ÁLUKA 27
27
Ayínɔ̄nyā kú Usɛ́lōfɛhadi
1Umálah, Unówa, Uhɔ́gila, Umílka, mɛ́mla Utɛ́sah wɛ ayínɔ̄nyā kú Usɛ́lōfɛhadi, ɔyí kú Uhɛ́fa kú Ugílɛ̄di, ɔyí kú Umácīru, ɔyí kú Umanásɛ, ɔyí kú Ujósɛ̄fu ā. 2É gaá háyi ɛgiyí Umósīsi mɛ́mla Ɛlísa, ɔ̄cogwɛ́ɛya ā, mɛ́mla anyākwɔ́cɛ mɛ́mla ójila kú Ísrɛ̄lu ā okómpinu kú Áklɔ̄kpīihɔ ā, anɔ́ɔ é kahíníī, 3“Ádā alɔ gekwú ipú ígbíli, ó ma ɔyínɔ̄nyīlɔ dúúmā ŋ́, ó wɛ ígwu kú Ukɔ́ra nōo yíīkpɛ̄yí olɔfú tá Óndú ā ŋ́, ó kwú ohígbū íne nɛ̄ ó bīya abɔ̄yī nū. 4Ɔdíyá nɛ̄ iyē kú ádā alɔ cíkā ō bí ŋmá ipú ācɛ kú Ísrɛ̄lu ā? Ohígbū ka abɔ̄ ó ma ɔyínɔ̄nyīlɔ dúúmā ŋ́ mā nɛɛ. Aá lɛ ajɛ je lɛ alɔ pi aɔ́máapú kú ádā alɔ.”
5Umósīsi kwú ɛlā kú uwā ú gé lɛ Óndú ā. 6Anɔ́ɔ Óndú ā da ɔ́ kahíníī, 7#Áluk 36.2“Ɛlā nɛ̄ ayínɔ̄nya kú Usɛ́lōfɛhadi ka ā le kpaakpa. Aá lɛ ajɛ je lɛ uwá pī aɔ́máapú kú ádā uwā, kú úgwū kú ádā uwā kóō wɛ ákú uwā. 8Lɛ ka lɛ ācɛ kú Ísrɛ̄lu ka, eko dúúmā nɛ̄ ɔ̄cɛ gekwú nɛ̄ ó ma ɔyínɔ̄nyilɔ ŋ́, ayínɔ̄nyā kú nū géē lé úgwū kú nū piíí á. 9Ɔ́dāŋ ka ó lɛ ayínɔ̄nyā ŋ́, ayínɛ̄ nū nɔ̄nyīlɔ ā géē lé úgwū kú nū. 10Ɔ́dāŋ kōó lɛ ayínɛ́ nɔ̄nyilɔ dúúmā ŋ́, ɔmáapú nū nōo kwu ɔ́ ajaajɛ fíyɛ́ ā, géē lé úgwū kú nū. 11Ācɛ kú Ísrɛ̄lu géē lɛ íne nyā tū piyóó ipú ɛcɛ nyā. Ami nōo wɛ Óndú ā kɛlā nyā á.”
É le Ujóssuwa fu kwɛyí Umósīsi
12 #
Obla 3.23-27; 32.48-52 Óndú ā da Umósīsi ka, “Nyɔ̄ gicɔ̄ ɛfu kú Abarím kú ā gaá lɛ ajɛ nɛ̄ n géē je lɛ ācɛ kú Ísrɛ̄lu ā má 13Eko nāa lɛ ɔ́ má kwɛyí, a géē kwú bɛ̄ɛka Árɔ̄ni, ɔyínɛ́ uwɔ ā. 14Ohígbū ka aá ɛpɛlɛ́ɛpa í lɛyí táajɛ lɛ íne kú um ipú ígbíli kú Usíni ā ŋ́. Eko nɛ̄ ācɛ kú Ísrɛ̄lu ka iŋini tú um ohígbū éŋkpɔ̄ kú Umɛ́rība ā. Aá tá ō ma ɔfú otīihɔ kú um ā fú ipéyī ācɛ ā.”
15Anɔ́ɔ Umósīsi gbɔ̄ɔkɔ lɛ Óndú ā kahíníī, 16“Óndú, Ɔwɔicō ohútu mɛ́mla okwutɛ kú oyēeyī, n gē gbɔ̄ɔkɔ gā uwɔ, lɛ ɔ̄cɛ éyi fu, nōo géē wɛ otrɛ̄yí kú uwā, 17#1 Aɔ́cɛ́ 22.17; Isík 34.5; Umát 9.36; Umák 6.34nōo géē kpó uwā trɛ̄yí eko nēé í kpɛ́fú, cɛ́ɛ́ kú ójila kú ācɛ kú uwɔ ā kéē híī lɛbɛ̄ɛka aálá nēé lɛ ɔ̄cɛ nōo gē gbo uwā ŋ́ mā ŋ́.”
18 #
Oyɛb 24.13
Óndú ā da Umósīsi kahíníī, “Kwú Ujóssuwa, ɔyí kú Unɔ́n ú, ɔ̄cɛ nōo lɔfú kwɛyí uwɔ glá, cɛ́ɛ́ kú ā lɛ abɔ̄ kú uwɔ kpó ce ɔ́ ɛyí 19Kwú ɔ̄ ú háyi iyɔ̄bū kú Ɛlísa, ɔ̄cogwɛ́ɛya ā mɛ́mla odúúdu ójila kú ācɛ Ísrɛ̄lu. Káā lɛ ka lɛ uwá abɔ́ɔ ka anú ɔ́ɔ kwɛyí anúɔ mɛ́ɛ̄ á. 20Lɛ íkwu mɛ́mla ɔfú kú uwɔ ōhī kpó lɛ ɔ́, cɛ́ɛ́ kú ójila kú Ísrɛ̄lu ā géē lɛyítáajɛ lɛ ɔ́. 21#Oyɛb 28.30; 1 Usám 14.41; 28.6Ó géē gboló ce Ɛlísa, ɔ̄cogwɛ́ɛya ā, nōo géē yɔ̄ ī jé ɔtū kú um oŋmá lɛ o tá ūlī kú Úrim mɛ́mla Utúmim#27.21 úrim mɛ́mla utúmim. Aɔ́dā ɛpa nɛ̄ ɔ̄cogwɛ́ɛya gē bī lɛ jé ɔtū kú Ɔwɔicō lɛyíkwu ɔdā dóódu ā. Ɔ̄cɛ dúú í jé ɛ́gɛ́nɛ̄ é gē bī ūwā yúklɔ́ lɛ ā ŋ́ Ɔwɛ nyā, cɛ́ɛ́ Ɛlísa géē bī Ujóssuwa mɛ́mla odúúdú ójila kú ācɛ Ísrɛ̄lu jé ɔdā dóódu nēé gáā yá ā. 22Umósīsi le yá ɛ́gɛ́nɛ̄ Óndú ā da ɔ́ ā. Ó cɛ̄ lɛ Ujóssuwa wā í háyi iyɔ̄bū kú Ɛlísa, ɔ̄cogwɛ́ɛya ā mɛ́mla odúúdu ójila kú ācɛ Ísrɛ̄lu. 23#Obla 31.23Ɛ́gɛ́nɛ̄ Óndú ā ka lɛ ā, Umósīsi lɛ abɔ̄ kpó ce ɔ́ ɛyí, le ka lɛ odúúdu ācɛ ā ka Ujóssuwa ɔ́ɔ kwɛyí anúɔ mɛ́ɛ̄ á.”
Currently Selected:
ÁLUKA 27: IFBCL
Highlight
Copy
Compare
Share
Want to have your highlights saved across all your devices? Sign up or sign in
The Bible Society of Nigeria
Learn More About Ubáyíbu kú Idɔma