PAKI HEBERU MAGA 4
4
1Nalakena tea wanogoe tuga mataku, mase ragi waina nasaiana sikai e pei tea toropusiana naga tuga sili paki namaromaroana aneana, te naata sikai kakamu e pe wo da pa paratiki nia mau. 2Nalakena narogorogoana wia e pei tea rogorogokiana paki gida, dapala waina e pei tea rogorogokiana paki da: ma navasaana ni narogoana e da mari m̃ata ki da mau, nalakena e da pei tea marisarisariana mau ki nasaralomauana sikoti tea maga waina eu dogo. 3Nalakena nigida waina tu saralomau sua tu sili paki namaromaroana wanogoe, dakiusi waina e naga,
Dapala waina a pivisa namaetoana aginau,
Naga euga wo da umai sili paki namaromaroana aginau mau:
Go nawosiana maga eu pei tea marisuaana pae nanadiki‐laketanoana ni maramana. 4Nalakena e noa sua doko tokora sikai nalo ni naaleatia kelarua dapala waia. Go Sup̃e e maromaro naaleatia kelarua m̃elu dua ki nawosiana aneana maga mamau puti; 5go tokora waia e moro naga,
Naga euga ta umai sili paki namaromaroana aginau mau.
6Nalakena tea wanogoe nalakena e doko naga te naata seara euga sili paki asa, go tea maga waina narogorogoana wia e pea pei tea rogorogokiana paki da eu da sili paki asa mau nalakena narogopiriana, 7e moro dawona ki naaleatia sikai, Masoso, e noa doko David, edaku ki ragi varau dapala nogoe, dapala waina e pea pei tea noaana, e naga,
Masoso ku pe rogo nadaleona,
Kuga ta mari nap̃op̃omu ega kasua mau.
8Nalakena Yoshua e pe tua sua ra namaromaroana, e pe ta edaku ki tea wanogoe pasa nalo ni naaleatia p̃ota sikai mau. 9Nalakena tea wanogoe namaromaroana sikai ni sabbath e magi narei ki Sup̃e doko. 10Nalakena tea waina e sili paki namaromaroana aneana nae ma e maromaro m̃elu dua ki nawosiana aneana maga, dakiusi waina Sup̃e e maromaro m̃elu dua ki aneana. 11Nalakena tea wanogoe tuga mari m̃arekareka naga tuga sili paki namaromaroana wanogoe, naga te naata sikai ega ta dowo mau paki naviseikiana sikai maau wanogoe ni narogopiriana. 12Nalakena navasaana ki Sup̃e e mauri, go e pei toro kasua, go e makali liu sara lova waina nawokana e dua, go e do puri pa pa paki natap̃otaeana ni namauriana anigida go ni naatagida, ni kolopuda maga go ni namaraeda, go e do midoaki p̃otae mamidodoarogoana maga go namidodoaleoana maga ni nap̃op̃ogida. 13Go tea tawonakiana sikai e da doko mau waina e da doko lina naraena mau: ma naleo maga mamau puti eu m̃alam̃ala go eu doko lina ki namata ni tea waina tu peani naatusigida‐ana paki nia.
14Nalakena tea wanogoe waina tu peani tea viri warua liu warua sikai waina e pa duaduru nakoroatelagi maga, Yesu Natu ni Sup̃e, tuga tape soki nanoasaiana anigida. 15Nalakena tu da peani tea viri warua liu sikai waina e mari sa dogo sikoti gida namanainaiana anigida maga mau, ma tu peani sikai waina e pei tea maridogoana sua nalo ni naleo maga mamau puti pae natakiusi‐gida‐ana masale ki namarinaleosaana. 16Nalakena tea wanogoe tuga viviari umai paki m̃aladigi ki malotokoana ni nasaup̃iaana, naga tuga tape nadodomiana, po pap̃ai nasaup̃iaana raki nasilaeana ragi kakana.
Currently Selected:
PAKI HEBERU MAGA 4: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
