Ihabaku 2

Ẹnẹyịmavara ô tụ́ Ihabaku ohi

1Ihabaku ka ọnị ee nee kú, dị ọnị o zi ịsị ọnị Ẹnẹyịmavara vaa ka yị ọnị, Ịjọnọọ ọnị vaa yẹ a mẹ vọrọ ka ọnị o tu o ohi. 2Dị Ẹnẹyịmavara tụ ọ ohi, dị o ka ọ chẹrẹ ịsa ọnị ọnị ọ̀ọ ka yọ tịtẹ. Ọ chẹrẹ ẹ banyị tụ́ ịzị ọza vaa ya re e ọ̀ọ daka ee zwe echi para huu. 3#Ihib 10.37Dị ọ ka, ịrẹyị ọnị ọnị aa kà a aanị, ẹ yị vaa mẹ̀ obobooro ọnọọ. Vị ụmẹ ịsa ẹnẹẹ vaa tangwa-tangwa vẹ nị. Agụvị avọọ asị e ha eyi ka ẹ yị vee tụra ẹtẹ. Ee vee re e. 4#Iro 1.17; Iga 3.11; Ihib 10.38Ree, ọza ana aa sị ẹngụ tụ ẹba dị a mẹ̀ ebira odivi ọ yị vaa ha. Ama aza ana a sị ayị tụra Ohomorihi vaa ra agụvị ka ẹ yaa mẹ̀ ebira ọyịza. 5Ogu ẹhẹ ọnọnị vị eneē vene ọza. Ịsa ọ yị mā hụụ aza ana si ẹngụ tụ́ ẹba. Ọza anaā ha ọhọha sị mẹ anka uswọọza avọọ nị. Ẹtẹ anaā rị ọza ịnẹ ọ yị mā ha. Avọọ Anibabironi mẹ ha irenu aa za ẹkụra ana vọ mụnẹ nị. 6Aza ẹnẹ ẹ yaa mẹ ẹvaya yị vaa jị ahẹ mẹ wa isiya. Dị ẹ yaa kà a ka ọ yị vee zee yị aza anaa mẹ ọza rị, dị aa kụ́ ogu aza gụ́ tẹ̀ yị ẹngụ ẹnịnị. 7Angwa vee hi wa ịhị aza ẹnẹ rị ụta ẹ ngụ tu wa avaavoo. Dị ẹ ngụ tu wa, dị ẹ dọ wa avaba ịsa ẹnẹ ẹ nyị, di ivoovo za wa jẹẹ. 8Ẹnịnị vị anaā vịdị aa sị àko dọ aza ọnịrị anẹkụra ẹnya para hu, dị ẹ yaa wụ́ aza ha. Booro aanị aza ana ha hụụnị ụvọ ẹnịnị vaa vara eyii sị ụya rị wa agụvị aza ẹnẹ wụ̀ ọnịrị ezigi ẹnẹ ẹ kụ́ hi ẹtẹ. 9Ọ yị vee zee yị aza ana kụ́ ẹnya aza na mẹ ize yị ovwoovu ẹnịnị, dị ee ro ka ẹ yị nyị ịsị e họ̀ ẹnị use. 10Ụhị ẹ yaa mẹ nyị ovwoovu ẹnịnị nị. Ee vee vú ẹtẹ anka ẹ mệ mẹ̀ aza nị. 11Avaba ịrẹta ugene ẹnịnị vi ene vee nowu tụ́ ozirenuu hi wa, dị ọchị irehi ẹnịnị aa dọ wa ọngwẹ. 12Ọ yị vee zee yị wa agụvị ebira odivi ẹnịnị ọnịrị anya ọza beri ogu onogu ẹnị ẹ sị da ẹkụra ẹnịnị nị. 13Ama Ẹnẹyịmavara Ochẹtẹẹngụ kà ọnị vaa sị ịra rị avaba ịsa ana aza ọnịrị ẹkụra sị ẹhị ẹnịnị sì nị. 14#Ayị 11.9Aza ana yẹ Ẹnẹyịmavara dị ẹ sị ụbanyị yọ vaa rụrụ chi ẹhẹ ẹngụ anka enyi meē hi oku avọọ. 15Ọ yị vee zee yị ọza ana ka ọnọhụva anị eche agụvị ọnị o re ahwaahụ anị, dị ụhị ọọ nyị ọ. 16Booro aanị, Ẹnẹyịmavara vaa mẹ̀ ụhị nyị ọ, dị ọ rẹ rị ụya ọnị ọ sị̀ yị aza rị. Dị aza ẹnị ree re ahwaahụ anị, dị ụhị nyị ọ eyi ẹnịnị. 17Avaba ẹngụkata ọnị ọ kụ́ tu aza vee tu ọ. Ọnị ọ sẹ́ iruku Ịrẹbanọnị va ha nị, dị ọ wụ́ uye ịnị iruku ẹnẹẹ va ha. Uye vee chire e angwa. Ẹnịnị ẹ̀ yị vaa nyị ẹngwọọrọ agụvị ẹngụkata oni e ku tu aza, dị ẹ wụ́ aza va ha, dị ẹ rẹ dụ ẹkụra ha. 18Sị ọza aa sị ori mẹ? Ọza mẹ nyẹngụ sị ayị tụra ọnyọọnọkụmị ọnị ọ sị ụvọta anị mẹ̀. Evene kẹnẹ ọ vị nị. Ọ́ tịtẹ kẹnẹ nị, ẹ yị zụ ka ịrẹyị. Ẹnyị vị ọchị ana a bẹ, dị ẹnyị vị enyusẹ ene tu nị. 19Ọza ana kàa yị ọchị a vị ịrẹta ka ọ̀ kwẹẹtẹ, ọ̀ nyarị iruwa. Áá nyị ịsị ẹẹmẹ ẹnẹẹ zụ sị zụ ọza? A zụ wụ́ igooru ọnịrị isiriva ku ọ, ama ori ọnọọ ẹ yị nyị ụhwẹ. 20Ẹnẹyịmavara yaa ịnị irehi anị, ọzọza ọ mẹ̀ hẹẹ ọvịdị anị.

Currently Selected:

Ihabaku 2: EBTP

Highlight

Copy

Compare