1 Kɔrɩntɩ Nɩaa 12

Kɩalɩŋ Wɩa Dɩŋ-zɔmʋŋ sɩ joŋo dii zile la lɛ

1Lɛɛlɛ, má leŋ dɩ la bʋl kɩalɩŋ Wɩa Dɩŋ-zɔmʋŋ sɩ joŋo dii zile la lɛ wɩaa. Mɩ naambiiriŋ, mɩɩ chɛ dɩ ma jɩŋ wʋtɩtɩɩ a mʋ kɩalɩŋ lɛ nɛ. 2Ma jɩma bʋa-la lɛ ma fa sɩ bɩ Wɩa ka chʋɔlɛ, ma faa to Sɩtaanɩ harɩŋ nɛ, a faa kpaarɛ vʋɩyaa ma. Vʋɩyaa deemba fa bɩ wɩaa wuo bʋbʋl. Ba leŋe ma yeŋŋi nɛ. 3Mɩɩ chɛ dɩ ma jɩŋ arɩ dɩ nʋʋ nɛ kɛŋ Wɩa Dɩŋ-zɔmʋŋ, ʋ bɩ jaŋ wuo bʋl wʋbɔŋ a tɩgɛ Yesu lɛ. Nʋʋkala bɩ jaŋ wuo bʋl dɩ Yesu nɛ ŋaa La Tɩɩna, see dɩ Wɩa Dɩŋ-zɔmʋŋ hɛ ʋ lɛ.

4Wɩa Dɩŋ-zɔmʋŋ sɩ joŋ kɩalɩŋ dii zile la lɛ, ba ŋaa dabaŋ dabaŋ nɛ, ama ba kala lɩɩ ʋ teeŋ nɛ. 5La jaŋ wuo to wombii dabaŋ dabamba a tɩma pɩpɩ Wɩa, ama Wɩɩ-bala nɛ la tɩma pɩpa. 6Kɩalɩŋ Wɩa Dɩŋ-zɔmʋŋ sɩ joŋo dii zile la lɛ yie tɩŋ tɩntɩŋ-dosunuŋ nɛ ʋ nɩaa lɛ, ama Wɩa nɛ to ba lɛ a tɩtɩŋ tɩntɩmɩa-la kala. 7Nʋʋkala kɛŋ ʋ wɩɩ nɛ Wɩa Dɩŋ-zɔmʋŋ sɩ joŋo dii zile ʋ lɛ, dɩ ʋ kaa pɩpɛ ʋ naambiiriŋ lɛ. 8Wɩa Dɩŋ-zɔmʋŋ yie joŋ wʋjɩmɩŋ a pɩ nʋʋ ʋ wuo bʋl Wɩa wɩaa pɩpɩ nɩaa. Ʋ yie joŋ wɩɩ pɩ nʋʋ dɔŋ ʋ wuo jɩŋ Wɩa wɩaa bʋbʋɔŋ a wuo dɩdagɛba woruŋ. 9Wɩa Dɩŋ-zɔmʋŋ yie ŋaa nʋʋ dɔŋ ma kɛŋ laa diiniŋ, ka dɔŋɔ ma kɛŋ doluŋ a ma wuo vɩvaarɛ nɩaa, 10ka dɔŋɔ ma kɛŋ doluŋ a kaa ŋaa wʋkpuŋkperisiŋ, ka dɔŋɔ ma kɛŋ doluŋ a wuo bʋbʋl Wɩa wɩaa, ka dɔŋɔ ma bɩra kɛŋ wʋjɩmɩŋ ʋ yie jɩŋ dɩnsɩ-la sɩ lɩɩ Wɩa teeŋ arɩ dɩnsɩ-la sɩ bɩ ʋ teeŋ lɩa pɛgɛ. Wɩa Dɩŋ-zɔmʋŋ yie pɩ nʋʋ dɔŋ ma doluŋ ʋ wuo bʋbʋl wɩaa, yikoro-la Wɩa Dɩŋ-zɔmʋŋ sɩ pɛ nɩaa lɛ ba bʋbʋl, ka ʋ pɩ dɔŋɔ ma wʋjɩmɩŋ ʋ wuo dagɛ wɩalɩŋ ba sɩ bʋla bʋbʋɔŋ. 11Tɩntɩŋ-dosunuŋ deemba kala lɩɩ Wɩa Dɩŋ-zɔŋ-la teeŋ nɛ. Ʋ tɩtɩa tʋɔtɔrʋŋ lɛ nɛ ʋ to a joŋ kʋ-dosunuŋ deemba a pɩ nʋʋkala arɩ ŋɩɩ ʋ sɩ cho.

12Nuhuobiine yaraa ŋaa kʋbala nɛ, ama ʋ nandaasɩŋ yʋga nɛ. La yaraa nandaasɩŋ sɩ yʋga ŋɩɩ, ba kala pɛ dɔŋɔ lɛ nɛ a ŋaa yarɩ-bala. Ŋɩɩ tɩtɩa nɛ Kirisito ma nagɛ. 13La nɩalɩŋ sɩ laa Yesu wɩaa dii, la nagɛ ŋ-la nɛ. La yʋga nɛ, ama la ŋaa kʋbala nɛ. Wɩa Dɩŋ-zɔŋ-la doluŋ lɛ nɛ ba fola Wɩɩchʋɔlɛ lɩɩŋ, nɩalɩŋ sɩ ŋaa Juu tɩŋŋaa arɩ nɩalɩŋ sɩ bɩ Juu tɩŋŋaa ŋaa, nɩalɩŋ sɩ ŋaa yosi arɩ nɩalɩŋ sɩ tɩɩ ba tɩtɩa. Wɩa leŋe la laa ʋ Dɩŋ-zɔmʋŋ a hɛ la tʋɔŋ nɛ.

14Nuhuobiine bɩ nandaa-bala kɛnɛ, ʋ nandaasɩŋ yʋga nɛ. 15Dɩ nuhuobiine naaŋ nɛ bʋla arɩ ʋ sɩ bɩ nɩsɩŋ ŋaa, ŋɩɩ wɩaa ʋ bɩ nuhuobiine nandaaŋ ŋaa, ʋ sɩ bʋl wɩɩ-la bɩ jaŋ leŋ dɩ ʋ sɩ́ nuhuobiine sɛmɛ dɔŋ ŋaa. 16Dɩ nuhuobiine dɩgɩlɩŋ ma nɛ sɩ ʋ bɩ sɩɩŋ ŋaa, ŋɩɩ wɩaa ʋ bɩ nuhuobiine yaraa sɛmɛ dɔŋɔ ŋaa, ʋ ŋɩɩ bɩ jaŋ leŋ dɩ ʋ sɩ́ nuhuobiine sɛmɛ dɔŋɔ ŋaa. 17Dɩ nuhuobiine yaraa kala nɛ fa ŋaa sɩaa, ɛɛ nɛ nuhuobiine fa jaŋ ŋaa a nɩnɩɩ wɩaa? Dɩ nuhuobiine yaraa kala ma nɛ fa ŋaa dɩgɩlaa, ɛɛ nɛ ʋ fa jaŋ ŋaa a nɩnɩɩ sʋɔra? 18Ʋ sɩ nagɛ ŋɩɩ, Wɩa ŋaa nuhuobiine nandaa kala arɩ ʋ tɩntɩmɩɩ nɛ, arɩ ŋɩɩ ʋ sɩ cho. 19Dɩ nuhuobiine fa kɛŋ nandaa-bala, nɩɩ nɛ ʋ yara-la fa jaŋ hɛ? 20Ʋ sɩ nagɛ ŋɩɩ, nuhuobiine nandaasɩŋ yʋga nɛ a mɛrɛ dɔŋɔ lɛ a ŋaa yarɩ-bala. 21Ŋɩɩ wɩaa sɩaa bɩ jaŋ wuo bʋla pɩ nɩsɩŋ arɩ ʋ bɩ ʋ chɛ, ŋɩɩ tɩtɩa nɛ nyuŋ ma bɩ jaŋ wuo bʋla pɩ naasɩŋ arɩ ʋ bɩ ba ka chɛ. 22Dɩ la nɛ bene, la jaŋ na arɩ nuhuobiine bɩ jaŋ kɛŋ doluŋ dɩ ʋ nandaasɩ-la sɩ bɩ chaasa ŋaa sɩɩfɩaŋ kɩaa nɛ tuo ʋ lɛ. 23La bɩɩna arɩ la nandaasɩ-la dɔnsʋŋ bɩ sɩɩfɩaŋ kɩaa ŋaa, ama ba nyuŋ nɛ la yie bibeŋ woruŋ. La bɩ nandaasɩ-la nɩaa sɩɩ na nyuŋ ka beŋ woruŋ. 24Wɩa nɛ joŋ nuhuobiine nandaasɩ-la kala a mɛrɛ dɔŋɔ lɛ, a ŋaa ʋ bibeŋ ʋ nandaasɩ-la sɩ bɩ sɩɩfɩaŋ kɩaa ŋaa nyuŋ woruŋ. 25Wɩa ŋaa ŋɩɩ dɩ nuhuobiine yaraa ŋaa kʋbala nɛ a kala tɩma pɩpɛ dɔŋɔ lɛ. 26Dɩ nuhuobiine sɛmɛ dɔŋɔ nɩɩ wɩɩ, ʋ yaraa kala nɩɩ wɩɩ ŋɩɩ, dɩ ba nɛ bɩra bɛsɛ nuhuobiine sɛmɛ dɔŋɔ lɛ, ʋ nandaasɩ-la kala lɛ nɛ ba bɛsɛ ŋɩɩ.

27Ma kala sɩ laa Yesu wɩaa dii, ma ŋaa Yesu yaraa nɛ, ma kʋŋkala nɛ pɛ dɔŋɔ lɛ a ŋaa yarɩ-bala. 28Ŋɩɩ nɛ tɩɩ nɩalɩŋ sɩ laa Yesu wɩaa dii aa hilimi tʋɔŋ, Wɩa joŋ ma kala hɛ leree nɛ, nɩalɩŋ sɩ laa sɩpaaŋ nɛ Wɩa nanzɔɔba, nɩalɩŋ sɩ tɩgɛ ba lɛ nɛ ŋaa Wɩa wʋlaabʋllaa, nɩalɩŋ sɩɩ to nɛ ŋaa nɩalɩŋ sɩɩ dagɛ Wɩa wɩaa, arɩ nɩalɩŋ ma sɩɩ ŋaa wʋmagɩlaa arɩ nɩalɩŋ ma Wɩa Dɩŋ-zɔmʋŋ sɩ joŋ doluŋ pa ba vɩvaarɛ nɩaa, arɩ nɩalɩŋ sɩɩ pɛ nɩaa lɛ, arɩ nɩalɩŋ sɩɩ beŋ nɩaa, arɩ nɩalɩŋ sɩɩ bʋl wɩaa yikoro-la Wɩa Dɩŋ-zɔŋ-la sɩ pɛ ba lɛ ba bʋbʋl. 29Wɩa nɩaa kala bɩ Wɩa nanzɔɔba ŋaa, ba kala tuo Wɩa wʋlaabʋllaa, koo nɩalɩŋ sɩɩ dagɛ Wɩa wɩaa. Ba kala dee bɩ doluŋ kɛnɛ dɩ ba ŋɩŋaa wʋmagɩlaa. 30Ba kala dee bɩ doluŋ kɛnɛ dɩ ba vɩvaarɛ nɩaa. Ba kala dee bɩ yie bʋbʋl wɩaa yikori-yiriba-la, Wɩa Dɩŋ-zɔmʋŋ sɩ pɛ nɩaa lɛ ba bʋbʋl lɛ. Ba kala dee bɩ wɩalɩŋ Wɩa Dɩŋ-zɔmʋŋ sɩ bʋla bʋbʋɔŋ ka dagɛ. 31Ŋɩɩ wɩaa, má joŋ ma nyuŋ kala hɛ sɩɩfɩaŋ kɩalɩŋ Wɩa Dɩŋ-zɔŋ-la sɩ joŋo dii zile ma lɛ. Mɩ jaŋ dagɛma wombii-la sɩ kɩɩ wombiee kala dɩ ma tuto.

Currently Selected:

1 Kɔrɩntɩ Nɩaa 12: SIS

Highlight

Copy