2 Ko̱ri̱nto̱ 13
13
Zoz ci vu̱rrto̱
1Bali arrak ki̱vo̱nnu̱ng lak rama, i̱yo̱ko̱ korongi ki̱vo̱nnu̱ng bo̱do̱k. Ki ming azi zoz ci Ta̱mu̱ta̱dde̱no̱ ne, “Ming anyak e̱e̱t ci ozoz azi ne u̱tu̱gu̱ e̱e̱ti̱ imma gerzet, orong ming anyak bbacak rama icima i̱i̱yo̱#13:1 Bbacak rama icima i̱i̱yo̱: Orong lo̱ti̱nno̱wa̱ cik Musesi bbacak rama icima i̱i̱yo̱ lo̱ki̱ka̱ kar apaktek ol e̱e̱t zoz ju̱rru̱m. IkebDeuteronomy 19:15; Ma̱te̱yo̱ 18:16; 1 Ti̱mo̱te̱yo̱ 5:19; I̱bu̱ru̱ 10:28. cik icinnet ba̱ci̱ neci.”#Deuteronomy 19:15 2Baling kokko anna keronakkung lak rama, ku̱du̱wa̱u̱ng kedezzung atin ming iróng e̱e̱ti̱ imma abiliz mu̱nye̱n. Kaave anna reena ngatinno̱ng i̱yo̱ko̱, ma̱i̱je̱ ngatu ka̱du̱wa̱kku̱ng zoz ci okkomi. 3Kozozi anna zoz ci i̱ye̱le̱ka̱ Ki̱ri̱sto̱. Ming okko enne adiman zoz cunne, iróng enne alali, een ti̱i̱r. 4Ming alali enne nu̱nu̱n ngati odode ol nonno ta̱la̱ke̱ca̱, itinga daiza, abak komize ci Ta̱mu̱ta̱dde̱no̱. Kalali naga ki bali Ki̱ri̱sto̱ ke̱. Abarik atin kabaito naga doize ci Ta̱mu̱ta̱dde̱no̱, ki bali Ki̱ri̱sto̱ ke̱, abunna ka̱li̱ngli̱nge̱kku̱ng.
5Timan ele cunne kar ruba ming anyai i̱nna̱ tu̱we̱ne̱t de̱de̱. Ming anyai i̱nna̱ tu̱we̱ne̱t neci, okko a̱gga̱ aave Ki̱ri̱sto̱ ngatinne. Ming iróng Ye̱su̱ Ki̱ri̱sto̱ abak ngatunne, u̱yu̱we̱ i̱nna̱ timaninet neci. 6Ki̱no̱ni̱ anna a̱gga̱yyu̱ atin niga kar zin iróng atin naga kabaci timaninet zo̱ze̱ ci Ki̱ri̱sto̱. 7Kalayya Ta̱mu̱ta̱dde̱n abunna ming abilizzu niga kaal cik gerzek. Iróng kalayya Ta̱mu̱ta̱dde̱n niko ki ci korongnyya ki̱ye̱lte̱yya̱ ol ke̱e̱ggi̱nna̱ naga ol cik kabunanna, abarik abunna ming ogonnu kaal cik abunna, ming kabaccit naga timaninet nu̱nu̱n. 8Kogon naga gi̱i̱ co̱de̱ ṯok ci kanuwe kaviyak cik Ki̱ri̱sto̱ abunna, iróng kadang zoz ci een de̱de̱, abarik kanu zoz ci een de̱de̱ do̱. 9Ming iróng naga kokkomi nu̱nu̱n, katalninna eci niga okkomnu, kalayya Ta̱mu̱ta̱dde̱n abunna ming ogonnu ju̱rru̱m kommog baiz necu. 10Keherakkung anna i̱ge̱t waraga cu ming ngen kuzucaung. Gi̱i̱ ci zin iróng anna kerenyekkung doize ci aanya Manyi annita, ming kokko ka̱kku̱na̱ku̱ng. Aanya ba̱li̱ye̱ enne doiz neci kar keelaung, iróng kegerezannung.
Zawinet ci Pa̱u̱lo̱ vu̱rrto̱
11I̱yo̱ko̱ zin, Gotonogga ki ngonogga tu̱we̱nta̱, a̱vvu̱t labak. U̱tu̱gu̱z kaal ju̱rru̱m, u̱zu̱tte̱ zoz ci ku̱du̱wa̱ anna ko̱. Abait ki ol labak. Kala Ta̱mu̱ta̱dde̱n wa anyak rezinet ki gano kar ka̱vvu̱ ngatinno̱ng.
12Izzac ol zi̱nze̱tti̱nne̱ cik voorik a̱li̱le̱. 13I̱tto̱na̱kku̱ng ol wak a̱tu̱we̱ do̱o̱k zawinet cinne̱ng.
14Anyik de̱ti̱ne̱t wa Manyi Ye̱su̱ Ki̱ri̱sto̱ ki rezinet wa Ta̱mu̱ta̱dde̱no̱ ki wowonet ci Vongiz ci A̱li̱le̱ ka̱vvu̱to̱ ngatinno̱ng do̱o̱k.
Currently Selected:
2 Ko̱ri̱nto̱ 13: tex
Highlight
Copy
Compare
Share
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
