2 TIMOTEO 1
1
Pablo, Timoteoman quipata quillcashcamanta
1Ñucaca Dios munashcamanta, Apunchic Jesucristo acllashca huillac Pablomi cani. Apunchic Jesucristohuan shuclla tucushcamanta, pai cushami nishca causaita huillacmi cani. 2Ñuca cuyashca huahua shina Timoteo, ñucanchic Diospish, Apunchic Jesucristopish canta cuyashpa, llaquishpa sumac causaita canman cushca cachun nishpami quillcani.
Jesucristomanta huillana cashcamanta
3Tutapish, punzhapish canta yuyarishpa paiman mañacushpaca, ñaupa taitacuna ruhuashca shinallatacmi, ñucapish chuya yuyaihuan Diospacta ruhuashpa pagui nicunilla. 4Can huacashcacunata yuyarishpaca ñahui ñahui ricushpa cushichinatami munani. 5Can mana nic tucushpa, alli cric cashcataca yachanimi. Cambac aila Loidapish, cambac mama Eunicepish chashnallatacmi cric carca. Canpish chashnallatac cric cashcataca yachanimi.
6Shina cashcamanta cambac uma jahuapi ñuca maquita churacpi, Dios ima ruhuana cashcata cushcataca, nina huañugricucta causachic shina cutin causachichunmi nini. 7Diosca manchana yuyaita cuc espiritutaca mana cushcachu, ashtahuanpish poderta cuc, cuyaita cuc, shinallatac quiquinllatac jarcarina yuyaita cuc Espiritutami cushca. 8Chashna cashcamanta ñucanchic Apunchic Jesucristomanta huillanatapish, huillacushcamanta ñuca prezu tiyacushcamantapish ama pinganguichu, ashtahuanpish alli huillaita huillacushcamanta llaquita apana cacpica, Diospac poderhuan ñuca shina llaquita apanguilla. 9Diosmi paipaclla causachun nishpa, ñucanchictaca quishpichishpa cayarca. Mana ñucanchic ima allita ruhuashcamanta, ashtahuanpish Dios cuyashcallamantami, Jesucristomanta quishpichirca. Cai shinaca cai pacha manarac callaricpimi, ñucanchicta Diosca cuyashca. 10Cunanca Quishpichic Jesucristota cai pachaman cachashpami, Diosca cuyac cashcata ricuchirca. Paimi huañuita chingachishpa, quishpirinamanta huillashpa, mana chingarina causaita ricuchirca.
11Cai alli huillaita huillachunmi ñucataca huillac cachunpish, yachachic cachunpish acllashpa cacharca. 12Chashna huillac cashcamantami tucui cai llaquicunataca apacuni. Ashtahuanpish ñuca pita crishcatapish, ñucaman mingashcatapish, shamuc punzhacaman huacaichina cashcatapish allimi yachani. Chaimantaca manatac pinganichu.
13Canca ñuca ima shina alli yachachishca shinallatac, Jesus-huan shuclla cashcamantaca paita crishpa, paita cuyashpa causachunmi nini. 14Ñucanchicpi causacuc Diospac Espíritu ayudacushcamantaca, Dios mingashca sumac yachanacunataca alli huacaichingui ninimi.
15Asia llactamanta caccuna tucui mashna ñucataca shitashpa rishcataca, canllatac yachanguimi. Paicunapurapica Figelopish, Hermogenespish carcami. 16Apunchic Jesusca Onesiforotapish, tucui paipac huasi ucupi causaccunatapish mai llaquichun ninimi. Paimi ñuca prezu cacpica, tauca cutin mana pingashpa ñucata ricuc shamushpa cushichic carca. 17Roma llactaman chayashpapish, mana samarishpami taringacaman ñucataca mashcarca. 18Chashna cashcamanta Apunchic Jesusllatac tucuita taripana punzhapica, mai llaquishca cachunmi nini. Efeso pueblopi ima shina allicunata ruhuashpa cushichishcataca, canllatacmi alli yachangui.
Currently Selected:
2 TIMOTEO 1: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.