Rom Tɩŋŋaa 11
11
Wɩa jaŋ fá Iziral tɩŋŋaa nenige
1Ŋɩɩ-na saa Wɩa vɩa ʋ nɩaa nɛ koo? Aɩ, mɩ ma tɩtɩa ŋaa Iziral tɩɩna nɛ, a ŋaa Abɩraham doho nʋʋ a lɩɩ Bɛnjamɩŋ nɩaa tʋɔŋ. 2Wɩa bɩ ʋ nɩaa vɩa, nɩalɩŋ ʋ sɩ laa sɩpaaŋ lɩɩsɛ. Ma bɩ wɩalɩŋ ba sɩ ŋmʋnsa Wɩa teniŋ tʋɔŋ ka liisii? Wɩalɩŋ ba sɩ ŋmʋnsa a tɩgɛ Ɩlaaja lɛɛ? Ba ŋmʋnsa arɩ Ɩlaaja fa bʋl Iziral tɩŋŋaa wɩaa pɩ Wɩa a tɩŋ ba wʋbɔŋŋɔɔ wɩaa. 3Ʋ fa sɩ,
“Mɩ Tɩɩna, ba kpʋ ŋ wʋlaabʋllaa nɛ,
a ŋmoo korunu-la ba sɩ saa pɩŋ a lo.
Mɩ dʋndʋŋa nɛ ka,
ba saa walɩmɛ dɩ ba kpʋ mɩ ma nɛ.”
4Ɩlaaja sɩ bʋl ŋɩɩ, bɛɛ nɛ Wɩa bɩra bʋla pʋ? Ʋ sɩ,
“Mɩ lɩɩsɛ nɩaa bʋɩ balɩpɛ nɛ a bile pɩ mɩ tɩtɩa.
Nɩaa deemba kʋŋkala bɩ vene-la ba sɩɩ yɩrɛ Baal kpaara.”
5Ŋɩɩ tɩtɩa nɛ ʋ nagɛ Iziral tɩŋŋaa lɛ bʋa deeŋ lɛ. Iziral tɩŋŋaa baŋmɛnɛ nɛ Wɩa lɩɩsɛ a fá ba nenige. 6Ʋ sɩ lɩɩsɛba a fá ba nenige ŋɩɩ, ʋ bɩ naga ba tɩntɩŋ-zɔŋŋɔɔ ba sɩ tɩma wɩaa nɛ tɩɩ. Dɩ ʋ nɛ tɩŋ nɩaa wʋzɔŋŋɔɔ wɩaa aa fá ba nenige, ŋɩɩ-na nɩaa nenige dee ʋʋ fá ŋɩɩ.
7Bɛɛ nɛ saa? Iziral tɩŋŋaa fa sɩɩ chɛ kɩalɩŋ, ba bɩ ba na. Ama nɩalɩŋ baŋmɛnɛ Wɩa sɩ lɩɩsa ba tʋɔŋ nɛ naba. Nɩkaana-la tʋɔŋ dolie. Wɩa sɩ yɩrɛba, ba vɩa nɛ. 8Ba bʋl ŋɩɩ nɛ Wɩa teniŋ tʋɔŋ a bʋl,
“Wɩa leŋe ba sɩaa chʋʋlɛ nɛ.
Ba bɩ kʋŋkala ka na,
ba bɩ wɩɩkala maa nɩɩ a kaa kɔ arɩ jɩnɩŋ.”
9Devit ma fa bʋla,
“Leŋ dɩ ba gbiele kʋdiile-la bɩrɩmɛ bɛrɛ́ a kɛsɛba,
leŋ dɩ ʋ bɩrɩmɛ kʋŋ sɩ jaŋ ŋaa dɩ ba gɛrɛ tel a na hɛɛŋ.
10Leŋ dɩ ba nyʋlɩmɛ a sɩ́ kʋŋkala wuo na,
leŋ dɩ wɩaa nyagɛba dɩ ba duduuri wuu.”
11Mɩ jaŋ pɩɛsɛ wɩɩŋ deeŋ: Ba sɩ sɩɛra tel ŋɩɩ, ba tele ŋɩɩ dɩ ba wɩɩ-wɩɩkala dɛrɛ nɛ koo? Aɩ. Ama a tɩŋ ba wʋbɔŋŋɔɔ ŋaanɩŋ wɩaa, Wɩa laa nɩalɩŋ sɩ bɩ Juu tɩŋŋaa ŋaa ta nɛ. Ʋ ŋaa ŋɩɩ dɩ Juu tɩŋŋaa yaraa bieri nɛ, dɩ ba na baanɩŋ nɩalɩŋ sɩ bɩ Juu tɩŋŋaa ŋaa nyuŋ. 12Juu tɩŋŋaa wʋbɔŋŋɔɔ leŋe dʋnɩa nɩaa ŋmoo naasɩmɩŋ nɛ. Ba sɩ tele ŋɩɩ ŋaa nɩalɩŋ sɩ bɩ Juu tɩŋŋaa ŋaa ŋmoo naasɩmɩŋ nɛ. Dɩ ʋ nɛ nagɛ ŋ-la saa, bʋa-la lɛ Juu tɩŋŋaa sɩ jaŋ kʋ laa Wɩa wɩaa dii, dʋnɩa nʋʋkala jaŋ paala nɩɩ sɩma kɩŋkɛŋ kɩŋkɛŋ.
Wɩɩ-la sɩ tɩɩ Wɩa laa nɩalɩŋ sɩ bɩ Juu tɩŋŋaa ŋaa ta
13Ma nɩalɩŋ sɩ bɩ Juu tɩŋŋaa ŋaa nɛ mɩ lɛɛlɛ chɩchɛ dɩ mɩ bʋl wɩaa pa. Wɩa nɛ tɩmmɛ dɩ mɩ ŋaa nɩalɩŋ sɩ bɩ Juu tɩŋŋaa ŋaa nanzɔɔ. Mɩ joŋ tɩntɩmɩŋ deeŋ ʋ ŋaa tɩntɩŋ-fɩaŋ nɛ. 14Mɩ sɩɩ tɩŋ tɩntɩmɩŋ deeŋ, ŋ bɩ pɔ ʋ jaŋ wuo leŋ dɩ mɩ naambiiriŋ Juu tɩŋŋaa yaraa bibieri, dɩ ba dɔnsʋŋ laa Wɩa wɩaa dii, dɩ ʋ laaba ta. 15Juu tɩŋŋaa sɩ vɩa Wɩa wɩaa ŋɩɩ leŋe dʋnɩa nɩkaanaa arɩ Wɩa sɩŋ nɛ. Dɩ Juu tɩŋŋaa nɛ bɩra kʋ laa Wɩa wɩaa dii, ɛɛ nɛ saa ʋ jaŋ nagɛ? Ʋ jaŋ nagɛ nɩsʋʋnʋŋ sɩ sii sʋʋŋ lɛ nɛ. 16Dɩ ŋ nɛ buu boroboro munuŋ a laa sɩpaaŋ lɔgɛ mʋa a pɩ Wɩa, dɩ ʋ nɛ bɩ disiniŋ kɛnɛ, kʋkaanɩŋ ma bɩra bɩ disiniŋ kɛnɛ. Dɩ tɩa naapoloo ma nɛ zɔmɔ, ʋ naakelee ma zɔmɔ nɛ.
17Juu tɩŋŋaa saa nagɛ tɩa-la ba sɩɩ yɩrɛ Olif nɛ. Ba kɛŋ ʋ nɛnɛɛ a kaa tutugi nʋʋŋ nɛ. Wɩa ŋaa ʋ zɔŋ. Ŋɩɩ nɛ Wɩa keri ʋ naakelee dɔnsʋŋ, aŋ kɛmma kaa mɛrɛ ba leree, ma nɩalɩŋ sɩ nagɛ gɩrɩŋ tɩɩ-naakelee. Ʋ ŋaa ŋɩɩ dɩ ma ma pɛ nɩɩ Olif tɩɩ-zɔŋ-la naakelee sɩma nɛ. 18Má sɩ́ ma tɩtɩa lɛ bigisu arɩ ma kpɩa tɩa-la naakelee ba sɩ kere ta lɛ. Ma dee bɩ tɩa-la naapoloo chaga bil. Tɩa-la naapoloo nɛ chagɛma bil.
19Ma jaŋ wuo bʋl arɩ Wɩa keri tɩa-la naakelee, ka dɩ ʋ kɛmma nɛ mɛrɛ nɩmɛ. 20Wʋtɩtɩɩ nɛ, Wɩa keri Juu tɩŋŋaa ta a tɩŋ ba sɩ bɩ Wɩa wɩaa laa dii wɩaa nɛ. Ama ma-na nɩalɩŋ sɩ bɩ Juu tɩŋŋaa ŋaa, ma sɩ laa Wɩa wɩaa dii dʋndʋŋa wɩaa nɛ tɩɩ ma chɩŋ kpaŋ kpaŋ. Ŋɩɩ wɩaa má sɩ́ ma tɩtɩa lɛ bigisu, aŋ kɛŋ ma tɩtɩa woruŋ. 21Wɩa sɩ bɩ tɩa-la naakelee tɩtɩa nenige fá aŋ keriba ta ŋɩɩ, dɩ ma ma nɛ bɩ ma sɩaa fɩɛla, ʋ jaŋ keri ma ma ta ŋɩɩ tɩtɩa. 22Ma na ŋɩɩ Wɩa sɩ kɛŋ zile arɩ ŋɩɩ ʋ sɩ tɛrɛ nɛ. Ʋ tɛrɛ nɩalɩŋ sɩ mɩɩrɛ ʋ harɩŋ nyuŋ nɛ. Ama ʋ kɛŋ zile ma-na teeŋ, dɩ ma nɛ sɛyɛ dɩ ma tuto ʋ zile-la lɛ arɩ ma sɩ suomi ŋɩɩ. Ŋɩɩ dee ʋ jaŋ kerima ma ta. 23Dɩ Juu tɩŋŋaa nɛ paala bɩrɩma to Wɩa, Wɩa jaŋ bɩra kɛmba kaa mɛrɛ tɩɩ-zɔŋ-la lɛ, bɛɛ wɩaa Wɩa kɛŋ doluŋ dɩ ʋ ŋaa ŋɩɩ. 24Ma nɩalɩŋ sɩ paala bɩ tɩɩ-zɔŋ-la naakelee ŋaa aŋ ŋaa gɩrɩŋ tʋɔŋ tɩɩ-naakelee, ka Wɩa kɛmma a kaa mɛrɛ tɩɩ-zɔŋ-la lɛ, ʋ jaŋ wuo kɛŋ tɩa-la tɩtɩa naakelee ʋ sɩ kere ta a kaa mɛrɛ.
Wɩa ma jaŋ laa Iziral tɩŋŋaa ta
25Mɩ naambiiriŋ, wɩaa nɛ hɛ nɩmɛ Wɩa fa joŋo faama, mɩɩ chɛ dɩ ma jɩŋ. Wɩɩ-la jaŋ ŋaa dɩ ma sɩ́ bɩɩna bʋl arɩ ma kɛŋ wʋjɩmɩŋ a bibigisi ma tɩtɩa lɛ. Wɩɩ-la nɛ ŋ-la: Iziral tɩŋŋaa sɩ kɛŋ nyu-duo-la, ba bɩ jaŋ kɛnʋ wuu. Bʋa-la lɛ dɩ nɩalɩŋ sɩ bɩ Juu tɩŋŋaa ŋaa nɛ kʋ yʋgɛ a laa Wɩa wɩaa dii, Iziral tɩŋŋaa nyu-duo-la jaŋ dɛrɛ. 26Ŋ-la lɛ nɛ Wɩa jaŋ to a laa Iziral tɩŋŋaa kala ta. Ba ŋmʋnsɛ ŋɩɩ nɛ Wɩa teniŋ tʋɔŋ. Ba sɩ,
“La Laataara jaŋ lɩɩ Zaayɔŋ.
Ʋ jaŋ kiri wʋbɔŋŋɔɔ kala Jekɔb doho nɩaa tʋɔŋ.”
27Ba bɩra ŋmʋnsa a bʋl,
“La dɩ ba jaŋ bil niiŋ a pɩ dɔŋɔ
dɩ mɩ laa ba wʋbɔŋŋɔɔ ta.”
28A tɩŋ Juu tɩŋŋaa sɩ vɩa Wɩa wʋzɔmɔ-la wɩaa nɛ tɩɩ ba ŋaa Wɩa dʋndɔmɔ, ma nɩalɩŋ saa sɩ bɩ Juu tɩŋŋaa ŋaa wɩaa nɛ tɩɩ. Ama a tɩŋ ʋ sɩ lɩɩsɛba wɩaa nɛ tɩɩ ba ŋaa ʋ nɩchooloo, a tɩŋ ba naabalɩmaba wɩaa, 29bɛɛ wɩaa kɩalɩŋ kala Wɩa sɩ joŋo pɩba arɩ ʋ sɩ lɩɩsɛba ŋɩɩ, ʋ bɩra bɩ jaŋ wuo vɔmba. 30Ama, ma-na nɩalɩŋ sɩ bɩ Juu tɩŋŋaa ŋaa, ma fa vɩa Wɩa niiŋ wɩaa, ama lɛɛlɛ Wɩa fá ma nenige nɛ a tɩŋ Iziral tɩŋŋaa ma sɩ vɩa Wɩa niiŋ wɩaa ŋɩɩ. 31Ŋɩɩ tɩtɩa nɛ Iziral tɩŋŋaa ma sɩ bɩ Wɩa niiŋ ka to lɛɛlɛ, Wɩa jaŋ fá ba ma nenige, arɩ ʋ sɩ fá ma ma nenige ŋɩɩ. 32Nɩalɩŋ kala sɩ bɩ Wɩa niiŋ wɩaa ka to, ba wʋbɔŋŋɔɔ nyagɛba bil nɛ, ŋɩɩ nɛ Wɩa wuo fá ba nenige.
33Wɩa sɩɩ fá la nenige ŋɩɩ arɩ ŋɩɩ ʋ sɩ kɛŋ wʋjɩmɩŋ arɩ ŋɩɩ ʋ sɩ jɩŋ wɩaa bʋbʋɔŋ, ʋ bɩ magɩa kɛnɛ. Kʋbɛɛ nɛ jɩŋ ŋɩɩ Wɩa sɩɩ ŋaa wɩaa? Nʋʋkala bɩ Wɩa wʋŋaalaa jɩŋ.
34Kʋbɛɛ nɛ jaŋ wuo jɩŋ Wɩa tʋɔbɩɩnaa?
Kʋbɛɛ ma nɛ jaŋ wuo dagɛ Wɩa?
35Kʋbɛɛ nɛ ha joŋ kʋŋ pɩ Wɩa aŋ gbɛrɛ dɩ Wɩa mɩɩra joŋ kʋ-la pʋ?
36Bɛɛ wɩaa Wɩa nɛ ŋaa kʋŋkala. Ʋ doluŋ lɛ nɛ kʋŋkala ma hɛ nɩmɛ. Ʋ nɛ tɩɩ kʋŋkala. Má leŋ dɩ Wɩa yɩrɩŋ yɩrɛ a kaa mʋ wuu. Amɩɩ.
Currently Selected:
Rom Tɩŋŋaa 11: SIS
Highlight
Share
Copy
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
Rom Tɩŋŋaa 11
11
Wɩa jaŋ fá Iziral tɩŋŋaa nenige
1Ŋɩɩ-na saa Wɩa vɩa ʋ nɩaa nɛ koo? Aɩ, mɩ ma tɩtɩa ŋaa Iziral tɩɩna nɛ, a ŋaa Abɩraham doho nʋʋ a lɩɩ Bɛnjamɩŋ nɩaa tʋɔŋ. 2Wɩa bɩ ʋ nɩaa vɩa, nɩalɩŋ ʋ sɩ laa sɩpaaŋ lɩɩsɛ. Ma bɩ wɩalɩŋ ba sɩ ŋmʋnsa Wɩa teniŋ tʋɔŋ ka liisii? Wɩalɩŋ ba sɩ ŋmʋnsa a tɩgɛ Ɩlaaja lɛɛ? Ba ŋmʋnsa arɩ Ɩlaaja fa bʋl Iziral tɩŋŋaa wɩaa pɩ Wɩa a tɩŋ ba wʋbɔŋŋɔɔ wɩaa. 3Ʋ fa sɩ,
“Mɩ Tɩɩna, ba kpʋ ŋ wʋlaabʋllaa nɛ,
a ŋmoo korunu-la ba sɩ saa pɩŋ a lo.
Mɩ dʋndʋŋa nɛ ka,
ba saa walɩmɛ dɩ ba kpʋ mɩ ma nɛ.”
4Ɩlaaja sɩ bʋl ŋɩɩ, bɛɛ nɛ Wɩa bɩra bʋla pʋ? Ʋ sɩ,
“Mɩ lɩɩsɛ nɩaa bʋɩ balɩpɛ nɛ a bile pɩ mɩ tɩtɩa.
Nɩaa deemba kʋŋkala bɩ vene-la ba sɩɩ yɩrɛ Baal kpaara.”
5Ŋɩɩ tɩtɩa nɛ ʋ nagɛ Iziral tɩŋŋaa lɛ bʋa deeŋ lɛ. Iziral tɩŋŋaa baŋmɛnɛ nɛ Wɩa lɩɩsɛ a fá ba nenige. 6Ʋ sɩ lɩɩsɛba a fá ba nenige ŋɩɩ, ʋ bɩ naga ba tɩntɩŋ-zɔŋŋɔɔ ba sɩ tɩma wɩaa nɛ tɩɩ. Dɩ ʋ nɛ tɩŋ nɩaa wʋzɔŋŋɔɔ wɩaa aa fá ba nenige, ŋɩɩ-na nɩaa nenige dee ʋʋ fá ŋɩɩ.
7Bɛɛ nɛ saa? Iziral tɩŋŋaa fa sɩɩ chɛ kɩalɩŋ, ba bɩ ba na. Ama nɩalɩŋ baŋmɛnɛ Wɩa sɩ lɩɩsa ba tʋɔŋ nɛ naba. Nɩkaana-la tʋɔŋ dolie. Wɩa sɩ yɩrɛba, ba vɩa nɛ. 8Ba bʋl ŋɩɩ nɛ Wɩa teniŋ tʋɔŋ a bʋl,
“Wɩa leŋe ba sɩaa chʋʋlɛ nɛ.
Ba bɩ kʋŋkala ka na,
ba bɩ wɩɩkala maa nɩɩ a kaa kɔ arɩ jɩnɩŋ.”
9Devit ma fa bʋla,
“Leŋ dɩ ba gbiele kʋdiile-la bɩrɩmɛ bɛrɛ́ a kɛsɛba,
leŋ dɩ ʋ bɩrɩmɛ kʋŋ sɩ jaŋ ŋaa dɩ ba gɛrɛ tel a na hɛɛŋ.
10Leŋ dɩ ba nyʋlɩmɛ a sɩ́ kʋŋkala wuo na,
leŋ dɩ wɩaa nyagɛba dɩ ba duduuri wuu.”
11Mɩ jaŋ pɩɛsɛ wɩɩŋ deeŋ: Ba sɩ sɩɛra tel ŋɩɩ, ba tele ŋɩɩ dɩ ba wɩɩ-wɩɩkala dɛrɛ nɛ koo? Aɩ. Ama a tɩŋ ba wʋbɔŋŋɔɔ ŋaanɩŋ wɩaa, Wɩa laa nɩalɩŋ sɩ bɩ Juu tɩŋŋaa ŋaa ta nɛ. Ʋ ŋaa ŋɩɩ dɩ Juu tɩŋŋaa yaraa bieri nɛ, dɩ ba na baanɩŋ nɩalɩŋ sɩ bɩ Juu tɩŋŋaa ŋaa nyuŋ. 12Juu tɩŋŋaa wʋbɔŋŋɔɔ leŋe dʋnɩa nɩaa ŋmoo naasɩmɩŋ nɛ. Ba sɩ tele ŋɩɩ ŋaa nɩalɩŋ sɩ bɩ Juu tɩŋŋaa ŋaa ŋmoo naasɩmɩŋ nɛ. Dɩ ʋ nɛ nagɛ ŋ-la saa, bʋa-la lɛ Juu tɩŋŋaa sɩ jaŋ kʋ laa Wɩa wɩaa dii, dʋnɩa nʋʋkala jaŋ paala nɩɩ sɩma kɩŋkɛŋ kɩŋkɛŋ.
Wɩɩ-la sɩ tɩɩ Wɩa laa nɩalɩŋ sɩ bɩ Juu tɩŋŋaa ŋaa ta
13Ma nɩalɩŋ sɩ bɩ Juu tɩŋŋaa ŋaa nɛ mɩ lɛɛlɛ chɩchɛ dɩ mɩ bʋl wɩaa pa. Wɩa nɛ tɩmmɛ dɩ mɩ ŋaa nɩalɩŋ sɩ bɩ Juu tɩŋŋaa ŋaa nanzɔɔ. Mɩ joŋ tɩntɩmɩŋ deeŋ ʋ ŋaa tɩntɩŋ-fɩaŋ nɛ. 14Mɩ sɩɩ tɩŋ tɩntɩmɩŋ deeŋ, ŋ bɩ pɔ ʋ jaŋ wuo leŋ dɩ mɩ naambiiriŋ Juu tɩŋŋaa yaraa bibieri, dɩ ba dɔnsʋŋ laa Wɩa wɩaa dii, dɩ ʋ laaba ta. 15Juu tɩŋŋaa sɩ vɩa Wɩa wɩaa ŋɩɩ leŋe dʋnɩa nɩkaanaa arɩ Wɩa sɩŋ nɛ. Dɩ Juu tɩŋŋaa nɛ bɩra kʋ laa Wɩa wɩaa dii, ɛɛ nɛ saa ʋ jaŋ nagɛ? Ʋ jaŋ nagɛ nɩsʋʋnʋŋ sɩ sii sʋʋŋ lɛ nɛ. 16Dɩ ŋ nɛ buu boroboro munuŋ a laa sɩpaaŋ lɔgɛ mʋa a pɩ Wɩa, dɩ ʋ nɛ bɩ disiniŋ kɛnɛ, kʋkaanɩŋ ma bɩra bɩ disiniŋ kɛnɛ. Dɩ tɩa naapoloo ma nɛ zɔmɔ, ʋ naakelee ma zɔmɔ nɛ.
17Juu tɩŋŋaa saa nagɛ tɩa-la ba sɩɩ yɩrɛ Olif nɛ. Ba kɛŋ ʋ nɛnɛɛ a kaa tutugi nʋʋŋ nɛ. Wɩa ŋaa ʋ zɔŋ. Ŋɩɩ nɛ Wɩa keri ʋ naakelee dɔnsʋŋ, aŋ kɛmma kaa mɛrɛ ba leree, ma nɩalɩŋ sɩ nagɛ gɩrɩŋ tɩɩ-naakelee. Ʋ ŋaa ŋɩɩ dɩ ma ma pɛ nɩɩ Olif tɩɩ-zɔŋ-la naakelee sɩma nɛ. 18Má sɩ́ ma tɩtɩa lɛ bigisu arɩ ma kpɩa tɩa-la naakelee ba sɩ kere ta lɛ. Ma dee bɩ tɩa-la naapoloo chaga bil. Tɩa-la naapoloo nɛ chagɛma bil.
19Ma jaŋ wuo bʋl arɩ Wɩa keri tɩa-la naakelee, ka dɩ ʋ kɛmma nɛ mɛrɛ nɩmɛ. 20Wʋtɩtɩɩ nɛ, Wɩa keri Juu tɩŋŋaa ta a tɩŋ ba sɩ bɩ Wɩa wɩaa laa dii wɩaa nɛ. Ama ma-na nɩalɩŋ sɩ bɩ Juu tɩŋŋaa ŋaa, ma sɩ laa Wɩa wɩaa dii dʋndʋŋa wɩaa nɛ tɩɩ ma chɩŋ kpaŋ kpaŋ. Ŋɩɩ wɩaa má sɩ́ ma tɩtɩa lɛ bigisu, aŋ kɛŋ ma tɩtɩa woruŋ. 21Wɩa sɩ bɩ tɩa-la naakelee tɩtɩa nenige fá aŋ keriba ta ŋɩɩ, dɩ ma ma nɛ bɩ ma sɩaa fɩɛla, ʋ jaŋ keri ma ma ta ŋɩɩ tɩtɩa. 22Ma na ŋɩɩ Wɩa sɩ kɛŋ zile arɩ ŋɩɩ ʋ sɩ tɛrɛ nɛ. Ʋ tɛrɛ nɩalɩŋ sɩ mɩɩrɛ ʋ harɩŋ nyuŋ nɛ. Ama ʋ kɛŋ zile ma-na teeŋ, dɩ ma nɛ sɛyɛ dɩ ma tuto ʋ zile-la lɛ arɩ ma sɩ suomi ŋɩɩ. Ŋɩɩ dee ʋ jaŋ kerima ma ta. 23Dɩ Juu tɩŋŋaa nɛ paala bɩrɩma to Wɩa, Wɩa jaŋ bɩra kɛmba kaa mɛrɛ tɩɩ-zɔŋ-la lɛ, bɛɛ wɩaa Wɩa kɛŋ doluŋ dɩ ʋ ŋaa ŋɩɩ. 24Ma nɩalɩŋ sɩ paala bɩ tɩɩ-zɔŋ-la naakelee ŋaa aŋ ŋaa gɩrɩŋ tʋɔŋ tɩɩ-naakelee, ka Wɩa kɛmma a kaa mɛrɛ tɩɩ-zɔŋ-la lɛ, ʋ jaŋ wuo kɛŋ tɩa-la tɩtɩa naakelee ʋ sɩ kere ta a kaa mɛrɛ.
Wɩa ma jaŋ laa Iziral tɩŋŋaa ta
25Mɩ naambiiriŋ, wɩaa nɛ hɛ nɩmɛ Wɩa fa joŋo faama, mɩɩ chɛ dɩ ma jɩŋ. Wɩɩ-la jaŋ ŋaa dɩ ma sɩ́ bɩɩna bʋl arɩ ma kɛŋ wʋjɩmɩŋ a bibigisi ma tɩtɩa lɛ. Wɩɩ-la nɛ ŋ-la: Iziral tɩŋŋaa sɩ kɛŋ nyu-duo-la, ba bɩ jaŋ kɛnʋ wuu. Bʋa-la lɛ dɩ nɩalɩŋ sɩ bɩ Juu tɩŋŋaa ŋaa nɛ kʋ yʋgɛ a laa Wɩa wɩaa dii, Iziral tɩŋŋaa nyu-duo-la jaŋ dɛrɛ. 26Ŋ-la lɛ nɛ Wɩa jaŋ to a laa Iziral tɩŋŋaa kala ta. Ba ŋmʋnsɛ ŋɩɩ nɛ Wɩa teniŋ tʋɔŋ. Ba sɩ,
“La Laataara jaŋ lɩɩ Zaayɔŋ.
Ʋ jaŋ kiri wʋbɔŋŋɔɔ kala Jekɔb doho nɩaa tʋɔŋ.”
27Ba bɩra ŋmʋnsa a bʋl,
“La dɩ ba jaŋ bil niiŋ a pɩ dɔŋɔ
dɩ mɩ laa ba wʋbɔŋŋɔɔ ta.”
28A tɩŋ Juu tɩŋŋaa sɩ vɩa Wɩa wʋzɔmɔ-la wɩaa nɛ tɩɩ ba ŋaa Wɩa dʋndɔmɔ, ma nɩalɩŋ saa sɩ bɩ Juu tɩŋŋaa ŋaa wɩaa nɛ tɩɩ. Ama a tɩŋ ʋ sɩ lɩɩsɛba wɩaa nɛ tɩɩ ba ŋaa ʋ nɩchooloo, a tɩŋ ba naabalɩmaba wɩaa, 29bɛɛ wɩaa kɩalɩŋ kala Wɩa sɩ joŋo pɩba arɩ ʋ sɩ lɩɩsɛba ŋɩɩ, ʋ bɩra bɩ jaŋ wuo vɔmba. 30Ama, ma-na nɩalɩŋ sɩ bɩ Juu tɩŋŋaa ŋaa, ma fa vɩa Wɩa niiŋ wɩaa, ama lɛɛlɛ Wɩa fá ma nenige nɛ a tɩŋ Iziral tɩŋŋaa ma sɩ vɩa Wɩa niiŋ wɩaa ŋɩɩ. 31Ŋɩɩ tɩtɩa nɛ Iziral tɩŋŋaa ma sɩ bɩ Wɩa niiŋ ka to lɛɛlɛ, Wɩa jaŋ fá ba ma nenige, arɩ ʋ sɩ fá ma ma nenige ŋɩɩ. 32Nɩalɩŋ kala sɩ bɩ Wɩa niiŋ wɩaa ka to, ba wʋbɔŋŋɔɔ nyagɛba bil nɛ, ŋɩɩ nɛ Wɩa wuo fá ba nenige.
33Wɩa sɩɩ fá la nenige ŋɩɩ arɩ ŋɩɩ ʋ sɩ kɛŋ wʋjɩmɩŋ arɩ ŋɩɩ ʋ sɩ jɩŋ wɩaa bʋbʋɔŋ, ʋ bɩ magɩa kɛnɛ. Kʋbɛɛ nɛ jɩŋ ŋɩɩ Wɩa sɩɩ ŋaa wɩaa? Nʋʋkala bɩ Wɩa wʋŋaalaa jɩŋ.
34Kʋbɛɛ nɛ jaŋ wuo jɩŋ Wɩa tʋɔbɩɩnaa?
Kʋbɛɛ ma nɛ jaŋ wuo dagɛ Wɩa?
35Kʋbɛɛ nɛ ha joŋ kʋŋ pɩ Wɩa aŋ gbɛrɛ dɩ Wɩa mɩɩra joŋ kʋ-la pʋ?
36Bɛɛ wɩaa Wɩa nɛ ŋaa kʋŋkala. Ʋ doluŋ lɛ nɛ kʋŋkala ma hɛ nɩmɛ. Ʋ nɛ tɩɩ kʋŋkala. Má leŋ dɩ Wɩa yɩrɩŋ yɩrɛ a kaa mʋ wuu. Amɩɩ.
Currently Selected:
:
Highlight
Share
Copy
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014