LEVI DOHO NƖAA 21
21
Wɩalɩŋ Wɩɩsʋllɩ sɩpaalaaraa sɩ maga dɩ ba ŋɩŋaa
1La TƖƖNA bʋla pɩ Mosis, “Bʋla pɩ Arɔŋ hambolibiisiŋ, Wɩɩsʋllɩ sɩpaalaaraa, dɩ ba kʋŋ naambii nɛ sʋba, ʋ sɩ́ ʋ digu a kɛŋ disiniŋ. 2Ama ʋ naaŋ koo ʋ nyɩmma, ʋ nanʋala koo ʋ tolo, ʋ ŋaana koo ʋ malɩma, kʋŋ nɛ sʋba, ʋ jaŋ wuo digi. 3Dɩ ʋ dɩhaal ma nɛ hɛ ʋ dɩa lɛ a bɩ bala jaa aŋ sʋʋ, ʋ jaŋ wuo digi. 4Dɩ ʋ haala naambii nɛ sʋba, ʋ bɩ maga dɩ ʋ digi ʋ kʋsʋʋŋ, dɩ ŋɩɩ leŋ dɩ ʋ kɛŋ disiniŋ.
5Wɩɩsʋllɩ sɩpaalaaraa bɩ maga dɩ ba fʋŋ ba nyusuŋ koo a kɛ ba tɔŋŋɔɔ koo a kpɛrɛ ba yaraa dɩ ba nɩɩ yel yoho. 6Ba bɩ maga dɩ ba kɛŋ disiniŋ a chei mɩ-na ba Wɩa yɩrɩŋ, bɛɛ wɩaa mɩ lɩɩsɛba nɛ dɩ ba tɩtɩŋ mɩ tɩntɩŋŋaa a nyɩgɛ Wɩɩsʋlʋŋ kɩaa pɩpɩmɛ a ŋaa kʋ diilee Wɩɩsʋlʋŋ a pɩmɛ. Ba bɩ maga dɩ ba kɛŋ disiniŋ.
7Ba bɩ maga dɩ ba jaa haala-la sɩ ŋaa hachɔrʋŋ wɩaa aa hɩɩsɛ ba tɩtɩa, koo haala-la sɩ vɩa ba balaba, bɛɛ wɩaa Wɩɩsʋllɩ sɩpaalaaraa bɩ maga ba kɛŋ disiniŋ mɩ-na ba Wɩa teeŋ. 8Ma Iziral tɩŋŋaa maga dɩ ma jɩŋ arɩ Wɩɩsʋllɩ sɩpaalaaraa bɩ disiniŋ kɛnɛ nɛ, bɛɛ wɩaa ba nɛ joŋ Wɩɩsʋlʋŋ kʋdiilee a pɩpɩ mɩ-na ma Wɩa. Mɩ-na ma TƖƖNA bɩ disiniŋ kɛnɛ, a leŋ ma ma bɩ disiniŋ kɛnɛ.
9Dɩ Wɩɩsʋllɩ sɩpaalaara tolo nɛ ŋaa hachɔrʋŋ, ʋ hɛ ʋ nyɩmma hɩɩsɩŋ nɛ, ʋ maga dɩ ba kɛŋ tolo-la a nyɩgɛ.
10Wɩɩsʋllɩ sɩpaalaaraa tʋɔŋ kʋhɩaŋ, nɩɩ-la ba sɩ chaasa lɩɩsɛ a wansɛ Wɩɩsʋlʋŋ nʋʋŋ hɛ ʋ nyuŋ lɛ, dɩ́ ʋ nɛ laalɛ Wɩɩsʋllɩ sɩpaalaaraa kʋhɩaŋ gɛnnɩŋ, ʋ bɩ maga dɩ ʋ vɩa ʋ nyuŋ ta koo a kɛŋ ʋ gɛnnɩŋ kɩɛsɛ aa dagɛ arɩ ʋʋ yel yoho nɛ. 11Ʋ bɩ maga dɩ ʋ mʋ kpagɛ sʋʋŋ, dɩ ʋ naaŋ koo ʋ nyɩmma nɛ sʋba ma, dɩ ŋɩɩ leŋ dɩ ʋ kɛŋ disiniŋ. 12Ʋ bɩ maga dɩ ʋ lɩɩ Wɩa dɩ-zɔŋ-la tʋɔŋ a yel yoho a ŋaa disiniŋ hɛ ʋ tɩtɩa arɩ Wɩa dɩ-zɔŋ-la lɛ, bɛɛ wɩaa ba lɩɩsʋ nɛ a joŋ Wɩɩsʋlʋŋ nʋʋ-la tɩsʋ dɩ ʋ ŋaa Wɩɩsʋllɩ sɩpaalaaraa kʋhɩaŋ. Mɩ nɛ ma TƖƖNA.
13Haal-la ʋ sɩ jaŋ jaa maga dɩ ʋ ŋaa hapuŋ nɛ. 14Ʋ bɩ maga dɩ ʋ jaa yo-haal koo haal arɩ ʋ bala sɩ vɩa dɔŋɔ koo haal-la sɩ ŋaa hachɔrʋŋ wɩaa a hɩɩsɛ ʋ tɩtɩa. Ʋ maga dɩ ʋ jaa hapuŋ nɛ ʋ doho nɩaa tʋɔŋ, 15dɩ ŋɩɩ leŋ dɩ ʋ biiriŋ sɩ́ disiniŋ kɛŋ ʋ doho nɩaa tʋɔŋ. Mɩ-na ma TƖƖNA nɛ lɩɩsʋ dɩ ʋ ŋaa Wɩɩsʋllɩ sɩpaalaarɩ-hɩaŋ.”
16La TƖƖNA bɩra bʋla pɩ Mosis, 17“Bʋla pɩ Arɔŋ, ʋ doho nɩaa tʋɔŋ a kaa mʋmʋ, dɩ nʋʋ yaraa nɛ kɛŋ nyɔɔ, ʋ bɩ maga ʋ kʋ joŋ kʋdiilee Wɩɩsʋlʋŋ pɩ ʋ Wɩa. 18Dɩ nʋʋ yaraa nɛ kɛŋ nyɔɔ, ʋ bɩ maga dɩ ʋ kʋ kpagɛmɛ. Dɩ ʋ nɛ nyʋlɩma, koo dɩ ʋ nɛ gbɛrɩgɛ koo dɩ ʋ yaraa nɛ bɩ chese koo a ŋaa jɩgɩla jɩgɩla. 19Dɩ nʋʋ naaŋ koo ʋ nɩsɩŋ nɛ sʋba, ʋ bɩ jaŋ wuo kɛŋ Wɩɩsʋlʋŋ kʋdiilee kɔ mɩ sɩpaaŋ. 20Dɩ nʋʋ nɛ kɛŋ gʋma koo a faasa kui, koo dɩ ʋ nɛ kɛŋ sɩɩ-togo, koo dɩ ʋ lee nɛ ŋmɛrɛ a lɩlɩɩ nʋɔlʋŋ, koo dɩ ʋ luribiee nɛ yɛrɛ, ʋ bɩ jaŋ wuo kɛŋ Wɩɩsʋlʋŋ kʋdiilee kɔ mɩ sɩpaaŋ. 21Dɩ Arɔŋ sɩ ŋaa Wɩɩsʋllɩ sɩpaalaara doho nʋʋ yaraa nɛ kɛŋ nyɔɔ, nɩɩ-la bɩ maga dɩ ʋ kʋ nyɩgɛ Wɩɩsʋlʋŋ kɩaa pɩ mɩ-na ma TƖƖNA. Ʋ bɩ maga dɩ ʋ kʋ joŋ kʋdiilee Wɩɩsʋlʋŋ ma pɩ mɩ-na ʋ Wɩa. 22Ʋ jaŋ wuo dii kʋdiile-la sɩ bɩ disiniŋ kɛnɛ ba sɩ yie joŋo pɩ mɩ-na ma Wɩa, kɩalɩŋ sɩ zɔmɔ arɩ kɩalɩŋ sɩ chaasa zɔŋ. 23Ama a tɩŋ ʋ yaraa sɩ kɛŋ nyɔɔ ŋɩɩ wɩaa, ʋ bɩ maga dɩ ʋ kʋ kpagɛ kʋnyɩgaa Wɩɩsʋllɩ koruŋ, koo patɩɩsaŋ-la sɩ kɛŋ Wɩa dɩ-zɔmʋŋ arɩ Wɩa dɩ-zɔŋ-la sɩpaaŋ kaa kpaa. Dɩ ʋ nɛ ŋaa ŋɩɩ, ʋ jaŋ ŋaa disiniŋ hɛ lee-la. Mɩ-na nɛ ma TƖƖNA a leŋ lere-la bɩ disiniŋ kɛnɛ mɩ teeŋ.”
24Ŋɩɩ nɛ Mosis bʋl wɩaa deemba kala pɩ Arɔŋ arɩ ʋ hambolibiisiŋ arɩ Iziral tɩŋŋaa kala.
Currently Selected:
LEVI DOHO NƖAA 21: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
