Yohane 3
3
Yesu Mʋa Nikodemo
1 Yudafɔ ɔhandɛ ɔkʋ letsia, bʋtɛtɩ mʋ Nikodemo. Farisiyin ogyi. 2Ɔlɛba Yesu wa ɛkɛ ɔkʋ onye bɛbla mʋ ɔbɛɛ, “Osunapʋ, anɩyin ánɩ́ Bulu lɔwa fʋ sɩsɩ fɛ atɔ osunapʋ. Tsufɛ ɔhaa mɛ́ɛtalɩ bwɛ osuna anfɩ fʋdɛbwɛ anfɩ, nɩ Bulu mobuo mʋ.”
3Yesu lɛlɛ mʋ́ ɔnɔ ɔbɛɛ, “Ɔnɔkwalɩ ndɛ fʋ bla, ɔhaa mɛ́ɛtalɩ nya Bulu ogyi iwie mʋsʋ, nkɛtɩ balakwɩɩ mʋ.”
4Nikodemo lɛfɩtɛ mʋ ɔbɛɛ, “Nkalɩ bɛ́lakwɩɩ ɔha ánɩ́ aladan? Ɔbɛ́talɩ sanki wie mʋ yin iputɔ, ɔbɛ́lakwɩɩ mʋ?”
5Yesu lɛlɛ mʋ́ ɔnɔ ɔbɛɛ, “Ɔnɔkwalɩ ndɛ fʋ bla. Nɩ bʋmɛlakwɩɩ ɔkʋ tsʋn ntsu mʋ́a Ɔŋɛ Wankɩhɛtɔ a, ɔmɛ́ɛtalɩ wie Bulu iwiegyi amʋtɔ. 6Ɔyʋlʋ nkpa itsu nyankpʋsatɔ, ɔŋɛtɔ klɛ ɛ itsu Bulu Ɔŋɛtɔ. 7Mʋ́ sʋ máha mʋ́ ɩwa fʋ wanwan ánɩ́ nabla fʋ mbɛɛ, ilehian ánɩ́ bɛ́lakwɩɩ mlɩ. 8Afu tɔtsʋn yɔ ɔtɩnɛá idekle. Fʋtonu mʋ́ nka, tamɛ fʋmeyin ɔtɩnɛá itsu pʋ́ ɔtɩnɛá ɩyɔ. Alɩ kɛn igyi ha ɔhagyiɔha ánɩ́ bakwɩɩ mʋ tsu Ɔŋɛ amʋtɔ nɩ.”#3:8 Ɔŋɛ mʋ́a afu lɛlɩan aba Griki ɔblɩtɔ.
9Nikodemo lɛfɩtɛ mʋ ɔbɛɛ, “Ngya ntɔ asʋn nɩ?”
10Yesu lɛlɛ mʋ́ ɔnɔ ɔbɛɛ, “Israelfɔ osunapʋ yile fʋgyi, mʋ́ fɛ́ɛ́ fʋmɔkʋnu asʋn anfɩ asɩ? 11Ɔnɔkwalɩ ndɛ fʋ bla. Tɔá anɩyin ɩwɩ anɩdɛtɔɩ tsu. Tɔá anɩlawun ɛ ɩwɩ anɩdɛ adansɩɛ gyi, tamɛ mlɩtamahɔ anɩ asʋn amʋ. 12Nɩ nɛbla mlɩ tɔá ɩdɛ mʋ́sʋ yɔ ɔyɩ anfɩtɔ, mlɩmohogyi a, nkalɩ ɩbɔ́bwɛ nɛbla mlɩ tɔá ɩdɛ mʋ́sʋ yɔ ɔsʋsʋ mboun mlóhogyi? 13Ɔhaa mɔkʋdʋ yɔ ɔsʋsʋ ɩnʋ kɩ, nkɛtɩ Nyankpʋsa-Mʋ-Bi amʋʋ olotsu ɩnʋ ba amʋ.
14“Alɩ amʋʋ Mose lɔpʋ kɔbrɩ ɩwɔ sian oyisʋ, tsu mʋ́ lɩɩ ɔsʋlʋkpansʋ ɩnʋ amʋ a, alɩ kɛn ilehian ánɩ́ bɛ́da Nyankpʋsa-Mʋ-Bi amʋ manta oyisʋ, tsu mʋ́ lɩɩ,#3:14 Mʋ oyikpalihɛsʋ sian ɩwɩ asʋn ɔdɛblɩ. 15mɛnɩ ɔhagyiɔha ánɩ́ ɔlɔhɔ mʋ gyi obénya nkpa ánɩ́ ɩtamata nɩ. 16Tsufɛ dwɛ Bulu lɛhɩɛ dwɛ anyankpʋsa. Mʋ́ sʋ ɔlɔpʋ mʋ Bi ɔkʋkʋnʋ ɔkʋlɛ pɛ amʋ ha, mɛnɩ ɔhagyiɔha ánɩ́ ɔlɔhɔ mʋ gyi omóowu, mboun obénya nkpa ánɩ́ ɩtamata. 17Bulu mɔpʋ mʋ Bi amʋ sɩsɩ ɔyɩ anfɩtɔ ɔbɛɛ, ɔba begyi aha asʋn, ɔha aha ɩpɔn. Mboun ɔbɛɛ, ɔba bɔhɔ aha nkpa.
18“Ɔha ánɩ́ ɔlɔhɔ mʋ Bi amʋ gyi lagyi asʋ. Ɔha ánɩ́ ɔmɔhɔ mʋ Bi amʋ gyi a, Bulu laha mʋ ɩpɔn dodo, tsufɛ ɔmɔhɔ mʋ Bi ɔkʋlɛ pɛ amʋ gyi. 19Alɩá ɔbɛ́ha ɩpɔn amʋ gyi, wankɩ amʋ laba ɔyɩtɔ, tamɛ aha bɔdwɛ oklun dʋn wankɩ amʋ, tsufɛ lalahɛ abwɛpʋ bʋgyi. 20Ɔhagyiɔha ánɩ́ ɔtɔbwɛ lalahɛ tolu wankɩ amʋ. Ɔtamakpʋkpɛ manta mʋ́, tsufɛ ɔdɛ ifu nya ánɩ́ mʋ bwɛhɛ bɛ́lɩn ɔwan. 21Tamɛ ɔha ánɩ́ ɔtɔbwɛ yile tɛha wankɩ amʋ tɔwankɩ wʋlɩ mʋsʋ, mɛnɩ aha bówun ánɩ́ Bulu apɛ ɔdɛbwɛ.”
Yesu Mʋa Asu Ɔbɔpʋ Yohane
22Ɩnɩ ɔma a, Yesu mʋa mʋ akasɩpʋ bɛdalɩ Yerusalem yɔ Yudea ɔmátɔ. Betsia ɩnʋ kpalobi, oletsia bɔ aha asu. 23Alɩ brɛ amʋtɔ a, Yohane ɛ dɛ aha asu bɔ Aenon nsaɩntɔ, manta Salim wulu. Tsufɛ ntsu ɩdada nsɩnɛ ɩnʋ. Aha betsia yɔ mʋ wa, oletsia bɔ amʋ́ asu. 24(Bʋmɔkʋnya kɩta Yohane tswɩ obu alɩ brɛ amʋtɔ.)
25Ɩwɩgyʋra ɩwɩ nwɛngyi kʋ lɛba Yohane akasɩpʋ pʋ́ Yudayin ɔkʋ nsɩnɛ. 26Ɩnʋ Yohane akasɩpʋ bɔyɔ mʋ wa yɛbla mʋ bɛɛ, “Osunapʋ, yɛɛ fakaɩn oyin amʋʋ fʋa mʋnyɔ mlɩletsia Yordan bʋnkpa ɔbɩn, fegyi mʋ ɩwɩ adansɩɛ wanklaan amʋsʋ? Ɔdɛ aha asu bɔ, aha fɛ́ɛ́ bʋdɛ mʋ wa yɔ.”
27Yohane lɛlɛ mʋ́ ɔnɔ ɔbɛɛ, “Ɔhaa mɛ́ɛtalɩ bwɛ tɔtɔ, nkɛtɩ Bulu laha mʋ ɔkpa. 28Mlɩ onuto mlɛ́talɩ gyi mɩ adansɩɛ ánɩ́ nɛbla mlɩ mbɛɛ, ‘Megyi mɩgyi Kristo amʋ, tamɛ Bulu lɔwa mɩ gya mʋ nkpa.> ” 29Ɩnʋ ɔlɛha amʋ́ yebi ɔbɛɛ, “Ɔka otsiapʋ bʋ mʋ ka. Ɔka otsiapʋ amʋ mʋ nyawie ɛ tetsia ɔka otsiakpa ɩnʋ, mɛnɩ ansɩ bégyi mʋ nɩ onu mʋ nyawie amʋ ɔmɛ. Alɩ kɛn ansɩ dɛ mɩ gyi sei nɩ. 30Mɩ atʋmabi bɛ́ta wie mʋ klɛtɔ.”
Ɔha Ánɩ́ Olotsu Ɔsʋsʋ Ba
31Ɔha amʋʋ otsu ɔsʋsʋ amʋ dʋn ɔhagyiɔha. Ɔha ánɩ́ otsu ɔsʋlʋsʋ ɛ gyi ɔsʋlʋsʋ ɔha. Ɔsʋlʋsʋ asʋn ɔtɛblɩ, tamɛ ɔha ánɩ́ otsu ɔsʋsʋ dʋn ɔhagyiɔha. 32Otegyi tɔá alawun pʋ́ tɔá alanu ɩwɩ adansɩɛ, ɔhaa tamahɔ mʋ asʋn blɩhɛ. 33Tamɛ ɔhagyiɔha ánɩ́ ɔlɔhɔ mʋ asʋn blɩhɛsʋ gyi dɛ mʋ́sʋ si ánɩ́ Bulu asʋn igyi ɔnɔkwalɩ. 34Ɔha amʋʋ Bulu lɔwa amʋ tɛlɛ Bulu asʋn blɩ, tsufɛ Bulu tɔpʋ Ɔŋɛ amʋ bʋla mʋtɔ. 35Ɔsɩ amʋ tɔdwɛ mʋ Bi amʋ, alapʋ tumi fɛ́ɛ́ wa mʋ ɩbɩtɔ. 36Ɔhagyiɔha ánɩ́ ɔlɔhɔ mʋ Bi amʋ gyi bʋ nkpa ánɩ́ ɩtamata. Ɔhagyiɔha ánɩ́ ɔmɔhɔ mʋ gyi ma nkpa ánɩ́ ɩtamata. Bulu ɩsʋbɩtɩ ɛ ɩdɩn mʋsʋ.
Currently Selected:
Yohane 3: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation