LEVI DOHO NƖAA 25

Jɩna-la lɛ tinteeŋ sɩ maga dɩ ʋ pɩna wiesi

1La TƖƖNA bʋla pɩ Mosis peel-la ba sɩɩ yɩrɛ Sɩnaɩ nyuŋ, 2“Bʋla pɩ Iziral tɩŋŋaa, dɩ ma nɛ kʋ jʋʋ Kɛnaŋ tintee-la mɩ sɩ jaŋ joŋo pɩma, tintee-la jaŋ kɛŋ jɩna ʋ sɩ jaŋ pɩna wiesi a pɩ mɩ-na ma TƖƖNA. 3Jɩsɩŋ balɩdʋ tʋɔŋ ma jaŋ duduu kɩaa ma bagɩsɩŋ lɛ a ŋɩŋaa, a beŋ ma girep tɩɩsɩŋ nyuŋ woruŋ a tʋtɔrɛ ba nɛnɛɛ. 4Ama jɩ-pɛɩ lɛ ma bɩ maga dɩ ma pɛrɛ tintee-la koo a buori ma girep tɩɩsɩŋ ta. Ʋ maga dɩ tintee-la pɩna wiesi nɛ a pɩ mɩ-na ma TƖƖNA. 5Kʋtɩarɩ-la ma sɩ waa ba tɩtɩa lɛ, má sɩ́ ba kala ŋaa a sɩ́ girep tɩɩsɩ-la sɩ nɛnɛ ma kala tɔrʋ. Tintee-la maga dɩ ʋ pɩna wiesi nɛ a pɩ mɩ-na ma TƖƖNA. 6Jɩna-la tʋɔŋ tintee-la sɩ jaŋ pɩna wiesi, kʋtɩarɩ-la sɩ jaŋ bii tintee-la lɛ jaŋ ŋaa ma dɩ ma tɩntɩnnaa baalaa arɩ haalaa arɩ ma nʋhʋɔraa kala kʋdiilee. 7Ma pʋsʋŋ arɩ gɩrɩŋ kɩaa kala nɛ jaŋ didiiba. Kʋtɩarɩ-la kala sɩ jaŋ bii tintee-la lɛ ma jaŋ wuo diiba.

Jɩ-mahɩŋ balɩa arɩ fii

8Má chɩŋ jɩna-la lɛ tintee-la sɩ jaŋ pɩna wiesi a dɩɩsɛ jɩsɩŋ mahɩŋ balɩa arɩ nibi. 9Jɩna-la chɛŋ-pɛɩ tʋɔŋ tapʋlaa fii chɛɛŋ tapʋlɩɩ-la ma sɩ jaŋ pɩɩsɛ ma disiniŋ ta, ʋ maga dɩ ma ŋmʋʋ banyile tintee-la kala lɛ. 10Dɩ ma nɛ ŋaa ŋɩɩ, má lɩɩsɛ jɩ-mahɩŋ balɩa arɩ fii, dɩ ʋ ŋaa jɩna-la nʋʋkala sɩ maga dɩ ʋ tɩɩ ʋ tɩtɩa. Jɩna deeŋ tʋɔŋ, dɩɩsɩŋ arɩ tinteye-la kala nɩaa sɩ yɔbɔ maga dɩ ba joŋo pɩ ba tɩŋŋaa nɛ, ka dɩ yosuŋ ma mɩɩra mʋ ba dɩa nɩaa teeŋ. 11Jɩ-mahɩŋ balɩa arɩ fii-la lɛ, má sɩ́ pɛrʋ koo a ŋaa kʋtɩarɩ-la sɩ bɩa koo a tɔrɛ ma girep nɛnɛɛ. 12Ʋ ŋaa jɩ-zɔŋ nɛ a pɩma. Ma jaŋ dii kʋtɩarɩ-la sɩ bɩɩ ma bagɩsɩŋ lɛ, ama ʋ bɩ maga dɩ ma ŋaa a kaa kɔ dɩa a tʋɔlɛ.

13Jɩna deeŋ tʋɔŋ maga dɩ ma joŋ ma dɔnsʋŋ tɩŋŋaa tinteye-la ma sɩ yɔbɔ pɩba nɛ.

14Dɩ Iziral tɩɩna nɛ yallɛ tinteeŋ pɩpɩ ʋ naambii koo dɩ ʋ yɔɔ tinteeŋ ʋ naambii teeŋ, ʋ bɩ maga dɩ ʋ to ŋɩɩ lɛ a gʋrʋ. 15Ʋ maga dɩ ŋ hɛ yalɩŋ a magɛ jɩsɩ-la ŋ naambile sɩ jaŋ wuo pɛrɛ tintee-la lɛ, ka dɩ jɩna-la ba sɩ jaŋ joŋ tinteye-la ba sɩ yɔbɔ pɩ ba tɩŋŋaa-na yi. 16Dɩ jɩsɩ-la nɛ yʋga, ʋ maga dɩ yalɩŋ ma yʋgɛ nɛ, ka dɩ ba nɛ bɩ yʋgɛ, yalɩŋ ma bɩ maga dɩ ʋ yʋgɛ, bɛɛ wɩaa kʋdiilee magɛ ŋɩɩ ŋ sɩ jaŋ wuo na tintee-la lɛ nɩɩ dagɛ ʋ yalɩŋ. 17Iziral tɩɩna kala bɩ maga dɩ ʋ gʋrɛ ʋ dɔŋɔ tɩɩna, ama má to mɩ-na ma TƖƖNA Wɩa niiŋ.

18Má to mɩ niiŋ arɩ wombie-la kala mɩ sɩ daga. Dɩ ma nɩɩ ŋaa ŋɩɩ, ma jaŋ hɔŋ tintee-la lɛ arɩ yarɩfɩɛlaa. 19Ma jaŋ na kʋdiilee woruŋ tintee-la lɛ a didii aŋ hɔŋ sɔm. 20Ma jaŋ wuo pɩɛsɛ arɩ ma sɩ bɩ kɩaa duo a bɩ kɩaa ŋaa, bɛɛ kɩaa nɛ ma jaŋ dii jɩ-pɛɩ-la tʋɔŋ? 21Mɩ jaŋ leŋ dɩ ma kʋdiilee chaasa wasɛ jɩ-dʋ tʋɔŋ dɩ ma wuo dii yi jɩsɩŋ batori. 22Ma jaŋ duu kɩaa jɩ-chori tʋɔŋ aŋ ha didii jɩ-dʋ-la kʋbɩnaa a mʋ jʋʋ jɩ-nibi tʋɔŋ bʋa-la lɛ ma sɩ jaŋ ŋaa ma baga kɩaa.

23Ma bɩ maga ma joŋ tintee-la yalla pɩ nʋʋ dɩ ʋ ŋaa ʋ kʋŋ a kaa mʋ wuu, bɛɛ wɩaa mɩ nɛ tɩɩ tintee-la, ka ma ŋaa nʋhʋɔra a hɔŋ ʋ lɛ. 24Dɩ nʋʋkala nɩɩ yallɛ tinteeŋ, ʋ maga dɩ ma bʋla bil arɩ tɩɩna jaŋ wuo bɩra tiŋ a laa ʋ kʋa.

25Dɩ Iziral tɩɩna kala nɛ summo a keri ʋ tinteeŋ yallɛ, ʋ naambile sɩɩ tɩgɛ ʋ lɛ maga dɩ ʋ time laa tintee-la. 26Ama dɩ ʋ nɛ bɩ naambii kɛnɛ dɩ ʋ time laa, ka dɩ ʋ tɩtɩa kʋ dʋa, a jaŋ wuo time laa, 27ʋ jaŋ dɩɩsɛ jɩsɩ-la tɩɩna sɩ yɔɔ tintee-la a kʋ yi bʋa-la lɛ ʋ sɩɩ chɛ ʋ time laa, a tiŋ jɩ-kaana-la sɩ ka, ka dɩ jɩna-la lɛ ba sɩ jaŋ joŋ tintee yɔbɔɔ pɩ ba tɩŋŋaa-na yi. 28Ama dɩ ʋ nɛ bɩ doluŋ kɛnɛ dɩ ʋ time laa, nɩɩ-la sɩ yɔbɔ jaŋ tɩɩ tintee-la a mʋ yi jɩna-la lɛ ba sɩ jaŋ joŋ tintee yɔbɔɔ pɩ ba tɩŋŋaa dɩ ʋ saa-na laa ʋ kʋa.

29Dɩ taŋ nɛ ba saa kɛrɛ golli, ka dɩ nʋʋ joŋ ʋ tʋɔŋ dɩa yalla pɩ nʋʋ, jɩna-la lɛ ʋ sɩ yalla dʋndʋŋa tʋɔŋ nɛ ʋ jaŋ wuo time laa ʋ kʋa. 30Dɩ ʋ nɛ bɩ time laa ka dɩ jɩna-la bal, dɩa-la jaŋ ŋaa nɩɩ-la sɩ yɔbɔ arɩ ʋ doho nɩaa kʋŋ a kaa mʋ. Dɩ jɩna-la lɛ ba sɩ jaŋ joŋ tintee yɔbɔɔ pɩ ba tɩŋŋaa nɛ yie, dɩa-la-na bɩra bɩ jaŋ ŋaa nɩɩ-la sɩ yalla kʋŋ. 31Ama tasɩ-la na-kala ba sɩ bɩ kɛrɛ saa golli ka dɩ nʋʋ joŋ dɩa a yalla lee-la, nɩɩ-la sɩ yalla jaŋ wuo time laa ʋ kʋa. Dɩ ʋ nɛ bɩ time laa, jɩna-la lɛ ba sɩ jaŋ joŋ tintee yɔbɔɔ pɩpɩ ba tɩŋŋaa nɛ yie, nɩɩ-la sɩ yalla jaŋ laa ʋ kʋa.

32Levi doho nɩaa-na ŋaa dabaŋ nɛ. Ba-na jaŋ wuo time laa ba dɩɩsɩŋ ba tasɩ-la ba sɩ joŋo pɩba bʋa na-kala lɛ. 33Dɩ Levi doho nʋʋ nɛ yallɛ ʋ dɩa, dɩ ba saa kɛrɛ golli taŋ-la koo ba bɩ saa golli, aŋ bɩ wuo time laa, dɩ jɩna-la lɛ ba sɩ jaŋ joŋ tintee yɔbɔɔ pɩpɩ ba tɩŋŋaa nɛ yie, ʋ maga dɩ ʋ laa ʋ kʋa nɛ. Levi doho nɩaa dʋndʋŋa nɛ tɩɩ ba dɩɩsɩŋ a kaa mʋ wuu Iziral tɩŋŋaa kala tʋɔŋ. 34Ama pʋsʋŋ dɩ-diile-la kala sɩ golli Levi doho nɩaa tasɩŋ-na bɩ maga dɩ ba joŋo yallɛ, bɛɛ wɩaa ba ŋaa ba kɩaa nɛ a kaa mʋ wuu.

35Dɩ Iziral tɩɩna kala nɛ kʋ summi a bɩ ʋ tɩtɩa wuo bibeŋ, má kɛnʋ mɛrɛ ma tɩtɩa lɛ a bibenu, arɩ ma sɩɩ beŋ nʋhʋɔraa ŋɩɩ, dɩ ʋ wuo hɛ ma tʋɔŋ. 36Má fá mɩ-na ma Wɩa a leŋ dɩ ma naambie guoli ma tʋɔŋ. Dɩ ma nɛ joŋ kʋŋ chɩmʋ, má sɩ́ leŋe dɩ ʋ tiŋ kʋŋ daŋ. 37Má sɩ́ moribiee koo kʋdiilee joŋ chɩmʋ aŋ chɩchɛ nyʋʋrʋŋ. 38Mɩ nɛ ma TƖƖNA Wɩa, mɩ nɛ kɛŋ ma kaa lɩɩ Ijipiti tinteeŋ kɔ dɩ mɩ joŋ Kɛnaŋ tinteeŋ pɩma aŋ ŋaa ma Wɩa.

39Dɩ Iziral tɩɩna kala nɛ kʋ summi a joŋ ʋ tɩtɩa yalla pɩ ʋ naambii, ʋ bɩ maga dɩ ʋ leŋ dɩ ʋ tɩma pʋpʋ a nagɛ yoŋ. 40Ʋ maga dɩ ʋ joŋu dɩ ʋ nagɛ pachɩŋ diire koo nʋhʋɔra sɩ hɛ ʋ dɩa lɛ. Ʋ maga dɩ ʋ tɩma pʋ a mʋ yi jɩna-la lɛ ba sɩ jaŋ joŋ tintee yɔbɔɔ pɩ ba tɩŋŋaa. 41Bʋa-la lɛ dɩ ʋ nɛ kɛŋ biiriŋ, tɩɩna maga dɩ ʋ leŋ ʋ dɩ ʋ biiriŋ kala mɩɩra mʋ ʋ doho nɩaa teeŋ ba tinteeŋ, 42bɛɛ wɩaa Iziral tɩŋŋaa ŋaa mɩ tɩntɩnnaa nɛ mɩ kaa lɩɩ Ijipiti tinteeŋ lɛ. Ʋ bɩ maga dɩ ba joŋ ba kʋŋ yallɛ a nagɛ yomo. 43Ʋ bɩ maga dɩ ma kɛŋ tʋɔhɛɛŋ dɔŋɔ lɛ. Má fɩfá mɩ-na ma Wɩa.

44Dɩ ma nɩɩ chɛ yosuŋ, ma jaŋ wuo yɔɔba tinteye-la sɩ kpagɛ ma lɛ. 45Ma jaŋ wuo yɔɔ nʋhʋɔra-la ma sɩ hɔŋ ma tʋɔŋ arɩ ba doho nʋʋkala ba sɩ lʋla ma tinteeŋ lɛ dɩ ba ŋaa ma kɩaa. 46Ma biiriŋ ma jaŋ wuo sii tɩɩba, dɩ ba ŋaa ba yosi a kaa mʋ wuu. Ama ma pɔ má sɩ́ ma Iziral tɩɩna dɔŋɔ dɔgɩsʋ. 47Dɩ nʋhʋɔra-la sɩ hɔŋ ma tʋɔŋ dɔŋɔ nɛ ŋaa kɩaa tɩɩna dɩ ma dɔŋɔ joŋ ʋ tɩtɩa yalla pʋ koo nʋhʋɔrʋ-la doho nʋʋ a tɩŋ ʋ sɩ summo wɩaa, 48wombiiŋ hɛ nɩmɛ ba sɩ jaŋ wuo time laaʋ. Ʋ naambiiriŋ dɔŋɔ jaŋ wuo time laaʋ. 49Ʋ nyɩmma kʋbie koo ʋ nyɩmma kʋbie ma bie koo ʋ naambii na-kala jaŋ wuo time laaʋ, koo dɩ ʋ ma tɩtɩa nɩsɩŋ nɛ kʋ kɛŋ, ʋ jaŋ wuo time laa ʋ tɩtɩa. 50Ʋ dɩ nɩɩ-la ʋ sɩ joŋ ʋ tɩtɩa yalla pa jaŋ chɩŋ jɩna-la lɛ ʋ sɩ yɔbʋ a dɩɩsɛ jɩsɩ-la ʋ sɩ yɔbʋ a kʋ yi bʋa-la lɛ ʋ sɩɩ chɛ dɩ ʋ time laa ʋ tɩtɩa, a saa na jɩ-kaana-la sɩ ka, ka dɩ jɩna-la lɛ ba sɩ jaŋ joŋ tintee yɔbɔɔ pɩ ba tɩŋŋaa-na yi. Ʋ jaŋ tiŋ a maga ŋɩɩ nɩa sɩ jaŋ tɩŋ jɩsɩ-la, ka ba timu a pɩ nɩɩ-la sɩ yɔbʋ. 51Dɩ jɩsɩ-la sɩ ka nɛ yʋga, ʋ jaŋ time yʋgɛ aŋ-na laa ʋ tɩtɩa. 52Ama dɩ jɩsɩ-la sɩ ka, ka dɩ jɩna-la lɛ ba sɩ jaŋ joŋ tintee yɔbɔɔ pɩ ba tɩŋŋaa-na yi nɛ bɩ yʋgɛ, ʋ jaŋ time magɛ ŋɩɩ jɩsɩ-la sɩ maga. 53Nɩɩ-la ʋ sɩ yallɛ ʋ tɩtɩa pa maga dɩ ʋ joŋu arɩ pachɩŋ diiru nɛ, ʋ bɩ maga dɩ ʋ dʋdɔgɩsʋ.

54Dɩ ʋ nɛ paala bɩ ʋ tɩtɩa wuo time laa ma, jɩna-la lɛ ba sɩ jaŋ joŋ tintee yɔbɔɔ pɩ ba tɩŋŋaa nɛ yie, nɩɩ-la sɩ yɔbʋ maga dɩ ʋ joŋ ʋ dɩ ʋ biiriŋ ta nɛ, 55bɛɛ wɩaa Iziral tɩŋŋaa ŋaa mɩ tɩntɩnnaa nɛ mɩ kaa lɩɩ Ijipiti tinteeŋ kɔ. Mɩ nɛ ma TƖƖNA Wɩa.”

Currently Selected:

LEVI DOHO NƖAA 25: SIS

Highlight

Copy

Compare