Yohane 14
14
Ɔsɩ Amʋ Wa Ɔkpa
1Yesu lɛbla mʋ akasɩpʋ amʋ ɔbɛɛ, “Opuni mátsii mlɩ. Mlɩhɔ Bulu gyi, amlɩhɔ mɩ gyi. 2Otsiakpa tsɔtsɔɔtsɔ bʋ mɩ Sɩ woyitɔ. Nɩ otsiakpa ma ɩnʋ a, tɛkɩ mmɛbla mlɩ mbɛɛ nɛyɛla ɩnʋ yaɩ mlɩ. 3Nɩ nɔyɔ yɛla otsiakpa amʋ yaɩ mlɩ ta a, néyinki ba bɛkpa mlɩ ya mɩ ɩwɩ wa, mɛnɩ mlétsia ɔtɩnɛá mbʋ. 4Mlɩyin ɔkpa ánɩ́ ɩda yɔ ɔtɩnɛ amʋʋ nɔyɔ amʋ.”
5Ɩnʋ Toma lɛfɩtɛ mʋ ɔbɛɛ, “Mɩ Wie, anɩmeyin ɔtɩnɛá fɔyɔ, nkalɩ abɔ́bwɛ abɛ́bɩ ɔkpa amʋ?”
6Yesu lɛlɛ mʋ́ ɔnɔ ɔbɛɛ, “Mɩgyi ɔkpa amʋ, ɔnɔkwalɩ amʋ pʋ́ nkpa amʋ. Ɔhaa mɛ́ɛtalɩ yɔ mɩ Sɩ amʋ wa, nkɛtɩ alatsʋn mɩsʋ. 7Nɩ mlɩyin mɩ lɛlɛ a, tɛkɩ mlɩlabɩ mɩ Sɩ amʋ ɛ. Tamɛ sei mʋ́ mlɩlawun mʋ, mlɩlabɩ mʋ ɛ.”
8Filipo lɛbla mʋ ɔbɛɛ, “Anɩ Wie, suna anɩ fʋ Sɩ amʋ. Mʋ́ kpan tsɔ anɩ.”
9Yesu lɛfɩtɛ mʋ ɔbɛɛ, “Filipo! Mbʋ mlɩ wa dodoodo. Mʋ́ sʋ fʋmɔkʋbɩ mɩ? Ɔhagyiɔha ánɩ́ alawun mɩ kɩ lawun mɩ Sɩ amʋ. Ntogyi sʋ fʋdɛblɩ fɛɛ, nsuna mlɩ Ɔsɩ amʋ? 10Fʋmohogyiá mbʋ mɩ Sɩ amʋtɔ, mʋ ɛ ɔbʋ mɩtɔ? Asʋn anfɩ ndɛ mlɩ bla anfɩ motsu mɩ onuto wa. Mboun mɩ Sɩ amʋʋ ɔbʋ mɩtɔ amʋ dɛ mʋ agyʋma yɔ. 11Nɩ ndɛ mlɩ bla mbɛɛ, mbʋ mɩ Sɩ amʋtɔ, mʋ ɛ ɔbʋ mɩtɔ a, mlɩhɔ mɩ gyi. Nɩ mlɩmɔ́ɔhɔ asʋn amʋsʋ gyi o a, ofula amʋʋ ndɛbwɛ amʋ sʋ mlɩhɔ mɩ gyi. 12Ɔnɔkwalɩ ndɛ mlɩ bla. Ɔhagyiɔha ánɩ́ ɔlɔhɔ mɩ gyi a, ɔbɔ́bwɛ tɔá ndɛbwɛ. Ɔbɔ́bwɛ mʋ́ dʋn mɩ klɛ, tsufɛ mɩ mʋ́ nɔyɔ mɩ Sɩ amʋ wa. 13Nɔ́bwɛ togyitɔá mlɔ́kʋlɩ mɩ ɩdatɔ ha mlɩ, mɛnɩ nɔ́wa mɩ Sɩ amʋ numnyam. 14Nɩ mlɔkʋlɩ togyitɔ mɩ ɩdatɔ a, nɔ́bwɛ mʋ́.
Ɔŋɛ Wankɩhɛ Amʋ Ɩba
15“Nɩ mlɩtɔdwɛ mɩ a, mlégyi mɩ mblasʋ. 16Nɔ́kʋlɩ mɩ Sɩ, ɔbɔ́pʋ Ɔma Ɔlɩɩpʋ bamba sɩsɩ mlɩ. Ɔbɛ́ba betsia mlɩ wa brɛ fɛ́ɛ́. 17Mʋgyi Ɔŋɛ Wankɩhɛ. Mʋtosuna ɔnɔkwalɩá ɩbʋ Bulutɔ. Ɔyɩtɔ aha bʋmɛ́ɛtalɩ hɔ mʋ, tsufɛ bʋmɛdɛ mʋ dunka. Bʋmɛ́ɛbɩ mʋ ɛ, tamɛ mlɩ mʋ́ mlɩyin mʋ. Tsufɛ ɔbʋ mlɩ wa, obétsia mlɩtɔ.
18“Mméesi mlɩ tswɩ fɛ awumbi. Néyinki ba mlɩ wa. 19Ɩlasi kpalobi ɔyɩtɔ aha bʋmɛ́ɛtra wun mɩ, tamɛ mlɩ mʋ́ mlówun mɩ. Ɩnɩá mbʋ nkpa sʋ a, mlɩ ɛ mlétsia nkpa. 20Nɩ ɛkɛ amʋ ɩfʋn a, mlɛ́bɩá mbʋ mɩ Sɩ amʋtɔ. Mlɩ ɛ mlɩbʋ mɩtɔ, fɛ alɩ amʋʋ mɩ ɛ mbʋ mlɩtɔ amʋ.
21“Aha ánɩ́ bʋdɛ mɩ mblasʋ gyi a, amʋ́gyi mɩ adwɛpʋ nɩ. Ɔhagyiɔha ánɩ́ ɔtɔdwɛ mɩ a, mɩ Sɩ ɔbɔ́dwɛ mʋ. Mɩ ɛ nɔ́dwɛ mʋ, lɛ mɩ ɩwɩ ɔwan suna mʋ.”
22Mʋʋ Yuda (megyi Yuda Iskariot) lɛfɩtɛ mʋ ɔbɛɛ, “Mɩ Wie, ntogyi sʋ anɩ nkʋlɛ pɛ fɛ́lɛ ɩwɩ ɔwan suna, megyi ɔyɩtɔ aha fɛ́ɛ́?”
23Yesu lɛlɛ mʋ́ ɔnɔ ɔbɛɛ, “Nɩ ɔkʋ dɛ mɩ dwɛ a, ɔbɔ́bwɛ dɩnka mɩ atosunahɛsʋ. Mɩ Sɩ ɔbɔ́dwɛ mʋ. Mɩa mɩ Sɩ amʋ nyɔ abɛ́ba betsia mʋ wa. 24Ɔha ánɩ́ ɔtamadwɛ mɩ ɔmɔ́ɔbwɛ dɩnka mɩ atosunahɛsʋ. Asʋn anfɩ ndɛblɩ mlɩdenu anfɩ motsu mɩ onuto wa. Mɩ Sɩ lɔwa mɩ, mʋ wa itsu.
25“Ndɛ mlɩ asʋn anfɩ bla, sei anfɩ mbʋ mlɩ wa. 26Tamɛ Ɔma Ɔlɩɩpʋ, ogyi Ɔŋɛ Wankɩhɛ amʋʋ mɩ Sɩ ɔbɔ́pʋsɩsɩ mɩ ɩdatɔ amʋ obósuna mlɩ togyitɔ. Ɔbɛ́kaɩn mlɩ asʋngyiasʋn ánɩ́ nɛbla mlɩ.
27“Iwilwii ndɛ mlɩ ha! Napʋ mɩ iwilwii ha mlɩ. Megyi mʋ́ amʋʋ ɔyɩtɔfɔ bʋtɛha amʋ odu. Mlɩmáha opuni itsii mlɩ. Ifu ɛ mákɩta mlɩ. 28Nabla mlɩ bɔtsʋn mbɛɛ, ndɛnatɩ, tamɛ néyinki ba mlɩ wa. Nɩ mlɩtɔdwɛ mɩ a, tɛkɩ mlénya ansigyiá nɔyɔ mɩ Sɩ wa, tsufɛ ɔdʋn mɩ. 29Ndɛ mlɩ ɩnɩ fɛ́ɛ́ bla yaɩ, mɛnɩ nɩ ɩba mʋ́tɔ a, mlóhogyi. 30Mmɛ́ɛtra tɔɩ yɔ nkpa, tsufɛ ɔyɩsʋ ogyipʋ amʋ ɔba. Ɔma tumi mɩsʋ. 31Ntonu mɩ Sɩ ɔmɛ, mɛnɩ ɔyɩtɔfɔ bɛ́bɩá ntɔdwɛ mʋ.
“Mlɩkʋsʋ anatɩ.”
Currently Selected:
Yohane 14: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation