MATEO 10
10
Chunga apostolcunata acllashcamanta
(Mr 3.13-19; Lc 6.12-16)
1Jesusca paipac chunga ishcai yachacuccunata cayashpaca, supaicunatapish llucchichun, tucuilaya ungüitapish alliyachichun, nanaicunatapish anchuchichunmi poderta curca.
2Chai chunga ishcai apostolcunaca: Pedro nishca Simón, paipac huauqui Andrés, Zebedeopac churicuna Jacobo, Juan, 3shinallatac Felipe, Bartolomé, Tomás, impuestota japic Mateo, Alfeopac churi Jacobo, Tadeo nishca Lebeo, 4Celote nishca Simón, Judas Iscariotemi carca. Paimi quipataca Jesustaca japichirca.
Chunga ishcai yachacuccuna huillagrishcamanta
(Mr 6.7-13; Lc 9.1-6)
5Chai chunga ishcai yachacuccunata Jesús cachashpaca: «Mana israelcunapacmanca ama ringuichicchu. Samaria llacta pueblocunamanpish ama yaicunguichicchu. 6Ashtahuanpish chingarishca ovejacuna shina cac, israelcunapacman ringuichic. 7Cancuna rishpaca: “Jahua pacha Diosca ñami mandagrin” nishpa huillanguichic. 8Ungushcacunatapish alliyachinguichic, Lepra ungüitapish pichanguichic, huañushcacunatapish causachinguichic, supaicunatapish llucchishpa cachanguichic. Yangami caita ruhuangapacca poderta chasquircanguichic, chaimantami yanga ruhuana canguichic.
9Curitapish, cullquitapish, cobretapish, 10cucayu mochilatapish, yanandi churanatapish, ushutatapish, taunatapish ama apanguichicchu. Maipipish imata ruhuacca, japinata charinmi.
11Cancuna mai puebloman, mana cashpaca mai llactaman chayashpaca, alli cuyac runata mashcashpa, paipac huasipi shucman ringacaman chaipi canguichic. 12Chai huasipi chayashpa, chaipi caccunataca saludanguichic. 13Chai huasiyuc cancunata alli chasquicpica, cancuna saludashcaca paicunahuanmi saquiringa. Mana alli chasquicpica, saludashcaca cancunamanmi cutinga. 14Mai pueblopi cashpa, mai huasipi cashpa cancunata mana chasquishpa, cancuna huillashcata mana uyashun nicpica, chaimanta llucshishpa, cancunapac chaquipi catirishca allpatapish chaillapitac chaspishpa ringuichic. 15Taripana punzhapica Sodoma pueblota, Gomorra pueblota llaquichishcatapish yallimi chai pueblopi causaccunaca llaquita apanga. Chaica, chashnatacmi canga.
Llaquichiccuna tiyanamanta
(Mr 13.9-13; Lc 21.12-19)
16Ñucaca cancunataca ovejacunata atuccunapac chaupita cachac shinami cachani. Chaimanta cancunaca culebra shina yuyaisapa, paloma humilde caichic. 17Cuidaringuichic, mandaccunapacmanpish japichingami. Tandanacuna huasicunapimi macanga. 18Ñucata caticushcamantami llactata mandaccunapacmanpish, jatun mandaccunapacmanpish apanga. Shina cacpimi, paicunamanpish, mana israelcunamanpish ñucamanta huillanguichic. 19Mandaccunapacman japichicpica ama: ‘¿Imatashi nishun?’ nishpa, llaquiringuichicchu. Cancuna rimai callaricpica, Diosmi yuyaita cunga. 20Mana cancunapac yuyaimantachu rimanguichic, ashtahuanpish Diospac Espiritumi, rimana yuyaita cunga.
21Huauquica quiquin huauquillatatac, taitaca quiquin churillatatacmi huañuchiccunaman japichinga. Huahuacunaca taita mamata piñashpami, huañuchiccunaman japichinga. 22Ñucamantami tucui gentecunapac piñashca canguichic. Maijanpish tucuringacaman llaquita apacmi quishpiringa. 23Maijan pueblopi llaquichicpica, shuctac puebloman ringuichic. Israel llactapi manarac tucuiman huillacpimi, Runa Tucungapac shamushca ñucaca cutimusha. Chaica, chashnatacmi canga.
24Yachacucca yachachicmanta mana ashtahuan yachacchu. Servicpish, amota mana ashtahuan yallichu. 25Yachacuc yachachic shina tucushpaca, allimi canman. Servicpish amo shina tucushpaca, allimi canman. Huasipi taita shina ñucata ‘supaicunata mandac Beelzebumi’ nishpaca, cancunatacarin, ¡imatachari ningacuna!
Diosta manchana cashcamanta
(Lc 12.2-7)
26Ima pacalla ruhuashcapish ricuringami, Imata pacalla ruhuashcapish yacharingami. Chaimanta gentecunata ama manchanguichicchu. 27Cancunaman pacallapi nishcataca, achicpi huillanguichic. Ringrillapi huillashcataca, huasi jahua pataman huichicushpa huillanguichic. 28Cuerpota huañuchiccunataca ama manchanguichicchu. Cuerpota huañuchishpapish, almataca mana huañuchi pudingachu. Ashtahuancarin almatapish, cuerpotapish ucu pachaman cachac Diosta manchanguichic.
29Ishcai zhutacunataca shuc cullquillapimi catun. Shina cacpipish, cancunapac Taita mana munacpica, shucllapish pambamanca mana urmanchu. 30Cancunapac umapi mashna acchapish yupashcami. 31Chaimanta gentecunata ama manchanguichicchu. Cancunacarin, achca zhutacunatapish yalli valicmari canguichic.
Jesusmanta huillanata mana pingana cashcamanta
(Lc 12.8-9)
32Maijanpish gentecunaman ñucata caticushcata huillacpica, ñucapish jahua pacha ñuca Taitaman ‘caticmi’ nishpa huillashami. 33Maijanpish gentecunapac ‘mana ricsinichu’ nicpica, ñucapish jahua pacha ñuca Taitapac ñaupapica: ‘Mana ricsinichu’ nishami.
Jesusta caticpi, piñana cashcamanta
(Lc 12.51-53; 14.26-27)
34Ñucataca ama ‘sumac causaita cungapacmi, cai pachamanca shamurca’ ninguichicchu. Mana cushi causaita cungapacchu shamurcani, ashtahuanpish piñanacui tiyachunmi shamurcani. 35Churica taitahuan, huarmi huahuaca mamahuan, nueraca suegrahuan piñanacuchingapacmi shamurcani. 36Huasi ucupurallatacmi piñanacunga.
37Maijanpish taita mamata ñucata yalli cuyacca, mana ñucapacchu. Maijanpish paipac huahuacunata ñucata yalli cuyacca, mana ñucapacchu. 38Maijanpish cruzpi chacatashca shina llaquita mana apasha nicca, mana ñucapacchu. 39Maijanpish quiquin causaita llaquicca chingaringami, ashtahuanpish ñucata caticushcamanta quiquin causaita mana llaquicca quishpiringami.
Imata japina cashcamanta
(Mr 9.41)
40Maijanpish cancunata chasquicca, ñucatami chasquin. Ñucata chasquicca, ñucata cachac Diostami chasquin. 41Maijanpish Dios ima nishcata huillacta chasquicca, Dios ima nishcata huillac japinatami japinga. Cashcata ruhuacta chasquicca, cashcata ruhuac japinatami japinga. 42Maijanpish ñucata catic, yangalla runaman asha chiri yacuta cucca, Diosmanta japina cashcata japingami. Chaica chashnatacmi canga» nirca.
Currently Selected:
MATEO 10: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.