesusta jatun urcuman pushashpa, tucui llactacunapi ima tiyashca sumaccunata ricuchishpaca:
9—Can ñucata cungurishpa adoracpica, cai tucuitami canman cusha— nirca.
10Shina nicpimi Jesusca:
—¡Anchuri caimanta Satanás! Dios quillcachishcapica: “Canta Mandac Diosllata alli ningui, paillata servingui” ninmi— nirca.
11Shina nicpimi, diabloca saquishpa rircalla. Chai quipami angelcunaca Jesusta servingapac shamurca.
Galilea llactapi Jesús huillai callarishcamanta
(Mr 1.14-15; Lc 4.14-15)
12Jesusca Bautizac Juan prezu cacta uyashpami, Galilea llactaman rirca. 13Shina cashpapish Nazaret pueblopica ña mana causagrircachu, ashtahuanpish Galilea jatun cucha patapi cac Capernaúm pueblopimi causagrirca. Chai puebloca ñaupa taita Zabulonpac, Neftalipac causana llactapimi carca. 14Dios ima nishcata huillac Isaías huillashca pactachunmi, chaipi causagrirca.
15Paica: «¡Zabulonpac,
Neftalipac causana
Galilea llactalla!
¡Jordán yacu chimba ladopi cac,
jatun cucha patapi tiyac,
mana israelcuna causana
Galilea llactalla!
16Amsapi causac cancunami
shuc jatun luzta ricurca.
Amsapi huañunalla caccunatami,
chai luzca achicyachirca» nishcami.
17Chaimanta pachami Jesusca: «Diosca ñami mandagrin. Chaimanta juchayuc cashcamanta llaquirishpa, Diosman cutirichic» nishpa, huillai callarirca.
Challuata japic chuscu runata Jesús acllashcamanta
(Mr 1.16-20; Lc 5.1-11)
18Jesusca Galilea cucha patata puricushpami, ishcai huauquindi runacunata ricurca. Shucca Simón nishca Pedro, shinallatac Andresmi carca. Paicunaca challuata japiccuna cashpami, linchita yacupi shitacurca. 19Chaipimi Jesusca paicunataca:
—Ñucahuan jacuchic. Cancunataca challuata japic shina, gentecunata Diospacman pushamuchunmi yachachisha— nirca.
20Shina nicpica, linchicunata chai pambapi saquishpa, Jesusta catishpa rircacunallami.
21Jesús chaimanta rishpaca, Zebedeopac churi huauquindipura Jacobota, Juantami ricurca. Paicunaca challuata japina linchicunata taita Zebedeohuan siracurca. Jesusca paicunatapish cayarcami. 22Chaimantami canoatapish, paicunapac taitatapish saquishpa, Jesusta catishpa rirca.
Tauca gentecunata Jesús alliyachishcamanta
(Lc 6.17-19)
23Jesusca tucui Galilea llacta israelcuna tandanacuna huasipimi yachachishpa puricurca. Dios mandanamanta alli huillaita huillashpami, tucuilaya ungüihuan, nanaihuan cac gentecunatapish alliyachishpa puricurca. 24Chai ruhuashcaca tucui Siria llactapimi uyarirca. Shina uyaricpimi, Jesuspacmanca nanaihuan caccunatapish, ungüihuan llaquilla caccunatapish, supai japishca caccunatapish, yuyai illac tucushcacunatapish, paralisis ungüihuan caccunatapish apamurca. Jesusca tucui chai ungushcacunatami alliyachirca. 25Chaimantami Galilea llactamantapish, Decápolis nishca chunga pueblocunamantapish, Jerusalén pueblomantapish, Judea llactamantapish, Jordán yacu chimba ladopi cac llactacunamantapish, achca gentecuna Jesustaca catirca.
Currently Selected:
MATEO 4: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.