LEVI DOHO NƖAA 20
20
Dɩ nʋʋ nɛ ŋaa Wɩɩ chei, ŋɩɩ ba sɩ jaŋ ŋaaʋ
1La TƖƖNA bʋla pɩ Mosis, 2“Bʋla pɩ Iziral tɩŋŋaa, dɩ ba kʋŋ koo nʋhʋɔra-la sɩ hɛ ba tʋɔŋ kʋŋ nɛ joŋ ʋ bie pa dɩ ba kaa kpaarɛ vene-la ba sɩɩ yɩrɛ Mɔlɛk, Iziral tɩŋŋaa kala maga dɩ ba yagɛ tɩɩna kpʋ arɩ tabɩaa. 3‘Mɩ jaŋ vɩa tɩɩna a keru ta ʋ nɩaa tʋɔŋ, a tɩŋ ʋ sɩ joŋ ʋ bie pa ba kaa kpaarɛ vene-la ba sɩɩ yɩrɛ Mɔlɛk wɩaa. Ʋ ŋaa disiniŋ hɛ mɩ-na Wɩa dɩ-zɔŋ-la lɛ nɛ a chei mɩ yɩrɩ-zɔŋ-la. 4Dɩ Iziral tɩŋŋaa nɛ na nɩɩ-la sɩ joŋ ʋ bie pa ba kaa kpaarɛ vene-la ba sɩɩ yɩrɛ Mɔlɛk aŋ vɩa dɩ ba kpʋʋ, 5mɩ-na tɩtɩa jaŋ joŋ mɩ sɩaa a chaasɛ nɩɩ-la arɩ ʋ dɩa nɩaa, a keriba ta ba nɩaa tʋɔŋ, arɩ nɩalɩŋ kala sɩ vɩa mɩ niiŋ aŋ to ba harɩŋ kpʋkpaarɛ vene-la ba sɩɩ yɩrɛ Mɔlɛk.
6Mɩ jaŋ joŋ mɩ sɩaa chaasɛ nɩɩ-la kala sɩɩ jʋʋ vʋgʋrʋ-dɩɩsɩŋ arɩ kantɔŋ-dɩɩsɩŋ a keru ta ʋ nɩaa tʋɔŋ. 7Má joŋ ma tɩtɩa hɛ mɩ nɩsɩŋ lɛ a sɩ́ disiniŋ kɛŋ, bɛɛ wɩaa mɩ nɛ ma TƖƖNA Wɩa. 8Má to mɩ niiŋ arɩ wombie-la mɩ sɩ dagɛma. Mɩ nɛ ma TƖƖNA Wɩa sɩ leŋe ma ŋaa nɩaa sɩ bɩ disiniŋ kɛnɛ.
9Dɩ nʋʋkala nɛ bʋl wʋbɔŋ hɛ ʋ nyɩmma koo ʋ naaŋ lɛ, ʋ maga dɩ ba kpʋʋ nɛ, ʋ tɩtɩa nɛ chɛ ʋ sʋʋŋ.
10Dɩ nʋʋkala nɛ kɛŋ ʋ dɔŋɔ haala pɩŋ, ʋ maga dɩ ba kpʋ baal-la arɩ haal-la kala nɛ.
11Dɩ nʋʋ nɛ kɛŋ ʋ nyɩmma haala pɩŋ, ʋ hɩɩsɛ ʋ nyɩmma nɛ, ʋ maga dɩ má kpʋ baal-la arɩ haal-la kala. Ba tɩtɩa nɛ chɛ ba sʋʋŋ.
12Dɩ baal nɛ kɛŋ ʋ bii-haala pɩŋ, ʋ maga dɩ má kpʋ baal-la arɩ haal-la kala, wʋberige nɛ ba ŋaa ŋɩɩ, ba tɩtɩa nɛ chɛ ba sʋʋŋ.
13Dɩ baal nɛ kɛŋ ʋ ba-dɔŋɔ pɩŋ arɩ ba sɩɩ pɩŋ haala ŋɩɩ, ba ŋaa wɩɩ sɩɩ kɩsʋ nɛ, ʋ maga dɩ ma kpʋba nɛ. Ba tɩtɩa nɛ chɛ ba sʋʋŋ.
14Dɩ nʋʋ nɛ jaa haal arɩ ʋ tolo kala, ŋɩɩ ŋaa wʋbɔŋ nɛ. Ʋ maga má nyɩgɛ ba kala batori a giri wʋbɔŋ-la ta ba tʋɔŋ.
15Dɩ baal nɛ kɛŋ pʋna pɩŋ, ʋ maga dɩ má kpʋ baal-la arɩ pʋna-la kala.
16Dɩ haal ma nɛ leŋe dɩ pʋna kɛnʋ pɩŋ, ʋ maga dɩ má kpʋ haal-la arɩ pʋna-la kala, ba tɩtɩa nɛ chɛ ba sʋʋŋ.
17Dɩ baal nɛ jaa ʋ dɩhaala, ʋ nyɩmma tolo koo ʋ naaŋ tolo a kɛnʋ pɩŋ, ʋ ŋaa hɩɩsɛ wɩɩ nɛ. Ʋ maga dɩ má keriba ta ba nɩaa tʋɔŋ. Ʋ hɩɩsɛ ʋ dɩhaala nɛ, ʋ jaŋ na hɛɛŋ ŋɩɩ bʋbʋɔŋ lɛ.
18Dɩ baal nɛ kɛŋ haala sɩ hɛ tɩŋa pɩŋ, ba ŋaa disiniŋ hɛ ba tɩtɩa lɛ nɛ. Ʋ maga dɩ ma keriba ta ba nɩaa tʋɔŋ.
19Dɩ nʋʋ nɛ kɛŋ ʋ nyɩmma dɩhaala koo ʋ naaŋ naambii pɩŋ, ŋɩɩ ŋaa hɩɩsɛ nɛ. Ba jaŋ na hɛɛŋ ŋɩɩ bʋbʋɔŋ lɛ.
20Dɩ nʋʋ nɛ kɛŋ ʋ nyɩmma kʋbie haala pɩŋ, ʋ hɩɩsɛ ʋ nyɩm-bie nɛ. Ba jaŋ na hɛɛŋ ŋɩɩ bʋbʋɔŋ lɛ, ba jaŋ sʋʋ dɩ ba bɩ bii lʋla. 21Dɩ nʋʋ nɛ laa ʋ naambie haala jaa, ʋ ŋaa disiŋ nɛ. Ʋ hɩɩsɛ ʋ naaŋ-bile nɛ, ba jaŋ sʋʋ dɩ ba bɩ bii lʋla.
22Má to mɩ niiŋ arɩ wombie-la kala mɩ sɩ dagɛma, dɩ ŋɩɩ leŋ dɩ ma wuo hɔŋ tintee-la lɛ mɩ sɩ kɛŋ maa mʋ. Dɩ ma nɛ bɩ ŋɩɩ ŋaa, tintee-la bɩ jaŋ laama. 23Má sɩ́ nɩalɩŋ mɩ sɩɩ chɛ dɩ mɩ kiri tintee-la lɛ wʋŋaalaa lɛ to. Wɩaa deemba kala mɩ sɩ dagɛma, ba kala nɛ ba ŋaa, ŋɩɩ nɛ tɩɩ mɩ bɛrɛba. 24Ama mɩ bʋlaa pɩma, mɩ jaŋ joŋ ba tintee-la sɩ sɩma a kɛŋ kɩaa woruŋ a pɩma dɩ ʋ ŋaa ma kʋŋ. Mɩ nɛ ma TƖƖNA Wɩa, mɩ nɛ lɩɩsɛma tinteyee kala tʋɔŋ. 25Ŋɩɩ wɩaa ʋ maga dɩ ma jɩŋ pʋsʋŋ arɩ bagɩla-la sɩ kɛŋ disiniŋ arɩ kɩalɩŋ sɩ bɩ disiniŋ kɛnɛ bʋa, a bɩra jɩŋ fille-la sɩ kɛŋ disiniŋ arɩ fille-la sɩ bɩ disiniŋ kɛnɛ ma bʋa. Má pɔ ma sɩ́ pʋna koo bagɩl koo zaarʋ koo kʋŋ na-kala sɩɩ tuuri tinteeŋ mɩ sɩ lɩɩsa arɩ ba kɛŋ disiniŋ chaŋ. 26Má joŋ ma tɩtɩa hɛ mɩ nɩsɩŋ lɛ a sɩ́ disiniŋ kɛŋ, bɛɛ wɩaa mɩ nɛ ma TƖƖNA, mɩ bɩ disiniŋ kɛnɛ. Mɩ nɛ lɩɩsɛma tinteyee kala tʋɔŋ dɩ ma ŋaa mɩ nɩaa.
27Dɩ baal koo haal nɛ hɛ ma tʋɔŋ a ŋaa vʋgʋrʋ koo kantɔŋ yɩrɩrʋ, ʋ maga dɩ ma yagɛba kpʋ, arɩ tabɩaa, ba tɩtɩa nɛ chɛ ba sʋʋŋ.’ ”
Currently Selected:
LEVI DOHO NƖAA 20: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
