Mateo 11
11
Yesu Mʋa Asu Ɔbɔpʋ Yohane
(Luka 7:18-35)
1Brɛá Yesu lɔpʋ agyʋma anfɩ wa mʋ akasɩpʋ duanyɔ amʋ ɩbɩtɔ ta a, ɔlɔyɔ yeki Galilea awulusʋ, suna aha atɔ, da asʋn amʋ ɛ ɔkan.
2-3Asu Ɔbɔpʋ Yohane da obu, olonu Kristo bwɛhɛ. Mʋ́ sʋ ɔlɔwa mʋ akasɩpʋ abanyɔ sɩsɩ Yesu ɔbɛɛ, bʋyɛfɩtɛ mʋ bɛɛ, “Fʋgyi ɔha amʋʋ ɔbɛ́ba amʋ nɩ, ntɛ akɩ ɔha bamba ɔkpa?”
4Yesu lɛbla amʋ́ ɔbɛɛ, “Mlɩyinki yɛbla Yohane asʋn ánɩ́ mlɩlabonu pʋ́ atɔá mlɩlabowun. 5Mlɩlabowun ánɩ́ ansibi abwiepʋ bʋdɛ atɔ wun, abɔ bʋna. Ɩlɔ pɛpɛ alɔpʋ ɩwɩ dɛplɩ. Ɩsʋ atinpʋ bʋdɛ asʋn nu. Afuli bʋdetsinki, ahianfɔ ɛ bʋdɛ asʋn wanklaan amʋ nu. 6Bulu obóyula ɔha ánɩ́ mɩ bwɛhɛ ɩmɔkʋsʋ lɩɩ mʋsʋ.”
7Brɛá Yohane akasɩpʋ amʋ beyinki bɔyɔ a, Yesu lɔwa tɔɩ tsu Yohane ɩwɩ suna ɔdɔm amʋ bɩ. Ɔbɛɛ, “Brɛá mlɩlɛdalɩ yɔ ɔsʋlʋkpansʋ ɩnʋ a, ntɔ ɔkɩkpa mlɩlɔyɔ? Fɩta ánɩ́ afu dɛ mʋ́ tsʋn loo? Ɛkɛkɛɛkɛ! 8Nɩ megyi mʋ́ a, ntɔ koun ɔkɩkpa mlɩlɔyɔ? Ɔha ánɩ́ ɔdɩdɩ ntsrim? Ɛkɛkɛɛkɛ! Awie woyi atati amʋ odu adɩdapʋ bʋtetsia. 9Mlɩbla mɩ! Bulu ɔnɔsʋ ɔtɔɩpʋ mlɩlɛdalɩ yɛkɩ? Ee, Yohane nɩ. Ɔdʋn Bulu ɔnɔsʋ ɔtɔɩpʋ. 10Mʋ ɩwɩ asʋn Bulu lɛblɩ bɔwanlɩn mʋ́ tswɩ bɛɛ, ‘Kɩ, ndɛ obi wa gya fʋ nkpa. Mʋ ɔbɛ́la ɔkpa ha fʋ nɩ.> 11Ɔnɔkwalɩ ndɛ mlɩ bla mbɛɛ, ɔhagyiɔha ánɩ́ ɔha tsɩhɛ lakɛn kwɩɩ mɔfʋn Asu Ɔbɔpʋ Yohane, tamɛ mʋ ɛ ɔmɔfʋn Bulu iwiegyi amʋtɔ ɔkʋsʋ kʋraa. 12Tsu Yohane brɛsʋ bɔtʋ ndɛ a, aha bʋdɛ Bulu iwiegyi amʋ prɩ ɔwʋnlɩnsʋ. Awʋnlɩnpʋ bʋdɛ mʋ́ prɩ. 13Tsufɛ Bulu ɔnɔsʋ atɔɩpʋ amʋ pʋ́ Mose Mbla ánɩ́ ɩda bɔfʋn Yohanesʋ fɛ́ɛ́ bɔtɔɩ tsu Bulu iwiegyi amʋ ɩwɩ. 14Nɩ mlɔ́hɔ asʋn amʋ gyi a, mʋmʋ mlɛ́bɩ ánɩ́ mʋgyi Elia. Mʋ ɔbɛ́ba nɩ. 15Ɔha ánɩ́ ɔbʋ asʋ onu.
16“Sei anfɩ a, amɛndɩ nɔ́pʋ ndɛmba-abi anfɩ kapʋ? Bʋgyi fɛ nyebiá bʋtsie dɩnsʋ bʋdɛ aba kpoli, 17blɩ bɛɛ, ‘Anɩlaplei ansigyisʋ, mlɩmɛtsa. Mʋ́ sʋ anɩlala wa awɩrɛhɔ ɩlʋ, tamɛ mlɩmosu.> 18Mlɩgyi fɛ nyebi anfɩ, tsufɛ Yohane lɛba a, oletsia klɩ ɔnɔ, omonun nta, tamɛ mlɩaa, ‘Ɔŋɛ lalahɛ bʋ mʋtɔ!> 19Tamɛ mɩ, Nyankpʋsa-Mʋ-Bi anfɩ mʋ́ naba ndɛ atɔ gyi, ndɛ nta nun. Mʋ́ ɛ mlɩaa, ‘Mlɩkɩ opotsuapʋ pʋ́ nta ɔbʋpʋ, lakpan abwɛpʋ pʋ́ lampoo ahɔpʋ onyawie.> Tamɛ Bulu ɔha tsiatɔ tɛlɛ mʋ nyansa ɔwan.”
Aha Ánɩ́ Bʋmɛdamli Klʋntɔ Asʋngyi
(Luka 10:13-15)
20Yesu lɔpʋ ɔblɔ tɔɩ tsu awulu akʋ ɩwɩ. Awulu amʋá ɔlɔbwɛ ofula akpɔnkpɔntɩ mʋ́tɔ, tamɛ bʋmɛdamli klʋntɔ amʋ. 21Ɔbɛɛ, “Korasinfɔ, mlɩgyɔwɩ. Betsaidafɔ, mlɩgyɔwɩ nɩ. Nɩ Tiro pʋ́ Sidon awulu lalahɛ amʋtɔ nɔbwɛ ofula akpɔnkpɔntɩ anfɩ nɔbwɛ mlɩtɔ a, tɛkɩ bɛdamli klʋntɔ dodoodo. Tɛkɩ bʋda akpekpetɔ, bakpa nsuo wa nwuntɔ pʋsuna ánɩ́ badamli klʋntɔ. 22Mlɩbɩá Bulu ɔbɛ́bɩtɩ mlɩ ɩsʋ mʋ asʋn ogyikɛ dʋn Tiro mʋ́a Sidonfɔ. 23Mlɩ Kapernaumfɔ, mlɩdekle mlɩaa mlotsu ɩwɩ fʋa alɩɩ yɔwɔ ɔsʋsʋ? Ɛkɛkɛɛkɛ! Bulu ɔbɛ́ba mlɩ asɩ yowie afulitɔ. Tsufɛ nɩ Sodom wulutɔ nɔbwɛ ofula akpɔnkpɔntɩ anfɩ odu a, tɛkɩ wulu amʋ ɩtra bʋ ɩnʋ bɔtʋ ndɛ. 24Mlɩkaɩn ánɩ́ Bulu obówun Sodomfɔ nwɛ asʋn ogyikɛ amʋ dʋn mlɩ.”
Mlɩbɛda Ɔkpʋnʋ Mɩ Wa
(Luka 10:21-22)
25Alɩ brɛ amʋtɔ a, Yesu lɔbɔ mpaɩ blɩ ɔbɛɛ, “Mɩ Sɩ, ɔsʋ mʋ́a asɩ Owie! Nɛda fʋ ɩpan ánɩ́ falɛ tɔá fɔpʋŋain anyansapʋ pʋ́ asʋn abɩpʋ ɔwan suna aha ánɩ́ bʋmeyin ɔlala, bʋgyi fɛ nyebi. 26Ee, Mɩ Sɩ! Alɩ fʋdekle fɛɛ ɩba mʋ́tɔ nɩ.”
27“Mɩ Sɩ lɔpʋ togyitɔ wa mɩ ɩbɩtɔ. Ɔhaa meyin Obi amʋ, nkɛtɩ Ɔsɩ amʋ nkʋlɛ. Ɔhaa meyin Ɔsɩ amʋ ɛ, nkɛtɩ Obi amʋ pʋ́ ɔha ánɩ́ Obi amʋ latsula ánɩ́ ɔbɛ́lɛ mʋ suna.”
28“Mlɩba mɩ wa, mlɩ aha ánɩ́ ɩlapian mlɩ, mlɩ atɔ sʋrahɛ dɛ mlɩ dʋn. Nɛ́ha mlɛ́da ɔkpʋnʋ. 29Mlɩba ɩwɩasɩ ha mɩ, amlɩsuan mɩ, tsufɛ nɛba ɩwɩasɩ, nolwii, mɛnɩ mlénya iwilwii. 30Tsufɛ mɩ wa tsia ɩbʋ atsialɛ. Mɩ atɔ sʋrahɛ ɛ mɔ́ɔdʋn mlɩ sʋra.”
Currently Selected:
Mateo 11: nko
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
