Rom Tɩŋŋaa 8

Má leŋ la joŋ la nyuŋ hɛ Wɩa Dɩŋ-zɔmʋŋ wɩaa lɛ

1Dɩ la dɩ Kirisito kala nɛ ŋaa kʋbala, Wɩa bɩra bɩ jaŋ dii la sarɩya a joŋ cheeriŋ pɩla. 2La dɩ Yesu Kirisito sɩ ŋaa kʋbala ŋɩɩ, ʋ Dɩŋ-zɔmʋŋ joŋ mɩɩsɩŋ pɩla nɛ. Ʋ laala ta nɛ wʋbɔŋŋɔɔ arɩ sʋʋŋ nɩsɩŋ lɛ. 3Wɩalɩŋ Mosis fa sɩ bile bɩ la lɛ wuo pɛ, bɛɛ wɩaa la yaraa bɩ doluŋ kɛnɛ. Ama wɩalɩŋ ba sɩ bɩ wuo ŋaa, Wɩa wuo ŋaaba nɛ. Ba nɛ ŋ-la: Ʋ sɩɩ chɛ ʋ lɩɩsɛ nuhuobiine wʋbɔŋŋɔɔ lɛ, ʋ ta ʋ tɩtɩa Bie nɛ ʋ kʋ tuu. Ʋ yaraa nagɛ la yaraa, dɩ ʋ laa la wʋbɔŋŋɔɔ ta. Ʋ sɩ ŋaa ŋɩɩ, Wɩa lɩɩsɛ wʋbɔŋŋɔɔ doluŋ nuhuobiine lɛ nɛ. 4Ʋ ŋaa ŋɩɩ dɩ la wuo kɛŋ doluŋ nɛ a ŋɩŋaa tʋɔpʋl wɩalɩŋ Mosis fa sɩ bile dɩ nɩaa tuto, la nɩalɩŋ sɩ bɩ la yaraa doluŋ lɛ ka to aŋ tuto Wɩa Dɩŋ-zɔmʋŋ doluŋ lɛ. 5Nɩalɩŋ kala sɩɩ to ba yaraa doluŋ lɛ, ba joŋ ba nyuŋ kala a hɛ ba yaraa wʋŋaalaa lɛ nɛ, ama nɩalɩŋ kala ma sɩɩ to Wɩa Dɩŋ-zɔŋ-la doluŋ lɛ, ba ma joŋ ba nyuŋ kala a hɛ Wɩa Dɩŋ-zɔŋ-la sɩ cho wɩalɩŋ lɛ nɛ. 6Dɩ la nɛ joŋ la nyuŋ a hɛ la yaraa wʋŋaalaa lɛ, la jaŋ sʋʋ, ama dɩ la nɛ joŋ la nyuŋ a hɛ Wɩa Dɩŋ-zɔŋ-la wʋŋaalaa lɛ, la jaŋ kɛŋ mɩɩsɩŋ a hɔŋ arɩ yarɩfɩɛlaa, 7bɛɛ wɩaa dɩ nʋʋ nɛ joŋ ʋ nyuŋ kala a hɛ ʋ yaraa doluŋ lɛ, ʋ ŋaa Wɩa dʋndɔŋ nɛ. Ʋ bɩ chɛ dɩ ʋ to wɩalɩŋ Wɩa sɩ daga, ʋ paala bɩ wuo to. 8Nɩalɩŋ sɩɩ to ba yaraa wʋŋaalaa lɛ, ba bɩ wɩalɩŋ Wɩa sɩ cho wuo ŋaa.

9Ama Wɩa Dɩŋ-zɔŋ-la sɩ hɛ ma lɛ ŋɩɩ, ma-na bɩ ma yaraa wʋŋaalaa lɛ ka to, maa to wɩalɩŋ Wɩa Dɩŋ-zɔŋ-la sɩ daga nɛ. Dɩ Wɩa Dɩŋ-zɔŋ-la nɛ tuo nʋʋkala lɛ, tɩɩna bɩ Kirisito nʋʋ ŋaa. 10Dɩ Kirisito nɛ hɛ ma lɛ, ma yaraa nammɩa ha jaŋ sʋʋ a tɩŋ ma wʋbɔŋŋɔɔ wɩaa. Ama Wɩa Dɩŋ-zɔŋ-la sɩ hɛ ma lɛ, ʋ nɛ pɩma mɩɩsɩŋ, bɛɛ wɩaa ma kɛŋ tʋɔpʋla nɛ Wɩa sɩpaaŋ. 11Wɩa nɛ chɩsɛ Yesu sʋʋŋ lɛ. Dɩ ʋ Dɩŋ-zɔŋ-la nɛ hɛ ma lɛ, ʋ jaŋ chɩsɛ ma yara-la sɩ jaŋ pʋa sʋʋŋ lɛ dɩ ma kɛŋ mɩɩsɩŋ, arɩ ʋ sɩ chɩsɛ Yesu sʋʋŋ lɛ ŋɩɩ. Ʋ jaŋ to ʋ Dɩŋ-zɔŋ-la sɩ hɛ ma lɛ nɛ a ŋaa ŋɩɩ.

12Ŋɩɩ wɩaa mɩ naambiiriŋ, ʋ bɩ maga dɩ nʋʋkala fʋgɛla dɩ la tuto la yaraa wʋŋaalaa lɛ. 13Dɩ ma nɛ to ma yaraa wʋŋaalaa lɛ, ma jaŋ sʋʋ. Ama dɩ ma nɛ vɩa ma yaraa wʋŋaalaa, ma jaŋ kɛŋ mɩɩsɩŋ Wɩa Dɩŋ-zɔŋ-la doluŋ lɛ. 14Nɩalɩŋ kala sɩɩ to Wɩa Dɩŋ-zɔŋ-la niiŋ wɩaa, ba ŋaa Wɩa biiriŋ nɛ. 15Wɩa bɩ ma ŋaa dɩ ma nagɛ yosuŋ a bɩra fɩfá fawʋllʋŋ, ama ʋ Dɩŋ-zɔŋ-la leŋe ma ŋaa ʋ biiriŋ nɛ. Dɩ la nɩɩ yɩrʋ, la wuo kɛnʋ yɩrɛ “La Nyɩmma.” 16Wɩa Dɩŋ-zɔŋ-la arɩ la tʋɔbɩɩnaa kala yie dagɛ arɩ la ŋaa Wɩa biiriŋ nɛ. 17La sɩ ŋaa Wɩa biiriŋ ŋɩɩ, Wɩa joŋ kɩaa nɛ a bil la lɛ, kɩalɩŋ kala Wɩa sɩ joŋo bil Kirisito lɛ, la ma jaŋ tɩɩba. Dɩ la dɩ Kirisito kala nɛ na hɛɛŋ, la ma jaŋ laa yɩrɩ-la Kirisito sɩ jaŋ laa.

Yɩrɩ-la la sɩ jaŋ laa Wɩa teeŋ

18Mɩ bee na arɩ hɛɛŋ deeŋ la sɩɩ na, la bɩ jaŋ wuo kaa magɩsɛ yɩrɩ-la la sɩ jaŋ laa. 19Dʋnɩa kʋŋkala nɩɩ gbɛrʋ a chaarɛ sɩaa dɩ ba na bʋa-la lɛ Wɩa biiriŋ sɩ jaŋ laa yɩrɩŋ. 20Wɩɩ-la wɩaa Wɩa sɩ ta dʋnɩa kɩaa kala daga arɩ ba bɩ jaŋ wuo ŋaaba. Ba tɩtɩa tʋɔtɔrʋŋ lɛ saa dee, ama Wɩa nɛ leŋe ba bɩ wuo ŋaa. Arɩ ŋɩɩ kala Wɩa ha leŋe ba kɛŋ yɩɛlaa nɛ, 21bɛɛ wɩaa Wɩa jaŋ laaba ta a lɩɩsɛba sʋʋŋ bʋa lɛ. Wɩa biiriŋ sɩ jaŋ kɔ a laa yɩrɩŋ ŋɩɩ a tɩɩ ba tɩtɩa, ba ma jaŋ tɩɩ ba tɩtɩa ŋɩɩ a ma kɛŋ yɩrɩŋ. 22La jɩma arɩ dʋnɩa kɩaa kala haa huuni nɛ, arɩ haala sɩɩ chɛ dɩ ʋ lʋl aa huuni ŋɩɩ. 23Dʋnɩa kɩaa dʋndʋŋa dee, ama la ma nɩalɩŋ Wɩa sɩ laa sɩpaaŋ joŋ ʋ Dɩŋ-zɔmʋŋ hɛ la lɛ, la maa huuni nɛ la tʋɔŋ lɛ dɩ ʋ kɛŋ la yaraa bɩrɩmɛ dɩ la chaasa ŋaa ʋ biiriŋ a laa yɩrɩŋ.

24La sɩ kɛŋ yɩɛlaa Wɩa lɛ nɛ tɩɩ ʋ laala ta. Dɩ la nɛ na wɩalɩŋ la sɩɩ yɩɛlʋ, ʋ bɩra bɩ maga dɩ la yɩyɩɛlɛ wɩɩ. Dɩ nʋʋ nɛ yɩɛlɛ kʋŋ, dɩ ʋ nɛ naʋ, ʋ jaŋ bɩra yɩyɩɛlɛ kʋ-la wɩaa? Aɩ. 25Ama dɩ la nɩɩ yɩɛlɛ wɩalɩŋ la ha sɩ bɩ na, la dii kenyiri a gbɩgbɛrɛ.

La sɩ yie kɛŋ yɩɛlaa ŋɩɩ a kɛŋ kenyiri, 26ŋɩɩ tɩtɩa nɛ Wɩa Dɩŋ-zɔmʋŋ ma yie kɔ a pɛ la lɛ a tɩŋ la sɩ bɩ doluŋ kɛnɛ dɩ la pɛ la tɩtɩa lɛ. La paala bɩ jɩŋ ŋɩɩ sɩ maga dɩ la chʋɔlɛ Wɩa. Ama Wɩa Dɩŋ-zɔŋ-la tɩtɩa sʋl Wɩa a pɩpɩla nɛ. Ʋ sɩ yie sʋsʋl Wɩa aa huuni ŋɩɩ, la bɩ jaŋ wuo kɛŋ niiŋ a dagɛ, ama 27Wɩa na nuhuobiine tʋɔŋ kala nɛ a jɩŋ Wɩa Dɩŋ-zɔmʋŋ sɩɩ huuni ŋɩɩ bʋbʋɔŋ, bɛɛ wɩaa Wɩa Dɩŋ-zɔŋ-la sɩ sʋl Wɩa a pɩpɩ Wɩa nɩaa ŋɩɩ, Wɩa tʋɔtɔrʋŋ lɛ nɛ ʋ yie sʋsʋl.

28La jɩma wɩɩkala lɛ, Wɩa yie leŋ wɩaa zɔŋ nɛ a pɩ nɩalɩŋ sɩ chou, nɩalɩŋ ʋ sɩ lɩɩsa ʋ tʋɔtɔrʋŋ lɛ. 29Nɩalɩŋ Wɩa sɩ laa sɩpaaŋ lɩɩsɛ, ʋ lɩɩsɛba dɩ ʋ kɛmba bɩrɩmɛ dɩ ba nagɛ ʋ tɩtɩa Bie nɛ, a leŋ ʋ Bie ŋaa ba kala kʋhɩaŋ. 30Wɩa yɩrɛ nɩalɩŋ ʋ fa sɩ laa sɩpaaŋ lɩɩsɛ dɩ ba ŋaa ʋ nɩaa nɛ. Ʋ sɩ yɩrɛba ŋɩɩ, ʋ leŋ ba kɛŋ tʋɔpʋla ʋ sɩpaaŋ. Nɩalɩŋ ma sɩ kɛŋ tʋɔpʋla ʋ sɩpaaŋ, ʋ leŋ ba ma pɛ laa ʋ yɩrɩŋ.

Kʋŋkala tuo sɩ jaŋ wuo lɩɩsɛmɛ ŋɩɩ Kirisito sɩ chomi lɛ

31Dɩ la nɛ jɩŋ wɩaa deemba kala, bɛɛ nɛ bɩra ka dɩ la bʋl? Dɩ Wɩa nɛ chɩŋ la harɩŋ, kʋbɛɛ ma nɛ bɩra kɛŋ doluŋ a kɩɩla? 32Wɩa paala bɩ ʋ tɩtɩa Bie kaa laa nɩaa teeŋ. Ʋ joŋu hɛ nɩaa nɩsɩŋ lɛ nɛ dɩ ba kpʋʋ a tɩŋ la wɩaa. Ʋ sɩ wuo ŋaa ŋ-la, ma bɩ jɩŋ arɩ ʋ jaŋ wuo chaasa joŋ kʋŋkala ma pɛ pɩla koo? 33Kʋbɛɛ nɛ saa jaŋ bɩra joŋ cheeriŋ a pɩ nɩalɩŋ Wɩa sɩ lɩɩsa? Wɩa tɩtɩa nɛ leŋe ba kɛŋ tʋɔpʋla ʋ sɩpaaŋ. 34Kʋbɛɛ ma nɛ bɩra jaŋ wuo dii ba sarɩya a dɔgɩsɛba? Kirisito sʋba nɛ, aŋ bɩra sii sʋʋŋ lɛ a kɛŋ mɩɩsɩŋ a hɔŋ Wɩa nadiiŋ, nɩduoŋ dɩhɔnʋŋ, a sʋl Wɩa pɩpɩla. 35Kirisito sɩ chola ŋɩɩ, bɛɛ kʋŋ nɛ jaŋ bɩra ŋaa dɩ Kirisito sɩ́ la cho? Wahala koo wʋjʋʋlaa, koo dɩ ba to naasɩŋ dʋdɔgɩsɛla, koo dɩ losuŋ kpʋla, koo dɩ la bɩ gɛnnɩŋ kɛnɛ dɩ la laalɛ, koo dɩ wʋbɔŋ nɛ gbɛrɛla, koo dɩ la nɛ jaŋ sʋʋ? Wɩaa deemba kʋŋkala bɩ jaŋ wuo ŋaa dɩ Kirisito bɩra sɩ́ la cho. 36Ba ŋmʋnsɛ Wɩa teniŋ tʋɔŋ a bʋl ŋ-la nɛ:

“A tɩŋ ŋ wɩaa, laa gbɛrɛ sʋʋŋ nɛ tapʋlɩɩ-na kala.

Ba yie benla arɩ la nagɛ piesee nɛ ba sɩ kaa lɩɩ dɩ ba kpʋ.”

37Arɩ ŋɩɩ kala, dɩ wɩaa deemba kʋŋkala nɛ kʋ jʋʋla, la yie wuo yuo dii nɛ a tɩŋ nɩɩ-la sɩ chola wɩaa. 38-39Wɩɩŋ deeŋ tuo kaalɛrɛ, mɩ jɩma kʋŋkala tuo sɩ jaŋ wuo lɩɩsɛmɛ ŋɩɩ Kirisito sɩ chomi lɛ: Sʋʋŋ, koo mɩɩsɩŋ, koo Wɩa tɩndaaraa, koo jɩŋ-bɔŋŋɔɔ, koo kɩalɩŋ kala sɩ hɛ nɩmɛ lɛɛlɛ, koo kɩalɩŋ sɩ jaŋ to harɩŋ kɔ, kɩalɩŋ sɩ hɛ wɩa-nyuŋ a kɛŋ doluŋ, koo kɩalɩŋ sɩ kɛŋ doluŋ a hɛ tinteeŋ lɛ. Wɩa sɩ to La Tɩɩna Yesu Kirisito lɛ a chola ŋɩɩ, dʋnɩa kʋŋkala tuo sɩ jaŋ wuo lɩɩsɛla chono-la lɛ.

Currently Selected:

Rom Tɩŋŋaa 8: SIS

Highlight

Copy