Ijosuwa 18

Ijosuwa ộ ga ẹtẹ ana vọ

1Ịrẹma ọnị Anisirẹrị nịnị raà dọ avaba ẹtẹ ọnọọ ta, dị ẹ avaba ẹnịnị kụ ẹngụ gụ Isiro, dị ẹ jị ajẹngụ ịzị ẹnịrị Ohomorihi aa gẹ nị. 2Ama â nyị ịrẹsụ ịhịmba ịnị Anisirẹrị nịnị ọnị ọza ẹ yị ga ẹtẹ tù. 3Agụvị avọọ Ijosuwa họ̀ Anisirẹrị ka, ịzị ẹ vaa jẹẹ tu di e vee nyima ọyị dọ ẹtẹ ọnị Ẹnẹyịmavara Ohomorihi ẹnịnị raà sị yị wa? 4Ộ ka ẹnịnị ẹ nyị aza ẹtẹẹta hụụnị ịrẹsụ ọnyọọnya vẹ. Ọnị aa tụ̀ wa ne re ẹtẹ, dị ẹ chẹrẹ ẹ tịtẹ ẹtẹ ọnọọ mẹmẹ ya ana vaa ga yị ịrẹsụ ọnyọọnya. Ẹ vavọọ sị ọ mẹ̀, dị ẹ varẹma vee tu ọnị. 5Ẹ ga ẹtẹ ọnọnị hi oze ịhịmba. Ijuda vaa ya ịzị ọ ya eyi ụvẹtẹ, dị anovwoovu Ijosẹẹhụ ẹ ya eyi ẹbẹẹba. 6Ẹ̀ ẹ raà chẹrẹ ẹtẹ ana a ga hi oze ịhịmba aanị mẹmẹ ya, ẹ sị iwe anị ve tu ọnị, dị ọnị zama ẹtẹ tụ ọ ẹtẹ ana vaa vị ọzọza ọvịdị Ẹnẹyịmavara Ohomorihi ẹnịnị. 7Ama Anireevi nịnị ẹ yị vaa nyị tụ ịnị ẹtẹ ana ga aanị, ụkọrọ ọyị mẹ anka ohirẹsụ irehi Ẹnẹyịmavara ọ vaa vị ogu ẹnịnị nị. Ịrẹsụ Igadi ọnịrị Irubẹnị beri achẹva Ịmanasẹ ệ vịdị raà dọ ẹtẹ ẹnịnị hụụnị ụvọ Imosiisi ozi ahụ Ẹnẹyịmavara akẹnẹ Ijodani eyi ịzị ọyị kwẹẹtẹ hụrẹ. 8Dị anọrụ ẹnẹẹ va jịnẹ na zụ ụtụ ọnọọ, Ijosuwa ộ vatụra ọda ẹnẹnị ya wa: E chire ẹtẹ ahụ ne hu, dị ẹ chẹrẹ ẹ ẹtẹ mẹmẹ ya, dị ẹ vavẹ vee tu ọnị Isiro. Ọnị vee họ̀ use hụụnị ụvọ Ẹnẹyịmavara a mẹ vọrọ ka ọnị ọ ga ẹtẹ ọnọọ yị wa. 9Ẹnịnị ệ ngụ avaba ẹtẹ ọnọọ zị, dị ẹ ga ẹkụra-ẹkụra ene hi ịzọọ tụ oze ịhịmba, dị ẹ vavẹ vee tu Ijosuwa ịnị ajẹngụ ana ya Isiro nị. 10Ijosuwa ô si iruvo hụụnị ụvọ Ẹnẹyịmavara a mẹ vọrọ ka ọ ga ẹtẹ ọnọọ, dị ọ ka yị wa ịsị Ẹnẹyịmavara kà nị.

Ẹtẹ ana a sị yị Ịbẹnjamịnị

11Ezi Ịbẹnjamịnị ẹ vị ọnịpaapa ana a sị ẹtẹ tụ́ ịnị akakana ịrẹsụ Ijuda ọnịrị evere Ijosẹẹhụ eyi ụvẹtẹ nị. 12Ẹhwị ẹtẹ ẹnịnị eyi ẹbẹẹba ô nyima hụrẹ irehu Ijuda vavọọ va hịrẹ akaha ataba na ngụ Ijeriko, jịnẹ va ịrẹsụ ka ẹkụra ịnị otutu va jịnẹ ịnị inozi ụnọmị Ịbẹtị-Aveni. 13Ẹhwị ẹtẹ ẹnịnị ọ hụ ịzọọ na ngụ eyi ụvẹtẹ Iruzi ọnị ịrẹha ọsa rị Ịbẹtẹrị, dị ọ para ịzọọ hu ne tu Ataroti-Ada ịrẹsụ ataba ana ya eyi ụvẹtẹ akẹtẹ Ịbẹtị-Ihoroni. 14Hụrị Ịbẹtị-Ihoroni ẹhwị ẹtẹ ọ ya zị eyi ịzị ọyịị̄ naa ngụ ẹtẹ, dị ọ jẹẹ Ikiriyati-Ijeyarimi ana vị ọnya ịnị ẹkụra Anijuda nịnị. 15Ẹhwị ẹtẹ eyi ụvẹtẹ vi ene nyima hụrẹ ụtọ Ikiriyati-Ijeyarimi na ngụ apasị Inehwitowa. 16Dị ọ vavọọ chi na ngụ ahẹtẹ ataba ana va eyi ka inozi Ihinọmị ẹtaha eyi ẹbẹẹba inozi Irehwayimi. Ẹtẹ ọnọọ ộ hụrị ịzọọ va chi zị oze inozi Ihinọmị, eyi ụvẹtẹ ụhwakọọrọ Ijebusi va ka eyi Enirogeri. 17Ộ hụrị ịzọọ vẹ eyi ẹbẹẹba na ngụ Enisemesi ne tu Igeriroti ana va eyi ka oze Adumimi. Ẹtẹ ọnọọ ộ vavọọ chi na ngụ ịrẹta Ibohani, (Ibohani vị ozi Irubẹnị) 18dị ọ para ụhwakọọrọ ana va eyi ka inozi Ijodani, dị ọ chị na ngụ inozii ọnọọ, 19dị ọ para eyi ẹbẹẹba ụhwakọọrọ Ịbẹtị-Ihogira, dị ọ jẹẹ tụ̀ eyi ẹbẹẹba oze ọnị enyi Okuha Ịjọdanị aā zịị vaa hi Òkū Anọ.

Ịzẹnị ọ vị ẹhwị ẹtẹ eyi ụvẹtẹ nị

20Ijodani vị ẹhwị ẹtẹ eyi ịzị ọyịị̄ kwẹẹtẹ hụrẹ nị. Ẹsẹnị ẹ vị ẹhwị ẹtẹ ọnị abara-abara ịrẹsụ Ịbẹnjamịnị nịnị dọ ana vị ẹnịnị nị. 21Ẹkụra ẹbanyị-ẹbanyị ẹnẹnị ẹ vị abara-abara ịrẹsụ, Ịbẹnjamịnị nị: Ijeriko, Ịbẹtị-Ihogira, Emeki-Ikezizi. 22Ịbẹtị-Araba, Izemarayimi, Ibeteri, 23Avimi, Ipara, Ohwịra, 24Ikehwa-Amọnị, ohwini, ọnịrị Ịgẹba; ẹkụra ẹbanyị-ẹbanyị ẹwụrẹva beri ẹkụra ọrụrụ-ọrụrụ ana kara wa. 25Ịrẹha ẹkụra ẹsa ana ya ịnị ẹtẹ ọnọọ ẹ vị Igibiyọnị, Iraama, Ịbẹẹrọtị, 26Imizipe, Chehwira Imoza, 27Irekemi, Iripeeri, Itarara, 28Ịzẹra, Ịharẹhwị, Ijebusi (Ijerusarẹmị), Igibeya, ọnịrị Ikiriyati-Ijeyarimi; Ẹkụra ẹbanyị-ẹbanyị ẹwụrẹna beri ẹkụra ana vọ ana kara wa. Ẹtẹ ọnọnị abara-abara ịrẹsụ Ịbẹnjamịnị dọ mẹ ogu ẹnịnị nị.

Currently Selected:

Ijosuwa 18: EBTP

Highlight

Copy

Compare