LEVI DOHO NƖAA 24
24
Ba bil nʋʋŋ arɩ boroboro La TƖƖNA sɩpaaŋ
1La TƖƖNA bʋla pɩ Mosis, 2“Leŋ dɩ Iziral tɩŋŋaa kɛŋ olif nʋʋŋ sɩ faasa zɔŋ kɔ dɩ ba joŋo hɩhɛ chaanaa lɛ dɩ ba didii a sɩ́ dɩsʋ. 3Arɔŋ maga dɩ ʋ nyɩgɛ chaanaa dɩdaanɩŋ a bil mɩ-na ma TƖƖNA sɩpaaŋ nɛ, lɛbɩ-la lɛ mɩ sɩ yie kɔ Iziral tɩŋŋaa teeŋ. Chaana-la jaŋ chɩŋ patɩɩsaŋ-la sɩ kɛŋ Wɩa dɩ-zɔmʋŋ arɩ Wɩa dɩ-zɔŋ-la lee-la zɔmʋŋ sɩ bɩ magɩa kɛnɛ kaa kpaa sɩpaaŋ, dɩ ba didii ŋɩɩ a kaa mʋ chʋchʋɔŋ. Wɩɩŋ deeŋ ŋaa nii nɛ a magɛ dɩ ma doho kala tuto a kaa mʋ wuu. 4Ba sɩ kɛŋ sɛlɩmɛ sɩ chaasa zɔŋ ŋaa chaaŋ-daaŋ ʋ chɩŋ mɩ-na ma TƖƖNA sɩpaaŋ, chaana-la sɩ sagɛ ʋ nyuŋ maga dɩ ba didii nɛ bʋa na-kala.
5Ŋaa munuŋ sɩ bɩɩ nʋgʋgʋ a wasɛ boroboroba fii arɩ balɩa, dɩ ba kʋŋkala yuŋuŋ ŋaa kilo balɩa, 6a joŋo daŋ dɔŋɔ lɛ naaderee balɩa teebʋl-la ba sɩ kɛŋ sɛlɩmɛ sɩ chaasa zɔŋ ŋaa nyuŋ, dɩ ʋ chɩŋ mɩ-na ma TƖƖNA sɩpaaŋ. 7Naadere-la kʋŋkala lɛ, hɛ kʋsʋɔrʋsʋŋ sɩ faasa zɔŋ sɩ jaŋ laa boroboroba-la nyuŋ a ŋaa mɩ-na ma TƖƖNA toruŋ dɩ ba joŋo ŋaa kʋnyɩgaa Wɩɩsʋlʋŋ pɩ mɩ-na ma TƖƖNA. 8Chɛ-wiesii-la chɛɛŋ na-kala Iziral tɩŋŋaa maga ba kɛŋ boroboroba-la kɔ, dɩ Arɔŋ joŋo bil mɩ-na ma TƖƖNA sɩpaaŋ. Ʋ ŋaa nii nɛ pɩ Iziral tɩŋŋaa kala dɩ ba tuto wuu. 9Boroboroba-la ŋaa Arɔŋ arɩ ʋ hambolibiisiŋ kɩaa nɛ. Ba jaŋ diiba Wɩa dɩ-zɔŋ, bɛɛ wɩaa ba ŋaa kʋdiilee zɔmʋŋ sɩ bɩ magɩa kɛnɛ nɛ, Wɩɩsʋllɩ kɩalɩŋ ba sɩ joŋo nyɩga pɩ mɩ-na ma TƖƖNA tʋɔŋ.”
Ba yagɛ nʋʋ sɩ chei Wɩa yɩrɩŋ kpʋ
10Baal kʋbala nɛ fa hɛ nɩmɛ, ʋ naaŋ ŋaa Iziral tɩɩna, ka ʋ nyɩmma ma ŋaa Ijipiti tɩɩna. Ŋɩɩ nɛ yuosuŋ sii baal-la arɩ Iziral tɩɩna pɛgɛ ba dɩhɔnʋŋ. 11Baal-la naaŋ sɩ ŋaa Iziral tɩɩna bʋl wɩaa chei La TƖƖNA yɩrɩŋ, ŋɩɩ nɛ ba kɛnʋ mʋ Mosis teeŋ. Ʋ naaŋ yɩrɩŋ nɛ fa Sɛlɔmɩf, Dibiri sɩ ŋaa Daŋ doho nʋʋ tolo. 12Ba kɛnʋ tɔ dɩa aŋ gbɩgbɛrɛ dɩ La TƖƖNA dagɛ wɩɩ-la ʋ sɩɩ chɛ dɩ ba ŋaa ʋ lɛ. 13Ŋɩɩ nɛ La TƖƖNA bʋla pɩ Mosis, 14“Kɛŋ mɩ yɩrɩ-cheeru-la sʋʋsa lɩɩ ma dɩhɔnʋŋ, dɩ nɩalɩŋ kala sɩ nɩɩ wɩalɩŋ ʋ sɩ bʋla joŋ nɩsaa daŋ ʋ nyuŋ lɛ, ka dɩ Iziral tɩŋŋaa kala paa tabɩaa a yagʋ kpʋ. 15Bʋla pɩ Iziral tɩŋŋaa dɩ nʋʋkala nɛ chei mɩ-na ma TƖƖNA yɩrɩŋ, ʋ jaŋ na hɛɛŋ ŋɩɩ bʋbʋɔŋ lɛ, 16dɩ ʋ ŋaa nʋhʋɔrʋ koo dɩ ʋ ŋaa Iziral tɩɩna, Iziral tɩŋŋaa kala maga dɩ ba paa tabɩaa yagʋ kpʋ nɛ.
17Dɩ nʋʋ nɛ kpʋ ʋ dɔŋɔ tɩɩna, ʋ maga dɩ ba kpʋʋ nɛ. 18Dɩ nʋʋkala nɛ kpʋ ʋ dɔŋɔ pʋna, ʋ maga dɩ ʋ kɛŋ pʋna nɛ tiŋ ʋ chɩmɩŋ. 19Dɩ nʋʋkala nɛ bolimi ʋ dɔŋɔ tɩɩna, wɩɩ-la kala ʋ sɩ ŋaa nɩɩ-la lɛ, ʋ maga dɩ ba joŋ ŋɩɩ tɩtɩa nɛ ŋaa ʋ ma lɛ. 20Dɩ ŋ nɛ bori nʋʋ naaŋ, ba jaŋ bori ŋ ma naaŋ. Dɩ ŋ nɛ togi nʋʋ sɩɩŋ, ba jaŋ togi ŋ ma sɩɩŋ. Dɩ ŋ nɛ ŋmoo nʋʋ nyɩlɩŋ churi, ba jaŋ ŋmoo ŋ ma nyɩlɩŋ churi. Wɩɩ-la ŋ sɩ joŋo ŋaa ŋ dɔŋɔ lɛ, ba jaŋ joŋ ŋɩɩ tɩtɩa nɛ ŋaa ŋ ma lɛ. 21Dɩ ŋ nɛ kpʋ nʋʋ pʋna, ŋ jaŋ kɛŋ pʋna tiŋ ʋ chɩmɩŋ, ama dɩ nuhuobiiŋ nɛ ŋ kpʋ, ba jaŋ kpʋ ŋ ma. 22Iziral tɩŋŋaa arɩ nʋhʋɔraa kala nɛ maga dɩ ba tuto wombiee deemba. Mɩ nɛ ma TƖƖNA Wɩa.”
23Mosis sɩ bʋl wɩaa deemba kala pɩ Iziral tɩŋŋaa dɛrɛ, ŋɩɩ nɛ ba kɛŋ baal-la fa sɩ bʋl wɩaa chei La TƖƖNA yɩrɩŋ, a sʋʋsa lɩɩ ba dɩhɔnʋŋ a paa tabɩaa yagʋ kpʋ. Iziral tɩŋŋaa ŋaa wɩalɩŋ La TƖƖNA sɩ dagɛ Mosis.
Currently Selected:
LEVI DOHO NƖAA 24: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
