Israelfɔ Ɩlʋ 80
80
Nana Bulu, Yinkia Anɩ Ba Fʋ Wa
Asaf kanfʋ-ɩlʋ ha ɩlʋ osunapʋ. Dimbisʋ-saprada ɩwɩ ntam ɩlʋ.
1Oo Israel Ɔkpapʋ, yaa asʋ!
Fʋtɛkpa Yosef abi-aná fɛ akufa!
Fʋá fʋtsie akerubsʋ#80:1 Akerub bʋgyi fɛ Bulu-abɔpʋ, bʋbʋ numnyam. Bʋgyi ntobi akʋá bʋbʋ abamba., wankɩ.
2Lɛ fʋ tumi ɔwan Efraim, Benyamin mʋa Manase abusuantɔ,
afʋbɔhɔ anɩ!
3Oo Bulu, yinkia anɩ ba fʋ wa.
Wa awɩtɔlɛ ha anɩ, afʋhɔ anɩ nkpa.
4Ɩsa Ɔnɔ Ɔlɩɩpʋ, Nana Bulu,
ɔmɛnkɛ fʋ aha mpaɩ bési fʋ ɔblɔ wa?
5Fʋlɛha ntsú lemli amʋ́ atogyihɛ,
fɔpʋ ntsú bʋla onunwe ha amʋ́ bonun.
6Faha aha ánɩ́ bʋtsie bomli anɩ bʋdɛkɔ anɩ ɔsʋlʋ sʋ,
alupʋ bʋdɛ anɩ mɔsɩ.
7Ɩsa Ɔnɔ Ɔlɩɩpʋ Bulu, yinkia anɩ ba fʋ wa.
Wa awɩtɔlɛ ha anɩ, afʋhɔ anɩ nkpa.
8Fʋletsii Israel fɛ waɩn-ɩfla tsu Egyipte ba.
Fegya ɔmá-ɔmá, swie mʋ.
9Fʋlɛla ɔsʋlʋ ha mʋ,
ɔlɛlɛ nlin, yɛɩ bun mʋ́sʋ fɛ́ɛ́.
10Ɩlɔbwɛ olulukpa bun abʋsʋ.
Mʋ́ abambi lɛyɛɩ bun Lebanon ndum akpɔnkpɔntɩsʋ.
11Mʋ́ abambi lɛklɛɩ yɔ Mediteranea ɔpʋ ɔnɔ,
klɛɩ yewie Eufrate ntsu ɔnɔ.
12Ntɔ mɛɛ sʋ fabwie ɩban lɛ mʋ́,
mʋ́ asɩ atsʋnpʋ fɛ́ɛ́ bʋdɛ mʋ́ abi kpɔtɩ?
13Abatafɔ bʋtɛdalɩ bɛtɩntɩn mʋ́,
mbwɩá bʋtɔtsʋn ndɔ amʋtɔ fɛ́ɛ́ bʋtɔwɩ mʋ́.
14Ɩsa Ɔnɔ Ɔlɩɩpʋ Bulu, kokoli damli kɩ.
Ko nwuntɔ wa kɩ waɩn-ɩfla anfɩ sɩsɩ tsu ɔsʋsʋ,
afʋkɩ mʋ́sʋ.
15Fʋlɔpʋ fʋ gyɔpɩ swie mʋ,
obi anfɩ fawa mʋ ɔwʋnlɩn ha fʋ ɩwɩ anfɩ.
16Alupʋ bawa mʋ ogya mɔ, kun mʋ da.
Pʋ ɔblɔ damli kɩ amʋ́, afʋmɔ amʋ́.
17Tamɛ kpa fʋ gyɔpɩsʋ otsiapʋ anfɩ.
Ɔha anfɩ fɔwa mʋ ɔwʋnlɩn ha fʋ ɩwɩ anfɩ.
18Mʋmʋ anɩmɛ́ɛtra damli ɔma ha fʋ ɛkɛkɛɛkɛ.
Lawa anɩ ɔwʋnlɩn, asu kpoli fʋ.
19Ɩsa Ɔnɔ Ɔlɩɩpʋ Bulu, Nana Bulu, yinkia anɩ ba fʋ wa.
Wa awɩtɔlɛ ha anɩ, afʋhɔ anɩ nkpa.
Currently Selected:
Israelfɔ Ɩlʋ 80: nko
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
