LEVI DOHO NƖAA 19
19
Tʋɔpʋla arɩ wʋtɩtɩɩ Wombiee
1La TƖƖNA bʋla pɩ Mosis, 2“Bʋla pɩ Iziral tɩŋŋaa kala: ‘Má sɩ́ disiniŋ kɛŋ, bɛɛ wɩaa mɩ-na ma Tɩɩna Wɩa bɩ disiniŋ kɛnɛ.
3Má zizil ma nyɩmmaba arɩ ma naamba, a tuto mɩ chɛ-wiesii-la woruŋ, mɩ nɛ ma TƖƖNA Wɩa.
4Má sɩ́ mɩ vɩa aŋ kpʋkpaarɛ tɔŋŋɔɔ koo a kɛŋ hɔɔŋ libi vesiŋ a pɩ ma tɩtɩa. Mɩ nɛ ŋaa ma TƖƖNA Wɩa.
5Dɩ ma nɩɩ chɛ dɩ ma ŋaa nii-magɛ dɔŋɔ Wɩɩsʋlʋŋ a pɩ mɩ-na ma TƖƖNA, má to wombie-la mɩ sɩ daga dɩ mɩ laa ma sʋla. 6Má chaŋ Wɩɩsʋlʋŋ nammɩa-la tapʋlɩɩ-la tɩtɩa ma sɩ ŋaa koo chɛ-lɩa chɛɛŋ. Dɩ ʋ nɛ ka tapʋl-tori chɛɛŋ, má joŋo nyɩga ta. 7Dɩ ma nɛ chaŋ nammɩa-la tapʋl-tori chɛɛŋ, ʋ kɛŋ disiniŋ nɛ. Mɩ-na ma TƖƖNA bɩ sɛɩ. 8Dɩ nʋʋkala nɛ chaŋa, ʋ jaŋ na hɛɛŋ ŋɩɩ bʋbʋɔŋ lɛ, bɛɛ wɩaa ʋ ŋaa disiniŋ hɛ kʋ-la sɩ zɔmɔ Wɩa teeŋ lɛ nɛ. Ʋ maga ma keru ta ʋ nɩaa tʋɔŋ.
9Dɩ ma nɩɩ ŋaa ma bagɩsɩŋ kɩaa, má sɩ́ sɛŋ-keree kɩaa ŋaa, ma bɩra sɩ́ mɩɩra mʋ a kuuni ma. 10Má bɩra sɩ́ ma girep nɛnɛɛ mɩɩra mʋ tɔrɛ a sɩ́ nɛnɛ-la ma sɩ tele paa, má lemba pɩ summo arɩ nʋhʋɔraa dɩ ba mʋ kuuni. Mɩ nɛ ma TƖƖNA Wɩa.
11Má sɩ́ gaa.
Má sɩ́ wɩaa nyɩa.
Má sɩ́ dɔŋɔba ma nyɩsʋ.
12Ma pʋpɔ má sɩ́ wɩaa nyɩa aŋ ŋmɩɛsɛ mɩ yɩrɩŋ lɛ a chei mɩ yɩrɩŋ. Mɩ nɛ ma TƖƖNA.
13Ma pʋpɔ má sɩ́ dɔŋɔba gɩrɩmʋ koo a kɛŋ dɔŋɔba kɩaa lɩlaa. Dɩ nʋʋ nɛ tɩma pɩŋ ka ŋ timu, sɩ́ leŋe dɩ ʋ moribiiŋ chʋa ŋ teeŋ.
14Má fá mɩ-na ma TƖƖNA Wɩa a sɩ́ taŋɩŋ tʋʋsʋ koo a joŋ kʋa bil nyʋlɩma sɩpaaŋ dɩ ʋ gɛrɛ tel.
15Ma pʋpɔ má sɩ́ wʋtɩtɩɩ joŋo faa. Má sɩ́ summo gʋrʋ a tɩŋ ʋ sɩ bɩ kʋŋ kɛnɛ wɩaa, a sɩ́ kɩaa tɩɩna ma lɛ pɛ a tɩŋ ʋ sɩ kɛŋ kɩaa. Má dii nʋʋkala sarɩya arɩ wʋtɩtɩɩ. 16Má sɩ́ gɔllɔ chichei ma dɔnsʋŋ tɩŋŋaa yɩrɩŋ.
Má sɩ́ ma naambiiriŋ joŋo hɛ wɩaa lɛ. Mɩ nɛ ma TƖƖNA.
17Sɩ́ ŋ naambie bɛrʋ, dɩ ʋ nɛ ŋaa wʋbɔŋ, bʋl wʋtɩtɩɩ pʋ, dɩ ŋ sɩ́ pɛ laa cheeriŋ.
18Pʋpɔ ŋ sɩ́ tʋɔŋ kɛŋ arɩ ŋ dɔŋɔ tɩɩna aa chɛ dɩ ŋ ŋaa wɩaa tiŋ chɩŋŋaa, ama cho ŋ dɔŋɔ arɩ ŋ sɩ cho ŋ tɩtɩa ŋɩɩ. Mɩ nɛ ma TƖƖNA Wɩa.
19Má kɛŋ wɩalɩŋ mɩ sɩ daga tɩtɩŋ.
Má sɩ́ leŋe dɩ pʋŋ-wogusuŋ jɩjɩl dɔŋɔ. Má sɩ́ kʋdo wogusuŋ balɩa joŋo duu bagɩ-bala lɛ.
Má sɩ́ gɛrɩpɛ wogusuŋ balɩa ba sɩ kaa yɛrɛ gɛrɩŋ laalʋ.
20Dɩ yoŋ-haal nɛ ha bɩ ʋ tɩtɩa time laa koo nɩɩ-la sɩ yɔbʋʋ ha bɩ ʋ joŋo ta, ka dɩ baal bilu a bɩ ʋ naasɩŋ to ka dɩ ba-wogo kɛŋ haal-la pɩŋ, ba maga dɩ ba dɔgɩsɛ haal-la arɩ baal-la sɩ kɛnʋ pɩŋ nɛ. Ama ʋ bɩ maga dɩ ba kpʋba. 21Baal-la maga dɩ ʋ kɛŋ pie-bele nɛ kɔ lɛbɩ-la lɛ mɩ sɩ yie kɔ Iziral tɩŋŋaa teeŋ boiŋ niiŋ a sʋl cheeriŋ Wɩɩsʋlʋŋ a pɩ mɩ-na ma TƖƖNA. 22Wɩɩsʋllɩ sɩpaalaara jaŋ joŋ cheeriŋ Wɩɩsʋlʋŋ pie-bele-la a sʋl Wɩɩsʋlʋŋ a pɩɩsɛ nɩɩ-la wʋbɔŋ-la ʋ sɩ ŋaa ta mɩ-na ma TƖƖNA sɩpaaŋ. Dɩ ʋ nɛ ŋaa ŋɩɩ, mɩ jaŋ joŋo chɛʋ.
23Dɩ ma nɛ jʋʋ Kɛnaŋ tintee-la a chɔnsɛ tɩɩsɩ-la nɛnɛɛ ma sɩɩ dii, dɩ ba nɛ kʋ nɛŋ, má kɩkɩsɛba jɩsɩŋ batori. 24Jɩ-nɛsɛ lɛ, má joŋ tɩɩnɛnɛ-la kala hɛ mɩ-na ma TƖƖNA nɩsɩŋ lɛ a zilmi. 25Ama jɩ-nɔŋ lɛ, ma jaŋ wuo didii tɩɩnɛnɛ-la. Dɩ ma nɛ ŋaa ŋɩɩ, ma tɩɩnɛnɛɛ jaŋ wasɛ woruŋ. Mɩ nɛ ŋaa ma TƖƖNA Wɩa.
26Má sɩ́ nammɩa ha sɩ kɛŋ chalɩŋ chaŋ. Ma pʋpɔ má sɩ́ vʋgʋ, a sɩ́ chichiribi wɩaa ma ŋaa. 27Má pʋpɔ má sɩ́ ma nyusuŋ sɛsɩŋ kɛ, a sɩ́ ma tɔŋŋɔɔ ma kɛ. 28Dɩ nʋʋ nɛ sʋba, ma pʋpɔ má sɩ́ ŋɩɩ wɩaa tɩŋ a kpɛrɛ ma tɩtɩa. Má sɩ́ kɩaa tuuro hɛ ma yaraa lɛ. Mɩ nɛ ŋaa ma TƖƖNA.
29Má pʋpɔ ma toloo sɩ́ berimu a ŋɩŋaa hachɔrʋŋ wɩaa. Dɩ ŋɩɩ dee, tintee-la kala jaŋ su arɩ hachɔrʋŋ wɩaa arɩ wʋbɔŋŋɔɔ.
30Má to mɩ chɛ-wiesii-la woruŋ aŋ zizil lee-la ma sɩ kʋʋ zilmi. Mɩ nɛ ŋaa ma TƖƖNA.
31Má sɩ́ vʋgʋ, a sɩ́ kantɔŋ dɩɩsɩŋ ma jʋʋ, dɩ ŋɩɩ leŋ dɩ ma kɛŋ disiniŋ. Mɩ nɛ ma TƖƖNA Wɩa.
32Má fá ma Wɩa a leŋ dɩ ma sɩɩŋ susu nɩhɩasɩŋ a zizilba. Mɩ nɛ ma TƖƖNA.
33Dɩ nʋhʋɔrʋ nɛ hɔŋ ma tinteeŋ lɛ, má pʋpɔ má sɩ́ ʋ walɩmʋ. 34Nʋhʋɔra-la sɩ hɛ ma tinteeŋ lɛ, má kɛmba woruŋ arɩ ma naambiiriŋ. Má choba arɩ ma sɩ cho ma tɩtɩa ŋɩɩ. Ma ma fa ŋaa nʋhʋɔra nɛ Ijipiti tinteeŋ lɛ, mɩ nɛ ma TƖƖNA Wɩa.
35Má pʋpɔ má sɩ́ nʋʋ gʋrʋ, a mʋʋ tɩgɛ kɩaa magɩsɩŋ lɛ, ba yuŋuŋ arɩ ŋɩɩ ba sɩ yʋga magɛ lɛ. 36Má kɛŋ kɩalɩŋ ma sɩ kaa magɩsɛ kɩaa a magɩsɛ kɩaa woruŋ. Mɩ nɛ ma TƖƖNA Wɩa sɩ kɛŋ ma lɩɩ Ijipiti tinteeŋ lɛ.
37Má to mɩ niiŋ arɩ wombie-la kala mɩ sɩ daga. Mɩ nɛ ma TƖƖNA.’ ”
Currently Selected:
LEVI DOHO NƖAA 19: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
