MATEO 19
19
Cusandi huarmindi mana raquirinamanta
(Mr 10.1-12; Lc 16.18)
1Chaicunata nishca quipami, Jesusca Galilea llactamanta rishpa, Jordán yacu chimba lado Judea llactaman rirca. 2Achca gentecunami Jesusta caticurca. Chaipimi Jesusca ungushcacunata alliyachirca. 3Chaimantami maijan fariseocuna Jesuspacman cuchuyashpa, paita pandachisha nishpaca:
—¿Cusaca huarmimanta raquirinaca allichu canga?— nishpa, tapurca.
4Chashna nicpimi Jesusca:
—Dios cai pachata ruhuashpaca, caritapish, huarmitapish ruhuarcami. ¿Chaitaca manachu Dios quillcachishcapica ricushcanguichic? 5Dios quillcachishcapica: “Carica taita mamata saquishpa, paipac huarmihuanmi tandaringa. Chashna tandanacushpaca, shucllami tucunga” nircami. 6Chashna cashcamantaca ña mana ishcaichu, ashtahuanpish shucllami can. Chaimanta Dios tandachishcataca, pi mana chicanyachinachu can— nirca.
7Fariseocuna Jesusta tapushpaca:
—¿Ima nishpatac Moisesca firmata cushpaca, huarmimanta raquirichunlla nishpa mandarca?— nirca.
8Chashna nicpimi Jesusca:
—Moisesca cancuna sinchi shungu cacpimi, huarmimanta raquirichun saquirca, ashtahuanpish callaripica, mana chashnachu carca. 9Shina cacpipish ñucaca: Manapish huarmi huainayacpi, huarmimanta raquirishpa shuc-huan cazaracca, juchallinmi ninimi— nirca.
10Chashna nicpimi yachacuccunaca:
—Huarmimanta mana raquirinalla cacpica, cazaranaca mana allichu— nirca.
11Chashna nicpimi Jesusca:
—Mana tucui caricunachu caita entendincuna, ashtahuanpish Dios yuyaita cushcacunallami caitaca entendin. 12Maijancunaca capashca shinami huacharin. Cutin maijancunaca capashcatacmi cancuna. Cutin maijancunaca jahua pacha Dios mandacucpi servingapacmi, capashca shina tucun. Chashnami tauca runacuna mana cazarashpa causancuna. Maijanpish cai shina casha nishpaca chashna cachunlla— nirca.
Huahuacunamanta Jesús mañashcamanta
(Mr 10.13-16; Lc 18.15-17)
13Huahuacunapac uma jahuapi maquita churashpa Diosta mañachunmi Jesuspacman pushamurca. Chaita ricushpami paipac yachacuccunaca piñarirca. 14Chaimantami Jesusca:
—Huahuacuna ñucapacman shamuchun, ama jarcaichicchu. Cai huahuacuna shina caccunami Dios mandacucmanca yaicunga— nirca.
15Jesusca huahuacunapac uma jahuapi maquita churashpa mañashpaca, chaimanta rircallami.
Chayuc mosomanta
(Mr 10.17-31; Lc 18.18-30)
16Shuc runa Jesuspacman shamushpaca:
—Yachachic, huiñai causaita charingapacca, ¿ima allitatac ruhuana cani?— nishpa tapurca.
17Shina nicpimi Jesusca:
—¿Ima nishpatac allimanta tapungui? Allica, shucllami tiyan. Huiñai causaita charisha nishpaca, mandashcacunata pactachingui— nirca.
18Chashna nicpimi chai mosoca:
—¿Maijan mandashcacunatatac pactachina cani?— nirca.
Chashna nicpimi Jesusca:
—Ama huañuchingui, ama shuhuangui, ama llullangui, ama huainayangui, 19taita mamata cuyangui. Can ima shinami cuyaringui, chashnallatac shuccunatapish cuyangui— nirca.
20Chashna nicpimi, chai mosoca:
—Chaicunataca tucuitami pactachishcani. Ashtahuanca, ¿imatatac ashtahuan ruhuana cani?— nirca.
21Chashna nicpimi Jesusca:
—Diospac ñaupapi alli canata munashpaca, tucui charishcacunata catushpa, huacchacunaman cugri. Chashna ruhuashpami, jahua pachapica achcata charingui. Chashna ruhuashpaca, ñucata catilla— nirca.
22Chai mosoca yalli chayucmi carca. Chaimantami chashna nicpica, yallita llaquirirca. 23Chaimantami Jesusca paipac yachacuccunataca:
—Chayuccuna Dios mandacucman yaicunaca sinchimi canga. Chaica chashnatacmi. 24Shuc chayuc runa, Dios mandacucman yaicunapac randica, shuc camellomi auja ringrita pasarinman— nirca.
25Chaita yachacuccuna uyashpaca, ashtahuan mancharishpami:
—Chashna cacpica, ¿pitac quishpiri pudingayari?— ninacurca.
26Chashna nicpi, Jesús paicunata ricurashpaca:
—Gentecunapac yuyaipica, maita mana quishpiripacchu, ashtahuanpish Diosmanca imapish ruhuaipacllami— nirca.
27Chashna nicpimi Pedroca:
—Ñucanchicca tucui charishcacunata saquishpami, cantaca caticunchic. ¿Chaimantaca imatatac japishun?— nishpa tapurca.
28Chaimantami Jesusca:
—Cai pachata Dios mushucta ruhuacucpimi, Runa Tucungapac shamushca ñucaca, sumaimana achicllapi mandai callarisha. Chaipica cancunapish ñucata caticcuna cashcamantaca, chunga ishcai mandaccuna mandashpa tiyarinapi tiyarishpami, chunga ishcai Israel aillucunata mandanguichic. Chaica chashnatacmi canga. 29Maijanpish ñucata catingaraicu huasita, huauquicunata, panicunata, taita mamata, huarmita, huahuacunata, allpata saquicca, chaicunamanta patsac yallihuanmi japinga. Huiñai causaitapish japingami. 30Chaica cunan punzhapi ‘allimi cani’ niccunaca, yangallami tucunga. Cutin, cunan punzhapi yangalla caccunaca, alli nishcami canga.
Currently Selected:
MATEO 19: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.