Səɓəlari 24

Mjir Israila Ku Ndəli Ndər Ka MTHLAKU

1Antə MTHLAKU pəla aka Musa, “Ndləɓəla gar ni ka gə sə wutə ra, ga ka Haruna, ka Nadab, ka Abihu, ka mji ol'olər Israila murfəkumari. Ka giri zuzuri ka vəngkər səli ali təng tə giri tsu cijuwa ka iya. 2Tar Musa shini an ata si kudzəhə ka I na MTHLAKU. Mambila mji aɗiya si kudzəhə wa. Mji ni aɗiya suni pəla da ata ndlə gar ni wa.”

3Antə Musa ku səghəi ka jikaɓəla shanga ndərayeri ka tsawayeri tə MTHLAKU pəla ni aka mji. Antə shanga mji shinau ka pəla ka mnya duku abbər, “Shanga su tə MTHLAKU pəla, yeru ata harari.” 4Antə Musa ku rəbutə shanga ndərayeri tə MTHLAKU pəla ni. Səɓəla ɗəpari antə Musa thlatə ɗəɗəpə mbing, ka həntə bagaɗi ata kusar gar ni. Antə tsa nci pelayeri kumnya suɗa, kalkal ka nyarmbwar mjir Israila na kumnya suɗə ni. 5Antə tsa ku thlentə maɗadakwiyir Israila ka da hamta gyalayeri kamnyar saɗaka mbamba ka saɗakar jakə mwardzi aka MTHLAKU. 6Antə Musa kətə retar mamshi ni ka puwa akwa tasayeri, ka kətə reta na mbil ni ka pshingkər ata kəra bagaɗi saɗaka ni. 7Aghəla nda antə tsa kətə kakaɗər Alkawal tə mdə rəbutə tsawur MTHLAKU akwa ni, ka karatəmta ka kuraku aka mji. Antə da shinau ka pəla, “Yeru ata kələngkər aka MTHLAKU, ka hara shanga su tə tsa ku pəla.”

8Antə Musa ku kətə mamshi na akwa tasa nda ka pshingkər aka mji, ka pəla, “Ka mamshi ngəni antə MTHLAKU ku mbwi alkawal arni ka giri, tsu apa suayeri tə MTHLAKU ku pəla.” 9Antə Musa, ka Haruna, ka Nadab, ka Abihu, ka mji ol'olər Israila na murfəkumari ku ndləɓəla gar ni. 10Anda antə da ku wutə Hyelər Israila. Tsuwa laku laga aɗi akira səlari tə mdə thlirtə ka pela dəɓa sapfiya, na akwa mbəlmbəla apa kutəram ata pci. 11Amma Hyel aɗi hara su na tsəkwar lapiyakur mji ol'olər Israila ni wa. Apani da ku wutə Hyel, ku səma ka sa akəmari.

Musa Ata Kəra Gar Sinai

12Antə MTHLAKU pəla aka Musa, “Ndləɓəla gar ni ka gə si wutə ra, ka gə səktə ra. Antə I ata hamta ala ga allowayeri ar pela natə I ku rubwamta shanga tsawayeri arna ata kamnyar ka mdə sə thlipa aka mji.” 13Antə Musa ka Joshuwa na mdər dlarərni ni ku ɗəmhədzi, antə Musa ku ndləɓəla gar Hyel ni. 14Antə Musa pəla aka mji ol'ol ni abbər, “Səktə giri yeru azi tar ma yeru ku ngka ka si wutə giri. Kəlara mdə natə sur damitədzi ku wutə ni akwa sakatə yeru aɗi azi wa, tsa ata mzhi wutə Haruna ka Hur, kamnyar arɗa da ata ndzi adzə giri.”

15Sakatə Musa ku ndləɓəla gar ni, antə dlamba ku hartə kəra gar ni. 16Antə parakər kəma MTHLAKU na akwa mbəlmbəla ku səghəi ata kəra Gar Sinai. Antə dlamba ni ku hartə gar ni har mnyar vir ngkwa. Akwa vir na murfəkur ni antə MTHLAKU ku kəga Musa akwa kuta dlamba ni. 17Antə parakər kəma MTHLAKU na akwa mbəlmbəl ni ku ncantədzi ata kəra gar ni. Antə mjir Israila ku wutə ni apa u'u laga na akwa mba ata kəra gar ni. 18Antə Musa ku ləkwa dlamba ni sakatə tsa akwa ndləɓəla ata kəra gar ni. Antə Musa ku ndzəndzi ata kəra gar ni mnyar pci nfwarkumari ka viri nfwarkumari.

Currently Selected:

Səɓəlari 24: KNB

Highlight

Copy

Compare