LEVITIKO 26
26
1Kuga ta dum̃amu mari te nasup̃e sikai mau, go kuga ta dum̃amu sike te nasup̃e taeana mau, kite te nasup̃e lawodu mau, go kuga ta sike te nasup̃e ni vatu doko navanua animu mau, naga kuga ta suai natano paki nia: nalakena kinau a pei Yehovah Sup̃e animu. 2Kuga vavaigoro sabbath aginau maga, po dodomadagani tokora tapu aginau: kinau a pei Yehovah.
3Waina ku pe surata doko natawonakiana aginau maga, po pavaigoro natip̃akiana aginau maga, po do mari pataka da; 4Ragi wanogoe aga wo dua mu usa ni p̃aunarago animu maga, go navanua ega wo pitua ki navinaga, go nakau maga ni vanua euga wo dau ki nawada maga. 5Go ragi ni nawokalesueana animu ega wo pa parati ki ragi ni nalolovaeana ni vaine, go ragi ni nalolovaeana ni vaine ega wo pa parati ki ragi ni nasapurakiana: go kuga wo ganikani po puka, po doko p̃ia doko navanua animu. 6Go aga wo pitua ki natam̃ateana ega toko navanua, go kuga wo one natano, go te naata ega wo da mari mu kuga mataku mau: go aga wo kopasi lua nalo mauri sa maga m̃elu dua ki navanua, go lova ega wo da duaduru navanua animu mau. 7Go kuga wo kopasi lua tea kokona ki mu maga, go euga wo dowo ki lova naraemu. 8Go eu lima kakamu euga wo kopasi lua p̃onotia sikai, go p̃onotia sikai kakamu euga wo kopasi lua manu rualima sikai: go tea kokona ki mu maga euga wo dowo ki lova naraemu. 9Go aga wo leo punusi mu, po mari mu kuga vavakawora po laapa; go aga wo lawosoki navasasokiana aginau ega toko mu. 10Go kuga wo gani tea ni natauakiana vea waina ku pai a tuai, go kuga wo daraku lua tea tuai nalakena tea vau. 11Go aga wo lawo ki nasum̃atokoana aginau m̃aleoputo kakamu: go naatagu ega wo da mamarago ki mu mau. 12Go kinau aga wo doko m̃aleoputo kakamu, go aga wo pei Sup̃e animu, go nimu kuga wo pei narei aginau. 13Kinau a pei Yehovah Sup̃e animu, waina a piragi lua mu m̃elu dua ki navanua ni Ityipt umai, naga kuga ta pei naviti adeada mau; go a po p̃ori kotovi tea walagoto maga ni nakau ni nanoa animu, po mari mu ku surata leana.
14Ma waina ku pe ta dogo parati ki nau mau, po da do mari pataka ni natip̃akiana maga mamau puti waia mau; 15Go waina ku pe tip̃adoa natawonakiana aginau maga, go waina nap̃op̃omu e pe mamarago ki navasap̃otaeana aginau maga, go ku pe ta do mari pataka ni natip̃akiana aginau maga mamau puti mau, ma ku pe tapiri navasasokiana aginau; 16Kinau ma aga wo mari tea waia paki mu; aga wo dip̃aki lua tea mataukiana warua ega wo dap̃augoro mu, sova loku, go nasasanaana ni navivitinuana waina ega wo gani puoli ki namata maga, po mari namauriana ega wo siri puoli: go kuga wo sapura ki m̃oli ki napati animu, nalakena tea kokona ki mu maga euga wo gani a. 17Go aga wo nakonako sa ki mu, go kuga wo pei tea atugiana narae ni tea kokona ki mu maga: tea maga waina eu pilosi mu euga wo maramara dap̃au mu; go kuga wo sava ragi waina te naata e da kopasi mu mau. 18Go waina ku pe ta dogo parati ki nau nalo ni navaratiana maga wanogoe mau, ragi wanogoe aga wo moro parati mu ega vaka larua nalakena namarinaleosaana animu maga. 19Go aga wo dapera ki nap̃op̃o‐vakilagi‐ana ni nakasuaana animu; go aga wo mari nakoroatelagi animu ega tapala airon, go maramana animu ega tapala brass: 20Go nakasuaana animu ega wo pei tea vitua‐ki‐m̃oli‐kiana: nalakena natano animu ega wo da pitua ki navinaga, go nakau maga ni navanua euga wo da dau ki nawada mau. 21Go waina ku pe to surata panop̃ota kinau po da dogo parati kinau mau: aga wo moro parati mu sala larua p̃ota ki nasasanaana sa, pataka ni namarinaleosaana animu maga. 22Go aga wo dip̃aki lua nalo mila maga ni namalasi euga vaki m̃aleoputo kakamu, waina euga wo dape pavakoto piakirikiri animu maga, po mari sa ki katel animu maga, po mari mu kuga visa maau; go napua animu maga euga wo pei maso maladi. 23Go waina navaratiana maga wanogoe eu pe ta mari mu ku pe midoaki doa mau, ma ku pe to surata panop̃ota kinau: 24Ragi wanogoe kinau ma aga wo surata panop̃ota ki mu; go aga wo atugi mu sala larua p̃ota nalakena namarinaleosaana animu maga. 25Go aga wo mari lova ega rowo paki mu, waina ega wo mari nasikoana nalo ni navasasokiana; go kuga wo pei tea viragi‐saisai‐kiana doko natokoana animu maga: go aga wo dip̃aki lua nasasanaana sa ega wo pakilina m̃aleoputo kakamu; go kuga wo pei tea vituakiana paki nam̃elearu ni tea kokona ki mu maga. 26Ragi waina aga wo mari p̃ori tiko ni navinaga animu, nagoroi rualima sikai euga wo daoni bred animu upu sikai maau, go euga wo dowogi bred animu ega liliu paki mu: go kuga wo ganikani po da puka mau.
27Go waina ku pe wo da dogo parati kinau mau nalo ni tea maga mamau puti wanogoe, ma ku pe to surata panop̃ota kinau; 28Ragi wanogoe kinau ma aga wo surata panop̃ota ki mu ki namaetoana vavaga; go kinau aga wo moro parati mu ega vaka larua nalakena namarinaleosaana animu maga. 29Go kuga wo gani nap̃okasi ni natumu naanoai maga, go nap̃okasi ni natumu nagoroi maga. 30Go aga wo mari peresi tokora vakilagi animu maga, po dae kotokotovi nasup̃e lawodu ni elo animu maga, po nadi ki nap̃atoko mate animu maga euga toko nap̃atoko ni idolo animu maga; go naatagu ega wo mamarago ki mu. 31Go aga wo mari natokoana animu maga euga vei maso maladi, po mari tokora tapu animu maga euga maladi, go aga wo da sidogo nadam̃o ni nap̃o lolo animu maga mau. 32Go aga wo mari navanua ega vei masop̃alo: go tea kokona ki mu maga waina eu doko asa doko euga wo saram̃akoto. 33Go aga wo daperavera ki mu m̃aleoputo ni nalauna maga, go aga wo sai lua lova po kopasi mu: go navanua animu ega wo pei maso maladi, go natokoana animu maga euga wo pei masop̃alo. 34Ragi wanogoe navanua ega wo maro sabbath aneana maga, sara naaleatia waina e maladi doko, go nimu ku doko navanua ki tea kokona ki mu maga doko; ragi wanogoe navanua ega wo maromaro, po maro sabbath aneana maga: 35Go sara naaleatia waina e pei maso maladi doko, ega wo peani namaromaroana; namaromaroana waina e dika asa ragi ni sabbath animu maga ragi waina nimu ku doko asa doko. 36Go nalo ni te seara kakamu waina eu ko mauri doko, aga wo doropusi nap̃ilakeana ega toko nap̃op̃oda navanua maga ki tea kokona ki da maga: go nasau ni naulu nakau waina nalagi e sui pulua ki nia, ega wo kopasi ra; go euga wo sava, dapala naata sikai e do sava dua ki lova; go euga wo dowo ragi waina te naata e da kopasi ra mau. 37Go euga wo dum̃ada dapilagona ara ragi waina te naata e da kopasi ra mau, dapala waina eu pe sava dua ki lova: go kuga wo da peani nakasuaana naga kuga lawodu narae ni tea kokona ki mu maga. 38Go kuga wo mate puoli m̃aleoputo ni nalauna maga, go navanua ki tea kokona ki mu maga euga wo gani sua mu. 39Go te seara kakamu waina eu ko doko euga wo siri puoli, nalakena namarinaleotageleana adeada doko navanua maga ki tea kokona ki mu maga; go nalakena namarinaleotageleana maga ki tamada maga, euga wo siri puoli sikoti ra. 40Go euga wo noasai namarinaleotageleana adeada, go namarinaleotageleana ki tamada maga nalo ni natapiriana adeada waina eu mari a paki nau, go naga dapala waina nara eu surata panop̃ota paki nau, dapala nogoe kinau ma a surata panop̃ota ki da, 41Po piragi ra umai paki navanua ki tea kokona ki da maga: go ragi wanogoe, waina nap̃op̃oda maga waina eu da pei tea tovadaviviana mau, eu pe vakitano, go waina eu pe suasua ki navaratiana ni namarinaleotageleana adeada; 42Ragi wanogoe aga wo midoaki navasasokiana aginau paki Yakob; go navasasokiana aginau paki Isaak, go aga wo moro midoaki navasasokiana aginau paki Abraham; go aga wo midoaki navanua. 43Go navanua ega wo pei tea toropusiana pae ara, go ega wo maro sabbath aneana maga, ragi waina e pei maso maladi doko masale ki da; go nara euga wo suasua dape navaratiana ni namarinaleotageleana adeada: nalakena eu dip̃adoa navasap̃otaeana aginau maga, go nalakena nap̃op̃oda eu mamarago ki natawonakiana aginau maga. 44Ma ragi waina euga ko doko navanua ki tea kokona ki da maga doko, aga wo da dip̃adoa ra, go aga wo da mamarago ki da mau, naga aga ta mari puoli ki da, po da dapiri navasasokiana aginau paki da: nalakena kinau a pei Yehovah Sup̃e adeada: 45Ma nalakena nara, aga wo midoaki navasasokiana ki tea matua vea adeada maga, waina a piragi lua ra m̃elu dua ki navanua ni Ityipt umai namata ni nalauna maga, naga aga vei Sup̃e adeada: kinau a pei Yehovah.
46Tea maga wanogoe eu pei natawonakiana maga go navasap̃otaeana maga go nawotaeana maga, waina Yehovah e mari ra namawota kakana go ni Israel natuna maga tava Sinai, pae nam̃elearu ni Moses.
Currently Selected:
LEVITIKO 26: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
