Pakaso 21
21
Se Omoniapụ Ma Na Angaḅịa Ḅara
(Maịn 15.12-18)
1“Ma olokoma seni Izrẹlapụma pịrị: 2Ị́ nemikase Hibru omoniḅọ fẹmẹ ḅẹḅẹ, sonio-a kụra ọ̀ nwọse fịrịnwẹngị ị́ pịrịḅịa. Sọnọmẹ karama kụra mị ḅie ori ọ̀ ḅụ nyanaḅịa, ye gbẹịnka ḅaraḅụ. 3Ma ori eresimeka simeogbo ò ḅo ị́ya omoniḅọ sọmẹ ḅẹḅẹ, ò soḅịa sịkị ori eresime so ẹkẹ; ọkụma nemikase ori eresime ḅọrọ se ò ḅo ị́ya omoniḅọ sọmẹ ḅẹḅẹ, tarọ ma ori ineda árị ọkị chụa soḅịa. 4Nemikase ọ̀ nyanaḅọ ḅe ere ya ọ̀ pịrịmẹ, se árị owuapụ awọ anịkanịka eremeni awọ yi ọ̀ pịrịmẹ ḅẹḅẹ, eremeniḅọ ma na àrịa awọma na ini sime ọ̀ nyanaḅọ ḅe pịrịmẹ, ọkụma tomoniḅọ ḅe ori ineda ngẹrị soḅịa. 5Ọkụma omoniḅọ ḅe nemikase ọ̀ nyanaḅọ ḅe na, tarọ ma na, pịkị oria awọma na ọ̀ nwọ ḅẹlẹmaye ẹrẹchị ọ̀ ḅarị soẹkẹ nwọ ḅẹḅẹ, 6anịọkụma ọ̀ nyanaḅọ ḅe ori ori ọkị tẹkẹ anga mị munḅịa. Anịanga ḅụ ori ọ̀ mịẹse ọ̀ ḅọkọ mị anịkanịka ḅọkọ mị anịa chịn mị tọrọkọ chịẹ se ọ̀ laga se ò ḅeri toluḅịa. Anịsịkị re mị ori oria omoniḅọ sọḅịaye-ẹ, oria ḍumo ene mamgba ḅụ.
7“Tomoniḅọ nemikase omoniḅọ ḅara se oria eremeni tọkụ dẹrịmẹ ḅẹḅẹ, ini á wẹrịso seni árị owuapụ omoniapụ inia ḅụ nyana ḅara se á ḅụ nyana-ẹkẹ. 8Nemikase ini á se á sime ḍọkịḅọ dẹrịmẹ, ọkụma árịa mịẹmịẹye ọ̀ ḅụḅẹlẹkẹ ḅẹḅẹ, anịọkụma ini kpoto á seni ḍawu ḅe dẹrịḅịa; á nyanaḅọ ḅe ọ̀ ḅarị á se jịn sẹ apụ dẹrịẹkẹ, anịatịḅị ọ̀ ḅarị iḅiḅara se árị na angakẹ. 9Tomoniḅọ nemikase eremeni omoniḅọ ya se oria owutọkụ pịrịmẹ ḅẹḅẹ, oria eremeni tọkụ ḅara ọ̀ nwọse árị na anga. 10Owuḅọ nemikase maịn karama eremeniḅọ simemẹ ḅẹḅẹ, tatarị eremeniḅọ ma ò se á pịrịpịrị fịye la-ọkụ mị ọ̀ pa se á pịrịpịrịḅịaye-ẹ, ḅịtẹ ḅụ sọnị á lalama kiri mamgba na, anị tatarị sịkị ḅara mị. 11Ò nemikase ma ayema mịẹ á pịrịkẹ ḅẹḅẹ, ori á wẹrịso á so, gbọrị gbẹịnye sọnị á ḅara ọ̀ nwọ ọkịka ḅaraḅụ.
Kurakaḅara Se Ye Seni Nweni Lama Mị Gboloma Oloko Ma
12“Nweni fomuḅaaḅọ goyegoye ini nụḅọ ḅaaḅịa. 13Ò tomoniḅọ ḅe ḅaa ḅikẹ, ọkụma bẹkẹma ḅaraḅụ tomoniḅọ ḅe fịmẹ ḅẹḅẹ ori ineda mangị so à tọn ọ́ pịrịḅịa anga mị nwọ munḅịa, anịanga ye ọ̀ la-ẹkẹ. 14Ọkụma tomoniḅọ nemikase yeḅụosọ ḅụ nemima jịn tomoniḅọ ḅaamẹ ḅẹḅẹ ini ọ̀ ḅaaḅịa, ọ̀ ḅọrọ mangị mun ị̀ya agbamịẹ ẹbẹ mị ḅụ ịnyasọmẹ nwọ ḅẹ sọnị.
15“Ḍaḅọ anịkanịka nyengiḅọ fomuḅọ goyegoye ini nụḅọ ḅaaḅịa.
16“Dẹrịḅịa ẹrẹchị anịkanịka se omoniḅọ mịẹḅịa tomoniḅọ kun-ọkịḅọ goyegoye ini nụḅọ ḅaaḅịa.
17“Nime seni ḍaḅọ na nyengiḅọ na woriḅọ goyegoye ini nụḅọ ḅaaḅịa.
18-19“Nemikase owusọ kiri ḅụ gbọrịḅọ ḍụparị se ísíḅọ ḅe gbin anịkanịka ịkpụlụ se ọ̀ ḅakụmẹ, ọkụma ori ọ̀ ḅaakẹ ḅẹḅẹ, ini fomuḅara seni ọ̀ pịrị-ẹkẹ. Nemikase ye mị laḅọ ḅe mun obi iḅila ọgọnọ simemẹ, ọkụma ọḅụkọ ori ineda sịsẹ seni amgbara se ọ̀ ḅụdachịẹma se nwẹngị pakamẹ ḅẹḅẹ, nwọ yese ọ̀ lamaḅọ ḅe ọ̀ ḅụ famasịkị mị ọ̀ nwọ seni ọ̀ gbẹịnḅịa, ọ̀ pịkị ọ̀ ḍikiḍiki nweni ọ̀ ḅụ iḅi sịkị nwọ laḅịa.
20“Nemikase tomoniḅọ chịn deki seni nụḅọ omoniḅọ fomumẹ, ḅọrọ owuḅọ anịkanịka eremeniḅọ sọnị, se omoniḅọ mị kirikiri fịmẹ ḅẹḅẹ, ini fomuḅara seni nụḅọ nyanaḅọ ḅe pịrịḅịa. 21Ọkụma nemikase omoniḅọ ḅe fịka mun gbọrị ḍin anịkanịka mama ḍin lamẹ ḅẹḅẹ, ọ̀ nyanaḅọ ḅe ini fomuḅara seni ọ̀ pịrị-ẹkẹ. Ori nyanaye ọ̀ ḅaraḅụ fa mị sọnị fomuḅara-ẹ.
22“Nemikase tomoni owusọarị anga ḅụ ini yese simekọn eremeniḅọ lama, se sime mị somẹ, se jịnye á lakẹ ḅẹḅẹ, ori ye mị se á lamaḅọ ḅe, eremeniḅọ ma dewu ḅe ḅi igbiki la-ọkụ-la-ọkụ ò seni ọ̀ gbẹịnḅịa, ḅẹrẹkọn apụma seni anị pịrịḅịa ḅịpị ḅụ. 23Nemikase ye eremeniḅọ ma lamẹ ḅẹḅẹ, anịa fomuḅara mị anị ḍumo na ḍumo na-ẹ, 24tọrụmgbọlụ na tọrụmgbọlụ na-ẹ, aka na aka na-ẹ, ḅara na ḅara na-ẹ, ḅụọ na ḅụọ na-ẹ, 25dọkịye na dọkịye na-ẹ, yela na yela na-ẹ, ịsịn ye na ịsịn ye na-ẹ.
26“Nemikase tomoniḅọ oria owuḅọ anịkanịka oria eremeni omoniḅọ tọrụmgbọlụ ḅakụ polomẹ ḅẹḅẹ, ori anị omoniḅọ mị wẹrịso se nụḅọ soḅịa, tọrụmgbọlụ mị anị oria gbẹịnye sọḅịaye-ẹ. 27Ò nemikase aka ḅakụ pọkọmẹ ḅẹḅẹ, ori omoniḅọ mị wẹrịso se nụḅọ soḅịa, aka mị anị oria gbẹịnye-ẹ.
Sime Ye Nyanapụ Ma Pịrị Fịrị
28“Nambulo nemikase tomoniḅọ chira ḅaamẹ ḅẹḅẹ, ini ò gbin ḅaaḅịa, ọkụma oria oju mịnị mị ini pẹị ẹkẹ; fomuḅara pịkị sime ọ̀ nyanaḅọ ḅe pịrị ẹkẹ. 29Nemikase nambulo ḅe nweni chira ḍumo kọnkọnmẹ se ini ọ̀ nyanaḅọ ḅe ḅeri jinesam, ọkụma ori ine ò kurakẹ ḅẹḅẹ—anịḅụ ò nemikase tomoniḅọ chira ḅaamẹ, ini ò gbin ḅaaḅịa, pịkị ọ̀ nyanaḅọ ḅe sọnị ini ọ̀ ḅaaḅịa. 30Anịẹḅẹsọnị, ini nemikase ḅereni ọ̀ nyanaḅọ ḅe pịrịmẹ na ori igbiki gbẹịn se oria ḍumo mị ḍụa nwọ ḅẹḅẹ, ini ḅi igbiki mị mgba ọ̀ nwọ gbẹịnḅịa. 31Nemikase nambulo ḅe owutọkụ anịkanịka eremeni tọkụ ḅaamẹ ḅẹḅẹ, anị gbọrị oloko mị ḅe fomuḅara iniḅọ laḅịa. 32Nemikase nambulo ḅe ori owuḅọ anịkanịka eremeni omoniḅọ ḅaamẹ ḅẹḅẹ, seleḅa pẹkẹrẹ-a soi ọ̀ nyanaḅọ ḅe ọ̀ nwọse omoniḅọ mị nyanaḅọ ḅe gbẹịnḅịa, se nambulo ḅe ini nwọ gbin ḅaaḅịa.
33“Tomoniḅọ nemikase olulu ḅịpị gbẹịnye nwọ dekisin anịkanịka kiri soku se anịa ḅịpị gbẹịnkẹ, se nambulo anịkanịka yepụra asụn sokoro anịa ḅie sọmẹ ḅẹḅẹ, 34nụḅọ nama ḅe gbẹịnḅịa. Ori igbiki mị se nama ḅe nyanaḅọ ḅe gbẹịn se fị nama ḅe ọkịḅịa. 35Nemikase gbọrịḅọ nambulo jụmḅọ nambulo ḅaamẹ ḅẹḅẹ, ini mama apụma ḍumo wuḅe dẹrị se igbiki mị ḍia ọkịḅịa; ini pịkị fị nama mị nwọ ḍia ọkịḅịa. 36Ini nemikase nemimẹ na ḍumo nambulo ḅe ori owupaka ḍumo kọnkọnmẹ se ọ̀ nyanaḅọ ḅe ori ine ò kurakẹ nwọ ḅẹḅẹ, ò ḍumo nambulo se ísíḅọ ḅe pịrịḅịa, se ọ̀ fị wuḅe nwọ ọkịḅịa.
Currently Selected:
Pakaso 21: OBTP
Highlight
Copy
Compare
Share
Want to have your highlights saved across all your devices? Sign up or sign in
The Bible Society of Nigeria
