MATEO 11
11
Bautizac Juan Jesusman tapuchun cachashcamanta
(Lc 7.17-35)
1Jesús paipac chunga ishcai yachacuccunata yachachishpaca, Galilea llacta pueblocunapi yachachishpa, alli huillaita huillangapacmi rirca.
2Juanca carcelpi cashpami Quishpichic Cristo imata ruhuashcataca yachac chayarca. Chaimantami paipac yachacuccunapuramanta ishcaita Jesusman tapuchun cacharca. 3Paicuna rishpaca:
—¿Canchu chai shamuna cashca Quishpichic Cristoca cangui? Mana cashpaca, ¿shuctachu shuyana canchic?— nirca.
4Chashna tapucpimi Jesusca:
—Caipi imata ricushcatapish, uyashcatapish Juanman huillagrichic. 5Ñahui mana ricuccuna ricucushcatapish, suchucunapish puricushcatapish, leprahuan ungushcacuna alliyashcatapish, ringri mana uyaccuna uyacushcatapish, huañushcacunata causachishcatapish, huacchacunaman alli huillaita huillashcatapish huillagrichic. 6Cushicuichic, ñuca ima ruhuacushcata ricushpa, mana pandariccuna— nircami.
7Juanpac yachacuccuna cutiricpi, Jesús Juanmanta gentecunaman parlashpaca: «Shitashca pambapica, ¿imatatac ricungapac rircanguichic? ¿Huairahuan caiman chaiman cuyuricuc carrizollatachu ricugrircanguichic? 8Mana cashpaca, ¿imatatac ricungapac rircanguichic? ¿Shuc alli churanata churarishca runatachu ricugrircanguichic? Alli churanata churarishcaca chayuccunahuanmi cushicushpa, jatun mandaccunapac huasicunapi causan. 9Shinashpaca, ¿imatatac ricugrircanguichic? ¿Dios ima nishcata huillactachu ricugrircanguichic? Ari, chaitami ricugrircanguichic. Juanca Dios ima nishcata huillactapish yallimi. 10Dios quillcachishcapi Juanmanta rimashpaca:
“Ñuca ima nishcata huillactaca,
Quishpichic shamuna ñanta allichichunmi,
ñaupachishpa cachani” nicunmi.
11Cai pachapica Bautizac Juanmanta yallica manatac tiyashcachu. Chashna cacpipish jahua pacha Dios mandacucpica, yangalla imapish mana cacmi, Juanta yalli alli nishcaca. Chaica, chashnatacmi can.
12Bautizac Juan huillai callarishca punzhamanta cunan punzhacamanmi jahua pacha Dios mandacucman yaicusha niccunataca millai gentecunaca chingachinata yuyashpa llaquichin. 13Moisés mandashcapipish, Dios ima nishcata huillaccuna huillashcapipish, Juanmantami huillashca. 14Chashquisha nishpaca, chasquichic. Dios ima nishcata huillac Elías nishcaca, Juanmi. 15Maijanpish ringrita charicca, caita alli uyaichic.
16Cai punzhapi causaccunataca, ¿imahuantac chimbapurasha? Paicunaca plaza pambapi huambracuna, caishuc chaishuc caparinacushpa: 17“Flautapi tocacpipish, mana bailarcanguichicchu. Llaquillata cantacpipish, mana huacarcanguichicchu ninacuc shinami” ninmi. 18Vinotapish mana ubiac, mana achcata micuc Juan shamucpica: “Paica supaihuanmi” ninguichicmi. 19Runa Tucungapac shamushca ñuca imatapish micuc, vinotapish ubiacpica: “Cai runaca yalli micucmi, vinotapish ubiacmi, impuestota japiccunahuanpish, caishuc juchayuccunahuanpish tandaricmi” ninguichicmi. Cancuna chashna nicucpipish, Dios yachac cashcataca paita cazuccunami ricuchicun» nirca.
Jesús huillashcata mana cazuccunamanta
(Lc 10.13-15)
20Jesusca tauca pueblocunapimi, achca milagrocunata ruhuarca. Chashna ruhuacpipish, gentecunaca Diosman mana cutirircachu. Chaimantami, sinchita rimashpaca: 21«¡Aij, Corazín pueblolla, Betsaida pueblolla! Cancunapac pueblocunapi ruhuashca shinata Tiro pueblopi, Sidón pueblopi ruhuashca cacpica, llaquirishpa, sharpa churanata churarishpa, uchupahuan cahuirishpa, Diosman cutirinmanmi carca. 22Taripana punzhapica, Tiro pueblopi, Sidón pueblopi causaccunata yallimi cancunaca llaquichishca canguichic. 23Capernaúm pueblopi causaccuna, ¿jahua pachaman rishunmi yuyanguichicchu? Ashtahuanpish ucu pachamanmi shitashca canguichic. Cancunapac pueblopi milagrocunata ruhuashca shina, Sodoma pueblopi ruhuashca cacpica, cunan punzhacamanmi tiyanman carca. 24Taripana punzhapica Sodoma pueblopi causac millai gentecunata yalli cancunaca llaquichishca canguichic, ninimi» nirca.
Jesús “ñucapacman shamuichic” nishcamanta
(Lc 10.21-22)
25Chai quipami Jesusca: «Jahua pachata, cai pachata Mandac ñuca Taitalla, cantaca “allimari cangui” ninimi. Canca, cai yachanacunataca alli yuyaiyuc, alli yachaccunamanta pacashpami, huahuacuna shinamanmi, yachana yuyaita cushpa yachachishcangui. 26Ari, ñuca Taitito, chaitami munashcangui.
27Ñuca Taitaca tucuitami ñucamanca curca. Ñuca pipac Churi cashcataca, pi mana yachanchu, ñuca Taitallami yachan. Ñuca Taita pi cashcataca, pi mana yachanchu, ñucallami yachani. Pipish ñuca yuyaita cucllapimi, ñuca Taita pi cashcataca yachan. 28Aparishca, shaicushca shina causaccuna, tucuilla ñucapacman shamuichic. Ñucami cancunataca samachisha. 29Yugota apac shina, ñucata catichic, ñucamanta yachacuichic. Ñucaca mana piñaric, alli shungumi cani. Samaringuichicmi. 30Ñuca yugoca pangallami. Ñuca cushca aparinapish aparinallami» nirca.
Currently Selected:
MATEO 11: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.