LEVITIKO 20
20
1Go Yehovah e pasa paki Moses, po naga, 2Go p̃a noa ki Israel natuna maga, po naga, Te naata sikai ni Israel natuna maga, kite ni nam̃enaki maga waina eu m̃enaki‐atatoko Israel, e pe vitua ki te naworana paki Molok; naata wanogoe ega vei tea toropusiana paki namateana: narei ni navanua euga nadi a ki vatu. 3Go naraegu ega wo kasua dip̃a naatam̃oli wanogoe, go aga wo daelua e m̃elu dua ki narei aneana; nalakena e pitua ki naworana sikai paki Molok, po mari tokora tapu aginau e loa, po mari m̃oli ki nagisagu tapu. 4Go waina narei ni navanua eu pe tasuru ki namatada padua ki naatam̃oli wanogoe, ragi waina e pitua ki naworana paki Molok, go eu pe ta doropusi a paki namateana mau: 5Ragi wanogoe naraegu ega wo kasua dip̃a naatam̃oli wanogoe, go dip̃a naworaworana, go aga wo daelua e m̃elu dua ki narei adeada, nara ma tea maga mamau puti waina eu dausi a, naga euga maripele dausi Molok. 6Go naata waina e pe va punusi tea maga waina naata tapu e sake ara, go tea tapu vakamaligo maga, naga ega maripele dausi ra, naata wanogoe ma naraegu ega wo kasua dip̃a e, go aga wo daelua e m̃elu dua ki narei aneana. 7Nalakena tea wanogoe kuga tum̃amu dapugoro mu, go kuga tapu: nalakena kinau a pei Yehovah Sup̃e animu. 8Go kuga vavaigoro parati ki natawonakiana aginau maga, po do mari ra: kinau a pei Yehovah waina a mari mu ku dapu. 9Nalakena naata waina e pe vasa sa ki tamana kite p̃ilana, naata wanogoe ega vei tea toropusiana paki namateana lomau: e pasa sa ki tamana kite p̃ilana; nadana ega toko nap̃auna. 10Go naata waina e pe maripele nagoroi ki tea ni m̃aladigi ki nia, naata wanogoe ma nagoroi waina e maripele asa, nara dua eroga wo pei tea toropusiana paki namateana lomau. 11Go naata waina e pe one sikoti nagoroi ki tamana, e lagai pakasa ki nam̃alam̃alaana waina e pei agi tamana: eroga wo dua pei tea toropusiana paki namateana; nadada ega toko nap̃auda. 12Go waina naata sikai e pe one sikoti sulina nagoroi, nara dua eroga wo pei tea toropusiana paki namateana lomau: ero mari nawosiana sa; nadada ega toko nap̃auda. 13Go waina naata sikai e pe one sikoti naanoai dakiusi eu one sikoti nagoroi, nara dua ero mari namamaragokiana: eroga wo pei tea toropusiana paki namateana lomau; nadada ega toko nap̃auda. 14Go waina te naata sikai e pe vuati nagoroi sikai go p̃ilana, tea wanogoe e pei nasigisigileoana: euga wo pei tea tap̃arakiana ki nakapu, nae go nara; naga nasigisigileoana ega ta doko m̃aleoputo kakamu mau. 15Go waina te naata sikai e pe one sikoti nalo tuavati sikai, naata wanogoe ega vei tea toropusiana paki namateana lomau: go kuga mari punue nalo tuavati wanogoe. 16Go waina te nagoroi sikai e pe vaki m̃aladigi ki nalo tuavati sikai po one sikoti a, p̃a mari punue nagoroi wanogoe, go nalo tuavati: eroga wo pei tea toropusiana paki namateana lomau; nadada ega toko nap̃auda. 17Go waina te naata sikai e pe vuati gorena, tamana natuna nagoroi, kite p̃ilana natuna nagoroi, go e pe vunusi nam̃alam̃alaana aneana, go gorena e pe vunusi nam̃alam̃alaana ki naata wanogoe; tea wanogoe e pei naleo sikai ni namaliereana; go eroga wo pei tea taeluaana namata ni narei adeada natuda maga: naata wanogoe e lagai pakasa ki nam̃alam̃alaana ki gorena; go ega wo dapetape namarinaleotageleana aneana. 18Go waina te naata sikai e pe one sikoti nagoroi sikai ragi waina e sua namasakiana aneana, po lagai pakasa ki nam̃alam̃alaana aneana; e lagai pakasa ki luku aneana, go nagoroi wanogoe e lagai pakasa ki luku ni nadana: go nara dua eroga wo pei tea taeluaana m̃elu dua ki narei adeada. 19Go p̃a ta lagai pakasa ki nam̃alam̃alaana ki p̃ilam̃a taina, kite ki tamam̃a gorena: nalakena tea waina e mari namatarau garagaara aneana e m̃alam̃ala, nara dua eroga tapetape namarinaleotageleana adeada. 20Go waina te naata sikai e pe one sikoti nagoroi ki aloana, nae e lagai pakasa ki nam̃alam̃alaana ki aloana: nara eroga wo dapetape namarinaleosaana adeada; eroga wo dim̃o. 21Go waina te naata sikai e pe vuati nagoroi ki taina, tea wanogoe e loa: e lagai pakasa ki nam̃alam̃alaana ki taina; eroga wo dim̃o.
22Nalakena tea wanogoe kuga vavaigoro parati ki natawonakiana aginau maga mamau puti, go navasap̃otaeana aginau maga mamau puti, po do mari pataka da: naga navanua waina kinau a piragi mu umai paki asa naga kuga toko asa doko, ega ta lua ki mu pano mau. 23Go kuga ta surata dausi natomariana maga ki nalauna vea, waina a kopa lua ra naraemu: nalakena nara eu mari naleo maga mamau puti wanogoe, go nalakena tea wanogoe kinau a karaikita ra asa. 24Ma a noa ki mu naga, Nimu kuga veanipioli ki navanua adeada, go aga wo dua mu asa naga kuga veani a, navanua sikai waina e do sara ki milk go ki honi: kinau a pei Yehovah Sup̃e animu, waina a mari p̃otae mu padua ki narei p̃ota maga. 25Nalakena tea wanogoe kuga atae p̃otae nalo tuavati dautau go tea loa, go manu dautau go tea loa: go kuga ta dum̃amu mari mu kuga vei tea mamaragokiana pae nalo tuavati, kite pae manu, kite pae te navatuna sikai waina e do kakaravi natano, waina a noa ki p̃otae mu asa naga e loa. 26Go nimu kuga maginau pei tea tapu: nalakena kinau Yehovah a dapu, go a mari p̃otae mu padua ki narei p̃ota maga, naga kuga vei aginau.
27Go naanoai sikai, kite nagoroi sikai, waina naata tapu e pe sake asa, kite waina e pe vei tea tapu vakamaligo sikai, ega vei tea toropusiana paki namateana lomau: euga nadi a ki vatu: nadana ega toko nap̃auna.
Currently Selected:
LEVITIKO 20: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
