LUKASE 1
1
1Theofilose yo a hlomphegago, batho ba bantši ba lekile go ngwala taodišo ya ditaba tše di diregilego mo go rena. 2Ba ngwadile tše re di boditšwego ke ba ba di bonego ka mahlo go tloga mathomong a tšona. Ke bona babegi ba Taba ye Botse ya Modimo. 3Le nna ge ke seno nyakišiša ditaba tše ka moka gabotse go tloga mathomong a tšona, ke bone go lebane gore ke go ngwalele tšona ka lenaneo le lebotse, 4gore o tle o tsebe gore tše o di rutilwego ke nnete.
Johanese Mokolobetši o tla tswalwa
5 Mehleng ya ge Heroda e le kgoši ya naga ya Judea, go be go na le moprista yo mongwe yo leina la gagwe e bego e le Sakaria, e le wa kgoro ya boprista ya Abia. Mosadi wa gagwe e be e le Elisabetha, le yena e le wa leloko la boprista. 6Bobedi bja bona ba be ba phela ka mokgwa wa go kgahla Modimo, ba phetha melao le ditaelo tšohle tša Morena gabotse. 7Ba be ba se na bana ka ge Elisabetha e be e le moopa, le gona ka babedi ba be ba šetše ba tšofetše kudu.
8Ka tšatši le lengwe Sakaria o be a dira modiro wa gagwe wa boprista ka Tempeleng, ka ge e be e le mayo a kgoro ya gabo. 9Go ya ka setlwaedi sa baprista, o be a kgethilwe ka matengwa go yo thuntšha seorelo aletareng. Ka gona a ya ka Tempeleng ya Morena, 10mola lešaba ka moka la batho le eme ka ntle le rapela ka nako ya ge go thuntšhwa seorelo.
11Morongwa wa Morena a iponagatša go yena a eme ka letsogong la go ja la aletare ya seorelo. 12Ya re ge Sakaria a mmona a tšhoga, a boifa. 13Morongwa a re go yena: “Se boife, Sakaria, gobane Modimo o kwele thapelo ya gago. Mosadi wa gago, Elisabetha, o tla go belegela morwa, mme o mo thee leina la Johanese. 14Go tswalwa ga gagwe go tla go thabiša wa hlalala, gwa thabiša le ba bantši, 15 gobane e tla ba yo mogolo pele ga Morena. A ka se tsoge a nwele beine le seno se bogale. O tla tlala Moya wo Mokgethwa go thoma ge a belegwa, 16gomme a sokollela Baisraele ba bantši go Morena Modimo wa bona. 17 O tla eta Morena pele a sa boife, a le bogale bjalo ka moprofeta Eliya. O tla boelanya bana le botatagobana; ba ba sa theeletšego o tla ba bušetša tseleng ye e lokilego, gore a lokišetše Morena setšhaba sa gagwe.”
18Sakaria a re go morongwa: “Ke tla tseba bjang ge o bolela nnete? Gape ke mokgalabje, mosadi wa ka le yena o tšofetše.”
19 Morongwa a mo fetola a re: “Ke nna Gabriele yo a dulago a emetše go hlankela Modimo. Ke romilwe go tlo bolela le wena, go go begela ditaba tše dibotse tše. 20Fela ka ge o se wa dumela se ke go botšago sona, sona se se tlago phethega ka nako ya sona, o tla ba semumu, wa se kgone go bolela, gwa ba gwa fihla letšatši le seo ke go boditšego sona se tlago phethega.”
21Ge e le lešaba lona le be le letetše Sakaria, mme le makaditšwe ke gore na o diegišitšwe ke eng ka Tempeleng. 22Ge a etšwa o be a sa kgone go bolela, gomme bona ba lemoga gore o bone pono ka Tempeleng. Ka ge a be a mumufetše o ile a bolela le bona ka diatla.
23Ge nako ya gagwe ya go dira modiro wa gagwe ka Tempeleng e fetile, a boela gae. 24Ka morago ga lebakanyana Elisabetha, mosadi wa gagwe, a ima, mme a dula ka gae dikgwedi tše tlhano, a re: 25“Se ke se ke se diretšwego ke Morena. Bjale ke gona a nkgopotšego, a mphumola go goboga bathong.”
Jesu o tla tswalwa
26Ka kgwedi ya boselela ya ge Elisabetha e le moimana, Modimo a roma morongwa Gabriele motseng wo mongwe wa Galilea wo o bego o bitšwa Nasaretha, 27 go kgarebe ye nngwe ye e bego e beeleditšwe ke monna yo mongwe wa moloko wa Dafida, yo leina la gagwe e bego e le Josefa. Leina la kgarebe yeo e be e le Maria. 28Morongwa a ya go yena, a fihla a mo dumediša a re: “Dumela, wena mokgahlago Modimo! Morena o na le wena!”
29Maria a tlabega kudu ge morongwa a realo, gomme a ipotšiša gore na tumedišo yeo e ka ba e ra go reng. 30Morongwa a re go yena: “Se tšhoge, Maria, gobane o kgahlile Modimo. 31 O tla ima, wa tla wa belega morwa yo o swanetšego go mo rea leina la Jesu. 32 Yena e tla ba yo mogolo, o tla bitšwa Morwa wa Yogodimodimo. Morena Modimo o tla mmea kgoši ya Baisraele bjalo ka Dafida, rakgolokhukhu wa gagwe. 33O tla buša ditlogolo tša Jakobo go ya go ile, gomme bogoši bja gagwe bo ka se fele.”
34Maria a botšiša morongwa a re: “Go ka kgonega bjang ke se ka ka ka robala le monna?”
35Morongwa a mo fetola a re: “Moya wo Mokgethwa o tla theogela go wena, gomme maatla a Yogodimodimo a tla go aparela. Ke ka lebaka leo yo o tlago mmelega a tlago bitšwa yo mokgethwa, a bitšwa Morwa wa Modimo. 36Le Elisabetha, moloko weno, o imile morwa botšofading bja gagwe, gomme yena a tsebjago e le moopa o šetše a na le kgwedi tše di selelago e le moimana. 37 Gobane ga go se se ka palelago Modimo.”
38Maria a re: “Ke nna mohlanka wa Morena; tše o di boletšego a di ntiregele.” Ke moka morongwa a mo tlogela.
Maria o etela Elisabetha
39Yona nakong yeo Maria a re go itokiša a itlhaganela a ya motseng wo mongwe nageng ya dithaba ya Judea. 40A fihla a tsena ka ga Sakaria, a dumediša Elisabetha. 41Ya re ge Elisabetha a ekwa Maria a mo dumediša, ngwana yo a mo imilego a itšhikinya. Elisabetha a tlala Moya wo Mokgethwa. 42A goeletša a re: “O šegofaditšwe go feta basadi ka moka, le ngwana yo o tlago mmelega o šegofaditšwe. 43Go tla bjang gore mmagoMorena wa ka a nketele? 44Gobane ke rile ge ke ekwa o ntumediša, ngwana yo ke mo imilego yo a itšhikinya ka lethabo. 45Go lehlogonolo wena o dumetšego gore tše Morena a go boditšego tšona di tla phethega.”
Maria o tumiša Morena
46 Maria a re:
“Pelong ya ka ke reta Morena;
47moyeng wa ka ke hlalalela Modimo, Mophološi wa ka,
48 gobane o ntšheditše, nna, mohlanka wa gagwe yo ke nyatšegago.
Go tloga bjale batho bohle ba tla re ke nna yo lehlogonolo,
49ka ge Ramaatla a ntiretše tše kgolo, mme leina la gagwe e le le lekgethwa.
50O gaugela ba ba mmoifago go tloga molokong wo mongwe go ya go wo mongwe.
51O dirile tše maatla ka letsogo la gagwe,
a ba a šwalalanya baikgogomoši ba ba ipotago.
52 O wišitše babuši ditulong tša bona, a godiša ba ba nyatšegago.
53Ba ba swerwego ke tlala o ba khorišitše ka dijo tše dibotse,
mme bahumi a ba gomiša ba le fela.
54O babaletše bahlanka ba gagwe, Baisraele, a tla a ba šokela, ka gona o ba thušitše.
55 Ke sona se a se tshepišitšego borakgolokhukhu ba rena,
Abrahama le ditlogolo tša gagwe, gore yeo ke tshepišo ya go ya go ile.”
56Maria a dula moo ga Elisabetha dikgwedi tše e ka bago tše tharo, a kgona a boela gae.
Matswalo a Johanese Mokolobetši
57Lebaka la Elisabetha la go belega la fihla, mme yena a belega ngwana wa mošemane. 58Baagišani le meloko yabo ge ba ekwa gore Morena o mo gaugetše kudu o mo file ngwana, ba thaba le yena.
59 Ka letšatši la seswai la ge ngwana a tswetšwe ba tla go mmolotša; ba be ba nyaka go mo rea leina la Sakaria, tatagwe. 60Eupša mmagwe a gana a re: “Aowa! Leina la gagwe e swanetše go ba Johanese.”
61Bona ba re go yena: “Ga ke re mo melokong ya geno ga go na motho yo a nago le leina leo?” 62Ba bolela le Sakaria ka diatla ba mmotšiša gore na leina la ngwana e swanetše go ba lefe.
63Yena a kgopela gore ba mo tlišetše letlapa, mme a ngwala mo godimo ga lona a re: “Leina la gagwe ke Johanese.” Ba tlabega ka moka. 64Ka yona nako yeo Sakaria a rarologa leleme a kgona go bolela gape, a reta Modimo. 65Baagišani ba gagwe bohle ba welwa ke poifo; nageng ka moka ya dithaba ya Judea gwa bolelwa ditaba tše ka moka. 66Bohle ba ba di kwago ba di nagana, ba ipotšiša ba re: “Na ngwana yo e tla ba eng?” Gobane go be go bonagala gabotse gore o thekgilwe ke maatla a Modimo.
Sakaria o reta Modimo
67Sakaria, tatagoJohanese, a tlala Moya wo Mokgethwa, mme a porofeta a re:
68“A go retwe Morena Modimo wa Israele,
gobane o tlilo phološa setšhaba sa gagwe a se lokolla.
69O re file Mophološi yo maatla,
setlogolo sa Dafida, mohlanka wa gagwe.
70O re tshepišitše go tloga kgale ka baprofeta ba gagwe ba bakgethwa
71gore o tla re phološa manabeng a rena,
le diatleng tša bohle ba ba re hloilego.
72A re o tla gaugela borakgolokhukhu ba rena,
a gopola kgwerano yela ya gagwe ye kgethwa.
73-74“O enetše rakgolokhukhu wa rena, Abrahama,
gore o tla re hlakodiša manabeng a rena,
a re kgontšha go mo hlankela re sa boife,
75re mo kgothaletše,
re mo hlompha bophelong bjohle bja rena.
76 “Wena, ngwanaka,
o tla bitšwa moprofeta wa Yogodimodimo.
O tla sepela pele ga Morena go mo lokišetša tsela,
77go begela setšhaba sa gagwe gore se tla phološwa ka go swarelwa dibe.
78Modimo wa rena o na le lešoko le kgaugelo.
O tla re romela Mophološi yo a tlago re bonegela bjalo ka letšatši le le hlabago la bonega le le godimo.
79 O tla bonegela ba ba dutšego leswiswing le moriting wa lehu,
rena a re iša tseleng ye e lebilego boiketlong.”
80Ngwana yoo o ile a gola, a fela a tia le tlhaologanyong, a dula lešokeng gwa ba gwa fihla letšatši le a ilego a iponatša phatlalatša go setšhaba sa Israele.
Currently Selected:
LUKASE 1: NSO00
Highlight
Share
Copy
Want to have your highlights saved across all your devices? Sign up or sign in
Bible in Sepedi 2000 translation © Bible Society of South Africa 2000. Digital Version © Bible Society of South Africa 2012. All rights reserved. www.biblesa.co.za.