Yohane 10
10
Akufa Ɔkpapʋ Mʋa Mʋ Akufa
1Yesu lɛblɩ ɔbɛɛ, “Ɔnɔkwalɩ ndɛ mlɩ bla. Ɔha ánɩ́ ɔdʋ tsʋn akufa ɩbansʋ wie mʋ́tɔ, ɔmɔtsʋn ɔkpa ɔnɔ a, owikplu pʋ́ ogyo otswapʋ ogyi. 2Tsufɛ ɩban ɔnɔ akufa ɔkpapʋ tɔtsʋn wie mʋ́tɔ. 3Ɩban amʋsʋ ɔkɩpʋ tefinki mʋ́ ha akufa ɔkpapʋ amʋ tebitiwie. Ɔtɔpʋ akufa amʋ ada tɩ amʋ́, bʋtonu mʋ ɔmɛ, ɔtɛkpa amʋ́ dalɩ. 4Nɩ ɔkpa akufa amʋ fɛ́ɛ́ dalɩ a, otegya amʋ́ nkpa, bʋtobuo mʋ, tsufɛ bʋyin mʋ ɔmɛ. 5Bʋtamabuo ɔfɔɔ. Srɩ bʋtɛsrɩ si mʋ, tsufɛ bʋmeyin mʋ ɔmɛ.”
6Yesu lɛha amʋ́ yebi anfɩ, tamɛ bʋmonu mʋ́ asɩ.
Akufa Ɔkpapʋ Wanklaan Amʋ
7Yesu lɛtra bla amʋ́ ɔbɛɛ, “Ɔnɔkwalɩ ndɛ mlɩ bla. Mɩgyi akufa ɩban amʋ ɔnɔ nɩ. 8Awikplu pʋ́ ogyo atswapʋ aha ánɩ́ begyankpa ba fɛ́ɛ́ bʋgyi. Akufa amʋ bʋmɛbɩ amʋ́ ɔmɛ. 9Mɩgyi akufa ɩban amʋ ɔnɔ nɩ. Nɩ ɔkʋ ɔtsʋn mɩtɔ wie dalɩ a, tɔtɔ mɔ́ɔbwɛ mʋ́. Obéyenya atɔ gyi mwɛ. 10Owikplu agywɩɩn gyi, ɔba bowi, ɔmɔ, oyinta atɔ. Mɩ mʋ́ nɛba, mɛnɩ aha bénya nkpa ánɩ́ ɩlɔfʋn.
11“Mɩgyi akufa ɔkpapʋ wanklaan amʋ nɩ. Akufa ɔkpapʋ wanklaan totsula hʋlɩ mʋ nkpa ha mʋ akufa. 12Tamɛ akufa ɔkpapʋá ɔdɛ ɩpa gyi, megyi mʋ onuto bʋ akufa amʋ tɛsrɩ nɩ owun ɔkpataku ɔba bɛkɩta amʋ́. Ɔkpataku amʋ tɛkɩta akufa amʋtɔ ɔkʋ, atrahɛ bʋtɛdasaɩn. 13Oyin amʋ tɛsrɩ, tsufɛ ɩpa kɛkɛ odegyi. Akufa amʋ nkpa tamahian mʋ. 14Mɩgyi akufa ɔkpapʋ wanklaan amʋ nɩ. Nyin mɩ akufa, mɩ akufa ɛ bʋyin mɩ. 15Fɛ alɩá mɩ Sɩ amʋ yin mɩ a, alɩ mɩ ɛ nyin mʋ nɩ. Ntɔhʋlɩ mɩ nkpa ha mɩ akufa. 16Mbʋ akufa bamba akʋ ɛ. Bʋma akufa ɩban anfɩtɔ. Ilehian ánɩ́ nɛ́kpa amʋ́ ɛ ba. Amʋ́ ɛ bónu mɩ ɔmɛ, amʋ́ fɛ́ɛ́ bɔ́bwɛ akufa iku-kʋlɛ pʋ́ ɔkpapʋ ɔkʋlɛ.
17“Ɩnɩ sʋ mɩ Sɩ tekle mɩ asʋn nɩ. Tsufɛ natsula ánɩ́ nɔ́hʋlɩ mɩ nkpa ha aha, mɛnɩ nɛ́lanya mʋ́. 18Ɔhaa mɛ́ɛtalɩ swɩɩ mɩ. Mɩ onuto latsula ánɩ́ nɔ́hʋlɩ mʋ́. Mbʋ ɔkpa hʋlɩ mɩ nkpa, mbʋ ɔkpa lanya mʋ́ ɛ. Ɩnɩ mɩ Sɩ lɛbla mɩ ɔbɛɛ, mbwɛ nɩ.”
19Mʋ asʋn blɩhɛ anfɩ sʋ Yudafɔ ahandɛ amʋ bʋmɛtra bwɛ kʋlɛ. 20Amʋ́tɔ akʋ bɛblɩ bɛɛ, “Ɔŋɛ lalahɛ bʋ mʋtɔ. Mʋ nwun deyinta. Ɔhaa mátra nu mʋ asʋn blɩhɛ.”
21Akʋ ɛ bɛɛ, “Ɔha ánɩ́ ɔŋɛ lalahɛ bʋ mʋtɔ mɛ́ɛtalɩ blɩ asʋn anfɩ odu. Ɔŋɛ lalahɛ ɔbɛ́talɩ bwii ansibi obwiepʋ ansibi?”
Yesu Kina
22Ɛkɛá bʋtɔpʋkaɩn Bulu ɔtswɛkpa gyʋrasʋ Yerusalem lɔfʋn. Alɩ brɛ amʋ igyi lɩlɩtɔ. 23Yesu lɔyɔ odeki Bulu ɔtswɛkpatɔ ɔtɩnɛkʋá bʋtɛtɩ ɩnʋ “Salomo Abrandasʋ.” 24Yudafɔ ahandɛ amʋ akʋ befia bomli mʋ. Bɛfɩtɛ mʋ bɛɛ, “Ɔmɛnkɛ kein asa fɛ́bla anɩ ɔnɔkwalɩ amʋ? Nɩ fʋgyi Kristo, (ɔha amʋʋ Bulu lada mʋ ofuli amʋ) a, wuna lɛ mʋ́ tii anɩ.”
25Yesu lɛbla amʋ́ ɔbɛɛ, “Nabla mlɩ bɔtsʋn, tamɛ mlɩmedehogyi. Ofula amʋʋ ndɛbwɛ mɩ Sɩ ɩdatɔ amʋ dɛ mɩ ɩwɩ adansɩɛ gyi. 26Tamɛ mlɩmedehogyi, tsufɛ mlɩmá mɩ akufatɔ. 27Mɩ akufa bʋtonu mɩ ɔmɛ. Nyin amʋ́, bʋtobuo mɩ. 28Ntɛha amʋ́ nkpa ánɩ́ ɩtamata. Bʋmóowu ɛkɛkɛɛkɛ, ɔhaa mɛ́ɛtalɩ swɩɩ mɩ amʋ́. 29Mɩ Sɩ amʋʋ ɔlɔpʋ amʋ́ ha mɩ amʋ dʋn togyitɔ. Ɔhaa mɛ́ɛtalɩ swɩɩ amʋ́ lɛ mɩ Sɩ ɩbɩtɔ. 30Mɩa mɩ Sɩ anɩgyi kʋlɛ.”
31Ɩnʋ a, Yudafɔ ahandɛ amʋ bɛtra kʋla abwi bɛɛ, abʋtswɩ da Yesu mɔ. 32Tamɛ Yesu lɛfɩtɛ amʋ́ ɔbɛɛ, “Nabwɛ ofula tsɔtsɔɔtsɔá itsu mɩ Sɩ wa suna mlɩ. Mʋ́tɔ mɔmʋ sʋ mlɩdekleá mlɛ́da mɩ abwi?”
33Bɛbla mʋ bɛɛ, “Megyi ofula ánɩ́ fabwɛ kʋkʋʋkʋ sʋ anɩaa abɛ́da fʋ abwi. Alɩ amʋʋ fablɩ abususʋ pʋkʋsʋ lɩɩ Bulusʋ amʋ sʋ. Nyankpʋsa fʋgyi, tamɛ fɛɛ Bulu fʋgyi.”
34Yesu lɛfɩtɛ amʋ́ ɔbɛɛ, “Bʋmɔwanlɩn wa mlɩ Mbla ɔwʋlʋ amʋtɔ bɛɛ, Bulu ɔbɛɛ, ‘Mlɩgyi fɛ Bulu?> 35Anɩyin ánɩ́ ɔnɔkwalɩ Bulu asʋn igyi. Mʋ́ sʋ nɩ Bulu lɛtɩ aha amʋʋ ɔlɔpʋ mʋ asʋn ha amʋ ɔbɛɛ, bʋgyi fɛ mʋ a, ntogyi sʋ mlɩdɛ ɔblɔ nya? 36Mɩ mʋ́ a, mɩ Sɩ lɛlɛ mɩ yaɩ. Ngyi mʋ klɛ, ɔlɔwa mɩ sɩsɩ ɔyɩ anfɩtɔ. Ntogyi sʋ mlɩdɛblɩ mlɩaa nablɩ mbɛɛ, ‘Bulu mʋ Bi ngyi> sʋ nablɩ abususʋ pʋkʋsʋ lɩɩ mʋsʋ? 37Nɩ megyi mɩ Sɩ agyʋma ndɛbwɛ mʋ́ a, mlɩmáhɔ mɩ gyi. 38Tamɛ nɩ mɩ Sɩ agyʋma ndɛbwɛ, asa mlɩmɔhɔ mɩ gyi kʋraa a, mʋmʋ mlɩhɔ ofula amʋʋ ndɛbwɛ amʋ mʋ́ gyi, amlɩbɩá Mɩ Sɩ amʋ bʋ mɩtɔ, mɩ ɛ mbʋ mʋtɔ.”
39Bɛtra bwɛ ánɩ́ bɛ́kɩta mʋ, tamɛ ɔlɛdalɩ amʋ́ ɩbɩ, natɩ si amʋ́.
40Yesu leyinki fa Yordan ɔbʋn ba ɔtɩnɛ amʋʋ Yohane letsia bɔ aha asu amʋ, olesi tsia ɩnʋ. 41Aha tsɔtsɔɔtsɔ bɛba mʋ wa, bʋdɛ aba bla bɛɛ, “Yohane mɔbwɛ osuna kʋkʋʋkʋ, tamɛ asʋn ánɩ́ Yohane lɛblɩ tsu oyin anfɩ ɩwɩ fɛ́ɛ́ laba mʋ́tɔ pɛpɛɛpɛ.” 42Aha tsɔtsɔɔtsɔ bɔhɔ mʋ gyi ɩnʋ.
Currently Selected:
Yohane 10: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation