MATEO 27
27
Pilatopacpaman Jesusta apashcamanta
(Mr 15.1; Lc 23.1-2; Jn 18.28-32)
1Pacarimucucpimi, curacunata mandac curacunapish, israelcunata pushac yuyaccunapish Jesusta ima shina huañuchinata yuyarinacurca. 2Shina yuyarishpami, Jesusta huatashpa, chai llactata mandachun mandac Pilatopacman aparca.
Judas Iscariote huañushcamanta
3Japichic Judasca Jesusta huañuchigricucta yachashpami, llaquirishpa, chai quimsa chunga cullquita curacunata mandac curacunaman, pushac yuyaccunaman cutichingapac rirca. 4Paica:
—Mana faltayuc runata japichishpaca, juchallishcanimi— nirca.
Chashna nicpimi paicunaca:
—Ñucanchicmanca, ¿imatac curinyari? Chaitaca canchari ricungui— nirca.
5Shina nicpimi, Judasca Diosta mañana huasi ucupi cullquita shitashpa, sipiringapac rirca. 6Curacunata mandac curacuna chai cullquita japishpaca: “Caica shuc runata huañuchingapac randishca cullquimi. Chaimanta ofrendata tandanapica, mana churanachu canchic” nirca. 7Shina ninacushpami, caru llacta runa huañucpi enterrangapac, mangata ruhuacpac allpata randirca. 8Chaimantami chai pambataca cunancaman Yahuar Allpa nishpa cayancuna. 9Chashnami Dios ima nishcata huillac Jeremías huillashcaca pactarca. Paica: «Quimsa chunga cullquitami japirca. Israelcunaca chaitami paimantaca paganga nishca carca. 10Ima shinami Dios nishca shinami, chaihuanca mangata ruhuacpac allpata randirca» nishcami.
Pilatopac ñaupapi Jesusta juchanchishcamanta
(Mr 15.2-5; Lc 23.13-35; Jn 18.33-38)
11Jesustaca Mandac Pilatopacmanmi aparca. Chaipimi Pilatoca:
—¿Canchu israelcunata Jatun Mandac cangui?— nirca.
Shina nicpimi Jesusca:
—Ari, canllatac nishcanguimi— nirca.
12Curacunata mandac curacunapish, pushac yuyaccunapish juchanchicucpica, Jesusca imata mana nircachu. 13Chaimantami Pilatoca:
—Canta cai tucuita juchanchicuctaca, ¿manachu uyangui?— nirca.
14Shina nicpipish, Jesusca imata mana nircachu. Chaimantami Pilatoca yallita mancharirca.
Jesusta huañuchingapac juchanchishcamanta
(Mr 15.6-20; Lc 23.13-25; Jn 18.38—19.16)
15Pascua punzhapica, gentecuna munashca shuc prezutami mandac Pilatoca cacharic carca. 16Chai punzhapica, shuc yalli millai Barrabás runami prezu tiyacurca. 17Pilatoca tandanacushca gentecunataca:
—¿Maijantatac cacharichun ninguichic? ¿Barrabasta? Mana cashpaca, ¿Cristo nishca Jesusta?— nishpa tapurca.
18Pilatoca Jesustaca envidiamanta apamushcatami yacharca. 19Pilato, pai mandanapi tiyacucpimi, paipac huarmica:
—Chai allita ruhuac runamantaca, shuc mancharinatami tutaca muscurcani. Paitaca ama imata ruhuanguichu— nichun cacharca.
20Utcamanmi curacunata mandac curacunapish, pushac yuyaccunapish gentecunataca: “Barrabasta cacharichun, Jesustaca chacatachun ninguichic” nishca carca. 21Pilato paicunata cutin tapushpaca:
—Cai ishcai runacunamantaca, ¿maijantatac cacharichun ninguichic?— nirca.
Shina nicpimi paicunaca:
—¡Barrabasta cachari!— nircacuna.
22Chaimantami Pilatoca:
—Shinashpaca, Cristo nishca Jesustaca, ¿imatatac ruhuachun ninguichic?— nirca.
Shina nicpimi, tucui paicunaca:
—¡Paitaca chacatailla!— nircacuna.
23Shina nicpimi Pilatoca:
—¿Ima mana allitatac ruhuashcayari?— nirca.
Shina nicpipish, paicunaca ashtahuanmi:
—¡Chacatailla!— nishpa caparircacuna.
24Tucui gentecuna mana uyashun nishpa, ashtahuan caparinacui callaricpimi, Pilatoca yacuta japishpa, maquita jahuashpaca:
—Cai runata huañuchishpaca mana ñucachu juchayuc casha, ashtahuanpish cancunami juchayuc canguichic— nirca.
25Shina nicpimi paicunaca:
—Ari, pai huañushcamanta ñucanchicmi juchayuc cashun— nircacuna.
26Chashna nicpimi, Pilatoca Barrabasta cacharishpa, Jesustaca azotichishpa cruzpi chacatachun Roma llacta soldadocunaman curca. 27Shina cucpimi, soldadocunaca Jesusta Pilato mandashpa tiyana jatun ucuman apashpa, caishuc soldadocunata Jesuspac muyundipi tandachirca. 28Chaipimi soldadocunaca Jesuspac churanata surcuchishpa, amsa puca churanata pachallichirca. 29Cashamanta ahuashca coronata umapi churachishpami, shuc taunata alli maquipi charichirca. Chashna nic tucushpalla, paipac ñaupapi cungurishpaca:
—¡Israelcunata Jatun Mandac, canca allimari cangui!— nircacuna.
30Chaimantaca tocashpami, paipac taunallahuantac umapi huactarca. 31Chashna burlashca quipaca, amsa puca churanata surcuchishpami, paipac churanallatatac churachishpa, cruzpi chacatangapac aparca.
Jesusta chacatashcamanta
(Mr 15.21-32; Lc 23.26-43; Jn 19.17-27)
32Chaimanta ricushpami, Cirene pueblomanta Simón runahuan tuparca. Paimanmi Jesuspac cruzta apachishpa rircacuna. 33Chaimantaca Gólgota nishca urcumanmi chayarca. Gólgota nishcaca, Uma Tullu nisha ninmi. 34Chaipimi jayac-huan chapushca vinota Jesusman curca. Chashna cucpica, Jesusca ashata mallishpa mana ubiasha nircachu.
35Jesusta cruzpi chacatashpaca, suerteta ruhuashpami paipac churanacunata japircacuna. 36Chaipimi soldadocunaca Jesusta cuidangapac tiyarirca. 37Cruz jahuapica, imamanta huañuchishcata quillcashcatami churarca. Chai quillcapica: «Caimi israelcunata Jatun Mandac Jesús» nicurcami.
38Jesustaca ishcai shuhuac runacunatami shuctaca alli maquiman, shuctaca lluqui maquiman chacatarca.
39Chaita pasaccunaca umata cuyuchishpa, Jesusta 40camishpaca: «Diosta mañana huasita urmachishpapish, quimsa punzhapica cutin shayachishallami nircanguimi. Can Diospac Churi cashpaca, ¡cruzmanta uricuiyari!» nircami.
41Shinallatac curacunata mandac curacunapish, mandashcacunata yachachiccunapish, pushac yuyaccunapish burlashpa: 42«Shuccunataca quishpichircami. Cunan paillatacca mana quishpiri pudinchu. Israelcunata Jatun Mandac cashpaca, cruzmanta uricunmanmi. Chashna uricucpica, ñucanchicpish crinchicmanmi. 43Paica: “Diospac Churimi cani” nishpami, Dios yuyailla puricurca. Shina cacpica, Dios cuyashpaca quishpichinmanmi» nircacuna.
44Chai shinallatacmi Jesus-huan chacatashca shuhuac runacunapish camircacuna.
Jesús huañushcamanta
(Mr 15.33-41; Lc 23.44-49; Jn 18.28-30)
45Chaupi punzhamanta quimsa horas chishicamanmi, tucui cai pachaca amsayarca. 46Chai horasllatacmi Jesusca: «Elí, Elí, ¿lama sabactani?» nishpa, caparirca. Chaica: “Ñuca Dios, ñuca Dios, ¿ima nishpatac ñucallata saquinguiyari?” nisha ninmi.
47Chaipi caccuna chaita uyashpaca:
—Paica huillac Eliastami cayacun— nircacuna.
48Chashna caparicta uyashcahuanmi shuc runaca, esponjata apamungapac callparca. Chaitaca jayac vinopi satishpami, caspi puntapi churashpa, Jesús ubiachun shimiman chayachirca. 49Ashtahuanpish maijancunaca:
—Saquichic, Eliasca quishpichingapac shamucta ricungapac— nircacuna.
50Jesusca cutinllatac sinchita caparishpaca huañurcallami. 51Chai ratomi Diosta mañana huasi tiyac lienzoca, jahuamanta uraiman chaupita lliquirirca. Allpapish chucchurcami, jatun rumicunapish chictarircami. 52Shinallatac enterrashca jutcucunapish pascarircami. Chashna pascaricpica, Diospaclla caccunaca causarircami. 53Chai enterrashcamanta causariccunaca Jesús causarishca quipami Jerusalén puebloman shamurcacuna. Paicunataca achca gentecunami ricurca. 54Patsac soldadocunata mandacpish, Jesusta cuidaccunapish allpa chucchucta, shuctac ima tucushcacunata ricushpaca yallita mancharishpami:
—Cai runaca Diospac Churitacmi cashca— nircacuna.
55Chaipica tauca huarmicunami carullamanta ricucurca. Paicunaca Galilea llactamantami Jesusta ayudashpa shamurca. 56Paicunapurapica Magdala pueblomanta Mariapish, Jacobopac, Josepac mama Mariapish, Zebedeopac churicunapac mamapishmi carca.
Jesusta enterrashcamanta
(Mr 15.42-47; Lc 23.50-56; Jn 19.38-42)
57Ña tutayamucucpica, Arimatea pueblomanta chayuc Josemi shamurca. Paipish Jesusta caticmi carca. 58Paimi mandac Pilatopacman rishpa, Jesuspac cuerpota enterrangapac mañarca. Chashna mañacpica, Jesuspac cuerpota cuchunmi Pilatoca mandarca. 59Chaimantami Joseca Jesuspac cuerpota mushuc lienzo pañohuan pillurca. 60Chashnami cunanlla ruhuashca enterrana jutcupi churarca. Chai jutcutaca Josellatacmi ruhuachishca carca. Chaipimi Jesuspac cuerpota churashpa, jatun rumihuan jarcashpa rirca. 61Chai jutcu ñaupapica Magdala pueblomanta Mariami, caishuc Mariahuan tiyacurca.
Enterrashcata cuidachunchurashcamanta
62Allichirina punzhamanta cayandi samana punzhapimi curacunata mandac curacunapish, fariseocunapish Pilatopacman rircacuna. 63Chaiman rishpaca:
—Jatun mandaclla. Cai llullac runa causacushpa: “Quimsa punzhapica causarishami” nishcatami yuyarinchic. 64Chaimanta quimsa punzhacaman cuerpo enterrashcata cuidachun cachai. Pacta yachacuccuna tuta shamushpa, paipac cuerpota shuhuanman. Chashna shuhuashpaca: “Jesusca ñami causarishca” nishpami, gentecunata crichinga. Chashna ruhuashpacarin, punta llullashcata atishpami ashtahuan llullanga— nircacuna.
65Chashna nicpimi Pilatoca:
—Caipimi, cai soldadocunata cachani. Paicunata pushashpa, ima shinapish allita cuidanguichic— nirca.
66Chashnami chai jutcuta huichcashca rumita ama pipish cuyuchichun, sellota churashpa, soldadocunatapish cuidachunmi saquirca.
Currently Selected:
MATEO 27: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.