Ijosuwa 21

Ẹkụra ana a sị yị Anireevi nịnị

1Aza ana vị ọdọvịdị Anireevi nịnị ệ kụ ẹngụ ve tu Eriyaza ohirẹsụ irehi Ohomorihi ọnịrị Ijosuwa ozi Inuni ne beri ọdọvịdị Anisirẹrị nịnị. 2#Ịrị 35.1-8Isiro ịnị ẹtẹ Ikanaani ẹ vavọọ ve tu wa nị. Ệ kà a Ẹnẹyịmavara ọ̀ vịdị kà yị Imosiisi ka a sị ẹtẹ yị ẹnị ịzị ẹ nyị avị ọnị ịsụpa ẹnịnị vaa rị. 3Ọda ọnị Ẹnẹyịmavara mẹ̀, a sị sị ẹkụra ẹnẹnị vaka ịzị avị hi ka ẹ vị ogu ẹnịnị nị. 4Evere Ikohati ịnị ịrẹsụ Ireevi vị ana sị ẹkụra ẹwụrẹta yị hụụnị ẹtẹ ana a sị yị Ijuda, Isimiyọnị, ọnịrị Ịbẹnjamịnị. 5Anikohati ana vọ vị ana a dọ ẹkụra ẹẹwụ hụụnị ụvọ Ehwireemi, Ịdaanị ọnịrị achẹva Ịmanasẹ 6Evere Igerisoni vị ana a sị ẹkụra ẹwụrẹta yị hụụnị ẹtẹ Iisaka, Aseri, Inahwitari ọnịrị achẹva Ịmanasẹ ana ya ịnị ẹtẹ Ịbasanị. 7Evere Imerari ịnị ezi Ireevi vị ana a sị ẹkụra ẹwụrẹva yị hụụnị ẹtẹ Irubẹnị, Igadi, ọnịrị Izeburuni. 8Avaba ẹkụra ẹnẹnị ọnịrị ịzị aa kụ ịsụpa rị ọnị Anisirẹrị sị yị Anireevi anka Ẹnẹyịmavara mẹ kà a yị Imosiisi.

Ẹkụra hụrị ẹtẹ Ijuda, Isimiyọnị ọnịrị Ịbẹnjamịnị

9Ijuda ọnịrị Isimiyọnị ẹ̀ sị ẹkụra ẹnẹnị 10ọnị ezi Eerọnị ana vị ọnya ịnị evere Ikohati ịnị ịrẹsụ Ireevi nị. Ẹnị ọ za ka ẹ vị ọnịpaapa anaa ga ẹtẹ tu nị. 11A sị ẹkụra ana a hị́ Ikiriyati-Arịba (ịrẹha ohiku Anaki nịnị) ana a raa hị́ Ihebirọnị ịrẹsụ ataba Ijuda vaka ịzị ịsụpa rị ana kara wa. 12Ama â vịdị raà sị ẹtẹ ẹkụra ọbanyị ọnọọ ọnịrị ẹkụra eweyi-eweyi ene hi ịzọọ yị Ịkarẹbị ozi Ijehwụnẹ. Ọnọọ ọ vị ọnyịrẹva anị nị. 13Ẹkụra ẹbanyị-ẹbanyị ana vọ beri Ihebirọnị ana a sị ezi Eerọnị ohirẹsụ Irehi Ohomorihi nịnị: Iribina, 14Ijatiri, Esitemowa, 15Ihoroni, Debiri, 16Ayini, Ijuta ọnịrị Ịbẹtị-Isemesi beri ẹtẹ aarẹ nịnị; ẹkụra ẹbanyị-ẹbanyị ịhịịna hụụnị ẹtẹ Ijuda ọnịrị ẹtẹ Isimiyọnị. 17Ẹkụra ẹbanyị-ẹbanyị ịhịịna ana a sị hụụnị ẹtẹ Ịbẹnjamịnị yị evere Eerọnị ẹ vị Igibiyọnị, Ịgẹba, 18Anatọtị, ọnịrị Arimoni, beri ẹtẹ aarẹ ẹnịnị. 19Avaba ẹkụra ẹbanyị-ẹbanyị ẹnẹẹ vị ẹwụrẹta beri ẹtẹ aarẹ beri ẹtẹ aarẹ ẹnịnị â si yi evere Eerọnị ana vị ohirẹsụ irehi Ohomorihi.

Ẹkụra hụrị ẹtẹ Ehwireemi, Ịdaanị ọnịrị Ịmanasẹ eyi ụvẹtẹ

20Evere Ireevi ọsa ana vị ezi Ikohati vị ana a sị ẹtẹ Ehwireemi yị. 21Ẹkụra ẹbanyị-ẹbanyị ẹẹna ana a sị yị wa ẹ vị Ịsẹkẹmị ọnịrị ẹtẹ ọyị kụ́ ịsụpa rị ana ya ịrẹsụ ataba anị, Ịgẹzẹrị, 22Ikibizayimi, Ịbẹtị-Ihoroni ọnịrị ẹtẹ ọyị kụ́ ịsụpa rị anị, 23Ẹkụra ẹbanyị-ẹbanyị ẹẹna ana a sị yị wa ịnị ẹtẹ Ịdaanị ẹ vị Eriteke, Igibetoni, 24Ayijaroni, ọnịrị Igati-Irimoni beri ẹtẹ ọyịkụ ịsụpa rị anị. 25Ẹkụra ẹbanyị-ẹbanyị ẹẹva a sị yị wa ịnị ẹtẹ Ịmanasẹ ana ya eyi ịzị ọyịị̄ zịị ngụ ẹtẹ ẹ vị; Itaanaki, ọnịrị Igati-Irimoni beri ẹtẹ ọyị kụ́ ịsụpa rị. 26Abara-abara ẹnẹnị ịnị ịrẹsụ Ikohati ệ dọ ẹkụra ẹbanyị-ẹbanyị ệ dọ ẹkụra ẹẹwụ ọnịrị ẹtẹ ọyị kụ́ ịsụpa rị ịnị anị nị.

Ẹkụra hụrị ẹtẹ acheva Ịmanasẹ ọhụva, Iisaka, Iisaka, Inahwitari

27Ịrẹsụ Igerisoni ịnị evere Ireevi ệ dọ ẹtẹ ẹkụra ẹbanyị-ẹbanyị ẹẹva hụụnị ẹtẹ Achẹva Ịmanasẹ ana ya eyi ịzị ọyịị̄ kwẹẹtẹ hụrẹ. Ẹtẹ ẹnẹẹ ẹ vị Igorani ịnị ẹtẹ Ịbasanị ọnịrị Ibeesitera beri ẹtẹ ọyị kụ́ ịsụpa rị. 28Ẹkụra ẹbanyị-ẹbanyị ẹẹna ana a sị yị wa hụụnị ẹtẹ Iisaka ẹ vị Ikisiyoni, Idaberati, 29Ijarimuti ọnịrị Eniganimi beri ẹtẹ ọyị kụ ịsụpa rị. 30Hụụnị ẹtẹẹtẹ ịrẹsụ Aseri, a sị ẹkụra ẹbanyị-ẹbanyị ẹẹna yị ezi Eerọnị nị. Ẹkụra ẹnẹẹ ẹ vị Imisari, Abidoni, 31Iherikati ọnịrị Irehobi beri ẹtẹ ọyị kụ́ ịsụpa rị. 32Hụụnị ẹtẹ ịrẹsụ Inahwitari a sị ẹkụra ẹbanyị-ẹbanyị ẹẹta, ana vị Ịkẹdẹsị ịnị Igariri ọnịrị ẹtẹ ọyị kụ́ ịsụpa rị, Ihamoti-Ịdọrị ọnịrị Ikaritani beri ẹtẹ ọyị kụ́ ịsụpa rị. 33Avaba ẹkụra ọnị abara irenyi-irenyi ene hi ịnị ịrẹsụ Igerisoni dọ vị ẹwụrẹta beri aha ọyị kú ịsụpa rị ịnị ọzọza.

Ẹkụra hụrị ẹtẹ Izeburuni, Irubẹnị ọnịrị Igadi

34Ịnị Anireevi nịnị ana vọ, ịrẹsụ Imerari ệ dọ ẹtẹ Izeburuni ẹkụra ẹbanyị-ẹbanyị ẹẹna. Ẹkụra ẹnẹ dọ ẹ vị Ijokinimi, Ikarita, 35Idimina, ọnịrị Inaharari beri ẹtẹ ọyị kụ́ ịsụpa rị. 36Hụụnị ẹtẹ Irubẹnị ẹ dọ ẹkụra ẹbanyị-ẹbanyị ẹẹna. Ẹkụra ẹnẹẹ ẹ vị Ibezeri, Ijahazi, 37Ikedemọtị ọnịrị Imehwaati beri ẹtẹ ọyị kụ́ ịsụpa rị ẹkụra ẹbanyị-ẹbanyị ẹẹna. 38Ẹkụra ana dọ ịrẹsụ Igadi ẹ vị Ịramọtị ịnị ẹtẹ Igiriyadi beri Imahanayimi ẹtẹ ọyị kụ́ ịsụpa rị anị, 39Ịhẹsịbọnị ọnịrị Ijazeri beri ẹtẹ ọyị kụ́ ịsụpa rị ẹnịnị. 40Avaba ẹkụra ana a sị yị ịrẹsụ Imerari vị ẹwụrẹva. 41Ịnị avaba ẹtẹ ọnị Anisirẹrị nịnị dọ, avaba ẹkụra ẹbanyị-ẹbanyị ana sị yị ezi Ireevi vị ẹbẹẹva tụra ịhịnta. 42Avaba ẹkụra ana sị yị wa vị ana nyị ẹtẹ kara wa ịzị ẹ yaa kụ́ ịsụpa ẹnịnị rị.

Anisirẹrị nịnị ẹẹ dọ ẹtẹ.

43Ẹnẹyịmavara ộ sị avaba ẹtẹ ọnị ọ wo oto anị yị ohiku ẹnịnị ka ọnị aa sị yị wa. Ệ dọ ẹtẹ ọnọọ dị ẹ ra ịnị anị nị. 44Ẹnẹyịmavara ộ mẹ̀ ẹngwọọrọ yị wa ịnị avaba ọnọọ anka ọ mè wo oto anị yị ohiku ẹnịnị. Ẹ yị nyị ọnịvị ẹnịnị ana zụ va eyi ka wa agụvị ka Ohomorihi ộ sị wa nyị ẹbẹẹba avaba ọnịvị ẹnịnị. 45Ẹnẹyịmavara ộ mẹ̀ avaba ịsa oni o wo oto anị yị Anisirẹrị nịnị.

Currently Selected:

Ijosuwa 21: EBTP

Highlight

Copy

Compare