Səɓəlari 25

Sur Hamta Kamnyar La Tentər MTHLAKU

(Səɓ 35:4-9)

1Antə MTHLAKU pəla aka Musa abbər, 2“Pəla aka mjir Israila ka da sənta ali sur hamta. Ga ata dlu ali sur hamta ni akəla kəlara mdə natə ɗəffari ku hir hamtari. 3Ngəni an jili sur hamta tə ga ata dluwari akəla ɗa. Ga ata dlu dinar, ka adzərfa, ka əmza, 4ka puwar nduɓwa na kalar lipəla, ka na yar ndləngi həng'ha, ka na mamza, ka lilin na ɓɗaku, ka shishir kwi, 5ka kəsəm gamayeri tə mdə putə mamza, ka kəsəmayeri na ɓɗakɓɗaku, ka udzəm akashiya, 6ka mal zaitun kamnyar pitəla, ka sur shiwura kamnyar malər hamta mda aka Hyel, ka kamnyar tulari ɗuza ar mba na msəra, 7ka pela oniks, ka pelayeri damwa ar dəɓa tə mda ana puta ata efod ka zhaɓər dlipwayeri ar kərathlu. 8Antə ka gə vu mjir Israila ka da namta ali vəi ndzəndzi na ɓɗakkarkara kamnyar kəi ndzəndzi akwa nca ɗa. 9Ka gə pəla ala ɗa ka da namta ali vəi ni ka shanga kariyir kutambwa ni ndzi kalkal apatə I ata ncanta ala ga.”

Lakur Namtə Akwati Alkawal

10“Ka giri namtə Akwati Alkawal ni ka udzəm akashiya. Ka saɓəlkurari ndzi dzartsi suɗa ka reta, ka baukurari ndzi dzartsi pal ka reta, ka nalkurari ndzi dzartsi pal ka reta. 11Ka gə fəi dzari ka na avivi ka na aɓəlaɓəla ka dinar swakti, ka gə dəɓatə mnyari shang ka dinar. 12Ka gə namtə lenduwayeri nfwar aka akwati ni, ka gə dləɓdzə kəlara lenduwa pal aka səla akwati na pal pal nfwar ni, lenduwa suɗsuɗa ata kəlara thlimbəla akwati ni. 13Tsuwa ka giri namtə zwalayeri suɗa ka udzəm akashiya, ka hartə dza ɗa ka dinar. 14Ka giri hau kəlara zwal ni akwa kur lenduwayeri na ata thlimbəla akwati ni kamnyar kəl akwati ni. 15Ka giri zhar zwalayeri ni tsu akwa lenduwa ni, mda aɗi ata fwaɓəla wa. 16Ma sakatə mdə ku kuri nam akwati ni, ka gə pu allowayeri ar seɗar alkawal natə I ata na gə ni akwa.”

17“Ka gə namtə sur hartə mnya akwati ni ka dinar shini, ka saɓəlkurari ndzi dzartsi suɗa ka reta, ka baukurari ndzi dzartsi pal ka reta. 18Ka gə namtə kerubayeri laga suɗa ar dinar tə mdə dəkha, ka gə puta ata tenga sur har mnyari ni. 19Ga ata ɓdlədzə kerub pal ata tenga sur hartə mnya akwati ni na abwani, ka ɓdlədzə kerub na dukwari ata tengari na abwanda, ka da ndzi su duku ka sur hartə mnyari ni. 20Antə ka kerubayeri ndzi ka bwakəma ɗa akwa wuldzi, ka da kəlar ɓəɓəka ɗa amta ka hamta shanggur aka sur hartə mnyari ni. 21Akwa akwati ni antə ga ata pu allowayeri ar seɗar alkawal tə I ata na ala gə ni, ka gə hartə ka sur hartə mnyari. 22Azi antə I ata si ka mwa kəɓa. Tsuwa ata kəra sur hartə kəra Akwati Alkawal ni, akwa daɓwa kerubayeri na suɗə ni, antə I ata gari ka ga, kəi hamta ala gə shanga tsawayeri kamnyar mjir Israila.”

Tebər Ar Vəta Buradi Aka MTHLAKU

(Səɓ 37:10-16)

23“Ka gə namtə tebər ka udzəm akashiya, ka saɓəlkurari ndzi dzartsi suɗa, ka baukurari ndzi dzartsi pal, ka nalkurari dzartsi pal ka reta. 24Ka gə fəi dzari ka dinar shini, ka kəli tengari shang ka dinar. 25Ka gə namtə udzəm na ata kalaktə tenga tebər ni, ka baukurari ndzi mandaɓar tsi pal, tsuwa ka gə citə tengari ni ka dinar. 26Ka gə namtə lenduwayeri nfwar ar dinar kamnyar tebər ni, ka gə dləɓtə kəlara pal ata səla tebər ni, akwa kuɗəmayeri na nfwar ni. 27Tsuwa ka lenduwayeri na kəsi zwalər kəl tebər ni ndzi kudzəhə ka dza tebər ni. 28Ka gə namtə zwalayeri ni ka udzəm akashiya ka hartə dza ɗa ka dinar, ka zwalayeri ngəni antə mda ata kəl tebər ni. 29Ka gə namtə parantiyayeri kəga tasayeri ar mba sur shiwura, kəga samtalayeri, kəga tasayeri ar hamta saɗakar sur sa. Ka gə namtə ɗa shang ka dinar shini. 30Tsuwa ka gə putə buradi tə mdə hamta ali ni ata kəra tebər ni akəmi tədəku.”

Zwalər Putə Pitəla

(Səɓ 37:17-24)

31“Ka gə namtə zwalər kəsi pitəlayeri ni ka dinar shini. Ka gə namtə zwal ni, ka kira zwal ni, ka kapayeri ar pu mal tə mdə namtə ɗa akwa dludzər pukdlər nfur almon, ka gə jatə ɗa shang ata kəma duku. 32Ka mdə namtə zwal ni ka tsa ndzi ka tsiyari pal pal ngkwa, makər ata thlimbəlari na abwani, ka tsuwa makər abwanda. 33Ka mdə dəɓatə kəlara tsiyayerari na ngkwa ni ka kwapə makər makər na dludzi ka pukdlər nfur almon. Antə tsiyayerari na ngkwa ni ata ndzi su duku ka zwal ni apa da thləla ata tsa. 34Tsuwa ka mdə putə kapayeri nfwar na dludzi ka pukdlər nfur almon ata zwalər kəsi pitəlayeri ni. 35Mda ata namtə pukdla pal akwa kəlara vəi tə tsiya zwal ni ku thləla ata, watau akwa kəlara vəi tə tsiyayerari na pal pal ngkwa ni səɓəla ata zwalər kəsi pitəlayeri ni. 36Antə pukdlə ni, ka tsiyari na ngkwa ni, ka zwalər kəsi pitəlayeri ni, ka mdə ɓdlətə ɗa ka dinar shini, ka da ndzi su duku. 37Ka gə namtə pitəlayeri murfa kamnyar zwalər kəsi pitəlayeri ni, ka gə putə ɗa kamnyar ka da hamta parakəu təbwakəma. 38Ka gə namtə məksayeri ka parantiyayeri ar dinar shini. 39Ga ata namtə zwalər kəsi pitəlayeri ni ka shanga suayeri na ata dzari ni ka dinar ar talent pal. 40Antə ka gə wuta abbər ga ku namtə shanga su akwa dludzər su tə mdə ncanta ala ga ata kəra gar nda.”

Currently Selected:

Səɓəlari 25: KNB

Highlight

Copy

Compare