Yohane 9
9
Ansibi Obwiepʋ Ɔkʋ Tsa
1Ɛkɛ ɔkʋ Yesu mʋa mʋ akasɩpʋ bʋna ɔkpatɔ, bowun oyin ɔkʋá bɔkwɩɩ mʋ ansibi obwiepʋ. 2Yesu akasɩpʋ amʋ bɛfɩtɛ mʋ bɛɛ, “Osunapʋ, ma lakpan sʋ bɔkwɩɩ oyin anfɩ ansibi obwiepʋ? Mʋ onuto lakpan sʋ loo, ntɛ mʋ akwɩɩpʋ?”
3Yesu lɛlɛ mʋ́ ɔnɔ ɔbɛɛ, “Megyi mʋ ntɛ mʋ akwɩɩpʋ lakpan sʋ bɔkwɩɩ mʋ ansibi obwiepʋ. Mboun alɩá Bulu ɔbɛ́lɛ mʋ tumi suna tsʋn mʋ ɩlɔ amʋtɔ sʋ. 4Ɩlasi kpalobi owi ɔbɛ́ta. Ɔhaa mɛ́ɛtalɩ tra yɔ agyʋma. Mʋ́ sʋ ilehian ánɩ́ abɔ́yɔ agyʋma amʋʋ ɔha amʋʋ ɔlɔwa mɩ sɩsɩ amʋ lɔwa mɩ ɔbɛɛ nyɔ amʋ. 5Ɩnɩá nenya mbʋ ɔyɩ anfɩtɔ a, mɩgyi ɔyɩ anfɩtɔ wankɩ.”
6Brɛá Yesu lɛbla amʋ́ asʋn anfɩ ta a, olotu atsʋnɔ tswɩ ɔsʋlʋtɔ, ɔlɔpʋ osrebi tsɩa ɩsɩ, tɩtɩ mʋ́ tan ansibi obwiepʋ amʋ ansibisʋ. 7Mʋʋ ɔlɛbla ansibi obwiepʋ amʋ ɔbɛɛ, “Natɩ yɔfwɩ ansɩtɔ Siloam Patɩtɔ.” (Siloam asɩ gyi, “Bɔwa mʋ sɩsɩ.”) Oyin amʋ lɔyɔfwɩ ansɩtɔ yinki ɔba woyi a, ɔdɛ atɔ wun.
8Mʋ aba pʋ́ aha ánɩ́ bʋtowun mʋ ɔdɛ atɔ kʋlɩ bɛfɩtɛ bɛɛ, “Megyi oyin anfɩ tetsia kʋlɩ atɔ brɛ amʋ nɩ?”
9Amʋ́tɔ akʋ bɛɛ, “Mʋ nɩ!” Akʋ ɛ bɛɛ, “O-o, lɩan ɔlɛlɩan mʋ.”
Ɩnʋ oyin amʋ onuto lɛblɩ ɔbɛɛ, “Mɩ nɩ.”
10Bɛfɩtɛ mʋ bɛɛ, “Nkalɩ ɩlɔbwɛ asa fʋdɛ atɔ wun ngya?”
11Ɔlɛlɛ mʋ́ ɔnɔ ɔbɛɛ, “Oyin amʋʋ bʋtɛtɩ mʋ Yesu amʋ lɔbwɛ ɔdɩba tan mɩ ansibisʋ. Mʋʋ ɔlɛbla mɩ ɔbɛɛ, nnatɩ yɔfwɩ ansɩtɔ Siloam Patɩtɔ. Nɔyɔfwɩ, mʋʋ ndɛ atɔ wun a.”
12Bɛfɩtɛ mʋ bɛɛ, “Nkʋnʋ ɔbʋ?” Mʋʋ ɔlɛlɛ mʋ́ ɔnɔ ɔbɛɛ, “Ohwee.”
Farisifɔ Ansibi Obwiepʋ Amʋ Asʋn Fɩtɛ
13Ɩnʋ bɛkpa oyin amʋʋ tɛkɩ ogyi ansibi obwiepʋ amʋ ya Farisifɔ wa. 14Ɛkɛ amʋʋ Yesu lɔbwɛ ɔdɩba pʋbwii mʋ ansibi amʋ igyi ɔkpʋnʋ ɔdakɛ. 15Mʋ́ sʋ Farisifɔ amʋ bɛlafɩtɛ oyin amʋ alɩá ɩlɔbwɛ asa ɔdɛ atɔ wun. Ɔlɛbla amʋ́ ɔbɛɛ, “Ɔdɩba ɔlɔpʋtan mɩ ansibisʋ, nɔyɔfwɩ ansɩtɔ. Mʋʋ ndɛ atɔ wun ngya a.”
16Farisifɔ amʋ akʋ bɛblɩ bɛɛ, “Megyi Bulu ɔha oyin amʋʋ olobwii mʋ ansibi amʋ gyi, tsufɛ ɔtamagyi ɔkpʋnʋ ɔdakɛ mbla amʋsʋ.”
Tamɛ akʋ ɛ bɛfɩtɛ bɛɛ, “Nkalɩ lakpan ɔbwɛpʋ ɔbɛ́talɩ bwɛ osuna anfɩ odu? Asʋn anfɩ sʋ bʋmɛtra bwɛ kʋlɛ.”
17Mʋ́ sʋ bɛlafɩtɛ oyin amʋ bɛɛ, “Fɛɛ, mʋlobwii fʋ ansibi. Amansʋ fʋbʋ blɩ tsu mʋ ɩwɩ?”
Oyin amʋ lɛlɛ mʋ́ ɔnɔ ɔbɛɛ, “Bulu ɔnɔsʋ ɔtɔɩpʋ ogyi.”
18Yudafɔ ahandɛ amʋ bʋmohogyi ánɩ́ lɛlɛ, bɔkwɩɩ mʋ ansibi obwiepʋ asa sei ɔdɛ atɔ wun, kpɛfʋn brɛá bɛtɩ mʋ akwɩɩpʋ ba. 19Bɛfɩtɛ amʋ́ bɛɛ, “Mlɩ bi amʋʋ mlɩaa, mʋ ansibi lobwie asa mlɩlɔkwɩɩ mʋ amʋ nɩ? Nkalɩ ɩlɔbwɛ asa ɔdɛ atɔ wun ngya?”
20Mʋ akwɩɩpʋ amʋ bɛlɛ mʋ́ ɔnɔ bɛɛ, “Anɩyin ánɩ́ anɩ bi nɩ. Anɩyin ánɩ́ anɩlɔkwɩɩ mʋ ansibi obwiepʋ. 21Tamɛ alɩá ɩlɔbwɛ asa ɔdɛ atɔ wun pʋ́ ɔha ánɩ́ olobwii mʋ ansibi mʋ́ a, anɩmeyin. Kokoli, mlɩfɩtɛ mʋ onuto. Megyi kebi ogyi, aladan. Ɔbɛ́talɩ lɛ mʋ́ ɔnɔ.” 22Mʋ akwɩɩpʋ amʋ bʋdɛ Yudafɔ ahandɛ amʋ ifu nya. Mʋ́ sʋ bɛblɩ alɩ nɩ. Tsufɛ ahandɛ amʋ bablɩ tswɩ bɛɛ, ɔhagyiɔha ánɩ́ ɔbɛ́blɩ ɔbɛɛ, Yesu gyi Kristo, (ɔha amʋʋ Bulu lada mʋ ofuli amʋ) a, bégya mʋ lɛ Yudafɔ ofiakpa ɩnʋ. 23Mʋ́ sʋ mʋ akwɩɩpʋ amʋ bɛɛ, “Megyi kebi ogyi, aladan, mlɩfɩtɛ mʋ onuto!” nɩ.
24Bɛlatɩ oyin amʋʋ bɔkwɩɩ mʋ ansibi obwiepʋ amʋ otse nyɔsɩ, bla mʋ bɛɛ, “Ka ntam Bulu ansɩtɔ ánɩ́ fɛ́blɩ ɔnɔkwalɩ. Anɩyin ánɩ́ lakpan ɔbwɛpʋ oyin amʋʋ olobwii fʋ ansibi amʋ gyi.”
25Mʋʋ oyin amʋ lɛlɛ mʋ́ ɔnɔ ɔbɛɛ, “Nɩ lakpan ɔbwɛpʋ ogyi o, yile ɔbwɛpʋ ogyi o, mɩ mʋ́ mmeyin. Toku kʋlɛ pɛ nyin. Mʋ́gyi, tɛkɩ brɛ amʋ ntamawun atɔ, tamɛ sei mʋ́ ndewun.”
26Mʋʋ bɛfɩtɛ mʋ bɛɛ, “Nkalɩ ɔlɔbwɛ fʋ? Nkalɩ olobwii fʋ ansibi amʋ?”
27Mʋʋ ɔlɛlɛ mʋ́ ɔnɔ ɔbɛɛ, “Nabla mlɩ dodoodo, tamɛ mlɩmonu. Ntogyi sʋ ntra bla mlɩ? Mlɩ ɛ mlɩdekleá mlɔ́bwɛ mʋ akasɩpʋ loo?”
28Besia mʋ, bla mʋ bɛɛ, “Fʋgyi mʋ ɔkasɩpʋ. Anɩ nain Mose akasɩpʋ anɩ mʋ́ anɩgyi. 29Anɩyin ánɩ́ Bulu lɔtɔɩ bla Mose asʋn, tamɛ anɩmeyin ɔtɩnɛá oyin anfɩ mʋ́ otsu.”
30Oyin amʋ lɛbla amʋ́ ɔbɛɛ, “Ngya ntɔ asʋn nɩ? Mlɩmeyin ɔtɩnɛá otsu, tamɛ mʋlabwii mɩ ansibi nɩ o. 31Anɩ fɛ́ɛ́ anɩyin ánɩ́ Bulu tamanu lakpan abwɛpʋ isu. Ɔha ánɩ́ otobu mʋ́, otegyi mʋ mblasʋ isu otonu. 32Tsu brɛá Bulu lɔbwɛ ɔyɩ ɔpá a, ɔhaa mɔkʋnuá ɔkʋ labwii ɔha ánɩ́ bɔkwɩɩ mʋ ansibi obwiepʋ ansibi kɩ. 33Nɩ megyi Bulu ɔha oyin anfɩ gyi a, tɛkɩ ɔmɛ́ɛtalɩ bwɛ tɔtɔɔtɔ.”
34Ahandɛ amʋ bɛlɛ mʋ́ ɔnɔ bɛɛ, “Fʋ anfɩ fʋgyi lakpan ɔbwɛpʋ tsu brɛá bɔkwɩɩ fʋ anfɩ dekleá fósuna anɩ asʋn?” Ɩnʋnʋ begya mʋ lɛ ofiakpa ɩnʋ.
Ɔŋɛtɔ Ansibi Bwie
35Yesu lonuá bagya oyin amʋ lɛ ofiakpa ɩnʋ. Mʋ́ sʋ brɛá olowun mʋ a, ɔlɛfɩtɛ mʋ ɔbɛɛ, “Fɔhɔ Nyankpʋsa-Mʋ-Bi amʋ gyi?”
36Oyin amʋ lɛbla mʋ ɔbɛɛ, “Owie, suna mɩ ɔha ánɩ́ ogyi, mɩ anhɔ mʋ gyi!”
37Yesu lɛbla mʋ ɔbɛɛ, “Fawun mʋ dodo. Mʋgyi ɔha anfɩ ɔdɛ fʋ asʋn bla sei anfɩ a.”
38Mʋʋ oyin amʋ lɛbla mʋ ɔbɛɛ, “Mɩ Wie, nahɔ fʋ gyi.” Ɩnʋ olosum Yesu.
39Yesu lɛblɩ ɔbɛɛ, “Asʋn ogyikpa nɛba ɔyɩ anfɩtɔ, mɛnɩ aha ánɩ́ bʋmɛdɛ atɔ wun bówun atɔ. Aha ánɩ́ bʋdewun ɛ ansibi ibwie.”
40Farisifɔ akʋá bʋbʋ Yesu wa ɩnʋ bonu asʋn anfɩ. Mʋʋ bɛfɩtɛ mʋ bɛɛ, “Mʋ́ sʋ fʋdɛblɩ fɛɛ, anɩ ɛ anɩgyi ansibi abwiepʋ?”
41Yesu lɛlɛ mʋ́ ɔnɔ ɔbɛɛ, “Nɩ ansibi abwiepʋ mlɩgyi a, tɛkɩ Bulu mɛ́ɛha mlɩ ɩpɔn. Tamɛ ɩnɩá mlɩaa mlɩdɛ atɔ wun sʋ a, mlɩ lakpan lasin mlɩsʋ.”
Currently Selected:
Yohane 9: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation