ÁLUKA 23
23
1Anɔ́ɔ Ubálam da Ubálāki kahíníī, “Lɛ ede ahāapa gwó amānyā gā um, káā lɛ ɔbá ɛna ahāapa mɛ́mla omlede ahāapa kpó wā. 2Ubálāki le yá ɛ́gɛ́nɛ̄ Ubálam ka lɛ ā. Ubálam kwú ɛna éyi, mɛ́mla omlede éyi ú gwɛ́ɛya ɛyí ede ā éyééye. 3Ubálam da Ubálāki ka, háyi amānyā pīyɛ̄ ɛya o yɔlá dúúdú kú uwɔ ā, ká n̄ nyɔ̄ gɔbū, ká n̄ má ɔ̄, ɔ́dāŋ ka Óndú ā géē wā ɛgiyí um, ámāŋ ka ó gáā wā ŋ́. Ɔdā dóódu nɛ̄ ó í mafú gā um ā, nɛ̄ n géē ka gā uwɔ á.” Anɔ́ɔ ó le yɛ tá icō généé kú ɛfu ā. 4Anɔ́ɔ Óndú ā gā ɛgiyí nū á, anɔ́ɔ Ubálam da ɔ́ kahíníī, “N le ede ahāapa gwó klla le ɔbá ɛna mɛ́mla omlede éyééye gwɛ́ɛya ɛyí uwā ɛɛ́.” 5Anɔ́ɔ Óndú ā le ɛlā nɛ̄ ó í ka lɛ Ubálāki ā da ɔ́ á, anɔ́ɔ ó da ɔ́ kahíníī, “Kwúcē ga ɛgiyí Ubálāki kú ā lɛ ɛlā nyā da ɔ́.” 6Eko nɛ̄ ó pīyɛyí wā ɛgiyí Ubálāki ā, ó má ka ó háyi ɛgiyí ɛya o yɔlá dúúdú kú nū ā kpɔ́, mla odúúdu anyākwɔ́cɛ kú Umówābu ā. 7Anɔ́ɔ Ubálam kɛlā kahíníī,
“Ubálāki, ɔ̄cɛ kú Umówābu bī um wā ŋmá Usiríya, ŋmá ɛyí ɛfu kú ɛnɔ̄ɔ̄cī. Ó kahíníī,
“Wā ká ā kɛlā kwɛyí um.
Lɛ okónu tá lɛ ācɛ kú Ísrɛ̄lu.
8Abɔ̄ ó yá ɛ́ɛ́ nɛ̄ n géē tokónu lɛ ācɛ nɛ̄ Ɔwɔicō í tókónu lɛ uwá ŋ́ māa?
Ámāŋ ka obɔ̄bí kú uwā, eko nɛ̄ Óndú ā í ka lɛ ā ŋ́ māa?
9Oŋmá ɛyí aɛ́fu nɛ̄hi ā, n gē má uwā, n yɔ̄ ī má uwā ŋmá ɛyí aɛ́fu nɛ̄ŋcɛ́ ā,
É wɛ ewo nōo lā ōfōōfū uwā.
É jé ka Óndú ā ɔ́ɔ hɔ́hā ce aá fíyɛ́ aéwo ɔhá.
10Ipɔ́ɔma kú Ísrɛ̄lu ā lɛbɛ̄ɛka úmúlá ā, é le lɛwa fíyɛ́ um abɔ̄ ō gbaáluka. Ká ɛ̄cī oyēeyī kú um kóō lɛ ŋmɛ́yí bɛ̄ɛka ákú ācɛ okpaakpa kú ɔlɛ́ Ɔwɔicō ā. Ká n̄ gekwú ɛbɔ́ bɛ̄ɛka ācɛ nēe lé ɛpɔ̄hi ā.”
11Anɔ́ɔ Ubálāk da Ubálam kahíníī, “Ɔdí nāa gē yá um yɔ̄ āa? N bī uwɔ wā ká ā gaá tókónu lɛ aólɛlā kú um, amáŋ ɔdā nāa gē yá a lɛbɛ̄ɛka ɔhā nāa ī hɛ́ ce uwá ā.” 12Anɔ́ɔ Ubálam tá ɔ̄ ohi kahíníī, “Ɔdā nɛ̄ Óndú ā da um ka ami ɔ́ ka ā, nɛ̄ n géē ka ōfōōfū nū á.”
Ɛlā kú ɛbɛ ɔ́mpa nɛ̄ Ubálam má ā
13Anɔ́ɔ Ubálāki da Ubálam kahíníī, “Wā mla um ká ālɔ̄ ga ɛga ɔhá, ɛga nāa géē má ācɛ ōhī kú Ísrɛ̄lu ā. Lɛ okónu tá lɛ uwá ŋmá abɔ́ɔ gā um.” 14Ó kwú ɔ̄ ú ga ipácí kú Usɔ́fim, ɛyi ɛfu kú Upísga. Abɔ́ɔ ā, ó le ede ahāapa ɔhá gwó dúú, klla le ɔbá ɛna éyi mɛ́mla omlede éyi gwɛ́ɛya ɛyí éyééye kú ede ahāapa ā.
15Ubálam da Ubálāki kahíníī, “Háyi pīyɛ̄ ɛya o yɔlá dúúdú kú uwɔ ā amānyā, ká n̄ nyɔ̄ gaá lɛ Ɔwɔicō kú um má.” 16Óndú ā gā ɛgiyí Ubálam, le ɔdā nɛ̄ ó géē ka lɛ ɔ́ ā ka lɛ ɔ́, anɔ́ɔ ó le ɔ́ cīgbīhi ga ɛgiyí Ubálāki á. 17Eko nɛ̄ Ubálam pīyɛyí ā, ó má Ubálāki háyi pīyɛ̄ ɛya o yɔlá dúúdú kú nū ā mɛ́mla anyākwɔ́cɛ kú Umówābu. Ubálāki da ɔ́ ɔ̄kā ɔdā nɛ̄ Óndú ā ka lɛ ɔ́ ā. 18Anɔ́ɔ Ubálam kahíníī, “Wā, Ubálāki, ɔyí kú Usípɔ, ká ā jāhɔ̄ lɛ ɛlā nɛ̄ n lɛ ō ka ā.
19Ɔwɔicō í lɛbɛ̄ɛka ācɛ, ɛ́ɛ́ nɛ̄ ó gē kɛ̄mgbɛ̄ ŋ́,
Ó wɛ ɔlɛɛcɛ nōo gē pīya odo kú nū abɔ̄ ā ŋ́,
Ɔdā dúúmā nɛ̄ ó le okónu ce ka anúɔ géē yá, ó géē yá ɔ̄,
Ó le ɛlā ka, ó kē ī yá ɔ̄ ɛ́gɔ́ɔmā.
20Óndú ā da um ka ami ɔ̄ hɔ́ha cɛ uwá,
Ɔ́dāŋ ka Óndú ā le ɔhá hɛ́ ce ācɛ,
Ń je ɔhā ā cīgbīhi glá ŋ́.
21N má ka ɛ̄cɔ̄bū kú ācɛ kú Ísrɛ̄lu,
ayí kú Ujékɔ̄pu ka ɔdōbɔ̄bí mɛ́mla ákanya í gáā yɔ̄ lɛ uwá ŋ́.
Óndú, Ɔwɔicō kú uwā yɔ̄ mla uwá,
É ka anú ɔ́ wɛ Ɔcɛ́ kú aá á.
22Óndú ā bī uwā bɛ̄cɛ ŋmá Íjīpiti á.
Ó géē nuunu lɛ uwā bɛ̄ɛka ɔbá ɛna ojɛɛ́lɛ́ ā.
23Ɔ̄cɛ í yá imabɔ̄ ámāŋ ka, ɛcí, ámāŋ ka ɔhɛ dúúmā klá ācɛ Ísrɛ̄lu glá ŋ́.
Abālɔbányā ācɛ í kɛlā lɛyíkwu ācɛ Ísrɛ̄lu kahíníī,
“Aá má ɔdā nɛ̄ Óndú ā yá ā.”
24Éwo kú Ísrɛ̄lu, ayí kú Ujékɔ̄pu lɛbɛ̄ɛka ágábá olɔfú nɛ̄hi ā,
Ó gáā mlɛ́nyɔ́ ŋ́ jāā gbéeko nɛ̄ ó le ɛbɛ́ ŋmó klla lɛ ɔ́ híla lé,
Klla lɛ oyī kú ɔdā nɛ̄ ó ŋmó ā pi gwá.”
25Anɔ́ɔ Ubálāki da Ubálam kahíníī, “A tá ka anúɔ í tókónu lɛ ācɛ Ísrɛ̄lu, ayí kú Ujékɔ̄pu ā ŋ́ mɛɛ́, ámāŋ ā híī hɛ́ ɔhā ce uwá ŋ́.” 26Ubálam tá ɔ̄ ohi kahíníī, “Ń tɛtɛ da uwɔ ka, ɔdā nɛ̄ Óndú ā da um ā nɛ̄ n géē ka ā ŋ́ nɛɛ?”
Ɛlā kú ɛbɛ ɔ́mɛɛtá nɛ̄ Ubálam má
27Ubálāki da Ubálam kahíníī, “Wā mla um, ká n̄ lɛ uwɔ bī ga ɛga ɔhá, eko ōhī ó géē he Óndú ā ɔtū ká ā lɛ okónu tá lɛ ācɛ kú Ísrɛ̄lu gā um ŋmá abɔ́ɔ.” 28Anɔ́ɔ ó kwú Ubálam ú ga ɛyí ɛfu kú Upéyɔ nōo lɛ eyī pīya kwu ígbíli ā. 29Ubálam da ɔ́ kahíníī, “Lɛ ede ahāapa gwó gā um amānyā, kú n̄ lɛ ɔbá ɛna mɛ́mla omlede ahāapa kpó wā. 30Ubálāki le yá ɛ́gɛ́nɛ̄ Ubálam ka lɛ ā, anɔ́ɔ ó kwú uwā ú kpó gwɛ́ɛya, éyééye ɛyí ede abɔ́ɔ á.”
Currently Selected:
ÁLUKA 23: IFBCL
Highlight
Copy
Compare
Share
Want to have your highlights saved across all your devices? Sign up or sign in
The Bible Society of Nigeria
Learn More About Ubáyíbu kú Idɔma