Roma 15

1HAMÖTA tavat ae hwege he ka hadruâ hnyat ae sënyin, ke ca he ka osenyini öta thibi. 2E so ate me he hia ka osenyinâ at ae hakekeny köta hnyi ûnyi ae so, me hnân okaukahwa. 3Anyin a haba Keriso ame ca ka osenyinâ e; ke helâ me hna sihnalimen, ka habe, Haba hna û hnen tavat adre me û u, me ame ta but huk. 4Anyin a haba ta je ûnyi adre sihnalimen adrem, me adre me sihnalimen hnân nʼ öta, me me hu anyita geju hnen hokhnyok me kaukahwa ûnyi hnyi je hna sihnalimen. 5E so e ham köbun hnen Khongon lingvec me kaukahwa he ka tha hnyok hoton Keriso Iesu: 6mʼ Öbun e he ka tha ogânâ Khong, a Kamen Tu hota Iesu Keriso, ge hnyok a khaca me hnyem a khaca. 7Anyin a wale ûkapköuâ ju öbun helâ me hna kop öbun hnen Keriso, hnân ogânâ Khong. 8Anyin a inya oge me ha, ka habe, haba Keriso ame bi athnyabainy peritom hobi kâu hnathu anyin Khong, me me he ka ohmâ hna ha bânâ ka lakamöta, 9me me he Aten ta je hnyei ka ogânâ Khong can anyin ibetengiö baû, helâ me hna sihnalimen, ka habe,

Wale me inye he ka oganö u hnyi wanben Aten ta je hnyei,

Me khumöngö iâm.

10Ke haingen minya, ka habe,

Aten ta je hnyei lö, tha senyin dö me je lakeiny.

11Ke wale minya eang, ka habe,

Ogânâ thö Than, öbun hia Aten ta je hnyei;

Ke ogânâ thö e öbun ta je hnyei hia thithö.

12Ke wale hmetu ang, haingö Isaia, ka habe,

Ame he ka hu iwân ûnyi ga Jese,

Ke at ame tot he ka muso Aten ta je hnyei;

Ame he ka labageju kâu hnen Aten ta je hnyei.

13E so e he Khongon geju ka ounöngöti öbun ge senyin me hnahic hnyi labageju, me me gan anyibun geju hnen man maniny Hanu Kap.

14Ke mou but eû hnyi hnyekuk gabun je liamekeiny mönya, a öbun e unöngötö ge hwakecin ae so, ke unöngöt ge metâ hia, ke e khanʼ öbun he ka ûsihwegei öbun köu. 15Ke oge me sihnalimen hwegiâ köbun ge ta je ûnyi he ka oûnykûmi öbun, ûnyi hnyi ibetengiö baû a ham könya Khong, 16me inye he ka bi athnyabai Iesu Keriso ka Aten ta je hnyei, he ka ânyâ hanymen at bihut hnyi ûthumetu ae so anyin Khong, me me he ka kap soâ hut wale Aten ta je hnyei, me okabi ödra hnen Hanu Kap. 17Anyin a wale e hu gak hnân he ka ohobeluâ ge ta je ûnyi anyin Khong ga Iesu Keriso. 18Anyin oge me ca he ka hwege ka ha ke ûnyi, wale ame ca tha mâdrâ mönya Keriso hnân okûâ ûling ka Aten ta je hnyei, hnen hofuc me huliwa, 19hnen maniny ta je haten me ûöman, me man maniny Hanu Kap; wale a hwân hnyi Jerusalema igigilo ke ne o but hnyi Iluriko oge me khetâ ûthumetu ae so anyin Keriso; 20eke, oge me elâm deny he ka khetâ ûthumetu ae so hnyi je dok adre me tiga ca ha hnyin iö Iesu, wâ oge nye he ka op hon taben anyin ke at; 21ke so bi, helâ me hna sihnalimen, ka habe,

Adre me he ka bwela, wale tavat adre me ca hâiâ e kodra,

Ke ame he tavat adre ca hnyi long ka wâ ûnykûme.

22Ke se bia hna ovheli nya he ka he but köbun: 23ke walang ang, me ba hmetu hanymök hnyi je ke keihen hnyei ang, ke se hia ta je huna oge me bewek gan hmâ he ka he but köbun, 24iny ka he Sepania ai (anyin oge me ûnykûme he ka iouny möbun hnyi ûhek, ke öbun e he ka su nya, ama bâu ka sekuk hnyi iouny a öta) 25—ke walang ang, inya oge me he Jerusalema ai, he ka bi athnyabainy wakap. 26Anyin a weny at Makedonia me Akaia he ka ûhnöhnö hnân betenge ka wakap a tavat ae theduoc hnyi Jerusalema, 27Eke, wale wedra ae so; ka e unyidra anyidra ta je ûnyi. Anyin a ne kap hnen Aten ta je hnyei ta je ûnyi anyin hanu ûnyi gadra, me e ûcû minya kodra he ka kap bi ta je ûnyi anyin unyin. 28Anyin a wale, iny ka hia but umo e, me ohmâ kodra wan eang, me oge me he ka he unyibun iny ka he Sepania ai. 29Ke e khanö nya, a iny ka he ka he köbun, me oge me he ka o but hnyi unöngötiny hnahic ge Keriso.

30Hnyat me lakeiny lö, inya oge sumat öbun ûnyi ge Tuhöta Iesu Keriso, me ûnyi ge ibetengiö anyin Hanu, möbun e he ka tha hic ûjöng mönya ka Khong hobi könya; 31me me hûgûnö nya but ge tavat adre me ca ûling hnyi Juda, me me kap soâ hnen wakap anyik huliwa hobi kodra hnyi Jerusalema; 32me inye he ka o köbun hnyi senyin ûnyi ge weny Khong, me otin e he ka tha kahwa. 33E so e unyibun hia thithö Khongon hnahic. Amen.

Currently Selected:

Roma 15: IAAI

Highlight

Copy