Anihiburu 12

Ohomorihi óo sì ịrẹyị ayị; agụvị avọọ ọọ̄ sị ụyaa rị yị nị.

1Wee re ka áa nyị onivenu ọrụrụ-ọrụrụ ana kara yị aanị. Agụvị avọọ ịsa tụra ịsa ana àa vaa dọ yị oro, à vẹ ya sị ọọ kwooze beri ịvị anaā paraa za yị biri-biri! À vẹ ya jẹẹ geri-geri, di yee zwe echi ana yà ọvịdị ayị! 2À vẹ ya sị eyi pe Ijeesu! Ọnị ọ mẹ ka ye nyima ẹdọwụ, dị ọ rẹ mẹ ka ẹdọwụ ayị ọnọọ ọ̀ gụ nị. Ộ dọ ka oni ò sú isu ụhị ị́rẹsụ ọchị apavahị. Ọ yị za ụhị ọnọọ ịrịka tụ́ ịnị ịsọnyị-ịsọnyị agụvị ịrajẹ ọyịjẹ oni Ohomorihi sị tịtẹ ee zí ọọ. Ọ yaayịtẹ éyi ụvọrị ịnị aga Ohomorihi ohinọyị booro aanị. 3Roo nịnị dị a re ẹngụ ọza ana vavọọ sị ẹngụ dọ ịsa edivi ọnị ọnịvị nịnị mẹ hi ọ! Agụvị avọọ asị ụ zẹẹ ka ò du wu nịnị eyi, dị ụ wa na hụrẹ ụvọ nịnị! 4Ụ màa sịị vụrị ka asị ụ mẹ̀ ịvị nịnị, oò yi ve tù ka à wụ̀ wụ nịnị tụ́ ịnị anị. 5#Ijov 5.17; Ụhị 3.11,12Ọtụtụrụma oni Ohomorihi aa tụ́ wụ nịnị anka ozi anị, vị ayị wéé hí wu nịnị nị? Ọ kà,

“Ozi emi, Ohomorihi ọ̀ọọ tụ wụ ohuvọ, asị ụ sị eyi wụ̀ ịrẹyị anị.

Àaa sị́ ụyaa rị wụ, asị ụ zẹẹ ka ò du wu eyi.

6Agụvị ka ọza ana Ananyị yị sì ịrẹyị anị, ọọ̄ sị ụyaa rị nị;

ọza ọnị ọ̀ọ dọ anka ozi anị, o ree tụ́ nị.”

7Agụvị avọọ, àaa sị ụyaa rị wụ, ụ sị isuuru dọ ọ nịnị! Ohomorihi vị ana aa mẹ wụ nịnị anka ezi anị. Áá nyị ozi ana ada anị ọ̀yị mā sị ụya rị? 8Wẹ̀ yị mā rị ụya nịnị, anka avaba ezi anị mẹ̀ẹ̄ rị ụya, ọnị ọ vị ka ozi ọta ụ vị nịnị nị, wẹ yị vị ezi obooro nịnị. 9Ada ayị ịnị ẹhẹ ọnọnịị̄ sị ụyaa rị yị, dị ị ká ịrẹsụ hi yị wa. Wéé ro ka ayị vọrọ ka ya ká ịrẹsụ hi hu avọọ yị Ada ayị ẹbẹẹba, dị ya zụ yára? 10Ada ayị ịnị ẹhẹ ọnọnị vị ana aa sị ụyaa rị yị mẹ ụmẹ chee kẹnẹ, anka e mè ro ka óo zoza. Ama Ohomorihi ọnị vị anaā sịị ụyaa rị yị ka ọ̀ vị ọgụ yị; ọnị ọ vị ka ya zụ vị ọnịnị, anka ọ́nị mẹ̀ rẹ vị ọnịnị. 11Ịnị ụmẹ ana àaa sịị sị ụyaa rị yị, o vee du yi ayị, yẹ yị vaa jẹ. Ama ọdịrẹma anị, ụyọrị ọnọọ vaa mẹ ka aza ana sị ẹngụ dọ ọ, ẹ̀ẹ mẹ̀ ịsa ana vọrọ, dị ẹ rẹ yaa mẹ̀ ebira ẹngwọọrọ.

Sị eyi pe ẹngụ awụ, agụvị ka Ohomorihi vị ọnịnị!

12 # Ayị 35.3 Ụvọ awụ nịnị ana sị kata, re ka wáa sị ụkata yọ nịnị! Idinku awụ nịnị ana rẹ sị kata, re ka wáa mẹ ka ọ̀ rẹ nyị ụkata nịnị! 13#Ụhị 4.26Waa zị ụsẹ ini oze ana vọrọ nịnị! agụvị asị ahụ aza ene ee sika, ne sú saka-saka, àyị vị ka ahụ ẹnịnị ọ̀ vana ta! 14Sị vụrị, di u we re ka wáa sị ẹngwọọrọ pe aza aa mẹ; dị ụ wa rẹ sị vụrị di u we re ka waa mẹ̀ ebira ọnịnị nịnị! Agụvị ka aza ẹnẹ ẹ̀yị vavọọ mẹ, eyi ve zuu re Ananyị yị. 15#Ọda 29.18Sị eyi pe ẹngụ awụ nịnị, agụvị asị a nyị ọza ana ahịka ọ rẹ̀ vaa dọ ayamva Ohomorihi! Asị a rẹ nyị ọza ana na yà anka ẹpa ọchị ọnyịrẹyị ana ha dị ọ̀ọ kụ́ ịrẹyịị hi ẹtẹ! Ẹngụ aza ẹnẹẹ vee du aza ọrụrụ-ọrụrụ ẹngụ. 16#Oyn 25.29-34Asị a rẹ nyị ọza ana na vị ọsẹrẹka ọnịrị ọza ẹnẹ ẹ̀ yị tẹsị ịrẹyị Ohomorihi anka Iisọ! Iisọ ọ́ọ hụ agụvị ịsọyịrị ụpẹ ọnya kẹnẹ ná ọzọkụ anị yị ọhụva anị. 17#Oyn 27.30-40Wáa yẹ nịnị ka ô vene sì pooro ka ada anị ọ̀ mẹ ka ò zé yị ọnị, ama ada anị ô yi. Iisọ ộ hyakụ yị sị ẹgọ sì oze ka oni ò tenyi ịsa ọnị ọnị vịdị mẹ, ama o yi kuku re oze. 18#Kụra 19.16-22; 20.18-21; Ọda 4.11,12; 5.22-27Ẹ yị vị ataba (Ịsịnayị) ọnị ọza zụ sị ụvọ kanyị, ụ jẹẹ pe nịnị (anka Anisirẹrị nịnị ịyẹẹyẹ). Ịzọọ, ịra aa za giri-giri, ô hozi ruma-ruma, ẹ yị nyị ẹtohweyi vụrụ-vụrụ, dị ahị aa tụ́ kukuku nị. 19Ọpanyị raa sụ́, di a rẹ nyị ọngwẹ ana aa kà ịrẹyị nị. Aza ẹnẹẹ mẹ̀ wụ́ ọngwẹ ọnọọ, ệ da ịpẹ ẹtẹẹtẹrẹ ka asị ọ kụkụ kà ịrẹyị yị ẹnị. 20#Kụra 19.12,13Ẹ́ẹ vavọọ dá ịpẹ, agụvị ka ẹ yị nyẹngụ dọ ọda ana a mẹ ka, uye ọ̀ọ hyakụ kanyị ataba ọnọọ kẹnẹ, à sị ịrẹta wụ ọọ. 21#Ọda 9.19Ịsa ene e re ô hí wa angwa ẹtẹẹtẹrẹ. Di Imosiisi hyakụ kà a ka vị ọnị aa dá ẹgahị, ángwa mèe hí ọnị nị. 22Ịzị ẹwụ nịnị vẹ aanị vị ịnị Ataba Ịzayọnị, ọnịrị ịnị ẹkụra Ohomorihi ana yára. Ịzọọ aā hị́ Ijerusarẹmị ini ihinẹba nị. Anggẹẹrị ọrụrụ-ọrụrụ ọnị ọza ọ̀yị yẹ ịrịka vị ene hi ịzọọ. 23Ịzị ụ vẹ nịnị aanị vị ịzị avaba anịragụ Ohomorihi kụ́ gụ. Ẹnị ẹ vị ezi ịpaapa Ohomorihi ọnị ọ raà chẹrẹ ịrẹha ẹnịnị tụ́ ẹbẹẹba nị. Wa raà saasa ọnịrẹyịzẹyịza nịnị oni Ohomorihi raà mẹ ka ẹ̀ gụ. 24#Oyn 4.10Wa zị vẹ ịdị Ijeesu nịnị, ana yà ịnị akakana aza ọnịrị Ohomorihi ini oze oto ọwọọwa, dị o re che anya anị sẹ́ ẹtẹ nị. Ịsa ana anya ọnọọ aa kà, o zoza huna ịsa ana anya Ẹba aa kà nị. 25#Kụra 20.22Agụvị avọọ, sị eyi pe ẹngụ awụ nịnị, asị u ne yi ọza ana aa kà ịrẹyịị wụ nịnị! Aza ẹnẹẹ ene yi dị ẹ̀yị wụ́ ọnọ ọza ana a kà ịrẹyị Ohomorihi yị wa ịnị ẹhẹ ọnọnị, ẹ yị há. Ẹyị èe re ve yi, dị yẹ̀ yị wụ́ ọnọ ana aa kà a hụrẹ ẹbẹẹba vẹ nị, wéé ro ka ya zụ há vụrụ-vụrụ? 26#Ihg 2.6Ịnị ụmẹ ọnọọ, ọngwẹ anị ô henyi ẹhẹ. Ama ọyaanị, ọ sị eku hị́ ka ẹ yị vị ẹhẹ kẹnẹ oni re venee henyi, ama oni re vee henyi ihinẹba bẹẹ. 27Ịjị ọ kà a ka, “re venee”, ọ́ọ sị zụ̀ ka e vee henyi ịsa ana a mẹ, dị a kụ́ wa kwooze. Dị a hị́ ka ịsa ọnị ọza ò yi zụ henyi, ọ kụkụ yà ịzọọ nị. 28Agụvị avọọ, à vẹ vị yaa kụ́ Ohomorihi avọ, agụvị ka ọ raà sị aha ịjọvaa yị, ana ahịka o yi zụ henyi. À vẹ ya zẹẹ ka Ohomorihi ọ̀ vayị ayị, dị ya zụ hẹkẹ ẹ ini oze ana ahịka óo zé e eyi; dị ya zụụ sị ụbanyịị yọ, dị ya rẹ zụ nyị angwahi anị! 29#Ọda 4.24Ohomorihi ayị vị ana sị mẹẹ anka ịra anaā rị avaba ịsa ịra avọọ.

Currently Selected:

Anihiburu 12: EBTP

Highlight

Copy

Compare