Səɓəlari 21

Laku Tə Ka Mdə Wul Mafayeri

(Z. Sha 15:12-18)

1“Ngəni an tsawayeri tə ga ata na aka mjir Israila. 2Ma ga ku mastə mafa na mdər Ibrani tsa ata hara mafakur ala ga ar məva ngkwa. Amma akwa məva na murfəkur ka gə psi ni ka tsa təra, kula tsa ntə su. 3Ma tsa si kula mwala, tsa ata təra kula mwala. Amma ma tsa si ka mwala, tsa ata təra ka mwalarni. 4Ma mthlakərni an kəl alari mwala ni, antə mwala ni ku yaɓəla alari maɗashili wala maɗankwi, to tsa ata təra shini. Kamnyar mwala ni ka maɗankyar ni ata ndzi ar mthlakərni. 5Amma ma mafa ni ləɓəla ata bəbal ka pəla, ‘I hir mthlakərna, ka mwalankiya, ka maɗa'na, antə I aɗi ata bara ka mdə psi ra wa,’ 6antə mthlakərni ata mwantə ni akəma Hyel. Aghəla nda tsa ata mwantə ni anyarmbwa, wala adzə udzəm nyarmbwa. Anda antə mthlakərni ata ɗiɗimta thləmari ka afər ɗiɗi kucir, aghəla nda antə mafa ni ata hara mafakur aka mdərkəyirni har kurər mpikari.”

7“Tsuwa ma mdə ku ɗələmta ngkwar ni tə tsa ndzi mafa, mdə na masə ni aɗi ata psi ni akwa tsikəra məva ngkwa apatə mda ana msərantə mafa na mdə sal wa. 8Ma tsa aɗi kəskəra mthlakərni na mastə ni abbər ka tsa ndzi mwalankiɗa ni wa, antə mthlakərni ni ata zhar ka mdə pəli. Amma mthlakərni amzhi ɗələmta ni aka mji na mətəpi wa, təng tə tsa aɗi hara su na kalkal aka mwala ni wa. 9Ma tsa mastə ɓzərngkwa ni abbər ka ngkwa ni ndzi mwalar ɓzərni, antə tar ka tsa namtə ngkwa ni apa tsa ngkwar kutari. 10Ma tsa an kəl ni ngkwa abbər ka ngkwa ni ndzi mwalankiɗa, ka kələngkər alari mwala damwa, to tsa aɗiya kəmta hangkur susəm wala zhaɓi tə tsa ana nar aka mwala na ntangkəma ni wa, wala zhar ta pi ka tsa wa apa na hwatu wa. 11Ma tsa aɗi hir hara suayeri ngəni makər ni wa, mwala ni ata mzhi təra kula ntə su.”

Tsawayeri Na Ata Kəra Dəkəi Mda

12“Kəlara mdə na ku dəkə nvwa ni har tə tsa mta, tsa ma mda ata tsi ni. 13Amma ma aɗi dzakdzakku tə tsa tsi ni wa, amma Hyel an ɗəmhə ka tsa hara apani, to tsa ata mzhi hwi ra ɗuwardzi akwa vəi laga tə I ata ɗəmha alari. 14Amma ma mdə ni an ɗəmhə ka tsa tsi nvwa ni dzakdzakku, to wala ma tsa an hwi ra ɗuwardzi adzə bagaɗiyirna, ka gə kəɓəla ni ka mdə tsi ni.”

15“Kəlara mdə na tsa baba'ni wala mama'ni, tsa ma mda ata tsi ni.”

16“Kəlara mdə na ku həltə mda, wala kamnyar ɗələmta ni, wala ka tsa kəsi ni akəlari apa mafa, mda ata tsi ni.”

17“Kəlara mdə na ku nggəl baba'ni wala mama'ni, mda ata tsi ni.”

18“Ma mji suɗa akwa beɗi, antə mdə na dukwari ku tsa nvwa ni ka pela wala ka matəkum, amma mdə ni aɗi mtə wa, təng tsa ku pəpəi ka nggawakur, 19ma mdə na dəkəidzi ni ku mzhi thlatə ka mwa ka zwal, mdə na tsa ni ni ata msəra, amma tsa ata ntə su kamnyar sakatə mdə ni shamta akwa nggawakur ni, ka tsuwa kamnyar wul lapiyakurər mdə na dəkəidzi ni har ka tsa hara lapiya.”

20“Ma mthlakər mafa ku tsa mafarni na mdə sal wala mdə mwala ka zwal har tə mafa ni ku mti, mda ata ɗi mthlakər mafa ni. 21Amma ma mafa ni ku mbəi akwa kutar vir pal wala vir suɗa, mda aɗi ata ɗi ni wa, kamnyar mafa ni ar kərari.”

22“Ma mji laga akwa mpa, antə da ku dəkəi mwala ka hur, tə har hur ni ku təri, amma vəi damwa aɗi dəkəidzi adzə mwala ni wa, mda ata ɗi mdə na dəkəi ni ni ka tsa ntəmta su tə salər mwala ni ata thlamta ata kər, ma su ni ku ndzi kalkal apatə alkaliyayeri ɗəmha. 23Amma ma mwala ni ka kərni ku dəkəidzi, mda ata hara alari shariyar mpika ata vəya mpika. 24Nca ata vəya nca, thlir ata vəya thlir, tsi ata vəya tsi, səl ata vəya səl, 25mbar u'u ata vəya mbar u'u, mbəlku ata vəya mbəlku, purpu ata vəya purpu.”

26“Ma mdə laga ku tsa mafarni na mdə sal wala mdə mwala akwa ncari, antə ncari ni ku ɓzi, antə tsa ata psi mafa ni ka tsa təra ata vəya ncari na ɓzi ni. 27Ma tsa ku tsa mafa ni har ka ɓəlɓəla thlira mafa ni, antə tsa ata psi mafa ni ka tsa təra ata vəya thlirari ni.”

Tsawayeri Na Ata Kəra Mwaɓiyayeri

28“Ma gyal thla ku dlər mdə sal wala mdə mwala ka tsi ni, mda ata ndzəndzəhtə gyal ni ka pela har ka tsa mta, tsuwa mda aɗiya ɓɗə kumari wa. Amma mda aɗi ata ɗi mthlakər gyal ni wa. 29Amma ma gyal ni ku tsəli ka dlər mji, tsuwa mdə ku kəɗar tsaktə mthlakərni, amma mdə ni aɗi mbwi ni wa. Ma thla ni ku tsi mdə sal wala mdə mwala, mda ata ndzəndzəhtə gyal ni ka pela, ka mdə tsi mthlakər thla ni. 30Amma ma mdə ku hir ka mthlakər gyal ni ntə su ata vəya mpikari, to, tsa ata ntəmta hangkur su tə mdə ku thlamta alari. 31Tsuwa tsu apani antə mda ata harari ma gyal ni ku tsi ɓzər sal wala ɓzərngkwa. 32Amma ma gyal ni ku dlər mafa na mdə sal wala na mdə mwala har ka tsi ni, antə mthlakər gyal ni ata ntəmta mthlakər mafa sal wala mafa mwala ni ka liyar adzərfa makkumari, tsuwa mda ata ndzəndzəhtə gyal ni ka pela har ka tsa mta.”

33“Ma mdə na ku kələmta sur hartə mnya ku tə tsa ndzi bwang, wala lamta ku ka zhar ta hartari, antə ma gyal wala kwara laga ku tərkwa, 34mthlakər ku ni ata ntəmta mwaɓi ni aka mthlakari, antə mshiyir mwaɓi ni ata ndzi aka mthlakər ku ni. 35Ma gyalər mdə laga ku mpa ka gyalər mdə damwa ka dəkəi ni har tə tsa mta, mji na mthlakər thlayeri ni ata ɗələmta na tsu ka mpikə ni ka da ndəkəi liyari kalkal, tsuwa da ata ndəkəi kumər gyal na mtəmtari ni. 36Amma ma gyal ni ku tsəli ka dlər mji, amma mthlakari aɗi mbwi ni wa, antə mthlakər gyal na tsu ka mpikə ni ata ntəmta thlar ntəwulərni ni ka gyal na ka mpika, antə arni tsa ata kətə mshiyari ni.”

Currently Selected:

Səɓəlari 21: KNB

Highlight

Copy

Compare